Hogusra 24 - Winnebego Bible Portions 1907

¹ Egi Abraham shagjina egi hambra rohana, egi Jehowa Abraham washophi howehina washana harnaj.

² Egi Abraham ware xete harnira eojhieja jegi wagena, jarnaga washara harnigi harnaj hirukana jegi, ningitarna nab hashinira regokanag harninegi hat’umbre,

³ Egi wihohi ningigikjanena Jehowa Mau wangregi herera egi Mau managre harnira hiu, Kana‐anitra horogregi hajhinagra hinug‐wahira hinig‐hara inkisha khanag‐giginianje.

⁴ Eshi ma‐harnieja howarare egi washa‐wahaija, egi hinig‐hara Isaak hisha khanag‐gigiaje.

⁵ Egi warajega wagena: Ningete hinugra inke ma‐egi hiroinaghu nainiege, jasge hinigraga shige ma‐horawarajieja harniahi‐kjeshe?

⁶ Egi Abraham wagena: Hirakara‐unge inke hinighara hakja eja hingarni hinianje.

⁷ Jehowa Mau wangregi herera, E jajiga hojhieja hinrus‐shana egi washa‐wahara ma‐harnineja egi E waigena, egi wiho hingigina wena: Su hashinira ma‐de‐e wak’unkjanena, E waxopiniwarajire harnira joweraija howaregigikjanena egi eja horus hinig‐hara hisha khanag‐gigiaje.

⁸ Egi hinugjega inke hironinag na’inigi hageja wihohi ningigi de‐e ningirushjare‐hikjanena, eshi hinig‐hara inke hakja harnihi‐nianje.

⁹ Egi warajega nab‐harnira hirukana harnira Abraham regokanag harnieja hat’umbshana egi washa she‐e hawau wihohina.

¹⁰ Egi warajega wanoijge‐huxashogra kerepanaisha russana hirukana harnira wanoijge‐huxashog warnira, egi rena, hirukana harnira washa jexi warnira roha harninena, egi nashianaga egi Mesopotamiara eja howarena Naxor jhinag harnieja.

¹¹ Egi wanoijge‐huxashog warnira ming‐wagigina jhinag jangeja ni‐wagueja hoxjarnanegi, hinugra ni‐agura higireregi.

¹² Egi wena: Jehowa Mau hirukana harnira Abraham harnira, ningitarna hamb de‐e hophiowewine, egi hirukana harnira Abraham phingigire.

¹³ Horuxujre ni‐wagu hijejregi nashi‐hajena, egi jhinagregi wankshig‐hinug wahirera ni‐hagu hajirekjena.

¹⁴ Egi shesge higigiaje, hinugnigra hisha wagekjanena ni‐hirusra kurushibre ningitarna tajgankjena egi wekjena rajgane egi wanoijge huxashog washinira hishge rajga wagigikjena, shesge higigiaje ware hashinira Isaak she‐e ragijana, egi eja howahi hiaperes‐hikjena Ne hirukana harnira phira gigira.

¹⁵ Egi herena, kheni hit’et’era rashjani, horuxujre Rebekah huhena, Bethuel hagarninera, Milkah hinigra Naxor hijawira, Abraham khinubra, ni‐rusra hinejeja hakereanaga.

¹⁶ Egi hinugnigra mashja phina hajara, hinugwajeg hisha, egi inke wangra hisha hiperesnina. Egi ni‐wagueja hina egi ni‐rusra hoixji hokshuanaga egi hegitina.

¹⁷ Egi warajega nuwankshana hinugra hakihi egi wena: Ningitarna ni‐hirus hashinieja nira watagnig rajgaingigire.

¹⁸ Egi hinugjega wena: Rajgane hirukana harnixji. Egi xapgehigi‐anaga egi ni‐hirusra kurushibshana hagirukos‐anaga egi rajgangigina.

¹⁹ Egi jaja hinugjega rajgangigira rushjangi wena: Wanoijge huxashog washinira hishge ni‐wagitusjanena, rajgara rushjaine hipa.

²⁰ Egi xapge ni‐hirusra kogeja homana‐hina egi niwagueja shige hornuwangshana ni‐rus egi wanoijge huxashog warnira harnaj ni‐wagirus‐shana.

²¹ Egi wangjega khore inke xabnijena, hiperes‐nai Jehowa jasge nigigikjanegi hoikiware harnira higisge‐arnaga nigeshge inke shesgarnikjanegi.

²² Egi herena wanoijge huxashogra rajgara rushjainegi, wangjega shurasi peja howehi gis hisha russana Shekelra hikirua kissag, egi aipara nupiwi shurasira Shekelra hikirua kerepanaisha.

²³ Egi wena: Peshe hinugra nineshe? Hungiragre ningitarna. Jasge hianjraga hojhieja hokarageakshe‐hoipushakjawira?

²⁴ Egi hinugjega wena: Bethuel hinugra newinena Milkah hinigra Naxor e hagarninera.

²⁵ Hinugjega hiraijera wagena: Waisgab‐hu egi warujra hina harniwina egi hoiwushara hokarage.

²⁶ Egi wangjega wakhuna egi Jehowa gikarajshana.

²⁷ Egi wena: Jehowa Maura hirukana harnira Abraham nirajankhirekjanena, E hinke hirukana harnira najojara egi wogisogra hagirushjanina, naguregi haumagra Jehowa hirukana harnira wakhinubra hojhireja hinihina.

²⁸ Egi hinugjega nuwangshana egi washan de‐e hiunira hojhieja herera wawogiragshana.

²⁹ Egi Rebekah hisha khinubshana Laban higairena. Egi Laban wangjega eja hornuwangshana ni‐wagueja.

³⁰ Egi herena, jaja peja howehi gisra hajagi egi aipara hinug‐jabra warnijegi, egi jaja hinugjabra Rebekah hoit’era naxgungi, wena, wangjera deshesge hingena, wangjega hirahina egi horuxujre wanoijge‐huxashog hikijainja nashinjena ni‐wagu hijejeja.

³¹ Egi wena: Hokaware, Jehowa najhojaine ranina, jagu‐u jangregi nanashira jeshe? Jhira hirushja harna egi wanoijge‐huxashogra hokarage wagigina.

³² Egi wangjega jhieja hokewena. Egi wanoijge‐huxashog warnira wagirushibshana egi waisgab‐hu egi waruj wanoijge‐huxashogra wogairena, egi ni si‐hirusha hokuinena, egi shige wang wakishu uangra si‐hirusha.

³³ Egi jowehieja waruj gishurena ruijera. Eshi wena: Inke hajnikjanena jagu hauanjira wakarakishana. Egi Laban wena: Are.

³⁴ Egi wena: Abraham ware harnira newinena.

³⁵ Egi Jehowa hirukana harnira washophi howehira rokana wagiuna, egi rokana jijena, egi jhasga hok’una egi je egi shurasga egi shurasi egi wang‐ware egi hinug‐ware, egi wanoijge‐huxashog egi shungxete‐najawaxetera.

³⁶ Egi hirukana harnira hijawira Sarah hojinjinig hisha hirukana harnira hagarnina shagkaja. Egi e jarnaga washara harnira harnaj hok’una.

³⁷ Egi hirukana harnira wihohi hingigina, wena: Hinighara inke Kana‐anitra, e ma harnineregi hajhinagre, hinug wahirera inkisha khanag‐giginianje.

³⁸ Eshi jajiga hojhieja howarare egi washa‐wahaija, egi eja hinig‐hara hisha khanag‐gigiaje.

³⁹ Egi hirukana harnira wagena: Ningete hinugra inke hiroinag‐niege.

⁴⁰ Egi waigena: Jehowa E jowehieja mani‐magra, waxopiniwarajire harnira hakishu re‐ningigikjanena, egi hoikiware hashinira hini‐gisgekjanena, egi hinig‐hara washa‐wahaija egi jajiga hojhieja hisha khanag‐ragigikjanena.

⁴¹ Egi hageja wihohi harni de‐e ningirushja‐rehikjanena, jaja washa‐wahaija rahigi egi inke hisha hornik’uiranigi, wihohi harnira ningirushja‐rehikjanena.

⁴² Egi hamb de‐e ni‐waguregi hajina, egi wahena: Jehowa Mau hirukana harnira Abraham harnira, hoikiware harnira hisgehinagigigi, wawatahare.

⁴³ Horuxujre ni‐wagu hijejeja nashianaga egi herekjena, jaja hinug‐wajegra ni‐hagu hira higi egi wagekje: Ningitarna nihirus hashinieja nira watagnig rajga hunk’une,

⁴⁴ Egi waigena, rajgane egi wanoijge‐huxashog washinira hishge ni‐wagitusjena, hinug she‐e e herena Jehowa hirukana harnira hinigra gigijara.

⁴⁵ Egi kheni hit’et’era tashjani najge harninegi, horuxujre Rebekah huhena ni‐hirusra hinejeja hakere, egi niwagueja hina, egi ni‐rus‐shana, egi wagena: Ningitarna rajga hingigire.

⁴⁶ Egi xapge higiarnaga, egi ni‐hirusra hinejeja‐jera rushibshana, egi wena: Rajgane, egi wanoijge‐huxashog washinira hishge rajga wagigikjanena. Egi tajgana egi wanoijge‐huxashogra hishge rajgairena.

⁴⁷ Egi hiagipaxshana egi wagena: Peshe hinugra nineshe? Egi wena: Bethuel hinugra, Naxor hinigra e Milkah hagarnira. Egi peja howehi gisra hija howeagigina egi aipara hija hiagiuna.

⁴⁸ Egi pakhuanaga egi Jehowa hagikarajshana egi Jehowa Mau hirukana harnira Abraham harnira tajankshana, E houna phihi hingigina hirukana harnira khinubra hinugra hinigra khanaikjera.

⁴⁹ Egi shegunegi hirukana harnira woragixete‐kjawigi egi washa wogisog hiragish’unkjawigi hungiragwire egi inke shesgarnigi hungiragwire, e hoishorora wagiwarnaga nigeshge hoirajgera wagiwekjegi.

⁵⁰ Egi Laban egi Bethuel hornihairena egi wairena: Washan de‐e Jehowa eja howajigaja, inke washa hirohire egi inke washa phi hinige tuxurugwinina.

⁵¹ Horuxujre Rebekah joweraregi‐nankaja, rusre, egi karare, egi hirukana hashinira hinigra khanag‐gigire, Jehowa era shesge.

⁵² Egi herena, jaja Abraham ware harnira hoit’e airare naxgungi, Jehowa jewehieja wakhuna (gikarajshana).

⁵³ Egi warajega shurasga woikikax egi shurasi woikikaxra egi wainira warnijina egi Rebekah wawok’una, egi khinubra egi hiunira hishge washa jexi wawogarna.

⁵⁴ Egi waruj‐hirena egi rajgainena, e‐hereanaga egi wang wakishu jira, egi haiserej hiwushairena, egi haininegi kikawa‐airanaga egi wena: Hirukana harnira eja howakere‐ingigire.

⁵⁵ Egi Rebekah khinubra egi hiunira wairena: Hinugnigra hamb‐jarnahangi hakarakishu un hingigiwire nigeshge hamb kerepanaisha, she‐e hageja rekjena.

⁵⁶ Egi wawagena, inke hiwusha‐wiwinine, Jehowa hoikiwarera hisge‐hingigige esge. Kere‐hingigire e hirukana harnieja wawakerekjena.

⁵⁷ Egi wairena: Hinugnigra hagigokjawina egi hingiwaixjawina.

⁵⁸ Egi Rebekah gigoirena egi wagairena: Jasge wang de‐e harakishu sherekjeshe? Egi wena: Tekjanena.

⁵⁹ Egi hinugjab‐hirera Rebekah regigirena egi hinug harniunihera hakishu, egi Abraham ware harnira egi wang warnira wakishu.

⁶⁰ Egi Rebekah washophi howe‐rogiguinena, egi wagairena: Ne hinugnik‐jabwina worohanje hogihixete hogihiwanganunig ranikjena egi su washinira wawosh’ighirera jhinag‐jhirob harninera wagarni wagigire.

⁶¹ Egi Rebekah nashina egi hinugware warnira, egi wanoijge‐huxashog haminag‐hirena egi wangra hironag, egi warajega Rebekah rusanaga egi kerena.

⁶² Egi Isaak huna ni‐wagu niambra wajara higairera eja huna, ma wiorojanje eja jhina.

⁶³ Egi Isaak maxeja gikaraj rena hoxjarnanegi egi woruxujgaja, egi hajarna, egi horuxujre wanoijge‐huxashogra haguhairena.

⁶⁴ Egi Rebekah woruxujshana egi jaja Isaak hajagi, wanoijge‐huxashogeja t’ampshana.

⁶⁵ Waranaka jornineja wagena: Wang de‐e peshe hereshe maxregi hikipa howahuhe maniangre, egi waranaka wagena: Hirukana harnira herena, esge hishja hirarukaisha rus‐anaga egi hakikurukana.

⁶⁶ Egi waranaka washa jagu ungi harnaj Isaak hogiragshana.

⁶⁷ Egi Isaak Rebekah harni‐hoikewena hiunira Sarah hojhieja, egi Rebekah rus‐shana egi e hijawi hijijena, egi wogixetena. Egi Isaak rukheg‐hirena hiunira d’era hawau.