Hogusra 21 - Winnebego Bible Portions 1907

¹ Egi Jehowa Sarah homakinijina arnihera shesge, egi Jehowa Sarah giuna jagu higarnihera.

² Sarah waujganagshana, egi Abraham shag‐jingaja hojinjinig hisha hagarnina, Maura homangiraj nihera eja.

³ Egi Abraham hinigra rash rajshana hagarninera, Sarah e hagarnina, Isaak higena.

⁴ Egi Abraham hinigra Isaak majhena hamb haruangahanegi, Maura ushira shesge.

⁵ Egi Abraham ma hogihishana hinigra Isaak hagarninega eja.

⁶ Egi Sarah wena: Maura hikshawingaja, jarnaga naxgungi waixjairekjane.

⁷ Egi shige wena: Peshe Abraham wage‐ruxurugnashe? Sarah ninkjang was‐hok’unag? Shagjingaja hojinjinig hisha hagarni.

⁸ Egi ninkjangra xetena, egi was‐ira rushjangigirena. Egi Abraham hamb‐eja woruj‐xeteisha una Isaak was‐ira rushjangigirega eja.

⁹ Egi Sarah hajarna Hagar Egipt wankshigra hinigra e Abraham hagarnira, iwigixjajena.

¹⁰ Esge Sarah Abraham wagena: Hinug warnihi de‐e egi hinigra hakarakishu wawahasre, hinug warnihi de‐e hinigra inke hoishjare harnira hinighara Isaak hakishu harninikjena.

¹¹ Egi washa de‐e Abraham jowehieja mashja najgetegjina hinigra hawau.

¹² Egi Maura Abraham wagena: Inke joweraregi najgetegnine, hojinjinigra hawau egi hinug warnihi hashinira hawau. Sarah jagu hinigeera harnaj harnaxgune, Isaak su hashinira harninekjanena.

¹³ Egi hinug warnihira hinigra hishge wankshig howajehisha haunkjanena, ne su hashinira herege esge.

¹⁴ Egi Abraham hainixjinig kikawa‐ana egi waisgabduj rusanaga egi pex hisha ni hoshurna, egi Hagar hok’una k’ingigina egi ninkjangnigra, egi nige‐howare‐gigina egi hinugjega nigeowarena egi Be‐er‐sheba ma hojainainja howe horajena.

¹⁵ Egi nira pexeja hoshujera shenana, egi ninkjangnigra xatab khuhainja eja t’umbshana.

¹⁶ Egi rarnaga egi hirarujeja hahi minagshana hirarexji, ma‐hoguj hisha, wena: Inke ninkjangnigra d’e haja duxurugnina. Egi hirarujeja hahi minaganaga egi xagjirena.

¹⁷ Egi Maura hojinjinigra hora naxguna, egi Maura waxopiniwarajire harnira wangregi howaji Hagar gigorna egi wagena: Hagar jagu ni‐ushe? Inke naxiranine, Maura hojinjinigra hora naxguna hajinjagra eja.

¹⁸ Nashianaga egi hojinjinigra nashingigige egi airutire, wankshig howajehi xeteisha haunkjanena.

¹⁹ Egi Maura hishjasura wagiruhas‐shana egi mai‐isha hajarna egi ranaga egi pexra nira hoixji hoshurna egi hojinjinigra rajga‐gigina.

²⁰ Egi Maura hojinjinigra hakishu unjena egi xetena, egi ma‐hojainainja jhina egi mawiguj waruphi‐jijena.

²¹ Egi Paran ma‐hojainainja jhina. Egi hiunira Egipt mainja hinugisha rusanaga khanaggigina.

²² Egi wauinena shejananegi, Abimelex egi Phixol manape hung xetera manape warnira Abraham hokit’airena, wairena: Maura harnikishu unjegaja higu jagu sh’unga.

²³ Esge shegunegi wiho hingigire Maura hiu, e inke washa hirohire hinagish’unikjena, egi shige inke hinighara, egi shige inke hinighara hinigra, eshi hophira jasge ningigira nishge shesge hingigire egi shige ma worakuruxe rajane.

²⁴ Egi Abraham wena: Wihohakjena.

²⁵ Egi Abraham Abimelex najisgina, niwaguisha heregi hawau, e Abimelex ware warnira nasheregi.

²⁶ Egi Abimelex wena: Inke hiaperesnina hisha washa de‐e ungi, inke shige hunagi‐sharagnina, inkaga shige naxgunina, hamb de‐e gajanga naxguna.

²⁷ Egi Abraham jhasga rusanaga egi je‐waruti, egi Abimelex wawok’una, egi hinuinke rohira horeishankira khinena.

²⁸ Egi Abraham jhasga‐ning hinugra shagowi horniheja rusanaga injab‐wakerena.

²⁹ Egi Abimelex Abraham wagena: jagu‐u wash’ushe jhasga‐ning hinugra shagowi injab‐warakerera.

³⁰ Egi wena: De‐shesge hawau jhasga‐ning hinugra shagowi hajane nab‐harninegi washurus‐janena, e wihohi warnira hererena niwagu de‐e hak’ekjege.

³¹ Egi ma‐de‐e Be‐er‐sheba higena, hinuinke eja wihohirege esge.

³² De‐shesge rohira horeishankira khina hirena Be‐er‐sheba eja. Egi Abimelex nashina egi Phixol manape hungra warnira, egi Philistra mainja hakja howakarairena.

³³ Egi Abraham Be‐er‐sheba eja na hoshuna egi Jehowa rash harnira wihokhuna Mau manegusra.

³⁴ Egi Abraham Philistra mainja hamb roha wakuruxena.