Hogusra 17 - Winnebego Bible Portions 1907

¹ Egi jaja Abram ma kerepana‐hishankijushguni‐anaga egi hishankijushguni‐hashanahangi, Jehowa Abram jantingikhina egi wagena: Ne Mau inke washa rushagnira winena, Hishja joweharegi manige egi inke washara hisha hirohiranine.

² Egi rohira hikisge wakhi harnira hojakena hihiregi haunkjanena egi woroha rokana ninkjanena.

³ Egi Abram hishjara mainja herehi himpshana, egi Maura hokit’ena wena:

⁴ Horuxujre de‐eshi niarnira, rohira hikisge wakhi harnira harakishu shunajena, egi wankshig howajehira rohaxji hianj‐hire niunkjanena.

⁵ Egi rash hashinira inke shige Abram hinigai‐ranikjanena eshi Abraham hinigairekjanena, wankshig howajehira rohaxji hianjni niunge esge.

⁶ Egi wojara rokanaxji niunkjanena, egi wankshig howajehi niunkjanena, egi hungra eegi horniwahi hihinab‐hirekjanena.

⁷ Egi rohira hikisge wakhi harnira hojakena hihiregi hakara‐kerekjanena, egi su washinira hag howarehire hokijhu harnineja, manegus rohira hikisge wakhi hisha herena. Mau hashinikjanena egi su washinira hag howarehire.

⁸ Egi hornik’unkjanena egi su washinira hag howarehire ma wakuruxe hosh’urajane Kana‐an mara harnaj manegus harninekjanena, egi Mau ne‐hininekjanena.

⁹ Egi Maura Abraham wagena: Esge rohira hikisge wakhi harnira harnijanje ne‐nineanaga egi su washinira hag howarehira wankshig‐hoi harnineja.

¹⁰ De‐e rohira hikisge wakhi harnira herena e hashinikjawina hojakena hihiregi egi su washinira hag howarehire. Wangra horograregi herera harnaj wamajhairekjena.

¹¹ Egi rei‐xu washiniwira wamanajhekjawina egi rohira hikisge wakhira e woijantira herekjanena hojakena hihiregi.

¹² Egi ninkjangnigra hamb haruanga‐hangi wamajhairekjena horog‐rawiejananka hokijhu hashinieja wangnanka harnaj hisha jhieja wankshig‐ingi, shige hijahi herera hisha shura hiruwinegi e inke su hashiuira herenishge.

¹³ Hisha jhi hashinieja wankshig‐ingi egi hisha shura hashinira hiruwinegi wamajhairegi phinana. Egi rohira hikisge wakhi harnira ro hashinieja nihekjanena, manegus rohira hikisge wakhisha herena.

¹⁴ Egi ninkjangnig wang inke majhairanira e rei‐xu harnira inke majhairanigi naxirag she‐e wankshig warnieja mawaxhirekjanena, e rohira hikisge wakhi harnira hingishanage.

¹⁵ Egi Maura Abraham wagena: Hijawinaga Sarai inke hinupahana Sarai higarnianje, eshi Sarah rashra higairekjanena.

¹⁶ Washophi howe‐hakjanege egi hishge hojinjinigra hisha hornik’unkjanena Sarah‐eja howaji. Hisgexji washophi howe‐hakjanena egi wankshig howajehira hiunihirekjanena, egi wankshigra hung warninera eja howajirekjanena.

¹⁷ Egi Abraham hishjara mainja herehi jimpshana, egi hiksharna, egi najge earnieja wakigena: Ninkjangnigra hisha hagarni‐hiranashe ma hogihishangi egi Sarah ma kerepana‐hishankijushguni‐hangaja ninkjang harnikjaneshe?

¹⁸ Egi Abraham Maura wagena: Ishmael e joweraregi wankshig‐insheshi.

¹⁹ Egi Maura wena: Hijawinaga Sarah hisgexji hojinjinig hisha harnigarnikjanena egi rash sharagi Isaak hiragekjena egi rohira hikisge wakhi harnira hakishuunje hakjanena, manegus rohira hikisge wakhi hisha herena egi e su warnira hag howarehiga.

²⁰ Egi shige Ishmael hishge nanaxgura, horuxujre washophi najhiroajane, egi woja hakjanena egi worohaxji rokana hakjanena, hungra kerepanaishanaga‐nuphashana hagarninekjanena egi wankshig howajehi rokan haunakjanena.

²¹ Eshi rohira hikisge wakhi harnira Isaak hakishu unjehakjanena e Sarah harnigarnikjanera deshejanagi ma joweregi.

²² Egi hokit’era rashjana egi Maura wangrowakerena Abraham eja unjera.

²³ Egi Abraham hinigra Ishmael kurussana egi jarnaga jhi eojhieja wankshig‐ingi egi jarnaga shura earnigi wawiruwingi Abraham hojhira wankshig warnira horog hireja wangra harnaj rei‐xu warninera wamangijhairena higu hamb eegi, Maura shesge higege.

²⁴ Egi Abraham ma kerepana‐hishankijushguni‐anaga egi hishankijushguni‐hashanana, rei‐xu earnira makarajhajega eegi.

²⁵ Egi hinigra Ishmael ma kerepanaishanaga‐danihashanana rei‐xura mangijhairega eegi.

²⁶ Egi higu hambeja Abraham egi hinigra Ishmael wamajhairena.

²⁷ Egi eojhieja wangnanka harnaj, jhieja wankshiginegi egi hijahi here shura wawiruwinegi wakishu majhairena.