Hogusra 16 - Winnebego Bible Portions 1907

¹ Egi Abram hijawira Sarai inke ninkjang hagarninina, egi hinug wareisha harnina Egipt wankshigisha, e Hagar higairena.

² Egi Sarai Abram wagena: Horuxujre Jehowa hornaingissege ninkjang harnira, ningitarna hinug‐ware harnieja hokaware, ningete ninkjang harniege newarnikjena. Egi Abram Sarai hoit’era harnagixguna.

³ Egi Abram hijawira Sarai hinug‐ware Egipt‐wankshig Hagar rus‐anaga egi Abram hok’una hikhanara hijawi hikjege, Abram Kana‐an mainja ma kerepana‐haisha jhiarnaga hageja.

⁴ Egi Abram Hagar‐eja hokewena egi waujganakshana. Egi jaja Hagar waujganagra hakijagi hirukana harnira inke washa hiranak‐inina hajaija.

⁵ Egi Sarai Abram wagena: Hawe hirawera ne harni‐shuna, hinug‐ware harnira mang hashinieja harniningigina egi jaja waujganagra hakijara inke washa hirainainina hajaija. Jehowa hajanga hiwaungi wangiragihikjanena.

⁶ Eshi Abram Sarai wagena: Horuxujre hinug‐ware hashinira nab‐hashinieja jena, jasge raiphingi giune. Egi jaja Sarai Hagar hawehigi jowehieja gias‐shana.

⁷ Egi Jehowa waxopiniwarajire harnira Hagar hierena niwagu hisha eja ma‐hojainainja, ni‐wagujega nagu Shur hirakereja.

⁸ Egi Hagar wagena: Hinug‐ware Sarai harnira, hajinja horawarajishe, egi hajinja horawa‐sh’ushe? Egi wena: Hirukana harnira Sarai hagigias‐shana.

⁹ Egi Jehowa waxopiniwarajire harnira Hagar wagena: Hirukana hashinieja hakja howakarare, egi nab‐earnieja hokikurushja rehiaje.

¹⁰ Egi Jehowa waxopiniwarajire harnira wagena; Su hashinira woroha rokana hakjanena, worohaxjingi inke gikarab phinikjanena.

¹¹ Egi Jehowa waxopiniwarajire harnira wagena: Horuxujre waurajganag‐kshanakshana, egi hojinjinig hisha hashinikjanena, egi rashra Ishmael higairekjanena, Jehowa harawera nanixgunge.

¹² Egi wang jashishig hisha herekjanena. Nab earnira higu peshe heregi hakirakjanena, egi wankshigra nab warninera hakirairekjanena, egi wakhinubra harnaj jowehireja jhikjanena.

¹³ Egi Hagar Jehowa rashra rajshana E hokit’era Mau wajaranina esge wena: Nishge eegi haunagre hajaphianiguni wajanagra.

¹⁴ Esge ni‐wagujega ni‐wagu niambjera E wajajera higena. Horuxujre Kades egi Bared hojakenainja herena.

¹⁵ Egi Hagar Abram hojinjinig hisha hagarnina. Egi Abram hinigra rashra Ishmael higena, Hagar hagarnina.

¹⁶ Egi Abram ma kerepana‐haruang‐anaga egi hakewehashanahana, jaja Hagar Abram Ishmael haganira.