Nyɛ̀nɛ̀ŋ 9 - WƆŊ FƐ̀Ì EBÒ SÌÀŊ DAYÀA

E kìlà kìì Sɔɔ̀ɛ

¹ Kɛɛ nààŋ wo Sɔɔ̀ naŋ wa nɔŋ ɗewè e gààŋ wuŋ biɛ̀ sùà wèè wo jìwà anyùùŋ màŋjɛ̀wɛ̀ Kanaà Jisɛ̀ nyaŋ, wò naŋ kɔ̀ koɓɛ̀ wo Kànà Sìèfèìŋ Zòòlo Gbeeɔ̀,

² yèè wò nauŋ dawè wèè wo sìngà maŋ fɛi koɓɛ̀ aŋ sìèfèìŋ ke sààŋ zòòlò aŋ Juùù nyaŋ ko Dàmakɔ̀ wèè kɛ̀ sèè wò mɛɛ̀ŋ wo nyùùŋ gbiŋ, jɔùŋ yèè felaa wo yèɔ nɔ̀ŋ wo bàuŋbà e nyaàiŋ dè ke Dòmàŋ Kanaà Jisɛ̀ɛ diɛŋ wɔ, kɛ̀ wo dèkàuŋ wo kɛlɛ̀ɛ̀uŋ ko Jùlusɛ̀làm.

³ Nààŋ wo Sɔɔ̀ yaà wa naàŋ hinie wò naŋ gbɛ̀ɛ̀ ko Dàmakɔ̀, e gbolòùŋ mɛ̀ɛŋ gbee nauŋ dè e yìwìà ko àìjɛnɛ̀ŋ euŋ gbàì kɔɔ gbòlòùŋ.

⁴ Wò naŋ sɔ̀ɔ̀ ko dììnaŋ yèè wò naŋ kòmò ke mìè nyùùŋ kè nauŋ woò wààŋ, “Sɔɔ̀, Sɔɔ̀, wèè kiìŋ mùŋ yààìm nìmila sùà?”

⁵ Wo Sɔɔ̀ naŋ dawè wààŋ, “Ɓòò nàŋ yààùm, Kanaà?” Yèè ke mìèɛ naŋ woò wààŋ, “Miàŋ nàŋ yaà wo Jisɛ̀, wo yèɔ mùŋ yaà nìmila sùà wɔ.”

⁶ Wo Jisɛ̀ nauŋ woò wààŋ, “Yewà dìì yèè muŋ ka ko jawa gbeeì, wo nyùùŋ bà doum nàŋ woò kɛ̀ kiìŋ mùŋ do nàŋ nyɛ̀nɛ̀ŋ.”

⁷ Anyùùŋ nyaŋ yaà wa kààìŋ wo Sɔɔ̀ maŋjɛ̀wɛ nyàŋ naŋ wa sie, kɛɛ maŋ nyaàŋ nyiŋ màŋ naŋ wa suo kpaŋ, àŋ naŋ wa kòmò ke mìè nyùùŋ, kɛɛ aŋ gò wa yɛ̀mɛ̀ wò nyùùŋ gbiŋ.

⁸ Wo Sɔɔ̀ naŋ yèwè dìì, yèè wò naŋ gbàì le fɛ̀ɛ̀, kɛɛ wo gò wa ɓɛ̀nɛ̀ŋ è nɛ̀ŋ gbiŋ yɛ̀mɛ. Weètii anyùùŋ nyaŋ yàaùŋ wa màŋjɛ̀wɛ̀ nyàŋ nauŋ kùwò kùàŋ yèè àŋ nauŋ kɔ̀ɔ̀ ko Dàmakɔ̀.

⁹ Wò naŋ wa nɔ̀ŋ e fɛɛ̀ zììleuŋ bi sùà wèè maŋ ɗɔ̀ɔ̀ taai. Maŋ ɗɔ̀ɔ̀ taai bi sùà wo gò wa jènɛ̀ŋ ɔ̀ɔ̀ wo tìà è nɛ̀ŋ gbiŋ.

¹⁰ Wo nyùùŋ màŋjɛ̀wɛ̀ Kanaà Jisɛ̀ɔ bà guùŋ yaà wa ko Dàmakɔ̀ àŋ nyaaŋ wo Ananaayà. Wo Kanaà nauŋ wa woò e gɔagòo sùà wààŋ, “Ananaayà!” Yèè wò naŋ fasàì wààŋ, “Miàŋ wɛɛ̀, Kanaà.”

¹¹ Wo Kanaà nauŋ woò wààŋ, “Yewà dìì muŋ ka ko gbòò Juɗài ke dòmaŋ nyìlɛɛ̀ŋ diɛŋ, muŋ dawè wèè wo kenàŋ bà àŋ nyaaŋ wo Sɔɔ̀ e yìwìà ko Tasɔ̀. Mùŋ douŋ nàŋ mɛɛ̀ŋ wò yaà zoolo,

¹² yèè e gɔagòo sùà wò naŋ yɛ̀mɛ̀ wo kenàŋ bà àŋ nyaaŋ Ananaayà wò naŋ hnè yèè wò nauŋ gbùwò maŋ kuàum màŋ diɛŋ wèè kɛ̀ wo Sɔɔ̀ yɛmɛ̀ ɓɛìŋ dìì.”

¹³ Wo Ananaayà naŋ fasàì wààŋ, “Kanaà, anyuùŋ zimgbe àim wòò e kèè wo felaa wɛɛ̀, e nyaàiŋ dè maŋ keì naanààŋ maŋ kinɛiŋ wò naŋ nyìnìè anyùùŋ nɛɛmauŋ nyàŋ ko Jùlusɛ̀làm lɛ.

¹⁴ Wò naàŋ hnàŋ ko Dàmakɔ̀ e yìwìà e gààŋ aŋ kànà sìèfèìŋ zòòlo nyàŋ wèè wo nyààŋ e kìlà wo kùwà wo nyùùŋ gbiŋ wo yèɔ do nàŋ zoolò e deè mɔ̀ɛ̀ diɛŋ wɔ̀.”

¹⁵ Kɛɛ wo Kanaà naŋ wòò wo Ananaayà wààŋ, “Kɔ̀ào, esaɓù kɛ̀ kàuŋ tàeɗùù wèè wo koà ke mìè gbìàŋ Ebò Siaŋ mɛ̀ koɓɛ̀ anyùùŋ nyaŋ fè àŋ Juùù nyaŋ yaà aŋ kànà fuɔŋ nyàŋ e kpùlìà aŋ Juùù nyaŋ nyiŋ bi, aŋ jɔ̀à kòmàŋ Ezɔ̀ɛ̀ nyaŋ.

¹⁶ Kɛɛ miàŋ bi douŋ nàŋ tɔ̀ɔ kɛ̀ kiìŋ è keì nyìnga wò do nàŋ kɔ̀ɛ̀ sùà wèè esàɓù e deè mɛ̀.”

¹⁷ Wo Ananaayà naŋ kɔ̀ yèè wò naŋ jɔ̀ ko saaìŋ wo Sɔɔ̀ yaà wa lɛ̀, yèè wò nauŋ gbùwò maŋ kuàuŋ màŋ diɛŋ wò nauŋ woò wààŋ, “Wùìya miɔ̀ŋ Sɔɔ̀, wo Kanaà Jisɛ̀ naim tùɔ̀ŋ ko nɛ̀ɛ̀ŋ muìŋ, wo nyùùŋ gunɔ̀ɔŋ naum fòlò feìŋ ko dòmaìŋ nààŋ mùŋ yaà weè kià hinie lɛ̀. Wò naim tùɔ̀ŋ wèè maŋ ɓɛìŋ yɛ̀mɛ̀ dìì yèè wèè wo Jìnàŋ Nɛɛmaàŋ woum sɛ̀ɛ̀ ko sùà.”

¹⁸ Ko fɛɛ̀feìŋ e nɛ̀ŋ bà naŋ tèènè maŋ dòò kɛì naŋ fòlò wo Sɔɔ̀ ko fɛ̀ɛ̀, yèè wò naŋ ɓɛìŋ yɛ̀mɛ̀ dìì. Wò naŋ yèwè dìì wo sie yèè wo Ananaayà nauŋ gùò.

¹⁹ Eɓìèmàŋjɛ̀wɛ̀ tii wo Sɔɔ̀ naŋ jènɛ̀ŋ yèè e gààŋ nauŋ ɓɛìŋ sɛ̀ɛ̀ sùà. Wo Sɔɔ̀ naŋ wa nɔ̀ŋ anyuùŋ hààwe nyàŋ maŋjɛ̀wɛ wèè e teenga bà ko Dàmakɔ̀.

Wo Sɔɔ̀ naŋ wòò Ebò Siaàŋ nyaàiŋ dè wo Jisɛ̀ ko Dàmakɔ̀

²⁰ E bìyao sùà wò naŋ wa kɔ̀ ko sààŋ zòòlò aŋ Juùù nyaŋ yèè wò naŋ tɔ̀ɔ̀tù anyùùŋ nyaŋ wòo wààŋ wo Jisɛ̀ nàŋ yaà wo Jɔ̀àfèlàà Dayàa.

²¹ È naŋ wa fòònò anyùùŋ nyaŋ gbiŋ nauŋ wa kumiè nyaŋ yèè àŋ naŋ dawè nyààŋ, “Wɛɛ̀ nààŋ fè wò felaaà yaà wa nìmìla sùà ànyùùŋ nyaŋ yaà wa zòòlò sùà è dèè Jisɛ̀ɛ diɛŋ kò Jùlusɛ̀làm wɔ? Yèè e kèì guùŋ bi nààŋ wo gò hnàŋ nyinie, wèè wo nyiŋ kùwà yèè wo nyiŋ kòà koɓɛ̀ wo kànà sìèfèìŋ zòòlo gbeeɔ̀?”

²² Wo Sɔɔ̀ naŋ wa gbùùyè e gaàŋ gbee sùà ko Dàmakɔ̀, nààŋ wò naŋ wa tɔɔ̀ janyai kɛ̀ wo Jisɛ̀ nàŋ yaà wo yèɔ wo Dayà naŋ tàeɗùù wèè wo jòèyè anyùùŋ nyaŋ gbiŋ e ɗùùnyaàŋ wɔ, yèè aŋ Juùù nyaŋ ko Dàmakɔ̀ gò niŋ wa ɓɛ̀nɛ̀ŋ gììyà màŋhɛɛ.

²³ Maŋ ɗɔɔ zimgbe naŋ mààŋ, yèè aŋ Juùù nyaŋ naŋ ɗewè wèè aŋ jìwà wo Sɔɔ̀,

²⁴ kɛɛ eɓìèmàŋjɛ̀wɛ̀ tii, wo Sɔɔ̀ naŋ wa nyìmè e ɗèwe nyiŋ nɛ̀. Àŋ naŋ wa jàà fɛ̀ɛ̀ dìì maŋ gɔɛ yèè e dùùm maŋ gbàngì jawa gbee màŋ feìŋ wèè auŋ jìwà.

²⁵ Kɛɛ wɔŋ dùùm guùŋ anyùùŋ màŋjɛ̀wɛ̀uŋ nyàŋ bà nauŋ jàà wɔŋ pòum gbee sìà e jèì sùà, yèè àŋ nauŋ kɔ̀ɔ̀yɛ̀ e jèwì wɔŋ gɔ̀ɔ̀ŋ jawaà sùà auŋ deeyè.

Wo Sɔɔ̀ hàì ko Jùlusɛ̀làm

²⁶ Yèè nààŋ wo Sɔɔ̀ naŋ wa hàì ko Jùlusɛ̀làm, wò naŋ wa kàmè ɗewe wèè wo sɛ̀ɛ̀ ke gbòò anyùùŋ màŋjɛ̀wɛ̀ Jisɛ̀ nyaŋ sùà. Kɛɛ e jùùɛ yaà wa aŋ gbiŋ e weèuŋ, esaɓù kɛ̀ aŋ gò wa haawè kɛ̀ wò yaà wa wò nyùùŋ màŋjɛ̀wɛ̀ɔ bà guùŋ.

²⁷ Kɛɛ wo Bànaŋɓà nauŋ wa ɓemè, yèè wò nauŋ hìɛ̀ŋ koɓɛ̀ aŋ keela tàeɗùù nyaŋ. Wò naŋ nyiŋ kìɛ̀ŋ ke jii gbài e nyaàiŋ dè e ɗeweɛ̀ wo Sɔɔ̀, ke dòmàŋ kààìuŋ nɛɛ̀ŋ diɛŋ wò naŋ yɛ̀mɛ̀ wo Kanaà Jisɛ̀, yèè wo Kanaà nauŋ gbòò kɔɔ. Yèè wo Bànaŋɓà naŋ nyiŋ ɓɛìŋ woò kɛ̀ e teengaà wo Sɔɔ̀ yaà ko Dàmakɔ̀ lɛ, wò naŋ gbòò janyai e dèè Jisɛ̀ɛ diɛŋ.

²⁸ Yèè wo Sɔɔ̀ naŋ wa naàŋ nɔ̀ŋ aŋ keela tàeɗùù nyaŋ maŋjɛ̀wɛ aŋ kìlìà ko Jùlusɛ̀làm gbiŋ, wò yaà gbùùyè e dèè wo Kanaà sùà.

²⁹ Wo Sɔɔ̀ hewa gbòà janyai e dèè Kanaà sùà. Wuŋ yèè aŋ Juùù gbòà Guliì mie nyàŋ hewa kpaane kpàànè, yèè àŋ naŋ kàmè ɗewe wèè auŋ jìwà.

³⁰ Yèè nààŋ anyuùŋ hààwe nyàŋ naŋ tɛɛ̀ kòmò, aŋ naŋ kɔ̀ɔ̀ wo Sɔɔ̀ ko Sesèlià, yèè àŋ nauŋ tùɔ̀ŋ ko Tasɔ̀.

³¹ Anyùùŋ hààwe nyàŋ gbiŋ ko Jùdià, ko Galaliì, yèè ko Sàmilià naŋ wa ngàà nɔ̀ŋ ke jii fàa sùà yèè àŋ naŋ kpèènè e zòòlo nyiŋ nɛ̀ maŋjɛ̀wɛ e dèè Kanaà sùà. Wo Jìnàŋ Nɛɛmaàŋ naŋ wa kìɛ̀ŋ jii nyingè yèè wò naŋ kpùùmò ke gbòò anyuùŋ hààwe nyàŋ ke dɛ̀ɛ̀ò sùà yèè wò naŋ nyiŋ kìɛ̀ŋ e gààŋ wèè aŋ kɛɛnɛ̀ŋ ɓɛ̀ɛ̀jàa wo Kanaà sùà.

Wo Pììlɛ kà ko Leɗià yèè ko Jɔpà

³² Kpeiŋ nààŋ wo Pììlɛ yaà wa kɔ̀ɔ̀yɛ̀ maŋ tàta màŋ sùà, wò naŋ wa jààmè anyùùŋ nɛɛmaŋ nyàŋ hewa jòò ko jawaì àŋ nyaaŋ ko Leɗià.

³³ Kuii wo Pììlɛ naŋ wa mɛ̀ɛ̀ŋ wo felaa kpɔ̀ɔ̀kpɔɔ bà àŋ nyaaŋ wo Enià. Wo felaa wɛɛ̀ wa naàŋ sààŋ wèè maŋ dòà nɔɔnɔŋ le taai wɔŋ gbùmauŋ nɔɔ̀ŋ sùà.

³⁴ Wo Pììlɛ nauŋ woò wààŋ, “Enià, wo Jisɛ̀ Kulaì wòum sùngà; yewà dìì yèè muŋ banè ko gbùmaŋ muìŋ.” Ko fɛɛ̀feìŋ wo Enià naŋ yèwè dìì.

³⁵ Anyùùŋ nyaŋ zimgbe nyiŋ hewa jòò ko Leɗià yèè ko Sàlɔɔ̀ŋ nyaŋ naŋ yɛ̀mɛ̀ wo Enià, yèè àŋ naŋ wa kìlè koɓɛ̀ wo Kanaà Jisɛ̀.

³⁶ Wo nìe kɛ̀ɛ̀nɛ̀ŋ hààwe bà yaò wa àŋ nyaaŋ wo Tàbità. E Guliì deeuŋ nɛ̀ nàŋ yaà wa wo Dɔkà. Wò hewa jòò ko jawa bà àŋ nyaaŋ ko Jɔpà. Wo nìe wɛɛ̀ hewa nyìnìàŋ anyùùŋ e keì sìàŋ e tèèngà nyiiŋ geuŋ nɔɔ̀ŋ gbiŋ sùà yèè wò kpuumàŋ wa anyuùŋ pɔ̀ɔ nyàŋ zimgbe.

³⁷ Kɛɛ wò naŋ wa sààŋ yèè wo naŋ fɔ̀. Àŋ naŋ wa gùò e fàuŋ nɛ̀ yèè àŋ naŋ niŋ hèè ko sààŋ fùùiŋ.

³⁸ Ko Jɔpà gò wa diidìì e yìwìà kò Leɗià. Yèè nààŋ anyuùŋ hààwe nyàŋ ko Jɔpà naŋ wa kòmò kɛ̀ wo Pììlɛ yaà wa ko Leɗià, àŋ naŋ wa tùɔ̀ŋ aŋ fèlàà tìyèe ko nɛ̀ɛ̀uŋ niìŋ wèè auŋ pɔwɔ̀ nyààŋ, “Kɔ̀nɛɛ̀ŋ, hnaàŋ ko nɛ̀ɛ̀ŋ wiì fiò.”

³⁹ Ko fɛɛ̀feìŋ, wo Pììlɛ naŋ yèwè dìì yèè àŋ naŋ kɔ̀. Aŋ felaa nyàŋ naŋ kɔ̀ɔ̀ wo Pììlɛ ko sààŋ fùùiŋ yèè wò nao haì. Aŋ jɔ̀ùnèèdàà zimgbe yaào wa ko gulie. Àŋ nauŋ tɔ̀ɔ̀ maŋ kotì maŋ yaà maŋ dèè kɔɔ gbànaŋ màŋ wo Dɔkà naŋ wa banè maŋ e teengaà wò yaà wɔŋ nyiiŋ gèeɔ̀ sùà lɛ.

⁴⁰ Wo Pììlɛ naŋ tùɔ̀ŋ anyùùŋ nyaŋ gbiŋ ko jɔɔlèi, wò naŋ dè maŋ gɛ̀ɛ̀ŋ nùuŋ màŋ dìì yèè wò naŋ zoolò. Yèè wò naŋ kìlè koɓɛ̀ e fàaà wò naŋ woò wààŋ, “Tàbità, yewà dìì!” Wo nìeɔ̀ naŋ gbàì le fɛɛ̀uŋ nɛ̀, yèè nààŋ wò naŋ yɛ̀mɛ̀ wo Pììlɛ, wo naŋ yèwè dìì wo jɛi.

⁴¹ Wo Pììlɛ nauŋ kùwò kùàŋ wouŋ kpuumàŋ wo yèwà dìì wo sie. Wò naŋ nyààŋ aŋ jɔ̀ùnèèdàà nyaŋ yèè anyuùŋ hààwe gbànaŋ nyàŋ ko saaìŋ yèè wò naŋ nyiŋ kìɛ̀ŋ wo Dɔkà wɔŋ nyiiŋ gèe sùà.

⁴² Ebò keì lɛɛ̀ naŋ ɓààyè maŋ tàta màŋ gbiŋ sùà ko Jɔpà, yèè è naŋ wa nyɛ̀nɛ̀ŋ anyuùŋ zimgbe naŋ kɛ̀ɛ̀nɛ̀ŋ hààwe wo Kanaà Jisɛ̀ sùà.

⁴³ Wo Pììlɛ naŋ wa nɔ̀ŋ ko Jɔpà ko gbòò wo kenàŋ bà àŋ nyaaŋ wo Saimɔ̀ŋ, wo yèɔ hewa tòòmò maŋ fɛ̀ì yilì wèè manɛ̀ŋ zimgbe bàne.