Nyɛ̀nɛ̀ŋ 7 - WƆŊ FƐ̀Ì EBÒ SÌÀŊ DAYÀA

Wo Siiwììŋ fàsàì anyùùŋ gbèègbèè aŋ Juùù nyaŋ

¹ Wo Kànà Sìèfèìŋ Zòòlo Gbeeɔ̀ naŋ dàwè wo Siiwììŋ wààŋ, “Maŋ keì mɛɛ̀ŋ yaà tɔɔɓaà?”

² Wo Siiwììŋ naŋ nyiŋ fasaì wààŋ, “Kùmiàŋ nìim, nyɛ̀iŋ nààŋ wùìyaim yèè nyuùŋ kòmaim nyàŋ! Wèè paŋ wo dèda wiɔ̀ Eɓulɔhɛɛ̀ŋ wo ka wa wo joo ko jawaì àŋ nyaaŋ Hàlaàŋ lɛ, wo Dàyà gbolòùŋ gbeeɔ̀ nauŋ wa fòlò feìŋ ko jawa gbeeì àŋ nyaaŋ Mɛsèpòtamiɔ̀,

³ yèè wò nauŋ woò wààŋ, ‘Joà ke kpoo mɔɛ̀ŋ yèè wɔŋ fuɔŋ mɔɔ̀ŋ e kìlà muŋ ka koɓɛ̀ e dììɛ mìŋ doum nàŋ tɔɔ̀ lɛ.’

⁴ Kpeiŋ Eɓulɔhɛɛ̀ŋ naŋ jòò e dìì anyùùŋ fùɔ̀ŋ Chaà nyaŋ yèè wò naŋ kɔ̀ wèè wo jɛ̀ì ko Hàlaàŋ. E teengaà wo kɛ̀ɛ̀ Eɓulɔhɛɛ̀ɔŋ naŋ wa fɔ̀ lɛ, wo Dayà nauŋ nyɛ̀nɛ̀ŋ wo hnàŋ koɓɛ̀ e dìì lɛɛ̀ nìŋ jaa yaà nàaŋ diɛŋ lɛ̀.

⁵ Wo Dayà gò wa kìɛ̀ŋ wò Eɓulɔɛɛ̀ŋ è nɛ̀ŋ èdàà gbiŋ wèè e nɔ̀ŋ è jeuŋ, e pɛɛ nɔ̀ŋ ko dèè gòlò e dììɛ diɛŋ, kɛɛ wo Dayà naŋ wa jɔ̀ɔ̀ e ɗààhiì kɛ̀ wò douŋ niŋ nàŋ kiɛ̀ŋ, wuŋ yèè aŋ jɔ̀ɛ̀ɛ̀jɔ̀ɛɛuŋ nyàŋ wèè aŋ nɔ̀ŋ aŋ kɛ̀ɛ̀nɛŋ niŋ, jòòpɛɛ e teenga lii wo Eɓulɔhɛɛ̀ŋ kuwà wa àŋ jɔ̀à.

⁶ Wo Dayà naŋ wa gbòò koɓɛ̀ Eɓulɔhɛɛ̀iŋ wààŋ, ‘Aŋ jɔ̀ɛ̀ɛ̀jɔ̀ɛɛum nyàŋ do nàŋ nɔ̀ŋ aŋ nyùùnèènyɛiŋ yèè aŋ jɛ̀ì wɔŋ fuɔŋ joo sùà, ko yèi àŋ do nàŋ nɔ̀ŋ aŋ ɗo yèè anyùùŋ aŋ nyiŋ tuwò naanààŋ wèè maŋ doa hɔ̀nɔ̀ɔ̀ tiinàŋ (400.)

⁷ Kɛɛ wo Dayà naŋ woò wààŋ, mìŋ do nàŋ kìɛ̀ŋ e keì nyìnga koɓɛ̀ anyùùŋ nyaŋ naŋ nyiŋ nyɛ̀nɛ̀ŋ àŋ naŋ tomo mààŋ aŋ ɗo nyàŋ, e kìlà eɓìèmàŋjɛ̀wɛ̀ tii aŋ jɔ̀ɛ̀ɛ̀jɔ̀ɛɛ nyiŋ nyàŋ do nàŋ yèwè wɔŋ fuɔŋ wiiŋ yèè àŋ doim nàŋ zoolò e dìì lɛɛ̀ diɛŋ.’

⁸ E tɔ̀ɔ̀maŋsèì e fèè ɗààhìì e mìèsùàguùŋ nɛ wo Dayà naŋ wa kìɛ̀ŋ wo Eɓulɔhɛɛ̀ŋ wèè e nyiŋ nɔ̀ŋ fèemàŋ lɛ nàŋ yaà wa wèè wo Eɓulɔhɛɛ̀ŋ wa nyimèè wèè anyùùŋ nyaŋ nɔ̀ŋ kpùà jàa nyiŋ. Wo Dayà wààŋ sèè tii kaaìŋ wa Kpeiŋ, kɛ̀ anyùùŋ nyaŋ jàà e ɗààhìì mìèsùàguùŋ nɛ kùàŋ dìì. Yèè wo Eɓuɔhɛɛ̀ŋ naŋ kòmò wo Ààze yèè wò nauŋ jàà kpùa e gɔ̀ɛ̀ɛ̀ nɔɔnɔŋ le taaà diɛŋ e yìwìà ke ɗɔ̀ɔ̀ kòmauŋ nɛɛ̀ŋ. Wo Ààze naŋ jàà wo jɔ̀àfelaauŋ nɔɔ̀ŋ wo Jègɔ ke kpùa, yèè wo Jègɔ naŋ jàà aŋ jɔ̀àfèlàà zììyà jɛ̀wɛ̀ tìyèeuŋ nyàŋ kpùa, aŋ nèwàènèwe wi nyàŋ.

⁹ “Aŋ jɔ̀àfèlàà Jègɔ nyàŋ naŋ wa gììyè wo nanàŋ nyiŋ nɔɔ̀ŋ Jòòsɛ le koo yèè àŋ nauŋ wa maàŋ e ɗo dìì ko Ijè. Kɛɛ wo Dayà yàaùŋ wa maŋjɛ̀wɛ,

¹⁰ yèè wò nauŋ joeyè e kìlà wouŋ kìɛ̀ŋ keì sìàŋ maŋ keì nyìngauŋ màŋ sùà. E teengaà wo Jòòsɛ naŋ fòlò kanaà Fɛɛlɔ̀ fɛɛ̀feìŋ wèè wɔŋ fùɔ̀ŋ Ijèɔ, wo Dayà nauŋ wa kìɛ̀ŋ e jiikɛ̀ɛ yèè ke kpèè siaŋ, yèè wo kanaà naŋ nyɛ̀nɛ̀ŋ wo Jòòsɛ wo ɓɛ̀màŋɗìɔ wèè wɔŋ fùɔ̀ŋ Ijèɔ gbiŋ yèè ke sààŋ kanauŋ nɛɛ̀ŋ.

¹¹ Kpeiŋ e jiè gbee naŋ sɔ̀ɔ̀ wɔŋ fùɔ̀ŋ Ijèɔ yèè wɔŋ fùɔ̀ŋ Kenàaŋ sùà, e yèɛ naŋ wa hìɛ̀ŋ e keì nyìnga gbee. Aŋ nèwàènèwe wi nyàŋ fè wa yɛ̀mɛ̀ è nɛ̀ŋje gbiŋ wèè aŋ wa pɛɛ dènàŋ.

¹² Kɛɛ nààŋ wo Jègɔ naŋ wa kòmò kɛ̀ e nɛ̀ŋje yaà wa ko Ijè, wò naŋ tùɔ̀ŋ aŋ jɔ̀àfelaauŋ nyàŋ, aŋ nèwàènèwe wi nyàŋ e jààme jiɛ̀jiɛ̀ nyiŋ nɛ̀ sùà.

¹³ E jààme dìà tìyèe nyiŋ nɛ̀ sùà, wo Jòòsɛ naŋ tɔ̀ɔ̀ wuŋ bi koɓɛ̀ aŋ wùìyauŋ nyàŋ, yèè e teenga bi sùà wo kànà fùɔ̀ŋ Ijèɔ, wo Fɛɛlɔ̀ naŋ wa ngàà nyìmè e kèè ke kpòò Joosɛɛ̀.

¹⁴ Ke jìì Jòòsɛɛ̀ naŋ wa fɔ̀, kpeiŋ wò naŋ wòò aŋ wùìyauŋ nyàŋ wààŋ aŋ ka aŋ hiàŋ wo dèdauŋ nɔɔ̀ŋ Jègɔ, e kpùlìà nyiŋ bi yaà ke kpooiŋ nɛɛ̀ŋ gbiŋ, wɔŋ fùɔ̀ŋ Ijèɔ. Aŋ gbiŋ yaà wa anyuùŋ kpɛ̀ɛ̀ùŋ taai jɛ̀wɛ̀ zììyà jɛ̀wɛ̀ nɔɔnɔŋ (75).

¹⁵ Kpeiŋ wo Jègɔ naŋ kɔ̀ ko Ijè, ko yèi wuŋ yèè aŋ jɔ̀àfelaauŋ nyàŋ naŋ wa fɔɔyɛ̀ guùŋ guùŋ lɛ.

¹⁶ Àŋ naŋ wa kɛ̀lɛ̀ɛ̀ maŋ fàa nyiŋ màŋ ko jawaì àŋ nyaaŋ Sikɛ̀m, ko yèi àŋ naŋ nyiŋ wa sììyè ke hùaàŋ sùà ke yèɛ wo Eɓulɔhɛɛ̀ŋ naŋ wa dìnìè e nɛɛnɛŋ jika e yìwìà aŋ jɔ̀àfèlàà Haamɔ̀ɔ nyaŋ sìwè.

¹⁷ “Nààŋ e teengaà naŋ wa gbɛ̀ɛ̀ wèè wo Dayà nyɛ̀nɛ̀ŋ e yèɛ wò naŋ wa jɔ̀ɔ̀ e ɗààhiì weè niŋ nɛ̀ koɓɛ̀ wo Eɓulɔhɛɛ̀iŋ e hɛɛnɛ̀ŋ, ke gbòò anyuùŋ wi nyàŋ wɔŋ fùɔ̀ŋ Ijèɔ kè wa naàŋ dɛkɛ̀ kè nɔ̀ŋ gbee.

¹⁸ Eɓìèmàŋjɛ̀wɛ̀ tii, wo kana joo bà wo yèɔ nyimààŋ wa è kèè wò Jòòsɛ wɔ̀ naŋ nɔ̀ŋ wo sìèfèìŋ wɔŋ fùɔ̀ŋ Ijèɔ.

¹⁹ Wò kaaɓì wa aŋ nèwàènèwe wi nyàŋ yèè wo nyiŋ ɓùlà, wo nyiŋ nyɛ̀nɛ̀ŋ aŋ gbìàŋ aŋ jɔaa bɔwɔ nyiŋ nyàŋ ko jɔɔlèei wèè aŋ fà.

²⁰ È yaà wa e teenga lii kɛ̀ àŋ naŋ wa kòmò wo Mòòze, yèè wo jɔ̀àa siaŋ wa kpaokpàò koɓɛ̀ Dayài. Wo nààŋ nauŋ wa yaà wèè maŋ wàà taai ko saaŋ nyiŋ noo.

²¹ E teengaà anyuùŋ kòmauŋ nyàŋ nauŋ wa fùlìè ko sààŋ lɛ̀, wo jɔ̀àjɔ̀ùŋ wo kànà fuɔɔ̀ŋ, wo Fɛɛlɔ̀ nauŋ wa ɓemè yèè wò nauŋ gɔɔyɛ̀ mààŋ wo jɔ̀à wuŋ bi yèè wò nauŋ nyààŋ wo jɔ̀àuŋ.

²² Àŋ naŋ wa kàà wo Mòòze maŋ kèì nyɛ̀nɛ̀ŋ anyùùŋ Ijè nyaŋ gbiŋ, yèè maŋ mìè gbòauŋ màŋ yèè maŋ keì nyɛ̀nɛuŋ màŋ kuwa wa zùlù.

²³ “E teengaà wo Mòòze naŋ wa naàŋ hàì maŋ doa kpɛ̀ɛ̀ùŋ tìyèe lɛ̀, wò naŋ wa ɗewè ke jiiuŋ nɛɛ̀ŋ sùà wèè wo jaamè aŋ wùìyauŋ nyàŋ, anyùùŋ Ezɔ̀ɛ̀ nyaŋ.

²⁴ Wò naŋ wa yɛ̀mɛ̀ wo wùìyauŋ nɔɔ̀ŋ bà guùŋ, wo nyùùŋ Ijèɔ bà yàaùŋ nòò ɓulie, yèè wò naŋ kɔ̀ wèè wo gè e kpàŋ wùìyauŋ nɔɔ̀ŋ, kpeiŋ wò naŋ jìwè wo nyùùŋ Ijèɔ. (

²⁵ Wo Mòòze naŋ wa gongò kɛ̀ aŋ wùìyà wuŋ bi nyàŋ do wa nàŋ nyìmè kɛ̀ wo Dayà yàaùŋ wa tòòmò sùà wèè wo nyiŋ gè e ɗo dìì, kɛɛ aŋ gò niŋ wa nyìmàŋ.)

²⁶ Wɔŋ niìsìaà bàa wo Mòòze naŋ yɛ̀mɛ̀ aŋ wùìyà Ezɔ̀ɛ̀uŋ nyàŋ àŋ tìyèe àŋ yaà sumie, yèè wò naŋ kɔ̀ wèè wo nyiŋ gòònò tɛɛ wèè aŋ hɔnè sòmaŋ. Wò naŋ nyiŋ woò wààŋ, ‘Felaa nyɛɛ̀ŋ, nìŋ yaà aŋ wùìya, wèè kiɛ̀ŋ nìŋ yaà yɛi sumie?’

²⁷ Kɛɛ wo yèɔ yaà wa ɓùlìè wo dàwiuŋ nɔɔ̀ŋ wɔ naŋ dùlò wo Mòòze wɔŋ fàà guùŋ yèè wò nauŋ dawè wààŋ, ‘Ɓòò naum nyɛ̀nɛ̀ŋ wo kana yèè wo nyuùŋ gbàì gòlàà diɛŋ wi?

²⁸ Mùŋ manaŋ wèè maim jìwà maànààŋ mùŋ naŋ jìɛ̀ jìwè wo nyùùŋ Ijèɔ lɛ̀?’

²⁹ E teengaà wo Mòòze naŋ wa tɛɛ̀ kòmò lɛ, wò naŋ wa dùɔ̀ŋ wo yèwà ko Ijè yèè wò naŋ kɔ̀ wo jɛ̀ì e dìì wɔŋ fùɔ̀ŋ Meɗiàaŋ diɛŋ. Kuii wò naŋ wa kùmìè aŋ jɔ̀àfèlàà tìyèe.

³⁰ “Nààŋ maŋ doa kpɛ̀ɛ̀ùŋ tìyèe naŋ mààŋ, wo màikà naŋ fòlò wo Mòòze feìŋ e ɓìè hmɔɔ̀ŋ kùwa gbee sùà ke fòngà e diì wòaà diɛŋ e gbɛ̀ɛ̀ wɔŋ Tòò Sanàa.

³¹ È naŋ wa fòònò wo Mòòze wèè e yèɛ wò naŋ wa yɛmɛ̀ lɛ, yèè wò naŋ bɔ̀mɔ̀ŋ e ɓieɛ̀ kɔɔ wèè wo yɛmɛ̀ niŋ tɛ̀ɛ̀. Kɛɛ wò naŋ wa kòmò ke mìè Wo Kanaà wò naŋ woò wààŋ,

³² ‘Miàŋ nàŋ yaà wo Dàyà aŋ nèwàènèweum nyàŋ, wo Dàyà Eɓulɔhɛɛ̀ɔŋ, wo Ààze, yèè wo Jègɔ.’ E jùùɛ naŋ wa nyɛ̀nɛ̀ŋ wo Mòòze wò jele kpàkpà wèè wo go nàŋ yɛ̀mɛ̀ wo Dayà.

³³ Wo Kanaà Dayà nauŋ woò wààŋ, ‘Gè maŋ baum màŋ gòlò, fòfoo koɓɛ̀i mùŋ sia lɛ è yaà e dìì nɛɛmaŋ.

³⁴ Kà yɛ̀mɛ̀ e keì nyìngaà anyunùim nyàŋ yaà kɔ̀ɔ̀yɛ̀ dìì lɛ ko Ijè. Kà kòmàŋ ko ɗìòsùà gùlia nyiŋ niìŋ, yèè kà dèyà wèè ka nyiŋ joeyè. Weètii hnaàŋ naàŋ sààmɛ. Mìŋ doum nàŋ tùɔ̀ŋ ko Ijè.’

³⁵ “Wo Mòòze nàŋ yaà wa wo nyùnɔ̀ɔŋ anyùùŋ Ezɔ̀ɛ̀ nyaŋ gò wa jàà kùàŋ dìì wɔ. Àŋ nauŋ wa dawè nyààŋ, ‘Ɓòò naum nyɛ̀nɛ̀ŋ wo kana yèè wo nyuùŋ gbàì gòlàà diɛŋ wi?’ Wuŋ nàŋ yaà wo nyùnɔ̀ɔŋ wo Dayà naŋ wa tùɔ̀ŋ wèè wo nɔ̀ŋ wo sìèfèìŋ anyùùŋ nyaŋ, e kìlà wèè wo nyiŋ gè e mɔ̀ɔ̀nɛŋ nyiŋ nɛ̀ dìì e yìwìà e kpùùmàŋ wo màikàa nauŋ wa fòlò feìŋ wɔ e ɓìè hmɔɔ̀ŋ kùwa gbeeɛ̀ sùà wɔ.

³⁶ Wò naŋ wa sìè anyùùŋ nyaŋ feìŋ e yìwià wɔŋ fùɔ̀ŋ Ijèɔ, wò yaà nyìnìè maŋ kèè mèè yèè maŋ tɔ̀ɔ̀màŋsèì keì ko Ijè, yèè koɓɛ̀ wɔŋ Juwo Wɛnɛɔ̀ŋ, yèè wèè maŋ doa kpɛ̀ɛ̀ùŋ tìyèe ke fòùngà e diì wòaà diɛŋ.

³⁷ Wo Mòòzè naŋ wa wòò aŋ wùìyauŋ nyàŋ, anyùùŋ Ezɔ̀ɛ̀ nyaŋ wààŋ, ‘Wo Dayà doiŋ nàŋ tùɔ̀ŋ wo keela, màànààŋ nɔŋ wò naim wa tùɔ̀ŋ lɛ, yèè wò do nàŋ nɔ̀ŋ wo wùìyaiŋ nɔɔ̀ŋ bà guùŋ.’

³⁸ Wuŋ yaà anyùùŋ Ezɔ̀ɛ̀ nyaŋ naŋ wa gbònò koɓɛ̀ guùŋ ke fòùngà e diì wòaà diɛŋ. Wuŋ yèè aŋ nèwàènèwe wi nyàŋ yaà wa koɓɛ̀ guùŋ yèè yaà wo màikàa nauŋ wa gbòò kɔɔ wɔŋ Tòò Sanàa dìmɛ̀ lɛ, yèè wò naŋ yɛ̀mɛ̀ maŋ mìè gbìàŋ nyiiŋ gèe e yìwìà wo Dayà sìwè wèè wo wi miŋ kiɛ̀ŋ.

³⁹ “Kɛɛ aŋ nèwàènèwe wi nyàŋ naŋ gè maŋhɛɛ wèè auŋ jàà kùàŋ dìì; àŋ nauŋ dùlò fàà guùŋ yèè àŋ naŋ nyɛ̀nɛ̀ŋ wànàŋ maŋ jii nyiŋ màŋ sùà wèè aŋ kɛɛ̀ ko Ijè.

⁴⁰ Aŋ naŋ wa wòò wo Elɔ̀ùŋ nyààŋ, ‘Bànè wi aŋ dayà wèè aŋ nɔ̀ŋ wi ko feìŋ. E nyimàìŋ kɛ̀ kiìŋ naŋ kààìŋ kòɓɛ̀ wò kenàŋ wɛɛ̀ Mòòze, wo yèɔ naŋ wi gè wɔŋ fùɔ̀ŋ Ijèɔ sùà wɔ.’

⁴¹ E teenga bi sùà àŋ naŋ wa bànè wo dayà joo tèènè wo dìi wowo, yèè àŋ naŋ hìɛ̀ŋ manɛ̀ŋ saàà nyiŋ màŋ ko nɛ̀ɛ̀uŋ niìŋ yèè aŋ naŋ gè e zɔlɔ̀ gbèe e dɛ̀ɛ̀kɛ sùà wèè e nɛ̀ɛŋ nyiŋ bi naŋ bàànè maŋ kùàŋ lɛ.

⁴² Kpeiŋ wo Dayà naŋ nyiŋ wa fè jɛwɛ yèè wò naŋ nyiŋ gè nyààŋ diɛŋ wèè aŋ zoolò maŋ ɗu màŋ ko àìjɛnɛ̀ŋ, nààŋ è yaà sìnga niŋ wɔŋ fɛ̀ì aŋ keela nyàŋ sùà ko yèi wo Dayà naŋ woò wààŋ, ‘Nyùùŋ Ezɔ̀ɛ̀ nyaŋ! E fè wa wèè miàŋ nìŋ naŋ wa jìwè yèè nìŋ naŋ gììyè maŋ ɗolònɛ̀ŋ saàà wèè màŋ doa kpɛ̀ɛ̀ùŋ tìyèe ke fòùngà e diì wòaà sùà.

⁴³ Kè vààyà mìè sìè dayà jooiŋ nɔɔ̀ŋ Molì nìŋ naŋ wa kɔɔ̀, yaà wɔŋ ɗù wo dayàiŋ nɔɔ̀ŋ naŋ tèènè Lifàŋ wɔŋ, nyiiŋ nàŋ yaà aŋ dayà joo nyàŋ nìŋ naŋ wa banè wèè naŋ zoolò. Weètii mìŋ doiŋ nàŋ tùɔ̀ŋ wɔŋ fuɔŋ joo sùà ko Ɓaɓelɔ̀ùŋ jɛ̀wɛ̀.’ ”

⁴⁴ Wo Siiwììŋ naŋ wa ɓɛìŋ woò wààŋ, “Aŋ nèwàènèwe wi nyàŋ kuwa wa ke Vààyà mìè sèì Dayàa, ke yèɛ naŋ wa tɔɔ̀ kɛ̀ wo Dayà kòò wò yaà nyiìŋ nèè tɛɛ ke fòùngà e diì wòaà sùà. Kè naŋ wa nɔ̀ŋ bàne nyiŋ màànààŋ wo Dayà naŋ wòò wo Mòòze, e kìlà kè naŋ wa tèènè ke yèɛ wo Mòòze naŋ wa yɛmɛ̀ e teengaà wò yaà wa wɔŋ tolòɔ dìmɛ̀ lɛ.

⁴⁵ E teengaà ke vààyà saàŋ naŋ wa naàŋ sɛ̀ɛ̀ aŋ nèwàènèwe wi nyàŋ sìwè e yìwìà aŋ dèda nyiŋ nyàŋ sìwè lɛ, wo Jàasùà nàŋ yaà wa wo sìèfeìŋ nyiŋ nɔɔ̀ŋ. Àŋ naŋ wa kɔ̀ɔ̀ ke vààyà saàŋ yèè àŋ naŋ ɓèmè e dììɛ nààŋ àŋ yaà wa kɔɔyɛ. Wo Dayà naŋ wa nyìmè anyùùŋ maŋ fuɔŋ màŋ gbiŋ hewa jòò e dìì lɛɛ̀ diɛŋ nyàŋ, wo nyiŋ niŋ kiɛ̀ŋ. Ke vààyà saàŋ naŋ wa jèè aŋ nèwàènèwe wi nyàŋ sìwè e dìì lɛɛ̀ diɛŋ e jèèsùà e tèèngà wo Kanaà Dèèwe e haì.

⁴⁶ Wo Dayà nauŋ wa yɛ̀ɛ̀mɛ̀ e fɛɛ̀ sìàŋ, yèè wo Dèèwe naŋ dàwè wo Dayà wèè wo gòuŋ nyààŋ diɛŋ wo nyɛ̀lɛ̀ ke sààŋ zòòlo wèè wo Dàyà Jègɔɔ̀.

⁴⁷ Kɛɛ wo jɔ̀àfèlàà Dèèweɔ̀ Salemàŋ naŋ wa naàŋ nyɛ̀lɛ̀ ke saaŋ wèè wo Dayà.

⁴⁸ “Kɛɛ wo Dàyà Gaàŋ Gbeeɔ̀ fè jàwà màŋ saaŋ màŋ ànyuùŋ kpùuŋ naŋ nyɛ̀lɛ̀ maŋ dìì. Màànààŋ wo kèèlà Dayàa naŋ wa woò lɛ,

⁴⁹ ‘Wo Kanaà Dayà naŋ woò wààŋ, “Ko Àìjɛnɛ̀ŋ nàŋ yaà ke kpùà kana miɛ̀ŋ, e kìlà e dììɛ e ɗuunyaàŋ nàŋ yaà ko dè gòlò miìŋ. Kiìŋ kè saaŋ mùŋ naŋ ɓɛ̀nɛ̀ŋ nyɛ̀lɛ weèim? Kòò nàŋ yaà koɓɛ̀i mìŋ do nàŋ gììyè nyiiŋ lɛ̀?

⁵⁰ Miàŋ nààŋ gò bànè manɛ̀ŋ mɛɛ̀ŋ gbiŋ?” ’ ”

⁵¹ Wo Siiwììŋ naŋ nyiŋ ɓɛìŋ woò wààŋ, “Kiìŋ è ɗì nyinge nìŋ kuwa yɛi le! Nìŋ yaà mààŋ anyùùŋ maŋ jii komaŋ gò jàà kpùa kpùɔ̀ŋ maŋ nùŋ, aŋ yè nyaŋ kòò àŋ kòmò wa kè mìè gbìàŋ Dayàa. Nìŋ yaà mààŋ aŋ nèwàènèweiŋ nyàŋ. Nyɛ̀iŋ pɛɛ nìŋ giiyà wo Jìnàŋ Nɛɛmaàŋ maŋhɛɛ e teenga gbiŋ!

⁵² Wo kèèlà Dayà bà gbiŋ wa hnàŋ wo yèɔ aŋ nèwàènɛweiŋ nyàŋ aŋ gò wa nimilà wɔ? Àŋ naŋ wa jìwè aŋ kèèlà Dayà nyaŋ naŋ wa wòò e kèè e hnàŋ wo Ɓɔ̀ìjɔ̀à Nɛɛmauŋ nɔɔ̀ŋ. Nìŋ nàuŋ maàŋ e kìlà nàuŋ jìwà.

⁵³ Nyɛ̀iŋ naŋ wa yɛ̀mɛ̀ maŋ Sàwà Dayà maŋ e yìwìà aŋ màikà nyaŋ sìwè, kɛɛ kòò nìŋ jɔ̀ɔ̀lɔ̀ miìŋ dìì.”

Anyùùŋ nyaŋ naŋ hɔ̀wɔ̀ wo Siiwììŋ auŋ jìwà

⁵⁴ Nààŋ anyùùŋ gbèègbèè fuɔɔ̀ŋ yaà wa kùmìàŋ sùà e keìɛ wo Siiwììŋ yaà wa woo lɛ̀, àŋ naŋ wa tuù àŋ gè gbìlà le sìaŋ e wùàŋ sùà weèuŋ.

⁵⁵ Kɛɛ wo Siiwììŋ, wo yèɔ wo Jìnàŋ Nɛɛmaàŋ naŋ wa dìèsùà wɔ, naŋ gè fɛ̀ɛ̀ dìì wo yɛ̀mɛ̀ ko àìjɛnɛ̀ŋ, yèè wò naŋ yɛ̀mɛ̀ e gbòlòùŋ Dayaà yèè wo Jisɛ̀ sia wɔŋ kùàŋ jìkà Dayàa.

⁵⁶ Wò naŋ nyiŋ woò wààŋ, “Yɛ̀mɛìŋ! Mìŋ yɛmɛ̀ ko àìjɛnɛ̀ŋ naŋ yilè yèè wo Jɔ̀àfèlàà Nyuùŋ Kpùnɔɔ̀ŋ sia wɔŋ kùàŋ jìkà Dayàa!”

⁵⁷ Wèè tɛɛ̀, anyùùŋ gbèègbèè fuɔɔ̀ŋ naŋ hɔ̀ɔ̀ maŋ kiiyò nùŋ, yèè àŋ naŋ kpààŋ sɛiŋ aŋ vaì auŋ kùwà fiò,

⁵⁸ auŋ gɔ̀ɛ̀ɛ̀ dìì auŋ gè ko jawa gbeeì yèè àŋ nauŋ tɔ̀ɔ̀tù hɔ̀wa. Aŋ sèì nyaŋ naŋ wa gè maŋ kùmà gbeegbèè nyiŋ màŋ yèè àŋ naŋ miŋ jùùyè wo kɔmɔŋjɔa bɔwɔ bà aŋ nyaaŋ wo Sɔɔ̀.

⁵⁹ Nààŋ àŋ yaà wa hɔ̀wà sùà wo Siiwììŋ, yɛi nɔŋ wò yaà wa nyààŋ sùà e dèè Kanaà wààŋ, “Kanaà Jisɛ̀, jaà wo jinàŋ miɔ̀ŋ kùàŋ dìì.”

⁶⁰ Kpeiŋ wò naŋ dè maŋ gɛ̀ɛ̀ŋ nùuŋ màŋ dìì yèè wò naŋ kpààŋ ke miè gbeeo sùà wààŋ, “Kanaà! Ɓɔ̀ mùŋ kuwià nyiŋ màŋ jùumù mɛɛ̀ŋ!” Wò naŋ tɛɛ̀ woò yèè wò naŋ mìè nyiiŋ.