Nyɛ̀nɛ̀ŋ 28 - WƆŊ FƐ̀Ì EBÒ SÌÀŊ DAYÀA

E nɛ̀ɛŋ naŋ wa kaaìŋ ke Tiɛ̀ɛŋ Maatà sùà lɛ

¹ Nààŋ è naiŋ wa naàŋ jòwò ko tiwiì bòìbòì, è naiŋ wa kòmò kɛ̀ àŋ nyaaŋ ke tiɛ̀ɛŋ Maatà.

² Anyùùŋ ziì joo nyàŋ joà wa koɓɛ̀ bi nyàŋ naŋ wi wa kpuumò. Nààŋ maŋ gɔ̀à maŋ naŋ wa tɔ̀ɔ̀tù sɔ̀àa yèè ke fòìɛ naŋ wa gàŋ, àŋ naŋ wa dììyè e hmɔ̀ɔ̀ŋ weè wi.

³ Nààŋ wo Pɔɔ̀ naŋ wa sɛ̀nɛ̀ŋ e hmɔɔ̀ŋ kùù wòa yèè wò naŋ niŋ gbìɛ̀ŋ ko hmɔ̀ɛ̀iŋ, e zùzùɛ naŋ nyɛ̀nɛ̀ŋ wo kaì wo fòlà ke hmɔɔ̀ŋ kùlɛ̀ɛ bà sùà, yèè wò naŋ kɛ̀nɛ̀ŋ wo Pɔɔ̀ wɔŋ kùàŋ.

⁴ Nààŋ anyùùŋ maŋ fuɔŋ joo nyàŋ joà wa koɓɛ̀ wii nyàŋ naŋ yɛ̀mɛ̀ wo kaìɔ wò sɛɛ wo Pɔɔ̀ wɔŋ kùàŋ, àŋ naŋ wòò aŋ dàwe e fèemàŋ nyààŋ, “Wo kaì wɛɛ̀ gò kɛ̀nɛ̀ŋ wò kenàŋ wɛɛ̀ wèè foo, èiŋ ɓɛ̀nɛ̀ŋ hààwe kɛ̀ wò yaà wo nyuùŋ jìwà nyùùŋ, kɛɛ e tɔ̀ɔ̀nyaàŋ nàŋ yaà kɛ̀ wo naàŋ jòèyè wèè wo jèè wɔ̀ŋ nyiiŋ gèeɔ̀ sùà, jòòpɛɛ wo gò jèè wɔ̀ŋ juwoɔ̀ sùà.”

⁵ Wo Pɔɔ̀ naŋ wa mɛ̀ɛ̀mɛ̀ɛ̀ŋ wɔŋ kuàuŋ nɔɔ̀ŋ, yèè wo kaìɔ naŋ sɛ̀ɛ̀ ko hmɔ̀ɔ̀ɛ̀iŋ. Wo kaìɔ gò wa nɛ̀ɛ̀mùŋ wò Pɔɔ̀.

⁶ Anyùùŋ nyaŋ yaà wa goongo kɛ̀ wo Pɔɔ̀ hewa nàŋ miŋge mìŋgè ɔ̀ɔ̀ wo sɔ̀à fiò wo fà. Àŋ naŋ wa tɛɛ̀ nɔ̀ŋ yɛ̀ɛ̀mɛ̀ dòmaŋ wèè e teenga mùnlaŋ wèè e kaaìŋ. Kɛɛ nààŋ àŋ naŋ wa yɛmɛ̀ kɛ̀ e nɛ̀ŋ gbiŋ gòuŋ wa kaaìŋ, àŋ naŋ kìlè maŋ jii nyiŋ màŋ yèè àŋ naŋ woò nyààŋ, “Wo felaa wɛɛ̀ yaà wo dayàa bà guùŋ.”

⁷ Wo kanaà wèè ke tiìɛŋ nàŋ yaà wa wo kenàaŋ àŋ nyaaŋ wa wo Pɔbilɔ̀, yèè wò kanaŋ wa e dììɛ bà e gbɛ̀ɛ̀ koɓɛ̀i è naiŋ wa dè lɛ. Wo Pɔbilɔ̀ naŋ wi wa kùwìè e mɔ̀ɔ̀nɔŋ yèè wò naŋ wi kɔ̀ɔ̀ ko gboouŋ noo wo wio jàà ɓɛ̀ɛ wèè maŋ ɗɔ̀ɔ̀ taai.

⁸ Wo kɛ̀ɛ̀ Pɔbilɔ̀ɔ hawa wa wɔŋ gbùmauŋ nɔɔ̀ŋ sùà wò yaà siinyɛŋ. Wò kuwa wa e sààŋ kɔɔ bìya yèè ko suàdèe, yèè wo Pɔɔ̀ naŋ kɔ̀ ko jaameuŋ. Wo kenàaŋ naŋ wa jòèyè nààŋ wo Pɔɔ̀ nauŋ wa gbùwò maŋ kùàŋ diɛŋ yèè wò nauŋ zòòlò diɛŋ.

⁹ Nààŋ tɛɛ̀ naŋ wa kaaìŋ yèè anyùùŋ nyaŋ naŋ niŋ kòmò, anyuùŋ kɛ̀ɛ̀nɛ̀ŋ maŋ sàaŋ gɛ̀wɛɛ̀ gbànaŋ nyàŋ gbiŋ joà wa ke tiìɛŋ sùà nyaŋ naŋ hnè ko nɛ̀ɛ̀uŋ niìŋ e teenga gbàè gbà sùà, yèè nààŋ wò naŋ nyiŋ gbùwò maŋ kùàŋ yèè wò naŋ nyiŋ zòòlò diɛŋ, àŋ naŋ jòèyè.

¹⁰ Anyùùŋ nyaŋ naŋ wi wa kìɛ̀ŋ e ɓɛ̀ɛ̀jàa gbee. Yèè nààŋ è naiŋ wa banebànè wèè eiŋ sɛ̀ɛ̀ wɔŋ meeèɔ sùà wèè eiŋ naàŋ ka, àŋ naŋ wi wa kìɛ̀ŋ manɛ̀ŋ zimgbe wɔŋ meeèɔ sùà maŋ yè maŋ naŋ wi wa ɓɛ̀nɛ̀ŋ kpùùmaŋ lɛ̀ ke dòmàŋ kàaiŋ wiɛ̀ diɛŋ.

Wo Pɔɔ̀ yèè aŋ dàwiuŋ nyàŋ naŋ yèwè ko Maatà aŋ kà ko Luùm

¹¹ È naiŋ wa nyɛ̀nɛ̀ŋ maŋ wàà taai ko Maatà. Kpeiŋ è naiŋ sɛ̀ɛ̀ wɔŋ meeè bà sùà àŋ nyaaŋ wa nyààŋ, “Aŋ Sèwì Dayà” e yìwìà ko Àlèzandilà wɔŋ fùɔ̀ŋ Ijèɔ sùà. Wɔŋ meeè wɛɛ̀ŋ naŋ wa jɛ̀ì ko Maatà wèè wɔŋ fòlà e sɛ̀ɛ̀ɛ e mààŋ.

¹² È naiŋ wa kɔ̀ eiŋ hàì ko Silakɔɔ̀ yèè è naiŋ noo nɔ̀ŋ wèè maŋ ɗɔ̀ɔ̀ taai.

¹³ E yìwìà kuii è naiŋ kɔ̀ ko Liigiùm. Wɔŋ niìsìaà bàa wɔŋ fòì naŋ yèwè dìì e yìwìà wɔŋ fùɔ̀ŋ kɔ̀ɔ̀. Ke ɗɔɔ dìà tìyèeɛ̀ diɛŋ è naiŋ hàì ko jawaì àŋ nyaaŋ ko Putiolì.

¹⁴ Kuŋ è naiŋ wa mɛ̀ɛ̀ŋ anyuùŋ hààwe nyàŋ bà. Yèè àŋ naŋ wi dawè wèè e nɔ̀ŋ nyiŋ nee gòlò wèè maŋ ɗɔ̀ɔ̀ nɔɔnɔŋ le tìyèe. Nààŋ maŋ ɗɔɔ miiŋ naŋ mààŋ, è naiŋ noo yèwè yèè è naiŋ kɔ̀ ko jawa gbeeì ko Luùm.

¹⁵ Anyuùŋ hààwe nyàŋ ko Luùm naŋ kòmò ebò wi yèè àŋ naŋ hnè e bòliɛ̀ sùà ko Apiɔ̀ yèè koɓɛ̀i àŋ nyaaŋ wa nyààŋ maŋ Sààŋ Nyùnèè Nyɛ̀ìŋ Taai màŋ wèè aŋ wi mɛɛ̀ŋ. Nààŋ wo Pɔɔ̀ naŋ nyiŋ wa yɛmɛ̀, wò naŋ wa gè wo Dayà esɛ̀ weè nyiŋ yèè è nauŋ kìɛ̀ŋ ke jii nyingè.

Wo Pɔɔ̀ naŋ gbòò ke mìè Dayàa ko Luùm

¹⁶ Nààŋ è naiŋ hàì ko Luùm, àŋ naŋ wa gè wo Pɔɔ̀ nyààŋ diɛŋ wèè wo nɔ̀ŋ wɔŋ kùàŋ wuŋ bi yaà wo kààlòòɗùàa yàùŋ wa yɛ̀ɛ̀mɛ̀ diɛŋ wɔ̀.

¹⁷ Maŋ ɗɔ̀ɔ̀ taai naŋ màànààŋ è naiŋ hàì ko Luùm, yèè wo Pɔɔ̀ naŋ nyààŋ aŋ ɓɛ̀màŋɗì aŋ Juùù nyaŋ bà wò naŋ nyiŋ woò wààŋ, “Wùìyaim nyàŋ, kòò mìŋ nyɛ̀nɛ̀ŋ wa è keì gbiŋ è do hìàŋ kè jii mɔ̀ɔ̀nɛ̀ŋ kòɓɛ̀ ànyunùim nyàŋ, kòò mìŋ fè màŋ sàwà àŋ nèwàènèwe wi nyàŋ jɛwɛ kè ɗɔ̀ɔ̀ guùŋ pɛɛ. Kɛɛ anyuùŋ wi nyàŋ ko Jùlusɛ̀làm naim kìlè koɓɛ̀ e kànà wɔŋ fùɔ̀ŋ anyùùŋ Luùm nyaŋ e pèesìnàŋ dìì.

¹⁸ Àŋ naŋ nyɛ̀nɛ̀ŋ maŋ nɔnɔŋ tùàŋ e nyaàiŋ dè maŋ keì maŋ àŋ naim gbùwò e ɗì maŋ, àŋ manaŋ weè aim dangè wèè ka ka, esaɓù kɛ̀ aŋ gò yɛ̀mɛ̀ è keì naanààaŋ mìŋ naŋ nyɛ̀nɛ̀ŋ lɛ wèè aim jìwà.

¹⁹ Kɛɛ anyùùŋ gbèègbèè aŋ Juùù nyaŋ naŋ gè maŋhɛɛ, yèè mìŋ naŋ dawè wèè wò kanaà Siisɔ̀, wo Kànà anyùùŋ fùɔ̀ŋ Luùm nyaŋ woim gbaì. Kɛɛ miŋ kuwà è keì gbiŋ fàà naanààŋ wèè ka woò wèè wɔ̀ŋ fùɔ̀ŋ miàŋ biɔ̀.

²⁰ Wèè esaɓù lɛɛ̀ mìŋ naŋ dawè wèè kaum yɛmɛ̀ e kìlà wèè kaum gbòà kɔɔ, nààŋ è yaà esàɓù wo nyùnɔ̀ɔŋ wo yèɔ anyùùŋ Ezɔ̀ɛ̀ nyaŋ kuwa ke jii tùlia sùà wɔ àŋ naim sìè maŋ jɔ̀ɔɔ mɛɛ̀ŋ.”

²¹ Yèè àŋ naŋ wòò wo Pɔɔ̀ nyààŋ, “Kòò è yɛ̀mɛ̀ìŋ wɔ̀ŋ fɛi gbiŋ e yìwìà ko Jùdià è nyaàìŋ eum dè, yèè aŋ wùìya wi nyàŋ kinɛiŋ yaà kià hinie nyàŋ bà gbiŋ kòò wò wòò wì è kiium, ɔ̀ɔ̀ wo wòò è keì naanààŋ weèum.

²² Kɛɛ tɔ̀ e nyìmàŋ kɛ̀ kiìŋ nàŋ yaà e gòngo mɔ̀ɛ̀. Èiŋ nyìmàŋ kɛ̀ anyùùŋ maŋ tàta màŋ gbiŋ sùà yaà wòò e kèè ke gbòò yɛɛ̀ mùŋ sùà yaà lɛ naanààŋ.”

²³ Nààŋ àŋ naŋ tɔ̀ɔ̀ e teenga wèè aŋ mɛ̀ɛ̀ŋ wo Pɔɔ̀, aŋ zimgbe nyiŋ naŋ wa hnè ko gbooì wò joà lɛ ke ɗɔɔ yii. Wo Pɔɔ̀ naŋ gbòò ko nɛ̀ɛ̀ŋ nyiŋ niìŋ e nyaàiŋ dè e Kànà Dayàa e yìwìà maŋ nyiìŋ tɛ̀tɛ̀ e jèèsùà e gɔɛɛ hàì ko ɗìò tɛɛ. Wò naŋ gbòò ko nɛ̀ɛ̀ŋ nyiŋ niìŋ e yìwìà maŋ Sàwà maŋ wo Dayà naŋ wa kìɛ̀ŋ wo Mòòze màŋ yèè maŋ keì wòo màŋ e yìwìà maŋ fɛ̀ì aŋ Wɛ̀ijì nyaŋ sùà wèè wo kamè ɗewe aŋ kɛɛnɛ̀ŋ e hààwe wo Jisɛ̀ sùà.

²⁴ Aŋ bà nyiŋ naŋ wa hààwè e yèɛ wo Pɔɔ̀ naŋ wa woò lɛ, e kìlà aŋ bà nyiŋ gò wa haawè kɛ̀ è tɔɔɓaa le.

²⁵ Nààŋ aŋ gò wa nyimèè nyiŋ wouwòù è fèemàŋ, àŋ naŋ tɔ̀ɔ̀tù kàa. Kɛɛ wo Pɔɔ̀ naŋ nyiŋ tɛɛ̀ woò wààŋ, “Wo Jìnàŋ Nɛɛmaàŋ naŋ wa wòò e keì kɛnɛɛ̀ e teengaà wò naŋ wa tùɔ̀ŋ wo wɛ̀ijìɔ Àzaayà lɛ,

²⁶ wèè wo woò aŋ nèwàènèwe wi nyàŋ wààŋ, ‘Kɔ̀à koɓɛ̀ anyùùŋ nyɛɛ̀ŋ muŋ woò nyiŋ mààŋ, “Nìŋ do nàŋ jàà maŋ nùŋ dìì, naŋ jàà maŋ nùŋ dìì, kɛɛ niŋ naàŋ nyìmè. Mùŋ do nàŋ jàà fɛ̀ɛ̀ dìì, maŋ jàà fɛ̀ɛ̀ dìì, kɛɛ muŋ naàŋ yɛ̀mɛ̀ è nɛ̀ŋ gbiŋ.

²⁷ Nyɛ̀iŋ gbiŋ maŋ jiiŋ màŋ naŋ dɔɔmùùŋ. Maŋ nuùiŋ màŋ naŋ kpuɔŋ, yèè e fɛɛ̀iŋ nɛ̀ yaà ɓùwa niŋ kpaŋ. Niŋ fè yɛ̀mɛ̀ è dìì ɔ̀ɔ̀ naŋ kòmàŋ màŋkàìŋ ɔ̀ɔ̀ naŋ nyìmàŋ è nɛ̀ŋ gbiŋ. Sèè nìŋ ɓɛnɛ̀ŋ weè, nìŋ he weè nàŋ kìlè ko nɛ̀ɛ̀ŋ miìŋ, yèè mìŋ heiŋ nàŋ joeyè.” ’ ”

²⁸ Wo Pɔɔ̀ naŋ kpɛ̀ɛ̀yɛ̀ gbòa wààŋ, “Nyìmaìŋ kɛ̀ wo Dayà manaŋ wo jòèyè anyùùŋ nyaŋ fè àŋ Juùù nyaŋ! E kìlà àŋ do nàŋ jàà maŋ nùŋ dìì aŋ kumiàŋ tɛ̀ɛ̀.” [

²⁹ Nààŋ wo Pɔɔ̀ naŋ tɛɛ̀ kpɛ̀ɛ̀yɛ̀ wòo, aŋ Juùù nyaŋ naŋ kɔ̀, àŋ yaà kpàànè kpàànè fèemàŋ e wùàŋ sùà.]

³⁰ Wèè maŋ dòà tìyèe wo Pɔɔ̀ naŋ wa nɔ̀ŋ wɔŋ kùàŋ wuŋ bi, yèè wò naŋ ɓèmè ke saaŋ ke yèɛ wò hewa paawà weè nyiŋ wuŋ bi. Yèè wò hewa jàà wo nyùnɔ̀ɔŋ gbiŋ hnàŋ wa ko nɛ̀ɛ̀uŋ niìŋ wɔ kùàŋ dìì.

³¹ Wò hewa gbòà e nyaàiŋ dè e Kànà Dayàa yèè wo kàà anyùùŋ nyaŋ e nyaàiŋ dè wo Jisɛ̀ Kulaì, yèè wo nyùùŋ gbiŋ gòuŋ wa kèèwè kùàŋ feìŋ.