Nyɛ̀nɛ̀ŋ 22 - WƆŊ FƐ̀Ì EBÒ SÌÀŊ DAYÀA

¹ “Nyɛ̀iŋ nààŋ wùìyaim nyàŋ, jàaìŋ maŋ nùŋ dìì ko nɛ̀ɛ̀ŋ miìŋ miŋ gbaì wèè miàŋ bì ko fɛɛ̀fenìiŋ!”

² Nààŋ àŋ naŋ wa kòmò wo Pɔɔ̀ yaà gbùùyè ko nɛ̀ɛ̀ŋ nyiŋ niìŋ e Hiɓulù mieɛ̀ sùà, àŋ naŋ nɔ̀ŋ dìì tɔ̀ùŋ.

³ Wo Pɔɔ̀ naŋ woò wààŋ, “Mìŋ yaà wo Juùù nyuuŋ, yèè àŋ naim wa kùmìè ko jawa gbeeì ko Tasɔ̀ wɔŋ fùɔ̀ŋ Sèlesìàa sùà. Kɛɛ kià ko Jùlusɛ̀làm mìŋ naŋ dɛɛkɛ̀, yèè mìŋ yaà wa wo kààjɔa e yìwìà ko gbòòkùàŋ Gàmaliàa. Yèè àŋ naim wa kaà wèè ka jɔ̀ɔ̀lɔ̀ maŋ sàwà aŋ nèwàènèwe wi nyàŋ gbiŋ dìì. Yèè ngèè mìŋ yaà wa e wànàŋ zimgbe sùà wèè ka jɔ̀ɔ̀lɔ̀ wo Dayà dìì mààŋ nyɛ̀iŋ nààŋ bà gbiŋ nàaŋ ɗɔɔ yɛɛ̀.

⁴ Mìŋ hewa nìmìlà anyùùŋ ebɛ̀ŋ e fàa diɛŋ koɓɛ̀ anyùùŋ nyaŋ gbiŋ hewa dè ke Dòmàŋ Kanaà diɛŋ nyàŋ. Mìŋ hewa kùwà jɔùŋ yèè felaa e kìlà ka nyiŋ gbìàŋ ko sààŋ nyìwì.

⁵ Wo Kànà Sìèfèìŋ Zòòlo Gbeeɔ̀ yèè aŋ màmànkùmɛ̀ŋ fuɔɔ̀ŋ gbiŋ nyìmàŋ kɛ̀ mìŋ yààìŋ wòò e tɔɔɓaaà. Àŋ naim wa kìɛ̀ŋ maŋ fɛ̀ì miè gbìaŋ wèè koɓɛ̀ anyùùŋ gbèègbèè aŋ Juùù nyaŋ ko Dàmakɔ̀, wèè kao wa kùwà anyùùŋ màŋjɛ̀wɛ̀ Kanaà yèè ka nyiŋ hìàŋ ko Jùlusɛ̀làm wèè aŋ ka e keì nyìnga dìì.”

Wo Pɔɔ̀ naŋ wòò e ɗeweɛ̀ wò naŋ wa kìlè koɓɛ̀ Jisɛ̀ɛ lɛ̀

⁶ Wo Pɔɔ̀ naŋ ɓɛìŋ woò wààŋ, “Nààŋ mìŋ yaà wa kaaiŋ yèè mìŋ yaà hinie e gbɛ̀ɛ̀ ko Dàmakɔ̀, ebɛ̀ŋ e gɔɛɛ hàì dìò tɛɛ e hmɔɔ̀ŋ mɛ̀ɛŋ e yìwìà ko àìjɛnɛ̀ŋ naim dè fiò eim gbàì kɔɔ gbòlòuŋ.

⁷ Mìŋ naŋ sɔ̀ɔ̀ ko dììnaŋ yèè mìŋ naŋ kòmò ke mìè nyùùŋ kè naim woò wààŋ, ‘Sɔɔ̀, Sɔɔ̀, wèè kiìŋ mùŋ yààìm nìmila sùà?’

⁸ Yèè mìŋ naŋ dawè mìàŋ, ‘Ɓòò nàŋ yààùm, Kanaà?’ Yèè ke mìèɛ naŋ woò wààŋ, ‘Miàŋ nàŋ yaà wo Jisɛ̀ e yìwìà ko Naazɔ̀ɛ̀, wo yèɔ mùŋ yaà nìmila sùà.’

⁹ Àŋ felaa nyàŋ yààìm wa kɔɔ nyàŋ naŋ yɛ̀mɛ̀ e gbolòùŋ mɛ̀ɛɛ̀ŋ, kɛɛ àŋ gò wa kòmàŋ kè mìè wò nyùnɔ̀ɔŋ yà wa gbùùyè kò nɛ̀ɛ̀ŋ miìŋ wɔ̀.

¹⁰ Yèè mìŋ naŋ dawè mìàŋ, ‘Kiìŋ mùŋ manaŋ ka nyɛ̀nɛ̀ŋ, Kanaà?’ Wo Kanaà naim woò wààŋ, ‘Yewà dìì yèè muŋ ka ko Dàmakɔ̀, kuŋ wo nyùùŋ doum nàŋ woò kɛ̀ kiìŋ mùŋ do nàŋ nyɛ̀nɛ̀ŋ.’

¹¹ Le fɛɛ̀ mɛ̀ naŋ wa ziilè esàɓù e gbòlòùŋ e hmɔɔ̀ŋ mɛ̀ɛɛ̀ŋ, weètii anyùùŋ nyaŋ yààìm wa maŋjɛ̀wɛ nyàŋ naim kùwò kùàŋ yèè àŋ naim kɔ̀ɔ̀ ko Dàmakɔ̀.

¹² “Wo kenàŋ bà yaà wa ko jawa gbee wii àŋ nyaaŋ wo Ananaayà, wo yèɔ hewa jɔ̀ɔ̀lɔ̀ maŋ Sàwà maŋ wo Dayà naŋ wa kìɛ̀ŋ wo Mòòze màŋ dìì, yèè aŋ Juùù nyaŋ gbiŋ heo wa joo nyàŋ hewa gbòà tɛ̀ɛ̀ weèuŋ.

¹³ Wo Ananaayà naŋ hnè ko nɛ̀ɛ̀ŋ miìŋ yèè wò naŋ woò wààŋ, ‘Wùìya miɔ̀ŋ Sɔɔ̀, yɛ̀mɛ̀ ɓɛìŋ dìì!’ Ko fɛɛ̀feìŋ e fɛɛ̀ mɛ̀ naŋ gbaì yèè mìŋ naŋ ɓɛìŋ yɛ̀mɛ̀ dìì yèè mìŋ nauŋ yɛmɛ̀.

¹⁴ Wo Ananaayà naim woò wààŋ, ‘Wo Dàyà aŋ nèwàènèwe wi nyàŋ wòum tàeɗùù wèè maŋ nyìmàŋ kɛ̀ kiìŋ wò manaŋ maŋ nyɛ̀nɛ̀ŋ. Wò naum tàeɗùù wèè maŋ yɛ̀mɛ̀ wo Ɓɔ̀ìjɔ̀à tɔ̀ɔ̀nyaàuŋ nɔɔ̀ŋ yèè wèè maŋ kòmàŋ wò yaà gbùùyè ke mìè wuŋ biɛ̀.

¹⁵ Mùŋ do nàŋ nɔ̀ŋ wo seì e weèuŋ koɓɛ̀ anyuùŋ kpùuŋ nyàŋ gbiŋ wèè e yèɛ mùŋ naŋ yɛmɛ̀ yèè mùŋ naŋ kòmò lɛ.

¹⁶ Kiìŋ mùŋ yaà fulie? Yewà dìì muŋ nɔ̀ŋ gùaum wèè Dayà juuyà maŋ jùumùum màŋ hakɛ̀ e yìwìà e zòòlo mɔ̀ɛ̀ koɓɛ̀ e deèuŋ nɛ̀.’ ”

Àŋ nyààŋ wo Pɔɔ̀ wèè wo gbòà koɓɛ̀ anyùùŋ nyaŋ fè àŋ Juùù nyaŋ

¹⁷ Wo Pɔɔ̀ naŋ wa ɓɛìŋ woò wààŋ, “Nààŋ tɛɛ̀ naŋ mààŋ, mìŋ naŋ kɛ̀ɛ̀ ko Jùlusɛ̀làm yèè mìŋ naŋ kɔ̀ ko Saaŋ Zòòlò Dayài wèè ka zoolò. Kuŋ mìŋ naŋ gò e gɔ̀à gò e jɛ̀ì,

¹⁸ e gɔ̀à gò e jɛ̀ì bi sùà mìŋ naŋ yɛ̀mɛ̀ wo Kanaà, yèè wò naim woò wààŋ, ‘Biào sùà muŋ yèwà ko Jùlusɛ̀làm! Wò naŋ woò wààŋ esaɓùɛ nàŋ yaà kɛ̀, anyùùŋ nyaŋ naàum kumiè sèè maŋ nyiŋ kìɛ̀ŋ ke mìè seì gbiŋ e nyaàiŋ eim dè.’

¹⁹ Mìŋ naŋ fàsàì mìàŋ, ‘Kanaà, anyùùŋ nyaŋ nyìmàŋ kɛ̀ mìŋ naŋ wa kùwò anyuùŋ zimgbe maŋ sààŋ zòòlò aŋ Juùù nyaŋ dìì yèè mìŋ naŋ ɓùlò anyùùŋ nyaŋ naum wa haawè nyaŋ.

²⁰ Nààŋ àŋ naŋ wa jìwè wo Siiwììŋ, wo seiyìiŋ nɔɔ̀ŋ, mìŋ yaào wa miàŋ bi. Mìŋ naŋ wa pɛɛ kpuumò wèè ka gbònògbònò maŋ dèè kɔ̀ɔ̀ anyùùŋ nyaŋ nauŋ wa jìwè nyaŋ.’

²¹ Kɛɛ wo Kanaà naim woò wààŋ miŋ ka, yèè wò naŋ jɔ̀ɔ̀ ɗààhiì wèè woim tùàŋ maŋ fuɔŋ dii sùà koɓɛ̀ anyùùŋ nyaŋ fè àŋ Juùù nyaŋ.”

²² E faaàŋ naŋ jèè kùmìè e yèɛ wo Pɔɔ̀ yaà woo lɛ̀, e jèèsùà wo tɛɛ̀ woò. Yèè anyùùŋ nyaŋ naŋ tɔ̀ɔ̀tù kpàaŋ nyààŋ, “Jiwàuŋ, wo fè tɛ̀ɛ̀ wèè wo nɔ̀ŋ wɔ̀ŋ nyiiŋ gèeɔ̀ sùà è ɗuunyaàŋ.”

²³ Àŋ naŋ ɓɛìŋ tɔ̀ɔ̀tù kpàaŋ. Àŋ naŋ gè maŋ kùmà nyiŋ màŋ aŋ miŋ jòòwò fùùŋ àŋ gè mìŋ kìlèkile, àŋ tawe e buunùuɛ̀ àŋ gbiɛŋ fùùŋ.

²⁴ Wo kànà aŋ kààlòòɗùà anyùùŋ ko Luùm nyaŋ naŋ wòò aŋ kààlòòɗùàuŋ nyàŋ kɛ̀ aŋ koà wo Pɔɔ̀ ko gbòòkùàŋ aŋ kààlòòɗùà nyaŋ, yèè wò naŋ nyiŋ woò wààŋ aŋ ɓùlàuŋ wèè aŋ nyɛ̀nɛ̀ŋ maŋ nɔnɔŋ tùàŋ kɛ̀ wèè kiìŋ aŋ Juùù nyaŋ yàaùŋ yɛi gùlìè dìì.

²⁵ Kɛɛ nààŋ aŋ kààlòòɗùà nyaŋ nauŋ wa dèkè wèè auŋ ɓùlà, wo Pɔɔ̀ naŋ dàwè wo nyùùŋ gbèè aŋ kààlòòɗùà nyaŋ siao wa wɔ̀ wààŋ, “Ke sàwàa naiŋ gè nyààŋ diɛŋ wèè naŋ ɓùlà wo jɔ̀à kòmàŋ anyùùŋ ko Luùm nyaŋ bà paŋgàà nìŋ koàuŋ ke sàwàa fɛɛ̀feìŋ wèè nauŋ gbaì?”

²⁶ Nààŋ wo nyùùŋ gbèè aŋ kààlòòɗùà wɛɛ̀ naŋ tɛɛ̀ kòmò, wò naŋ kɔ̀ koɓɛ̀ wo kànà aŋ kààlòòɗùà nyaŋ yèè wò nauŋ woò wààŋ, “Wo felaa wɛɛ̀ yaà wo Luùm nyuuŋ. Kiìŋ mùŋ do nàŋ nyɛ̀nɛ̀ŋ?”

²⁷ Yèè wo kànà aŋ kààlòòɗùàa naŋ kɔ̀ koɓɛ̀ Pɔɔ̀i yèè wò nauŋ dawè wààŋ, “Wòoim, mùŋ yaà wo Luùm nyuuŋ?” Wo Pɔɔ̀ naŋ fasàì wààŋ, “Hɛ̀ɛɛ̀ŋ, mìŋ yaà wo Luùm nyuuŋ.”

²⁸ Wo kànà aŋ kààlòòɗùà nyaŋ naŋ fàsàì wo Pɔɔ̀ wààŋ, “Mìŋ naŋ wa pààwà e nɛɛnɛŋ zimgbe wèè ka nɔ̀ŋ wo Luùm nyuuŋ.” Kɛɛ wo Pɔɔ̀ naŋ nauŋ woò wààŋ, “Mìŋ yaà wo jɔ̀à kòmaŋ kɛnɛ wèè wɔŋ fùɔ̀ŋ anyùùŋ ko Luùm nyaŋ.”

²⁹ Aŋ kààlòòɗùà nyaŋ yaà wa kɔɔyɛ wèè aŋ ɓùlà wo Pɔɔ̀ yèè auŋ gbìàŋ maŋ mààŋdàwè nyaŋ naŋ kɛ̀ɛ̀ maŋjɛ̀wɛ fiò. E jùù naŋ nyɛ̀nɛ̀ŋ wo kànà aŋ kààlòòɗùà nyaŋ nààŋ wò naŋ jàà jii kɛ̀ wo naŋ sìè wo jɔ̀à kùmìàŋ wɔŋ fùɔ̀ŋ anyùùŋ ko Luùm nyaŋ bà maŋ jɔ̀ɔɔ.

Wo Pɔɔ̀ yaà anyùùŋ gbèègbèè aŋ Juùù nyaŋ fɛɛ̀feìŋ

³⁰ Kɛɛ wɔŋ niìsìaà bàa wo kànà aŋ kààlòòɗùà nyaŋ manaŋ wa wo nyìmàŋ e keì titiɛ̀ yèè esaɓùɛ anyùùŋ gbèègbèè aŋ Juùù nyaŋ naŋ wa jàà maŋ keì mɛɛ̀ŋ wo Pɔɔ̀ ɗì lɛ. Yèè wò naŋ gè wo Pɔɔ̀ maŋ jɔ̀ɔɔ màŋ, wò naŋ nyààŋ aŋ kànà sìèfèìŋ zòòlo nyàŋ yaà anyùùŋ gbèègbèè aŋ Juùù nyaŋ gbiŋ e dèène sùà. Kpeiŋ wò naŋ nyiŋ hìɛ̀ŋ wo Pɔɔ̀ wo nyiŋ wuŋ sèèlè fɛɛ̀feìŋ.