Nyɛ̀nɛ̀ŋ 19 - WƆŊ FƐ̀Ì EBÒ SÌÀŊ DAYÀA

Wo Pɔɔ̀ naŋ wòò Ebò Siaàŋ ko Ɛfesɔ̀

¹ E teengaà wo Àpolò yaà wa ko Kɔliìŋ lɛ, wo Pɔɔ̀ naŋ kɔ̀ɛ̀ maŋ kpàlàùŋ kpàlàùŋ Eesìà maŋ sùà yèè wò naŋ hnè ko Ɛfesɔ̀. Kuŋ wò naŋ wa mɛ̀ɛ̀ŋ anyùùŋ màŋjɛ̀wɛ̀ Jisɛ̀ nyaŋ bà.

² Wo Pɔɔ̀ naŋ nyiŋ dawè wààŋ, “Wo Jìnàŋ Nɛɛmaàŋ wòiŋ wa dèyà diɛŋ nààŋ nìŋ naŋ kìlè anyuùŋ hààwe koɓɛ̀ Jisɛ̀i?” Àŋ naŋ fasàì nyààŋ, “Kpele, kòò è kòmòìŋ pɛɛ ngèè è kèè wò Jìnàŋ Nɛɛmaŋ.”

³ Yèè wo Pɔɔ̀ naŋ nyiŋ dawè wààŋ, “Kɛ̀ dièsɔa nìŋ naŋ wa nɔ̀ŋ gùaiŋ?” Àŋ nauŋ fasàì nyààŋ, “E gùo kiiɛ̀ wo Jɔ̀ɔŋ naŋ wi kaà lɛ.”

⁴ Wo Pɔɔ̀ naŋ nyiŋ fasàì wààŋ, “Wo Jɔ̀ɔŋ naŋ wa gùò anyùùŋ wèè aŋ fè maŋ tùwo naanààŋ nyiŋ màŋ jɛwɛ yèè aŋ kìlà koɓɛ̀ Dayài. Kɛɛ wò naŋ nyiŋ wa ɓɛìŋ woò wààŋ wo nyùùŋ bà kòò wò yaà hinie, yèè aŋ sìà e hààwe nyiŋ nɛ̀ wo nyùùŋ bi sùà. Wo Jisɛ̀ nàŋ yaà wo nyùùŋ bi wo yèɔ wo Jɔ̀ɔŋ yaà wa wòò e kiiuŋ wɔ̀.”

⁵ E teengaà àŋ naŋ wa tɛɛ̀ kòmò lɛ, àŋ naŋ wa nɔ̀ŋ gùa nyiŋ e dèè Kanaà Jisɛ̀ diɛŋ.

⁶ Nààŋ wo Pɔɔ̀ naŋ nyiŋ wa gbùwò maŋ kùàŋ diɛŋ, wo Jìnàŋ Nɛɛmaàŋ naŋ nyiŋ dèyè diɛŋ. Kpeiŋ àŋ naŋ gbòò ke mìè Dayàa maŋ kaìŋ joo sùà.

⁷ Aŋ gbiŋ àŋ yaà wa aŋ kpàkòò zììyà jɛ̀wɛ̀ tìyèe.

⁸ Wo Pɔɔ̀ naŋ ɓèmè maŋ wàà taai wò yaà kɔ̀ɔ̀yɛ̀ ko sààŋ zòòlò aŋ Juùù nyaŋ ko gbùùyè anyùùŋ nyaŋ kɔɔ ke jii nyingè sùà e nyaàiŋ dè e Kànà Dayàa. Wò yaà wa kààmè e ɗewe wèè wo kìlà nyiŋ koɓɛ̀ Dayài.

⁹ Kɛɛ aŋ bà nyiŋ naŋ wa nyìngè maŋ nùŋ yèè aŋ naŋ wa gè maŋhɛɛ wèè aŋ niŋ haawè. Àŋ hewa wòò maŋ keì naanààŋ anyùùŋ nyaŋ fɛɛ̀feìŋ e nyaàiŋ dè ke Dòmàŋ Kanaà Jisɛ̀. Wo Pɔɔ̀ naŋ nyiŋ wa jòò yèè wò naŋ ɓèmè anyùùŋ màŋjɛ̀wɛ̀ Jisɛ̀ nyaŋ yèè aŋ naŋ kɔ̀ ko zɛ̀mɛ̀ɛ̀ŋ gbèè Talanùi ko yèi wò hewa gbòà ko nɛ̀ɛ̀ŋ nyiŋ niìŋ ke ɗɔɔ gbiŋ lɛ̀. Ko zɛmɛɛŋ bì kuŋ wo Talanù hewa gbòà koɓɛ̀ anyunùuŋ nyàŋ.

¹⁰ Wo Pɔɔ̀ naŋ wa kɔ̀ɔ̀ ke nyɛ̀nɛŋ yɛɛ̀ feìŋ wèè maŋ dòà tìyèe, e jèèsùà aŋ Juùù nyaŋ gbiŋ yèè anyùùŋ nyaŋ fè àŋ Juùù nyaŋ maŋ kpàlàùŋ kpàlàùŋ Eesìà maŋ sùà aŋ kòmàŋ ke mìè gbìàŋ wo Kanaà Dayà.

Aŋ jɔ̀àfèlàà Siivà nyaŋ

¹¹ Wo Dayà naŋ wa kìɛ̀ŋ wo Pɔɔ̀ e gààŋ wèè wo nyɛ̀nɛ̀ŋ maŋ kèè mèè gbeegbèè.

¹² Anyùùŋ nyaŋ bà nyiŋ naŋ wa ɓèmè maŋ pisì yaà maŋ deè kpàa faa dìkìà tɛɛ maŋ yè maŋ wo Pɔɔ̀ naŋ wa mɛŋlɛ̀ɛ̀ŋ maŋ, yèè aŋ naŋ miŋ kɔɔ̀ aŋ miŋ hàà wo nyùnɔ̀ɔŋ gbiŋ wò yaà wa siinyɛŋ wɔ̀ diɛŋ, yèè wò naŋ jòèyè, yèè aŋ jinàŋ naanààŋ nyaŋ naŋ wa fòlò anyùùŋ nyaŋ aŋ jinàŋ bì yaà wa maŋjɛ̀wɛ nyàŋ ko sùà.

¹³ Aŋ Juùù nyaŋ bà nyiŋ naŋ tɔ̀ɔ̀tù kà maŋ tàta màŋ sùà àŋ yaà kààmè ɗewe wèè aŋ gè aŋ jinàŋ naanààŋ anyùùŋ maŋjɛ̀wɛ e dèè Kanaà Jisɛ̀ diɛŋ. Àŋ naŋ wa wòò aŋ jinàŋ naanààŋ nyaŋ nyààŋ, “Fòlaìŋ anyùùŋ nyaŋ ko sùà e dèè wo Jìsɛ̀ guùŋ wii wo Pɔɔ̀ naŋ yɛi wòò kiiuŋ wo sùà!”

¹⁴ Aŋ wùìyà nyùùŋ nɔɔnɔŋ letìyèe, aŋ jɔ̀àfèlàà wo Juùù nyuuŋ bà àŋ nyaaŋ Siivà wo kànà sìèfèìŋ zòòlo gbeeɔ̀, nàŋ yaà wa tɛɛ̀ nyinie.

¹⁵ Kɛɛ wo jinàŋ naanààaŋ naŋ nyiŋ wa fasàì wààŋ, “Kà nyìmàŋ wo Jisɛ̀, yèè kà nyìmàŋ wo Pɔɔ̀, kɛɛ ɓòò nàŋ yààìŋ?”

¹⁶ Kpeiŋ wo felaaà kuwa wa wo jinàŋ naanààaŋ wɔ̀ naŋ tii woò, wò naŋ nyiŋ gbùwò ke gùuŋ yèè wò naŋ nyiŋ ɓùlò tɛ̀ɛ̀, esaɓù kɛ̀ wò kuwa wa gààŋ. Àŋ naŋ wa dùɔ̀ŋ aŋ fòlà ko saaìŋ, aŋ kòà ke kpanya yaà manɛ̀ŋjèla.

¹⁷ Yèè anyùùŋ nyaŋ gbiŋ joà wa ko Ɛfesɔ̀ nyaŋ naŋ tɛɛ̀ kòmò, e hààwè aŋ Juùù yèè anyùùŋ nyaŋ fè àŋ Juùù nyaŋ. Yèè e jùù naŋ sɛ̀ɛ̀ aŋ gbiŋ e kɔɔo sùà, yèè aŋ gbiŋ naŋ wa jòòwò e dèè wo Kanaà Jisɛ̀.

¹⁸ Anyuùŋ hààwe nyàŋ zimgbe nyiŋ naŋ wa hnè, yèè àŋ naŋ ngàà tɔ̀ɔ̀tù wòò maŋ keì naanààŋ maŋ àŋ yaà wa nyinie màŋ.

¹⁹ Anyùùŋ nyaŋ bà nyiŋ yaà wa nyìnìè maŋ keì naanààŋ e sɛɛ̀ŋ sùà nyaŋ naŋ hìɛ̀ŋ maŋ fɛi nyiŋ màŋ yèè àŋ naŋ miŋ sùɔ̀ŋ anyùùŋ nyaŋ gbiŋ fɛɛ̀feìŋ. E ɓàà maŋ fɛi mɛɛ̀ŋ wa ɓɛ̀nɛ̀ŋ nɔ̀ŋ sɔ̀ngɔ̀ e pàtaà taasùùŋ kpɛ̀ɛ̀ùŋ tìyèe jɛ̀wɛ̀ zììyà (50,000) e nɛɛnɛŋ fua sùà.

²⁰ Kpeiŋ ke mìè Kanaà Dayà naŋ wa ɓaayè yèè kè naŋ ngèè ɓɛìŋ kɛ̀ɛ̀nɛ̀ŋ gààŋ e nìàŋ e gɔuɛ̀.

Ke gbòàa ko Ɛfesɔ̀

²¹ Nààŋ maŋ keì mɛɛ̀ŋ gbiŋ naŋ wa kaàiŋ, wo Pɔɔ̀ naŋ wa ɗewè wo jinàuŋ nɔɔ̀ŋ sùà wèè wo jaamè anyùùŋ nyaŋ ko Mɛ̀sèdonià yèè ko Àkaayà nààŋ wò yaà wa kɔ̀ɔ̀yɛ̀ ko Jùlusɛ̀làm. Wo Pɔɔ̀ naŋ wa woò wààŋ, “Sèè mìŋ yewe kuii mìŋ do nàŋ kɔ̀ ko Luùm.”

²² Kpeiŋ wò naŋ tùɔ̀ŋ anyuùŋ tòmo dàwiuŋ nyàŋ àŋ tìyèe, wo Timetè yaà wo Ɛ̀lesitɔ̀ ko Mɛ̀sèdonià. Kɛɛ wuŋ bi naŋ wa jòò ko Eesìà wèè e teenga kpàa bà.

²³ E teenga bi sùà e gbɔ̀ɔ gbee naŋ wa sɔ̀ɔ̀ ko Ɛfesɔ̀ e nyaàiŋ dè ke Dòmàŋ Kanaà Jisɛ̀ɛ.

²⁴ Wo felaa bà yaào wa àŋ nyaaŋ wo Dìmɛtù. Wò yaà wa wo zòòbuu wèè manɛ̀ŋ bàànè e kaiŋfua. Wuŋ nàŋ hewa bànè ke saaŋ zòòlò dàyà Atɛmèɔ. Anyùùŋ nyaŋ toomàuŋ wa dìì nyaŋ hewa nyɛ̀nɛ̀ŋ e nɛɛnɛŋ zimgbe.

²⁵ Wo Dìmɛtù naŋ wa nyààŋ anyùùŋ nyaŋ gbiŋ yaà nyiŋ hewa nyɛ̀nɛ̀ŋ e tòmò guùŋ nɛ nyàŋ koɓɛ̀ guùŋ, yèè wò naŋ nyiŋ woò wààŋ, “Dàwim nyàŋ, nàŋ nyìmàŋ kɛ̀ e yìwìà e tòmo lɛɛ̀ sùà è nyinìàŋ wɔŋ nyiiŋ gèe siaŋ wiɔ̀.

²⁶ Yèè nàŋ niŋ naàŋ yɛmɛ̀ yèè nàŋ niŋ kòmàŋ nyɛ̀iŋ bi tɛ̀ɛ̀ e nyaàiŋ dè e yèɛ wo felaa wɛɛ̀, wo Pɔɔ̀ yaà woo koɓɛ̀ anyuùŋ zimgbe lɛ̀. Yèè wo fè nɔŋ wòò è keì lɛɛ̀ kò Ɛfesɔ̀ kuŋ guùŋ, kɛɛ ebɛ̀ŋ maŋ tàta màŋ gbiŋ sùà ko Eesìà. Wò naŋ nyɛ̀nɛ̀ŋ anyùùŋ nyaŋ aŋ nyìmàŋ kɛ̀ aŋ dayà nyaŋ anyuùŋ kpùuŋ baanàŋ le sìwè nyaŋ aŋ fè àŋ dayà kɛnɛ.

²⁷ Anyùùŋ nyaŋ gbiŋ do nàŋ tɔ̀ɔ̀tù maŋ keì naanààŋ wòo e nyaàiŋ dè e tòmo wilɛ̀. Anyùùŋ nyaŋ do nàŋ hɔ̀ànè e ɓɛ̀ɛ̀jàa kìɛŋ koɓɛ̀ ke saaŋ zòòlò dàyà Atɛmèɔ, wo yèɔ àŋ zoolà ko Eesìà yaà e ɗuunyaàŋ gbiŋ sùà wɔ. Anyùùŋ nyaŋ do nàŋ fè wo dayà gbee wiɔ̀ jɛwɛ!”

²⁸ Nààŋ anyuùŋ tòmo dàwiuŋ nyàŋ naŋ tɛɛ̀ kòmò, àŋ naŋ wa tuù yèè àŋ naŋ tɔ̀ɔ̀tù kpàaŋ nyààŋ, “Wo dayà gbeeɔ̀ nàŋ yaà wo Atɛmè, wo dayàa wèè anyùùŋ Ɛfesɔ̀ nyaŋ!”

²⁹ E teenga kpuu sùà anyùùŋ nyaŋ gbiŋ ko jawaì naŋ wa dàà ke gboà gbee. Yèè anyùùŋ nyaŋ bà nyiŋ naŋ kùwò wo Gayɔ̀ yaà wo Àlètakɔ̀, yèè aŋ naŋ nyiŋ kɔ̀ɔ̀ zɛ̀mɛ̀ɛ̀ŋ dèèneì. Aŋ fèlàà tìyèe bi naŋ wa dè wo Pɔɔ̀ maŋjɛ̀wɛ e yìwìà ko Mɛ̀sèdonià. Kpeiŋ anyùùŋ nyaŋ gbiŋ e faaàŋ sùà naŋ dùɔ̀ŋ aŋ kà koɓɛ̀i àŋ yaà wa kɛ̀ɛ̀nɛ̀ŋ sùà e dèènè jawaà lɛ.

³⁰ Wo Pɔɔ̀ wuŋ bi manaŋ wa wo ka wo gbòà koɓɛ̀ anyùùŋ nyaŋ, kɛɛ anyuùŋ hààwe nyàŋ gòuŋ wa nyimèè wèè woo ka.

³¹ Anyùùŋ ɓììɓìì fuɔŋ nyàŋ bà yaà wa anyuùŋ mɔ̀ɔ̀nɔŋ koɓɛ̀ Pɔɔ̀i, àŋ nauŋ tùɔ̀ŋ ke miè gbìaŋ yèè àŋ nauŋ pɔwɔ̀ wèè kɛ̀ ɓɔ̀ wò ka wò do tɔ̀ɔ̀ wuŋ bi kò zɛ̀mɛ̀ɛ̀ŋ dèèneì.

³² Anyùùŋ nyaŋ bà nyiŋ e dèèneɛ̀ sùà yaà wa wòò e keì joo, yèè aŋ bà nyiŋ naŋ woò è gbà màànààŋ àŋ manaŋ lɛ̀. Maŋ jii naŋ wa dììyè anyùùŋ nyaŋ gbiŋ, yèè aŋ zimgbe nyiŋ nyimààŋ wa kɛ̀ wèè kiìŋ àŋ naŋ wa deenè.

³³ Anyùùŋ gbèègbèè aŋ Juùù nyaŋ zimgbe nyiŋ naŋ wa dùùlò wo Àlèzanàŋ e faaàŋ feìŋ, yèè àŋ nauŋ woò kɛ̀ kiìŋ wò woà. Wo Àlèzanàŋ naŋ wa jòòwò kùàŋ fùùŋ wèè aŋ kiɛ̀uŋ e ɗeweɛ̀ wèè wo kiɛ̀ŋ ke jii gbài wèè e yèɛ yaà wa kaaiŋ lɛ̀.

³⁴ Kɛɛ nààŋ àŋ nauŋ wa jàà jii kɛ̀ wò yaà wo Juùù nyuuŋ, aŋ gbiŋ naŋ kpààŋ sɛiŋ nyààŋ, “Wo dayà gbeeɔ̀ nàŋ yaà wo Atɛmè, wo dayàa wèè anyùùŋ Ɛfesɔ̀ nyaŋ!”

³⁵ Ko diemeì, wo nyuùŋ sìngà maŋ fɛ̀ì jawaà naŋ nyɛ̀nɛ̀ŋ anyùùŋ nyaŋ naŋ hɔ̀ànè kpàaŋ, yèè wò naŋ nyiŋ woò wààŋ, “Nyùnòò Ɛfesɔ̀ nyaŋ, anyùùŋ nyaŋ gbiŋ àŋ nyìmàŋ kɛ̀ ko jawa gbeeì Ɛfesɔ̀ nàŋ yaà nyuùŋ tùnìàŋ wo dayà gbeeɔ̀ Atɛmè, yaà ke duò titiɛ̀ naŋ wa fòlò ko àìjɛnɛ̀ŋ kè naŋ sɔ̀ɔ̀ yɛ.

³⁶ Wo nyùùŋ gbiŋ fè tɛɛ̀ ɓɛ̀nɛ̀ŋ gè màŋhɛɛ. Weètii, gɔ̀aìŋ maŋ jiiŋ màŋ dìì yèè ɓɔ̀ nìŋ nyɛ̀nɛ̀ŋ è kèè ɓàaɓàa gbiŋ.

³⁷ Nìŋ naŋ kià hìɛ̀ŋ anyùùŋ nyɛɛ̀ŋ jòòpɛɛ aŋ gò wòò è keì naanààŋ wèè kè sààŋ zòòlò Atɛmèɛ ɔ̀ɔ̀ aŋ wòò màŋ mìè ɓɛ̀ɛ̀pɔ̀ɔ wèè wò dayà wiɔ̀.

³⁸ Sèè wo Dìmɛtù yèè anyuùŋ tòmouŋ nyàŋ kɛɛnɛ̀ŋ e keì gbiŋ wèè aŋ felaa nyɛɛ̀ŋ, kòò è kùwàìŋ anyuùŋ gbàì maŋ keì nyaŋ yèè maŋ ɗɔ̀ɔ̀ tòmo wèè ko sààŋ sàwài, tɔ̀ aŋ koào e zawè nyiŋ nɛ̀.

³⁹ Kɛɛ sèè nìŋ kɛɛnɛ̀ŋ e keì bà è nie tii, kɛ̀ sɔɔ̀ e nɔ̀ŋ wòo niŋ ke sàwà diɛŋ aŋ màmànkùmɛ̀ŋ fuɔɔ̀ŋ fɛɛ̀feìŋ.

⁴⁰ Àŋ wi weè ɓɛ̀nɛ̀ŋ gbùwà e keì ɗì wèè e gbɔ̀ɔ lɛɛ̀ nàaŋ ɗɔɔ yɛɛ̀, yèè e naiŋ weè kɛ̀ɛ̀nɛ̀ŋ kè kàfaì! E fèìŋ ɓɛ̀nɛ̀ŋ tɔ̀ɔ̀ èsaɓù sìàŋ wèè kè gbòà yɛɛ̀.”

⁴¹ Nààŋ wò naŋ tɛɛ̀ kpɛ̀ɛ̀yɛ̀ wòo, wò naŋ wòò anyùùŋ nyaŋ wèè aŋ ka.