Nyɛ̀nɛ̀ŋ 18 - WƆŊ FƐ̀Ì EBÒ SÌÀŊ DAYÀA

Wo Pɔɔ̀ jààmè anyùùŋ nyaŋ ko Kɔliìŋ

¹ Eɓìèmàŋjɛ̀wɛ̀ tɛɛ̀, wo Pɔɔ̀ naŋ yèwè ko Atɛ̀ìŋ yèè wò naŋ kɔ̀ ko Kɔliìŋ.

² Kuŋ wò naŋ wa mɛ̀ɛ̀ŋ wo Juùù nyuuŋ bà àŋ nyaaŋ wo Àkuilà, wo jɔ̀à kùmìàŋ ko Pɔuŋtɔ̀. Wo Àkuilà yèè wo jawèuŋ nɔɔ̀ŋ Pɛ̀silià naŋ nɔŋ hnè mùnèè tɛɛ nɛɛ̀ŋ e yìwìà ko Etelè, esaɓù kɛ̀ wo Kànà fuɔɔ̀ŋ wèè ko Luùm wo Kulɔdiɔ̀ naŋ woò wààŋ aŋ Juùù nyuuŋ nyàŋ gbiŋ aŋ yèwà ko Luùm. Wo Pɔɔ̀ naŋ wa kɔ̀ ko jààmè wo Àkuilà yèè wo Pɛ̀silià.

³ Wo Àkuilà yaà wa wo nyuùŋ nyɛ̀lɛ̀ maŋ vààyà, yèè wo Pɔɔ̀ naŋ nɔ̀ŋ ko nɛ̀ɛ̀ŋ nyiŋ niìŋ, yèè yaà nyiŋ naŋ tòòmò koɓɛ̀ guùŋ.

⁴ Wo Pɔɔ̀ hewa gbòà koɓɛ̀ aŋ Juùù nyaŋ yèè anyùùŋ nyaŋ fè àŋ Juùù nyaŋ ko sààŋ zòòlò aŋ Juùù nyaŋ maŋ Ɗɔ̀ɔ̀ Zòòlò aŋ Juùù nyaŋ diɛŋ wèè aŋ kɛɛnɛ̀ŋ e hààwe wo Kanaà Jisɛ̀ sùà.

⁵ Kɛɛ nààŋ wo Silà yaà wo Timetè naŋ kɛ̀ɛ̀ maŋjɛ̀wɛ e yìwìà ko Mɛ̀sèdonià, e tòmò Pɔɔ̀ɛ wò yaà wa nyinie lɛ̀ nàŋ yaà ke mìè gbìàŋ Dayàa gbòa koɓɛ̀ aŋ Juùù nyaŋ, kɛ̀ wo Jisɛ̀ nàŋ yaà wo Kulaìɔ wo Dayà naŋ tàeɗùù wɔ wèè wo hìàŋ e jòèye koɓɛ̀ anyùùŋ nyaŋ e ɗuunyaàŋ.

⁶ Ko diemeì, anyùùŋ nyaŋ nauŋ gììyè maŋhɛɛ yèè àŋ nauŋ fè maŋ mìè ɓɛ̀ɛ̀pɔ̀ɔ. Kpeiŋ wo Pɔɔ̀ naŋ gbùmò e buunùuɛ̀ maŋ dèè kɔɔuŋ màŋ yèè wò naŋ nyiŋ tɔ̀ɔ̀ maŋ kùàŋ wò naŋ woò wààŋ, “Sìaìŋ nyɛ̀iŋ bi jii wèè e yèɛ gbiŋ doiŋ nàŋ kaaìŋ lɛ, e naàŋ nɔ̀ŋ è kpàŋ è kɔɔim è do nàŋ nɔ̀ŋ e kèì ɗì maŋ sɛ̀ìŋ nyɛ̀iŋ bi màŋ! Yèè niŋ naìm sìè jii. E yìwìà nàaŋ mìŋ do nàŋ nɔ̀ŋ gbùùyè ke mìè Dayàa koɓɛ̀ anyùùŋ nyaŋ fè àŋ Juùù nyaŋ.”

⁷ Wo Pɔɔ̀ naŋ nyiŋ jòò yèè wò naŋ kɔ̀ wèè wo jòò ko gbòò wo felaa bà àŋ nyaaŋ wo Taitɔ̀ Jɔtù. Wo felaa wɛɛ̀ fè wa wò Juùù, kɛɛ wò hewa zòòlò Dayà yèè ko gboouŋ niìŋ naŋ wa gbɛ̀ɛ̀ ke sààŋ zòòlò aŋ Juùù nyaŋ.

⁸ Wo Kulesipɔ̀ naŋ yaà wa wo sìèfèìŋ ko sààŋ zòòlò aŋ Juùù nyaŋ ko Kɔliìŋ. Wuŋ yèè anyùùŋ nyaŋ gbiŋ ke kpoouŋ nɛɛ̀ŋ sùà naŋ wa sìè e hààwe nyiŋ nɛ̀ wo Kanaà Jisɛ̀ sùà. Anyuùŋ zimgbe e yìwìà ko Kɔliìŋ naŋ wa kòmò ke miè gbìaàŋ, yèè anyùùŋ nyaŋ gbiŋ naŋ wa hààwè wo Kanaà Jisɛ̀ nyaŋ naŋ wa nɔ̀ŋ gùa nyiŋ.

⁹ Wɔŋ dùùm guùŋ wo Pɔɔ̀ naŋ gò e gɔa, yèè e gɔagòo bi sùà wo Kanaà nauŋ woò wààŋ, “E jùù ɓɔ̀ è nyɛ̀nɛ̀um wèè kè mìè Kanaà gbòa kòɓɛ̀ ànyùùŋ nyaŋ, yèè ɓɔ̀ mùŋ hɔnè nyiŋ gbòa.

¹⁰ Kòò mìŋ yààùm maŋjɛ̀wɛ, wo nyùùŋ gbiŋ naàum gbùwò kè gùuŋ wèè woum nɛɛmùŋ, esaɓù anyùùŋ nyaŋ zimgbe nyiŋ ko jawa gbee àŋ yaà anyunùim.”

¹¹ Yèè e teengaà wo Pɔɔ̀ naŋ wa nɔ̀ŋ ko Kɔliìŋ lɛ è yaà wa wɔŋ dòà guùŋ gbànaŋ, wò yaà kàà sùà anyùùŋ nyaŋ ke mìè Dayàa.

¹² Kɛɛ nààŋ anyùùŋ nyaŋ naŋ wa nyɛ̀nɛ̀ŋ wo Gàliò wo kana wèè wɔŋ fùɔ̀ŋ Àkaayàa, anyùùŋ gbèègbèè aŋ Juùù nyaŋ bà naŋ wa jàà ke gbòò yèè àŋ naŋ kùwò wo Pɔɔ̀ yèè àŋ nauŋ kɔ̀ɔ̀ ko fɛ̀ɛ̀fèìŋ wo kanaà ko sààŋ sàwài.

¹³ Àŋ naŋ wòò wo Gàliò nyààŋ, “Wo felaa wɛɛ̀ yaà kààmè ɗewe wèè wo nyɛ̀nɛ̀ŋ anyùùŋ nyaŋ gbiŋ àŋ zòòlò Dayà e ɗeweɛ̀ maŋ sàwà wi màŋ gò tɔɔ̀ lɛ.”

¹⁴ Wèè paŋ wo Pɔɔ̀ tɔɔtù wa gbòa, wo Gàliò naŋ wòò aŋ Juùù nyaŋ wààŋ, “Sèè è nɔ̀ŋ wèè e keì naanààŋ nyɛ̀nɛŋ ɔ̀ɔ̀ e keì naanààŋ titi e yèɛ nààŋ wo felaa wɛɛ̀ naŋ nyɛ̀nɛ̀ŋ, mìŋ kuwa ka niŋ kumiàŋ tɛ̀ɛ̀ e hàì ko dìaì.

¹⁵ Kɛɛ sèè è nɔ̀ŋ e kèì maŋhɛɛ ge e nyaàiŋ dè e nɛ̀ɛŋ wo nyùùŋ bà naŋ woò lɛ yèè maŋ dèè anyùùŋ bà, yèè e làngì maŋ sàwàiŋ màŋ, kɛ̀ nyɛ̀iŋ bi bàneìŋ niŋ sùà. Miŋ naàŋ nɔ̀ŋ wò nyuùŋ gbài wèè màŋ keì mààŋ mɛɛ̀ŋ.”

¹⁶ Wò naŋ nyɛ̀nɛ̀ŋ aŋ kààlòòɗùà nyaŋ aŋ nyiŋ nyìmàŋ aŋ nyiŋ gè kò sààŋ sàwài.

¹⁷ Nààŋ tii naŋ kaaìŋ, aŋ Juùù nyaŋ naŋ kùwò wo Sòtiniìŋ, wo sìèfèìŋ ko sààŋ zòòlò aŋ Juùù nyaŋ, yèè àŋ nauŋ ɓùlò kè sààŋ sàwàa feìŋ. Kɛɛ wo Gàliò gò wa ngèè pɛɛ kpɛɛ̀ŋ wèètii.

Wo Pɔɔ̀ kɛ̀ɛ̀ maŋjɛ̀wɛ ko Aŋtiɔ̀

¹⁸ Wo Pɔɔ̀ naŋ nɔ̀ŋ ko Kɔliìŋ wèè e teenga kpàa bà, yèèngàà wò naŋ fè anyuùŋ hààwe nyàŋ ke miè dìàmaŋ yèè wò naŋ kɔ̀ ko Siilià. Nààŋ wò yaà wa kɔɔyɛ, wo Pɛ̀silià yèè wo Àkuilà nauŋ wa dè maŋjɛ̀wɛ àŋ naŋ kɔ̀ ko Sìŋkulià. Kɛɛ wèè paŋ aŋ sɛɛ̀ wa wɔŋ meeèɔ sùà aŋ ka, wo Pɔɔ̀ naŋ wa dòò e ɗìuŋ nɛ̀ esaɓù kɛ̀ wò naŋ wa jɔ̀ɔ̀ e ɗààhiì koɓɛ̀ Dayài.

¹⁹ Nyiŋ taai àŋ naŋ hàì ko Ɛfesɔ̀, kuŋ wo Pɔɔ̀ naŋ wa jòò wo Pɛ̀silià yèè wo Àkuilà. Kpeiŋ wò naŋ kɔ̀ ko sààŋ zòòlò aŋ Juùù nyaŋ wèè wo gbòà koɓɛ̀ anyùùŋ nyaŋ.

²⁰ Anyùùŋ nyaŋ nauŋ wa dawè wèè wo nɔ̀ŋ nyiŋ le gòlò wèè maŋ ɗɔɔ kpàa, kɛɛ wo gò wa nyimèè.

²¹ Wèè paŋ wo jòà nyiŋ wa wo ka, wò naŋ nyiŋ woò wààŋ, “Sèè wo Dayà nyimààŋ, mìŋ do nàŋ kɛ̀ɛ̀ ko nɛ̀ɛ̀iŋ niìŋ.” Yèè wò naŋ sɛ̀ɛ̀ wɔŋ meeèɔ sùà wò naŋ yèwè ko Ɛfesɔ̀ yèè wò naŋ kɔ̀ ko Sesèlià.

²² Nààŋ wo Pɔɔ̀ naŋ hàì ko Sesèlià, wò naŋ kɔ̀ yèè wò naŋ zùùmò ke gbòò anyuùŋ hààwe nyàŋ, yèè wò naŋ kɔ̀ ko Aŋtiɔ̀.

²³ Wò naŋ kuii nɔ̀ŋ wèè e teenga kpàa bà, yèè wò nao yèwè wo jààmè maŋ kpàlàùŋ kpàlàùŋ zimgbe wɔŋ fùɔ̀ŋ anyùùŋ Gàlatìà nyaŋ yaà wɔŋ fùɔ̀ŋ Fɛgìàa sùà. Wò naŋ wa kpùùmò anyuùŋ hààwe nyàŋ koɓɛ̀ bi wèè aŋ kɛɛnɛ̀ŋ gààŋ e hààwe nyiŋ nɛ̀ sùà.

Wo Àpolò naŋ wa hnè ko Ɛfesɔ̀ yèè ko Kɔliìŋ

²⁴ E teenga lii sùà wo Juùù nyuuŋ bà e yìwìà ko Àlèzandilà àŋ nyaaŋ wo Àpolò naŋ wa hnè ko Ɛfesɔ̀. Wò hewa gbòà tɛ̀ɛ̀ e kìlà wò naŋ wa nyìmè e zimgbe niŋ wɔŋ Fɛ̀ì Dayàa sùà.

²⁵ Wò naŋ wa gbeè yèè wò naŋ nyìmè e zimgbe niŋ e nyaàiŋ dè ke Dòmàŋ Kanaà, yèè wò naŋ wa gbòò e nyɛ̀ìnyɛ̀ìŋ gbee e yìwìà wo jinàaŋ sùà yèè wò naŋ kàà e tɔ̀ɔ̀nyaàŋ e nyaàiŋ dè wo Jisɛ̀. E ɗewe gbio sùà, wò naŋ wa nɔŋ nyìmè e kèè e ɗeweɛ̀ wo Jɔ̀ɔŋ guo nyùùŋ lɛ.

²⁶ Wo Àpolò naŋ tɔ̀ɔ̀tù gbòa janyai ko sààŋ zòòlò aŋ Juùù nyaŋ. Kɛɛ nààŋ wo Pɛ̀silià yèè wo Àkuilà nauŋ kumiè, àŋ nauŋ ɓemè auŋ kòà ko gboo nyiŋ noo yèè àŋ nauŋ kaà wèè wo nyìmàŋ e làngì Dayàa tɛ̀ɛ̀.

²⁷ Kpeiŋ wo Àpolò naŋ ɗewè wèè wo ka wɔŋ fùɔ̀ŋ Àkaayàa sùà. Yèè anyuùŋ hààwe nyàŋ ko Ɛfesɔ̀ nauŋ nyììnè jii, yèè àŋ naŋ sìngè wɔŋ fɛi koɓɛ̀ anyuùŋ hààwe nyàŋ ko jawa bi wèè aŋ jààuŋ kùàŋ dìì. Nààŋ wo Àpolò naŋ wa hàì ko Àkaayà, wò naŋ wa nɔ̀ŋ wo nyuùŋ kpùùmaŋ gbee koɓɛ̀ anyùùŋ nyaŋ gbiŋ naŋ wa hààwè wo Kanaà Jisɛ̀ sùà nyaŋ, esàɓù ke kpèè sìàŋ Dayàa àŋ naŋ nɔ̀ŋ anyuùŋ hààwe.

²⁸ Wò naŋ wa gììyè aŋ Juùù nyaŋ maŋhɛɛ yèè yaà nyiŋ naŋ kpaane kpàànè ko ɓài. Yèè wò naŋ nyiŋ tɔɔ̀ janyai e yìwìà wɔŋ fɛ̀ì Dayàa sùà kɛ̀ wo Jisɛ̀ nàŋ yaà wo Kulaìɔ wo yèɔ wo Dayà naŋ tàeɗùù wèè wo joeyè e ɗuunyaàŋ wɔ.