Maafiù 8 - WƆŊ FƐ̀Ì EBÒ SÌÀŊ DAYÀA

Wo Jisɛ̀ naŋ sùngò wo felaa sàaŋ bà

¹ Nààŋ wo Jisɛ̀ naŋ wa dèyè e yìwìà wɔŋ tolòɔ dìmɛ̀, ke gbòò anyuùŋ zimgbe nauŋ wa dè maŋjɛ̀wɛ.

² Kpeiŋ nààŋ wò naŋ wa jòò e faaàŋ, wo felaa kùwìè e sààŋ maŋkùnù naanààŋ bà naŋ hnè ko nɛ̀ɛ̀uŋ niìŋ, yèè wò naŋ dè maŋ gɛ̀ɛ̀nùuŋ màŋ dììnaŋ wò naŋ woò wààŋ, “Dàa, kɔ̀nɛɛ̀ŋ sungàim, esaɓù kà nyìmàŋ kɛ̀ màim ɓɛ̀nɛ̀ŋ sùnga ka zɛ̀nɛ̀ŋ sèè mùŋ mɔnɔŋ.”

³ Wo Jisɛ̀ naŋ vùlɔ̀ŋ wɔŋ kuàuŋ nɔɔ̀ŋ yèè wò naŋ mɛ̀nlɛ̀ɛ̀ŋ wo felaaà wò nauŋ woò wààŋ, “Mìŋ manaŋ. Joyà muŋ zɛ̀nɛ̀ŋ!” Ko fɛɛ̀feìŋ, e sààŋ maŋkùnùɛ naŋ jùò wo felaaà e kɔɔ sùà.

⁴ Kpeiŋ wo Jisɛ̀ naŋ wòò wo felaaà wààŋ, “Kùmiàim, ɓɔ̀ mùŋ woò wò nyùùŋ bà gbiŋ è keì lɛɛ̀. Kɔ̀à muŋ tɔɔ̀ muàŋ bi koɓɛ̀ wo sìèfèìŋ zòòloɔ̀ wo yɛmɛ yɛ̀mɛ̀ùm tɛ̀ɛ̀ wèè wo nyìmàŋ kɛ̀ e sààŋ maŋkùnùɛ èum jùà e kɔɔ sùà. Kpeiŋ wò do nàŋ kiɛ̀ŋ ke mìè seì koɓɛ̀ anyùùŋ fuɔŋ nyàŋ, kɛ̀ àŋ nyìmàŋ kɛ̀ e sààŋ maŋkùnùɛ èum jùà e kɔɔ sùà janyai. Tɛɛ̀ dò nàŋ nyɛ̀nɛ̀ŋ nyɛ̀iŋ nyiŋ naŋ ɓɛìŋ tòòmò koɓɛ̀ guùŋ. Kpeiŋ kɔ̀à muŋ kiɛ̀ŋ e kìɛ̀ŋ e nɛ̀ŋ saàa wo Mòòze naŋ wa wòò kii niŋ lɛ̀ ko Saaŋ Zòòlò Dayài wèè e tɔɔ̀ kɛ̀ wo Dayà wòum joeyè.”

Wo Jisɛ̀ naŋ sùngò wo ɓɔ̀ìjɔ̀à kààlòòɗùà Luùm nyuuŋ

⁵ Nààŋ wo Jisɛ̀ naŋ wa kɔ̀ ko jawa gbeeì àŋ nyaaŋ Kepanàùm lɛ, wo kààlòòɗùà anyùùŋ ko Luùm nyaŋ bà naŋ hnè ko nɛ̀ɛ̀uŋ niìŋ yèè wò nauŋ pɔwɔ̀ wèè e kpùùmaŋ. Wo felaaà naŋ wòò wo Jisɛ̀ wààŋ,

⁶ “Kanaà, wo ɓɔìjɔ̀à miɔ̀ŋ yaà siinyɛŋ ko gboo mio e kìlà wo fè ɓɛ̀nɛ̀ŋ kàaiŋ.”

⁷ Yèè wo Jisɛ̀ nauŋ woò wààŋ, “Mìŋ yaà kɔɔyɛ wèè kauŋ sùngà.”

⁸ Kɛɛ wo kààlòòɗùàa nauŋ woò wààŋ, “Kpele Kanaà, miŋ fè tɛ̀ɛ̀ wèè maŋ hnàŋ maŋ jɔ̀à kè saaŋ miɛ̀ŋ dìì. Wòò nɔŋ mààŋ wo ɓɔìjɔ̀à miɔ̀ŋ jòèyà, wò do nàŋ jòèyè.

⁹ Mìŋ naŋ tɛɛ̀ haawè esaɓù kɛ̀, miàŋ pɛɛ mìŋ yaà wo nyùùŋ e gààŋ anyuùŋ gbeegbèè dìì. Sèè àŋ woàìm nyààŋ nyɛnɛ̀ŋ tɛɛ̀, ka niŋ nyɛ̀nɛ̀ŋ. Mìŋ kuwa ɓɛìŋ aŋ kààlòòɗùà aŋ yè nyaŋ toomàìm dìì. Sèè mìŋ woà wo bà guùŋ mìàŋ, ‘Kɔ̀à!’ wò do nàŋ kɔ̀. Sèè mìŋ woà ɓɛìŋ wo bà mìàŋ ‘Hnaàŋ!’ wò do nàŋ hnè. Mìŋ woà wo ɓɔìjɔ̀à miɔ̀ŋ mìàŋ, ‘Nyɛnɛ̀ŋ tɛɛ̀!’ wò do niŋ nàŋ nyɛ̀nɛ̀ŋ.”

¹⁰ Nààŋ wo Jisɛ̀ naŋ wa kòmò e keì wòo lɛɛ̀, è nauŋ wa foonò zimgbe. Kpeiŋ wò naŋ kìlè yèè wò naŋ wòò anyùùŋ nyaŋ yàaùŋ wa maŋjɛ̀wɛ nyàŋ wààŋ, “Tɔ̀ miŋ woòiŋ e tɔɔɓaaà kɛ̀, wɔŋ fùɔ̀ŋ Ezɔ̀ɛ̀ɔ gbiŋ sùà, kòò mìŋ yɛ̀mɛ̀ wò nyùùŋ gbiŋ wò yèɔ kuwa è hààwe gbee mààŋ tɛɛ̀!

¹¹ Anyuùŋ zimgbe do wa nàwèè nàŋ yèwè maŋ tàta màŋ gbiŋ sùà wèè aŋ jɛ̀ì wo Eɓulɔhɛɛ̀ŋ, wo Ààze, yaà wo Jègɔ kɔɔ ko jììyè nɛ̀ŋ e Kànà àìjɛnɛ̀ɛŋ sùà.

¹² Kɛɛ anyùùŋ nyaŋ wo Dayà naŋ tàeɗùù wèè aŋ weè nɔ̀ŋ e kanauŋ nɛ̀ sùà nyaŋ, àŋ do nyiŋ nàŋ gbìɛ̀ŋ ke nyiwì gbee sùà. Àŋ do nàŋ gòlò e kìlà aŋ gbìlà le sìaŋ nyiŋ nɛ̀ e keì nyìnga sùà.”

¹³ Kpeiŋ wo Jisɛ̀ naŋ wòò wo sìèfèìŋ aŋ kààlòòɗùà nyaŋ wààŋ, “Kɔ̀à naàŋ ko gboo moo. E hààwe mɔ̀ɛ̀ è nyɛ̀nɛ̀ŋ e yèɛ mùŋ naŋ woò lɛ è hɛɛnɛ̀ŋ.” E tèèngà guùŋ lii sùà nɔŋ wo ɓɔ̀ìjɔ̀à wo sìèfèìŋ aŋ kààlòòɗùà nyaŋ naŋ jòèyè.

Wo Jisɛ̀ naŋ sùngò anyuùŋ kɛ̀ɛ̀nɛ̀ŋ maŋ sàaŋ gɛ̀wɛɛ̀ zimgbe

¹⁴ Wo Jisɛ̀ naŋ wa kɔ̀ ko jààmè wo Piilɛ̀ ko gboouŋ noo. Yèè wò nao mɛ̀ɛ̀ŋ wo nèmààŋ Piilɛ̀ɔ wò hawa ko gbùmaìŋ, kɛɛ wò yaà wa sììnyɛ̀ŋ e sààŋ e kɔɔbìa.

¹⁵ Wò naŋ kɔ̀ ko nɛ̀ɛ̀uŋ niìŋ, wò nauŋ mɛ̀nlɛ̀ɛ̀ŋ kùàŋ, yèè e kɔɔ bìaà naŋ jùò wo nìeɔ̀ kɔɔ sùà, kpeiŋ wò naŋ yèwè dìì wo kìɛ̀ŋ wo Jisɛ̀ e nɛ̀ŋje.

¹⁶ E koya lii nààŋ e gɔɛɛ̀ naŋ wa naàŋ jùò fùùŋ, anyùùŋ naŋ wa hìɛ̀ŋ anyuùŋ kɛ̀ɛ̀nɛ̀ŋ aŋ jinàŋ naanààŋ zimgbe koɓɛ̀ Jisɛ̀i. Yèè e yìwìà ke mìè gbòà Jisɛ̀ɛ, aŋ jinàŋ naanààŋ nyaŋ naŋ wa fòlò anyùùŋ nyaŋ e kɔɔ sùà, yèè wò naŋ sùngò anyuùŋ kɛ̀ɛ̀nɛ̀ŋ maŋ sàaŋ gɛ̀wɛɛ̀ zimgbe.

¹⁷ Wo Jisɛ̀ naŋ wa tɛɛ̀ kaaìŋ wèè e nyɛ̀nɛ̀ŋ e yèɛ wo Dayà naŋ wa woò lɛ e hɛɛnɛ̀ŋ, nààŋ wo wɛ̀ijìɔ Àzaayà naŋ wa woò lɛ wààŋ, “Wò naŋ wi gè maŋ sàaŋ wi màŋ e kɔɔ wi lɛ̀ sùà, yèè wò naŋ wi sùngò.”

Anyùùŋ nyaŋ nyààŋ àŋ hewa nàŋ dè wo Jisɛ̀ maŋjɛ̀wɛ nyàŋ

¹⁸ Nààŋ wo Jisɛ̀ naŋ wa yɛ̀mɛ̀ e faaàŋ nauŋ kiliè, wuŋ yaà anyùùŋ màŋjɛ̀wɛ̀uŋ nyàŋ naŋ kɔ̀ wɔŋ fàa bàa wɔŋ juwoɔ̀ kɔɔ ko Galaliì.

¹⁹ Wo kààmɔ̀ɔ̀ŋ maŋ Sàwà Dayàa bà naŋ hnè ko nɛ̀ɛ̀uŋ niìŋ yèè wò naŋ woò wààŋ, “Kààmɔɔŋ, mìŋ yààùm dè sùà maŋjɛ̀wɛ e kà koɓɛ̀i gbiŋ mùŋ do nàŋ kɔ̀ lɛ.”

²⁰ Wo Jisɛ̀ nauŋ fasàì wààŋ, “Aŋ kààŋ nyaŋ kuwa maŋ jèwì wèè aŋ jɔ̀à, yèè aŋ wòì nyaŋ ko fùùiŋ kuwa maŋ jie wèè aŋ jɔ̀à. Kɛɛ miàim wo Jɔ̀àfèlàà Nyuùŋ Kpùnɔɔ̀ŋ kuwà kò hàwe wèè miàŋ bi.”

²¹ Wo nyùùŋ màŋjɛ̀wɛ̀ɔ bà guùŋ naŋ wòò wo Jisɛ̀ wààŋ, “Kanaà, mìŋ doum nàŋ dè maŋjɛ̀wɛ, kɛɛ tɔ̀ weè miŋ ka miŋ sìà wo dèda miɔ̀ŋ jiɛ̀.”

²² Wo Jisɛ̀ naŋ fasàì wààŋ, “Dèim maŋjɛ̀wɛ, dàngè anyùùŋ nyaŋ naŋ gàngà wèè aim dè maŋjɛ̀wɛ nyàŋ, nààŋ àŋ yaà fàa nyiŋ wo Jinàaŋ sùà nyaŋ, aŋ sìà anyuùŋ fàa nyiŋ nyàŋ.”

Wo Jisɛ̀ naŋ nyɛ̀nɛ̀ŋ wɔŋ dùfòìɔ naŋ gɔ̀àà dìì

²³ Wo Jisɛ̀ yaà anyùùŋ màŋjɛ̀wɛ̀uŋ nyàŋ naŋ sɛ̀ɛ̀ wɔŋ gɔɔ̀ sùà àŋ naŋ kɔ̀.

²⁴ Àŋ naŋ wa nɔŋ kɔ̀ e wùìyèɛ diɛŋ kinɛiŋ wɔŋ dùfòì gbee yèwà dìì, yèè e bɔiŋ nɛ̀ naŋ tɔ̀ɔ̀tù jòwa è sɛɛ̀ wɔŋ gɔɔ̀ sùà, e joo tòloò wèè wɔŋ gɔɔ̀ wɔŋ dìà e wùìyè. Kɛɛ wo Jisɛ̀ hawa wa wɔŋ gɔɔ̀ sùà wò yaà maŋ jàwè.

²⁵ Kpeiŋ anyùùŋ màŋjɛ̀wɛ̀ nyaŋ naŋ kɔ̀ àŋ nauŋ tùngò yèè àŋ naŋ woò nyààŋ, “Kanaà, jòèyè wi, è yààìŋ hinie eiŋ fà!”

²⁶ Kpeiŋ wo Jisɛ̀ naŋ dàwè anyùùŋ màŋjɛ̀wɛ̀uŋ nyàŋ wààŋ, “Wèè kiìŋ e jùùɛ nyɛ̀nɛ̀ìŋ? Kiìŋ è hààwe jɔa nìŋ kuwa yɛi?” Wo Jisɛ̀ naŋ yèwè dìì wo sie wo wòò wɔŋ dùfòìɔ yaà e bɔiŋ nɛ̀ wààŋ, “E dìà yɛi!” Wɔŋ dùfòìɔ yaà e bɔiŋ nɛ̀ naŋ gɔ̀àà dìì, yèè e dìì naŋ nɔ̀ŋ gìli.

²⁷ Kɛɛ è naŋ nyiŋ wa foonò, yèè àŋ naŋ kùùnò wòò nyiŋ bi e fèemàŋ nyààŋ, “Ɓòò naŋ yaà wo felaa wɛɛ̀? Wɔŋ dùfòìɔ yaà e bɔiŋ nɛ̀ kàìŋ nɛ pɛɛ jɔɔlɔ̀uŋ dìì!”

Wo Jisɛ̀ naŋ sùngò aŋ fèlàà tìyèe kùwìè aŋ jinàŋ naanààŋ

²⁸ Wo Jisɛ̀ yaà anyùùŋ màŋjɛ̀wɛ̀uŋ nyàŋ naŋ kɔ̀ wɔŋ fàaa bàa wɔŋ juwoɔ̀ kɔɔ, maŋ kpàlàùŋ kpàlàùŋ wɔŋ fuɔɔ̀ŋ àŋ nyaaŋ Gàdalà lɛ. Wò naŋ wa nɔŋ fòlò wɔŋ gɔɔ̀ sùà wò naŋ dè ko tiwi wò yaà kààìŋ ko dòmaìŋ, wò naŋ dèènè aŋ fèlàà tìyèe bà àŋ folo e ɓìè maŋ hùaàŋ sùà koɓɛ̀ bi. Aŋ felaa nyàŋ kuwa wa aŋ jinàŋ naanààŋ maŋjɛ̀wɛ nyiŋ. Aŋ felaa nyàŋ kuwa wa gààŋ zimgbe e kìlà àŋ hewa gbùwà anyùùŋ ke gùuŋ, esaɓù lii wo nyùùŋ gbiŋ fè wa ɓɛìŋ ɓɛ̀nɛ̀ŋ kè dòmaŋ bi kààìŋ diɛŋ.

²⁹ Ko fɛɛ̀feìŋ aŋ felaa nyàŋ naŋ kpààŋ sɛiiŋ nyààŋ, “Jɔ̀àfèlàà Dayàa! Kiìŋ mùŋ manaŋ maŋ wi nyiniàŋ? Mùŋ naŋ hnè wèè maŋ wi nimilà paŋgàà e teenga wilɛ̀ è haì?”

³⁰ Ke gbòò aŋ nyuàŋ gbee bà yaà wa e gbɛ̀ɛ nyiŋ nɛ̀ koɓɛ̀ bi wɔŋ tolòɔ ɓula ko gbilie.

³¹ Kpeiŋ aŋ jinàŋ naanààŋ nyaŋ naŋ kùùnò pɔ̀wɔ̀ wo Jisɛ̀ nyààŋ, “Sèè mààŋ mùŋ yaà hinie maŋ wi gè aŋ felaa nyɛɛ̀ŋ ko sùà, kɛ̀ tuàŋ wi koɓɛ̀ aŋ nyùàŋ nyaŋ e jɔ̀à nyiŋ ko sùà.”

³² Wo Jisɛ̀ naŋ nyiŋ woò wààŋ, “Kɔ̀àiŋ niŋ jɔ̀à nyiŋ ko sùà.” Aŋ jinàŋ naanààŋ nyaŋ naŋ fòlò aŋ felaa nyàŋ ko sùà aŋ ka aŋ jɔ̀à aŋ nyùàŋ nyaŋ ko sùà. Yèè ke gbòò aŋ nyuàŋ tɛ̀mɛ̀ɛ̀ yii gbiŋ naŋ dùɔ̀ŋ ke dèyà e toònyàa vauŋvàùŋ lii ke ka ke sɛ̀ɛ̀ ko kòiì keo jeeè.

³³ Aŋ kpàkòò nyaŋ yaà wa yɛ̀ɛ̀mɛ̀ aŋ nyùàŋ nyaŋ diɛŋ nyàŋ, naŋ dùɔ̀ŋ aŋ ka aŋ ɓààyè ebò lɛɛ̀ ko jawaì. Àŋ naŋ wòò anyùùŋ nyaŋ e nɛ̀ɛŋ naŋ kààìŋ koɓɛ̀ aŋ felaa nyàŋ aŋ jinàŋ naanààŋ nyaŋ yaà wa maŋjɛ̀wɛ nyàŋ.

³⁴ Kpeiŋ anyùùŋ nyaŋ gbiŋ ko jawaì naŋ kɔ̀ wèè aŋ mɛɛ̀ŋ wo Jisɛ̀. Nààŋ àŋ nauŋ yɛmɛ̀, àŋ nauŋ pɔwɔ̀ wèè wo yèwà wɔŋ fuɔŋ nyiŋ nɔɔ̀ŋ sùà.