Maafiù 19 - WƆŊ FƐ̀Ì EBÒ SÌÀŊ DAYÀA

E kàà Jisɛ̀ɛ e nyaàiŋ dè e ɓààne

¹ Nààŋ wo Jisɛ̀ naŋ kpɛ̀ɛ̀yɛ̀ maŋ keì mɛɛ̀ŋ wòo, wò naŋ yèwè ko Galaliì yèè wò naŋ kɔ̀ maŋ kpàlàùŋ kpàlàùŋ Jùdià maŋ sùà wo nìàŋ e wùìyèɛ àŋ nyaaŋ Jɔɔɗììŋ lɛ.

² E faaŋ nauŋ ɓɛìŋ kuii dèènè kɔɔ, yèè wo naŋ sùngò maŋ sàaŋ nyiŋ màŋ.

³ Aŋ Fɛlosiì nyaŋ bà naŋ hnè yèè àŋ naŋ gɛ̀ɛ̀ wo Jisɛ̀ jɛ̀wɛ̀ nyààŋ, “Wòò wi, ke sàwà wiɛ̀ naŋ wi gè nyààŋ diɛŋ wèè wo felaa yaà wo jawèuŋ nɔɔ̀ŋ aŋ ɓaanè wèè esaɓù bà gbiŋ, nààŋ wo felaaà wò manaŋ lɛ̀?”

⁴ Wo Jisɛ̀ naŋ fasàì wààŋ, “Kòò nìŋ kpɛ̀nɛ̀ŋ wɔ̀ŋ fɛ̀ì Dayàa wɔ̀ŋ yèɔ naŋ woò kɛ̀ ko tɔ̀ɔ̀tù e ɗuunyaàŋ wo Dayà naŋ nyiŋ wa banè wo felaa yèè wo jɔùŋ?

⁵ Yèè wo Dayà naŋ woò wààŋ, ‘Wèè esaɓù lɛɛ̀ wo felaa do nàŋ jòò wo dèdauŋ nɔɔ̀ŋ yèè wo yèyeuŋ nɔɔ̀ŋ yèè yaà wo jawèuŋ nɔɔ̀ŋ, aŋ nɔ̀ŋ e kèìŋ guùŋ.’

⁶ Aŋ fè ɓɛìŋ ànyùùŋ tìyèe, kɛɛ àŋ yaà naàŋ ke kpùnàŋ guùŋ. Weètii e nɛ̀ɛŋ wo Dayà naŋ gbìɛ̀ŋ koɓɛ̀ guùŋ lɛ, wo nyuùŋkpùuŋ gbiŋ ɓɔ̀ wò goonò niŋ tɛɛ.”

⁷ Aŋ Fɛlosiì nyaŋ naŋ dàwè wo Jisɛ̀ nyààŋ, “Wèè kiìŋ wo Mòòze naŋ gè wo felaa gbiŋ nyààŋ diɛŋ wèè wo sìngà wɔŋ fɛi e nyaàiŋ dè e ɓààne kɛ̀ wòuŋ ɓɛ̀nɛ̀ŋ gè ɓie?”

⁸ Wo Jisɛ̀ naŋ nyìŋ fasàì wààŋ, “Wo Mòòze naŋ wa sìngè ke sàwà yɛɛ̀ esaɓù kɛ̀ nìŋ naŋ nyìngè kàa. Kɛɛ e fè yɛi wa kò tɔ̀ɔ̀tù è ɗuunyaàŋ.

⁹ Tɔ̀ miŋ woòiŋ kɛ̀, wo felaaà yèɔ gè wo jawèuŋ nɔɔ̀ŋ ɓie wèè esàɓù e keì joo bà wɔ eɓìèmàŋjɛ̀wɛ̀ e hmɔŋtu nyɛ̀nɛŋ, wo felaa wii nyɛ̀nɛ̀ŋ hmɔŋtu sèè wò ɓemàŋ ɓɛìŋ wo jɔùŋ joo bà.”

¹⁰ Kpeiŋ anyùùŋ màŋjɛ̀wɛ̀uŋ nyàŋ nauŋ woò nyààŋ, “Sèè mààŋ kɛ̀ yɛ̀ì è yaà e fèèmàŋ wo felaa yèè wo jawèuŋ nɔɔ̀ŋ, kɛ̀ e gò tɛɛwɛ̀ wèè wò felaa wo ɓèmè wò jɔùŋ.”

¹¹ Wo Jisɛ̀ naŋ nyiŋ fasàì wààŋ, “E keì wòo lɛɛ̀ fè wèè ànyùùŋ nyaŋ gbiŋ, kɛɛ è yaà wèè anyùùŋ nyaŋ è naŋ sɔ̀ dèè wèè kɛ̀ ɓɔ̀ àŋ ɓemè àŋ jɔùŋ nyaŋ.

¹² Esaɓùɛ aŋ felaa nyàŋ bà nyiŋ aŋ fè ɓèmè aŋ jɔùŋ lɛ è naŋ gàŋ. Aŋ bà nyiŋ àŋ naŋ nyiŋ wa kòmò wèè kɛ̀ ɓɔ̀ àŋ ɓemè àŋ jɔùŋ. Aŋ bà nyiŋ zà è yaà esàɓù e yèɛ wo nyuùŋkpùuŋ dàwi nyiŋ nɔɔ̀ŋ naŋ nyiŋ nyɛ̀nɛ̀ŋ lɛ. Aŋ bà nyiŋ zà aŋ fè ɓèmè àŋ jɔùŋ esaɓù kɛ̀ àŋ manaŋ aŋ nɔ̀ŋ e Kànà àìjɛnɛ̀ɛŋ dìì. Tɔ̀ wo nyùnɔ̀ɔŋ do nàŋ jàà e kàa lɛɛ̀ kùàŋ dìì wɔ wo jàà niŋ kùàŋ dìì.”

Wo Jisɛ̀ naŋ zòòlò aŋ jɔ̀àkàiŋ jɔa nyàŋ

¹³ Anyùùŋ bà naŋ wa hìɛ̀ŋ aŋ jɔ̀àkàiŋ jɔa koɓɛ̀ Jisɛ̀i wèè wo gbùwà nyìŋ maŋ kùàŋ yèè wo zoolò nyiŋ diɛŋ, kɛɛ anyùùŋ màŋjɛ̀wɛ̀ nyaŋ naŋ nyiŋ wa gbuuyè wèè aŋ hɔanè yɛi nyɛ̀nɛŋ.

¹⁴ Yèè wo Jisɛ̀ naŋ wòò anyùùŋ màŋjɛ̀wɛ̀uŋ nyàŋ wààŋ, “Dàngeìŋ aŋ jɔ̀àkàiŋ jɔa nyàŋ aŋ hnàŋ ko nɛ̀ɛ̀ŋ miìŋ, ɓɔ̀ nìŋ kilià nyiŋ kùàŋ feìŋ, esaɓù kɛ̀ e Kànà àìjɛnɛ̀ɛŋ è yaà wèè anyùùŋ mààŋ nyɛɛ̀ŋ.”

¹⁵ Wò naŋ nyiŋ gbùwò maŋ kùàŋ diɛŋ, wo nyiŋ zoolò yèè wò naŋ nyiŋ jòò wo ka.

Wo kɔmɔŋjɔa bàneɔ̀

¹⁶ Wo felaa bà naŋ wa hnè koɓɛ̀ Jisɛ̀i yèè wò nauŋ dawè wààŋ, “Kààmɔɔŋ, kiìŋ è keì kɛnɛ mìŋ naŋ ɓɛ̀nɛ̀ŋ nyɛ̀nɛŋ wèè ka kùwìè wɔŋ nyiiŋ gèe gò jùà?”

¹⁷ Wo Jisɛ̀ nauŋ woò wààŋ, “Wèè kiìŋ mùŋ naim dawè e nyaàiŋ dè e nɛ̀ŋ siaŋ? Wo Dayà nɔŋ nàŋ siaŋ. Sèè mùŋ mɔnɔŋ wèè maŋ kɛ̀ɛ̀nɛ̀ŋ wɔŋ nyiiŋ gèe gò jùà, sɔɔ̀ maŋ jɔ̀ɔ̀lɔ̀ maŋ sàwàuŋ màŋ dìì.”

¹⁸ Yèè wo felaaà naŋ dàwè wo Jisɛ̀ wààŋ, “Kiìŋ nàŋ yaà maŋ sàwà maŋ?” Wo Jisɛ̀ naŋ fasàì wààŋ, “Ɓɔ̀ mùŋ jìwà wò nyùùŋ. Ɓɔ̀ mùŋ nyɛ̀nɛ̀ŋ hmɔŋtu. Ɓɔ̀ mùŋ wùà. Ɓɔ̀ mùŋ gbaì è kàaɓì wèè wò dàwi mɔɔ̀ŋ.

¹⁹ Jɔ̀ɔ̀lɔɔ̀ wo dèda mɔɔ̀ŋ yèè wo yèye mɔɔ̀ŋ dìì. Yèè manàŋ wo nyuùŋkpùuŋ dàwi mɔɔ̀ŋ màànààŋ mùŋ manaŋ muàŋ bi lɛ̀.”

²⁰ Wo kɔmɔŋ jɔaà naŋ woò wààŋ, “Kààmɔɔŋ, kà kùwà maŋ sàwà mɛɛ̀ŋ gbiŋ. Kiìŋ naŋ ɓɛìŋ joo wèè ka nyɛ̀nɛŋ?”

²¹ Wo Jisɛ̀ nauŋ woò wààŋ, “Sèè mùŋ mɔnɔŋ wèè maŋ nɔ̀ŋ wo nyùùŋ tɔ̀ɔ̀nyaàŋ, kɔ̀à mààŋ manɛ̀ŋ siwèum màŋ gbiŋ muŋ kiɛ̀ŋ e nɛɛnɛɛ̀ŋ anyuùŋ pɔ̀ɔ nyàŋ, kɛ̀ màŋ kɛ̀ɛ̀nɛ̀ŋ e sùlò ko àìjɛnɛ̀ŋ. Kpeiŋ muŋ hnàŋ muŋ dèim maŋjɛ̀wɛ.”

²² Nààŋ wo kɔmɔŋ jɔaà naŋ wa tɛɛ̀ kòmò, wò naŋ nɔ̀ŋ ɗoomɛɛŋ yèè wò naŋ kɔ̀ɔ̀ ke jii mɔ̀ɔ̀nɛŋ, esaɓù kɛ̀ wò kuwa wa e bàne zimgbe.

²³ Kpeiŋ wo Jisɛ̀ naŋ wòò anyùùŋ màŋjɛ̀wɛ̀uŋ nyàŋ wààŋ, “Miŋ woòiŋ e tɔɔɓaaà, è do wa nàwèè nàŋ nyìngè wèè wo nyuùŋ bàneɔ̀ wo kà e Kànà àìjɛnɛ̀ɛŋ sùà.

²⁴ Tɔ̀ miŋ woòiŋ ɓɛìŋ, e gò nyìngà wèè wò ɗòsòo wo kɔ̀ɛ̀ɛ̀ e mìilì jewi sùà màànààŋ è naŋ nyìngè wèè wo nyuùŋ bàne wo kà è Kànà Dayàa sùà.”

²⁵ Tɛɛ̀ naŋ wa fòònò anyùùŋ màŋjɛ̀wɛ̀ nyaŋ zimgbe nààŋ aŋ naŋ tɛɛ̀ kòmò. Kpeiŋ àŋ naŋ dawè nyààŋ, “Kɛ̀ ɓòò kai, nàŋ do naàŋ nàŋ yɛ̀mɛ̀ e jòèye?”

²⁶ Wo Jisɛ̀ naŋ nyiŋ yɛmɛ̀ sɛiŋ yèè wò naŋ woò wààŋ, “Tɛɛ̀ naŋ nyìngè wèè anyuùŋ kpùuŋ, kɛɛ sèè è nɔ̀ŋ wèè wo Dayà, e keì gbiŋ gò nyìngà.”

²⁷ Kpeiŋ wo Pììlɛ naŋ woò wààŋ, “Yɛ̀mɛ̀, èiŋ jòà manɛ̀ŋ wi màŋ gbiŋ wèè eiŋ nɔ̀ŋ anyùùŋ màŋjɛ̀wɛ̀um. Kiìŋ yàwi è doiŋ nàŋ kɛɛnɛ̀ŋ?”

²⁸ Wo Jisɛ̀ naŋ nyiŋ fasàì wààŋ, “Tɔ̀ miŋ woòiŋ e tɔɔɓaaà kɛ̀, nìŋ yaà anyùùŋ màŋjɛ̀wɛ̀im. Yèè e ɗuunyaŋ jɛiɛ̀ do nàŋ hnè lɛ, sèè miàim wo Jɔ̀àfèlàà Nyuùŋ Kpùnɔɔ̀ŋ mìŋ jaà wa nàwèè ke kpùà e jòòwo gbee miɛ̀ŋ diɛŋ wèè ka kɛ̀ɛ̀ kana, nìŋ do nàŋ jɛ̀ì maŋ kpùà kana diɛŋ, màŋ zììyà jɛ̀wɛ̀ tìyèe wèè naŋ gbàì maŋ zìì ɗì zììyà jɛ̀wɛ̀ tìyèe màŋ ko Ezɔ̀ɛ̀.

²⁹ Anyùùŋ nyaŋ gbiŋ naŋ jòò maŋ gboo nyiŋ màŋ ɔ̀ɔ̀ aŋ jaa ɔ̀ɔ̀ aŋ wùìya nyiŋ nyàŋ, wo dèda nyiŋ nɔɔ̀ŋ ɔ̀ɔ̀ wo yèye nyiŋ nɔɔ̀ŋ ɔ̀ɔ̀ aŋ jɔ̀à nyiŋ nyàŋ, ɔ̀ɔ̀ maŋ diì nyiŋ màŋ wèè esaɓù mɛ̀, àŋ do miŋ nàŋ yɛmɛ̀ e nìàŋ e hɔnɔ̀ɔ̀, e kìlà àŋ do nàŋ kɛ̀ɛ̀nɛ̀ŋ wɔŋ nyiiŋ gèe gò jùà.

³⁰ Kɛɛ anyùùŋ nyaŋ zimgbe nyiŋ yaà naàŋ aŋ jiɛ̀jiɛ̀ nyaŋ lɛ̀, do nàŋ nɔ̀ŋ anyuùŋ dìàmaŋ nyàŋ, yèè anyuùŋ nyaŋ zimgbe nyiŋ yaà naàŋ aŋ dìàmaŋ nyàŋ lɛ, do nàŋ nɔ̀ŋ anyuùŋ jiɛ̀jiɛ̀ nyaŋ.”