Luùm 9 - WƆŊ FƐ̀Ì EBÒ SÌÀŊ DAYÀA

Wo Dayà yaà anyunùuŋ nyàŋ wò naŋ tàeɗùù nyaŋ

¹ Mìŋ yaà wòò e tɔɔɓaaà kɛ̀, mìŋ yaà wo nyùùŋ màŋjɛ̀wɛ̀ wèè wo Jisɛ̀ Kulaì, miŋ fè tòà. Wo Jìnàŋ Nɛɛmaàŋ yaà wo seì wèè e gòngo mɛ̀, yèè miŋ fè tòa sùà

² màànààŋ mìŋ naŋ woò lɛ miàŋ ke nyowo gbee yèè ke jii mɔ̀ɔ̀nɛŋ gò kɛ̀ɛ̀nɛ̀ŋ dìa yaà ke jii miɛ̀ŋ sùà,

³ wèè anyunùim nyàŋ, e kèìŋ yèè maŋ sɛ̀ìŋ miàŋ bi màŋ! Wèè esàɓù aŋ wùìyaim nyàŋ, aŋ Juùù nyaŋ, mìŋ he weè nàŋ mɔ̀nɔ̀ŋ ka nɔ̀ŋ e gbòònò Dayàa dìì, yèè wèè woim gè anyùùŋ màŋjɛ̀wɛ̀ nyaŋ sùà wo Kulaì maŋjɛ̀wɛ.

⁴ Anyùùŋ Ezɔ̀ɛ̀ nyaŋ, nyiiŋ wo Dayà naŋ tàeɗùù. Wò naŋ nyiŋ ɓemè wèè aŋ nɔ̀ŋ anyunùuŋ. Wò naŋ nyiŋ tɔ̀ɔ̀ e jòòwouŋ nɛ̀, yèè wò naŋ bànè e ɗààhìì e mìèsùàguùŋ ko nɛ̀ɛ̀ŋ nyiŋ niìŋ yèè wò naŋ nyiŋ kìɛ̀ŋ maŋ Sàwàuŋ màŋ. Nyiiŋ nàŋ kanaŋ e ɗèwè kìì zòòlo kɛnɛɛ̀ yèè e ɗààhiìɛ wo Dayà naŋ ɓèmè ko nɛ̀ɛ̀ŋ nyiŋ niìŋ lɛ.

⁵ Tɔɔɓaa anyùùŋ nyɛɛ̀ŋ naŋ wa fòlò aŋ nèwàènèwè aŋ Hiɓulù nyaŋ sùà. Wo Jisɛ̀ Kulaì yaà wa wo nyuùŋkpùuŋ, yèè wò yaà wa wo bàuŋbà wèè e ziì lii. Tɔ̀ anyuùŋ kpùuŋ nyàŋ gbiŋ aŋ tɛnɛ̀ŋ Dayà wèè julɔfɔ, wo yèɔ kuwa e gààŋ manɛ̀ŋ maŋ gbiŋ diɛŋ wɔ̀. Àmiinàŋ.

⁶ Miŋ fè woo mìàŋ è ɗààhiìɛ wo Dayà naŋ ɓemè lɛ e fè toomo, kɛɛ anyùùŋ Ezɔ̀ɛ̀ nyaŋ gbiŋ nàŋ fè ànyùùŋ Dayà.

⁷ Aŋ jɔ̀à nyaŋ kinɛiŋ naŋ fòlò ke kpòò Eɓulɔhɛɛ̀ɛŋ sùà nyaŋ nààŋ fè àŋ jɔ̀à Dayà. Wo Dayà naŋ wa wòò Eɓulɔhɛɛ̀iŋ wààŋ, “È yaà e yìwìà wo jɔ̀àfelaa mɔɔ̀ŋ Ààze sùà mùŋ do nàŋ kɛ̀ɛ̀nɛ̀ŋ ke kpooɛ̀ mìŋ naŋ jɔ̀ɔ̀ ɗààhiì kɛ̀ mìŋ doum nàŋ kiɛ̀ŋ lɛ.”

⁸ Tɛɛ̀ naŋ tɔɔ̀ kɛ̀, e fè àŋ jɔ̀à nyaŋ gbiŋ wò Eɓulɔhɛɛ̀ŋ naŋ wa kòmò nyaŋ, wò Dayà naŋ wa jɔ̀ɔ̀ ɗààhiì wèè aŋ nɔ̀ŋ àŋ jɔ̀à Dayà. Kɛɛ aŋ jɔ̀à nyaŋ àŋ naŋ kòmò e esàɓù e ɗààhiìɛ wo Dayà naŋ wo jɔ̀ɔ̀ lɛ̀ nàŋ yaà aŋ jɔ̀à tɔ̀ɔ̀nyaàŋ nyaŋ.

⁹ Tɛɛ̀ wo Dayà naŋ wa woò nààŋ wò naŋ wa jɔ̀ɔ̀ e ɗààhiìɛ koɓɛ̀ Eɓulɔhɛɛ̀iŋ wààŋ, “Sèèla, e teenga mààŋ tɛɛ̀ doa bà nàwèè mìŋ do nàŋ kɛ̀ɛ̀ maŋjɛ̀wɛ, yèè mìŋ doum nàŋ mɛɛ̀ŋ màŋ kòmàŋ wo jɔ̀àfelaa.”

¹⁰ Ɓɔ̀ mùŋ nyɛɛnɛ̀ŋ è nɛ̀ɛŋ naŋ wa kààìŋ kòɓɛ̀ àŋ jɔ̀àfèlàà tìyèe nyàŋ wo Ààze, wo nèwàènèwe wiɔ̀, yaà wo Lòbɛkà naŋ wa kòmò nyaŋ.

^11-12 Kɛɛ wèè paŋ aŋ jɔ̀àfèlàà tìyèe nyàŋ aŋ nɔ̀ŋ wa kòmaŋ nyiŋ, ɔ̀ɔ̀ wèè paŋ aŋ nyɛ̀nɛ̀ŋ wa e keì sìàŋ ɔ̀ɔ̀ e keì naanààŋ gbiŋ, wo Dayà naŋ wòò wo Lòbɛkà wààŋ, “Wo jɔ̀àfelaa jiɛ̀jiɛ̀ mɔɔ̀ŋ do nàŋ tòòmò wo nanàuŋ nɔɔ̀ŋ dìì.” Wo Dayà naŋ wa tɛɛ̀ woò wèè e tɔɔ̀ kɛ̀ wò naŋ wa ɗewè yèè wò manaŋ wa nɔŋ wo tà wo jɔ̀àfèlàà guùŋ ɗùù. Kɛɛ e fè wa wèè è keì ɗewe bà gbiŋ è yèɛ àŋ naŋ wa nyɛ̀nɛ̀ŋ lɛ.

¹³ Wɔŋ fɛ̀ì Dayàa naŋ woò wààŋ, “Miàim Dayà manaŋ wo Jègɔ, kɛɛ mìŋ naŋ wùɔ̀ŋ wo Isɔ̀.”

¹⁴ Weètii èiŋ ɓɛ̀nɛ̀ŋ wòo kɛ̀ wo Dayà yaà wo nyùùŋ kàaɓì? Kpele! Wo Dayà yaà wo nyùùŋ tɔ̀ɔ̀nyaàŋ.

¹⁵ Wo Dayà naŋ wòò wo Mòòze wààŋ, “Mìŋ do nàŋ tɔ̀ɔ̀ ke nyowo koɓɛ̀ wo nyùnɔ̀ɔŋ gbiŋ mìŋ manaŋ wɔ̀. Mìŋ do nàŋ nɔ̀ŋ tɛ̀ɛ̀ koɓɛ̀ nyùnɔ̀ɔŋ gbiŋ mìŋ manaŋ wɔ̀.”

¹⁶ Sèè è nɔ̀ŋ yɛi, manɛ̀ŋ maŋ gbiŋ naŋ tùlìè ke nyowoɛ̀ wo Dayà tɔɔ̀ lɛ jii, yèè e fè è yèɛ ànyuùŋ kpùuŋ manaŋ ɔ̀ɔ̀ àŋ nyɛnɛŋ lɛ̀.

¹⁷ Wɔŋ fɛ̀ì Dayàa naŋ wòò wo kànà wɔŋ fùɔ̀ŋ Ijèɔ àŋ nyaaŋ Fɛɛlɔ̀ wɔ wààŋ, “Mìŋ naum nyɛ̀nɛ̀ŋ wo kana wèè kaum toomò wèè ka tɔ̀ɔ̀ e gaàŋ mɛ̀ yèè wèè anyùùŋ nyaŋ gbiŋ e ɗuunyaàŋ aŋ tɛ̀nɛ̀ŋ e deè mɛ̀.”

¹⁸ Weètii wo Dayà tɔɔ̀ ke nyowo koɓɛ̀ wo nyùnɔ̀ɔŋ gbiŋ wò manaŋ wɔ̀, yèè sèè wò mɔnɔŋ wèè wo nyɛ̀nɛ̀ŋ ke jìì nyùùŋ gbiŋ ke nɔ̀ŋ gbɔ̀mgbɔ̀ɔ̀, wò nyɛ̀nɛ̀ŋ nìŋ.

Wo Dayà tuù yèè wò tɔ̀ɔ̀ ke nyowo

¹⁹ Nyɛ̀iŋ nyɛɛ̀ŋ bà guùŋ doim nàŋ woò wààŋ, “Sèè è nɔ̀ŋ yɛi, kɛ̀ dièsɔa wo Dayà naŋ ɓɛ̀nɛ̀ŋ sìà wo nyùùŋ gbiŋ jii? Ɓòò naŋ ɓɛ̀nɛ̀ŋ gììyà e yèɛ wo Dayà manaŋ lɛ̀ maŋhɛɛ?”

²⁰ Kɛɛ ɓòò nàŋ yààùm muàum nyuùŋ kpùnɔɔ̀ŋ, wèè maŋ gbìàŋ wo Dayà wɔŋ mààŋdàwè wèè e yèɛ wò nyɛnɛŋ lɛ̀? E golà kpoò fè ɓɛ̀nɛ̀ŋ dàwè wò nyùnɔ̀ɔŋ naŋ niŋ banè wɔ wààŋ, “Wèè kiìŋ mùŋ naim yɛi bànè?”

²¹ E ɗewe gbio sùà, wo nyùnɔ̀ɔŋ toomàŋ e ɓooɛ̀ wèè manɛ̀ŋ bàne wɔ̀, wò kuwa e gààŋ wèè wo tòòmò e ɓooɛ̀ e ɗeweɛ̀ wò manaŋ lɛ̀, wèè wo bànè maŋ gòlà kpòò tìyèe e yìwìà ke ɓòò pɔ̀ɔ̀ gènàŋ gunɛ̀ɛŋ sùà. Wò banàŋ è guùŋ wèè ke nyɛ̀nɛŋ titi bà yèè è guùŋ wèè ke nyɛ̀nɛŋ joo bà.

²² E kèì guùŋ lɛɛ̀ è yaà tɔ̀ɔ̀nyaàŋ wèè e yèɛ wo Dayà naŋ nyɛ̀nɛ̀ŋ lɛ̀. Wo Dayà manaŋ wa wo tɔ̀ɔ̀ e nimilàa, yèè wo nyɛ̀nɛ̀ŋ anyùùŋ nyaŋ gbiŋ aŋ yɛ̀mɛ̀ e gaàuŋ nɛ̀. Kɛɛ wò kuwa wa ke jii tɔumtɔ̀ùm wèè anyùùŋ nyaŋ wò manaŋ wa wo nimilà nyaŋ e kìlà àŋ henàŋ nàŋ fɔ̀ nyaŋ.

²³ Wò naŋ wa tɛɛ̀ nyɛ̀nɛ̀ŋ nààŋ wò naŋ wa tɔ̀ɔ̀ e jòòwo gbeeuŋ nɛ̀, e teengaà wò naŋ wa kɛ̀ɛ̀nɛ̀ŋ ke nyowo anyunùuŋ nyàŋ diɛŋ aŋ yè nyaŋ wò naŋ wa tàeɗùù wèè aŋ nɔ̀ŋ aŋ bà nyiŋ bà e jòòwouŋ nɛ̀ sùà nyaŋ.

²⁴ Esaɓù kɛ̀ yàwi nàŋ yaà anyùùŋ nyaŋ wò naŋ nyààŋ nyaŋ, yèè e fè nɔŋ è yìwìà àŋ Juùù nyaŋ è fèemàŋ, kɛɛ e yìwìà anyùùŋ nyaŋ fè àŋ Juùù nyaŋ nyiiŋ pɛɛ.

²⁵ Tɛɛ̀ wo Kanaà Dayà naŋ woò wɔŋ fɛ̀ì Hòseèɔ sùà wààŋ, “Anyùùŋ nyaŋ fè wa ànyunùim nyàŋ nyiiŋ mìŋ do nàŋ nyààŋ ‘Anyunùim nyàŋ.’ Anyùùŋ nyaŋ e ɗuunyaàŋ miŋ manàŋ wa nyàŋ nyiiŋ mìŋ do nàŋ nyààŋ ‘Anyuùŋ mànaim nyàŋ.’

²⁶ Koɓɛ̀ gunìiŋ wo Dayà naŋ nyiŋ wa woò wààŋ, ‘Niŋ fè ànyunùim lɛ̀,’ kuuŋ àŋ do nyiŋ nàŋ nyààŋ aŋ jɔ̀à wo Dayà gè nyiiɔ̀ŋ.”

²⁷ Tɛɛ̀ wo wɛ̀ijìɔ Àzaayà naŋ wa woò e nyaàiŋ dè anyùùŋ nyaŋ ko Ezɔ̀ɛ̀ wààŋ, “Sèè pɛɛ anyùùŋ Ezɔ̀ɛ̀ nyaŋ aŋ weè pɛɛ gàŋ mààŋ e heiɛ̀ wɔŋ juwoɔ̀ kɔɔ, aŋ bà nyiŋ nɔŋ wo Kanaà Dayà do wa nàwèè nàŋ joeyè.

²⁸ E teenga kpuu sùà, wo Kanaà Dayà do nàŋ gbàì anyùùŋ nyaŋ gbiŋ e dììɛ diɛŋ.”

²⁹ Wo wɛ̀ijìɔ Àzaayà naŋ ɓɛìŋ woò wààŋ, “Sèè wo Kànà Gaàŋ Gbeeɔ̀ go wa weè nyimèè kè nyowouŋ nɛɛ̀ŋ sùà wèè wo nyɛ̀nɛ̀ŋ aŋ jɔ̀à wi nyàŋ bà aŋ nɔ̀ŋ wɔŋ nyiiŋ gèeo sùà, è heiŋ wa weè nàŋ pɔɔpɔ̀ɔ̀ mààŋ anyùùŋ nyaŋ ko Sɔdɔ̀ùŋ yaà ko Gòmolà.”

Ko Ezɔ̀ɛ̀ yaà wɔŋ fɛ̀ì Ebò Siaàŋ

³⁰ Kiìŋ tɛɛ̀ gbiŋ naŋ fasàì? È naŋ tɔɔ̀ kɛ̀ anyùùŋ nyaŋ fè àŋ Juùù nyaŋ fè wa kààmè ɗewe wèè wò Dayà wo nyiŋ jàà kùàŋ dìì wèè aŋ nɔ̀ŋ anyùùŋ tɔ̀ɔ̀nyaàŋ, kɛɛ wo Dayà naŋ nyiŋ wa jàà kùàŋ dìì wèè aŋ nɔ̀ŋ anyùùŋ tɔ̀ɔ̀nyaàŋ esàɓù e hààwe nyiŋ nɛ̀.

³¹ E tèèngà guùŋ bi, anyùùŋ Ezɔ̀ɛ̀ nyaŋ wo Dayà naŋ wa tàeɗùù nyaŋ yaà wa kààmè ɗewe kè Sàwà Dayàa dìì wèè aŋ nɔ̀ŋ anyùùŋ tɔ̀ɔ̀nyaàŋ koɓɛ̀ Dayài, kɛɛ aŋ gò wa yɛ̀mɛ̀ kè sàwà bi.

³² Kɛɛ wèè kiìŋ aŋ gò wa yɛ̀mɛ̀ kè sàwà bi? Aŋ gò nyiŋ wa yɛmɛ̀ esaɓù kɛ̀, aŋ gò wa tùlìà è hààwe jii sɔɔ̀ e yèɛ àŋ naŋ wa nyɛ̀nɛ̀ŋ lɛ. Weètii àŋ naŋ wa duonò kè dùò diɛŋ gbàwìà.

³³ Màànààŋ nɔŋ wo Dayà naŋ woò wɔŋ fɛ̀ì Dayàa sùà lɛ wààŋ, “Yɛ̀mɛìŋ, mìŋ yaà hàa sùà ke dùò ko Zanyɔ̀ŋ, ke dùòɛ ke yèɛ do nàŋ nyɛ̀nɛ̀ŋ anyùùŋ aŋ duonò, ke dùòɛ ke yèɛ do nyiŋ nàŋ nyɛ̀nɛ̀ŋ aŋ sɔ̀à dìì fukpù. Kɛɛ wo nyùnɔ̀ɔŋ gbiŋ haawà Dayà wɔ e sàngè naàuŋ kùwò.”