Luù 16 - WƆŊ FƐ̀Ì EBÒ SÌÀŊ DAYÀA

Ke kàɓànè wo ɓɔ̀ìjɔ̀à kàaɓì yɛ̀mɛ̀ manɛ̀ŋ diɛɔ̀ŋ ko gbooì

¹ Wo Jisɛ̀ naŋ wa ɓɛìŋ wòò anyùùŋ màŋjɛ̀wɛ̀uŋ nyàŋ wààŋ, “Wo felaa bàne bà yaào wa, wò kuwa wa wo ɓɔìjɔ̀à yɛ̀mɛ̀ manɛ̀uŋ màŋ diɛŋ ko gbooì. Anyùùŋ nyaŋ naŋ wa wòò wo felaa bàneɔ̀ nyààŋ kɛ̀ wo ɓɔìjɔ̀àa yɛmɛ̀ manɛ̀uŋ màŋ diɛŋ wɔ̀ yaà wa pɔ̀ɔ̀pɔ̀ɔ̀ sùà e nɛ̀ɛ̀nɛ̀ŋ kààmɔɔuŋ nɔɔ̀ŋ.

² Yèè wo felaa bàneɔ̀ nauŋ nyààŋ wò nauŋ dàwè wààŋ, ‘Kiìŋ mìŋ naŋ yaà kòmò e nyaàiŋ eum dè? Hnaàŋ muŋ kiɛ̀im ke jii gbài e nyaàiŋ dè manɛ̀ŋ maŋ kinɛiŋ mùŋ yaà yɛ̀ɛ̀mɛ̀ diɛŋ màŋ, esaɓù kɛ̀ mìŋ yààùm gè sùà e tòmò ɓɔìjɔ̀à yɛ̀mɛ̀ manɛ̀ŋ diɛɛ̀ŋ sìwè.’

³ Wo ɓɔìjɔ̀à yɛ̀mɛ̀ manɛ̀ŋ diɛɔ̀ŋ naŋ wòò koɓɛ̀ wuŋ biì wààŋ, ‘Wo kààmɔɔŋ miɔ̀ŋ yaà hinie woim gè e tòmò ɓɔìjɔ̀à yɛ̀mɛ̀ manɛ̀ŋ diɛɛ̀ŋ sìwè. Kiìŋ mìŋ do nàŋ nyɛ̀nɛ̀ŋ? Miŋ gò nyìngà kɔɔ wèè ka nyɛ̀nɛ̀ŋ è tòmo nyìnga, yèè e sàngèɛ nyɛ̀nɛ̀ìm wèè ka hɔmɔ̀ɔ̀ŋ.

⁴ Yèè wò naŋ woò wààŋ kà nyìmàŋ kɛ̀ kiìŋ mìŋ do nàŋ nyɛ̀nɛ̀ŋ, wèè kɛ̀ sèè e tòmò ɓɔìjɔ̀à yɛ̀mɛ̀ manɛ̀ŋ diɛɛ̀ŋ fòlòìm sìwè, aŋ dàwiim nyàŋ doim nàŋ jàà kùàŋ dìì maŋ gboo nyiŋ màŋ sùà.’

⁵ Kpeiŋ wò naŋ nyààŋ anyùùŋ nyaŋ gbiŋ kuwa wo kààmɔɔuŋ nɔɔ̀ŋ e kpàŋ nyaŋ. Wò naŋ dàwè wo nyuùŋ jiɛ̀jiɛ̀ɔ wààŋ, ‘Kpàŋ kiìŋ mùŋ kuwa wo kààmɔɔŋ miɔ̀ŋ?’

⁶ Wo nyùnɔ̀ɔŋ nauŋ woò wààŋ, ‘Mìŋ kùwaùŋ e kpàŋ e bù tiìŋ hɔ̀nɔ̀ɔ̀ guùŋ (100).’ Yèè wo ɓɔìjɔ̀à yɛ̀mɛ̀ manɛ̀ŋ diɛɔ̀ŋ nauŋ woò wààŋ, ‘Ɓèmè wɔŋ fɛ̀ì kpàŋ mɔɔ̀ŋ muŋ sìngào e kpàŋ bù tiìŋ kpɛ̀ɛ̀ùŋ tìyèe jɛ̀wɛ̀ zììyà (50) fiò.’

⁷ Kpeiŋ wo ɓɔìjɔ̀àa naŋ ɓɛìŋ dàwè wo nyuùŋ kùwìè kpàaŋ bà guùŋ wààŋ, ‘Muàŋ zà, kpàŋ kiìŋ mùŋ kuwa?’ Yèè wuŋ wò naŋ woò wààŋ, ‘Mìŋ kùwaùŋ e kpàŋ e kpàli pòum tààsùùŋ guùŋ (1,000).’ Yèè wo ɓɔìjɔ̀à yɛ̀mɛ̀ manɛ̀ŋ diɛɔ̀ŋ nauŋ woò wààŋ, ‘Ɓèmè wɔŋ fɛ̀ì kpàŋ mɔɔ̀ŋ muŋ sìngào e kpàŋ e kpàli pòum hɔ̀nɔ̀ɔ̀ nɔɔnɔŋ le taai (800).’

⁸ Wèè esaɓù lɛɛ̀, wo kààmɔ̀ɔ̀ŋ wo ɓɔ̀ìjɔ̀à kàaɓì yɛ̀mɛ̀ manɛ̀ŋ diɛɔ̀ŋ nauŋ tɛnɛ̀ŋ wèè e jiikɛ̀ɛ wò naŋ nyɛ̀nɛ̀ŋ wèè wuŋ bi lɛ̀. Yɛi nɔŋ anyùùŋ kàaɓì nyaŋ e ɗuunyaŋ lɛɛ̀ àŋ yaà. Àŋ kuwa e jiikɛ̀ɛ zimgbe manɛ̀ŋ nyɛ̀nɛŋ nyiŋ màŋ sùà e nìàŋ anyùùŋ tɔ̀ɔ̀nyaàŋ nyaŋ.”

⁹ Yèè wo Jisɛ̀ naŋ ɓɛìŋ woò wààŋ, “Weètii tɔ̀ miŋ woòiŋ, tòòmoìŋ e nɛɛnɛɛ̀ŋ nìŋ naŋ yɛmɛ̀ e kàaɓì sùà lɛ e ɗuunyaàŋ lɛɛ̀ wèè niŋ kpuumàŋ anyùùŋ, wèè aŋ nɔ̀ŋ anyuùŋ mɔ̀ɔ̀nɔiŋ. Kpeiŋ sèè nìŋ fà e yèɛ niŋ fè ɓɛ̀nɛ̀ŋ kòà è nɛɛnɛŋ lɛ̀, kɛ̀ wo Dayà yaà aŋ màikàuŋ nyaŋ doiŋ nàŋ ɓeè aiŋ jàà kùàŋ dìì aiŋ kìɛ̀ŋ maŋ vààyà saaŋ ko yè dò nàŋ nɔ̀ŋ wèè julɔfɔ lɛ̀ ko àìjɛnɛ̀ŋ.

¹⁰ Wo nyùnɔ̀ɔŋ gbiŋ nyɛnɛŋ tɔ̀ɔ̀nyaàŋ maŋ keì jɔ̀à sùà wɔ, àŋ douŋ nàŋ haawè maŋ keì gbeegbèè sùà. Wo nyùnɔ̀ɔŋ gbiŋ nyɛnɛŋ kàaɓì maŋ keì nyɛɛnyɛ̀ɛ̀ sùà wɔ, wò do nàŋ nyɛ̀nɛ̀ŋ kàaɓì maŋ keì gbeegbèè sùà.

¹¹ Kpeiŋ kɛ̀ sèè mààŋ kòò nìŋ nɔ̀ŋ è tɔ̀ɔ̀nyaàŋ sùà wèè è nɛɛnɛɛ̀ŋ wo Dayà naiŋ kiɛ̀ŋ e ɗuunyaŋ lɛɛ̀ sùà lɛ, kɛ̀ tɔɔɓaa wo naàŋ nyimèè wèè wo kìɛ̀ŋ è nɛ̀ɛ̀nɛ̀ŋ tɔ̀ɔ̀nyaàaŋ kò àìjɛnɛ̀ŋ kò nɛ̀ɛ̀iŋ niìŋ nyɛ̀iŋ nààŋ nyuùŋ gò hààwè Dayà nyaŋ.

¹² Yèè sèè mààŋ kòò nìŋ nɔ̀ŋ è tɔ̀ɔ̀nyaàŋ sùà wèè è nɛ̀ɛŋ wo nyùùŋ bà kanaŋ lɛ̀, ɓòò nàŋ douŋ nàŋ kìɛ̀ŋ e yèɛ nauŋ sɔ̀ dèè lɛ?

¹³ “Wo ɓɔìjɔ̀à gbiŋ fè ɓɛ̀nɛ̀ŋ nɔ̀ŋ wò ɗo wèè àŋ kààmɔ̀ɔ̀ŋ ɗì tìyèe. Wò do nàŋ mɔ̀nɔ̀ŋ wò guùŋ e nìàŋ wo bàa, ɔ̀ɔ̀ wò do nàŋ jɔ̀ɔ̀lɔ̀ wò guùŋ dìì e nìàŋ wo bàa. Muŋ fè ɓɛ̀nɛ̀ŋ zòòlò wò Dayà yaà è nɛɛnɛŋ.”

Maŋ kèì wòò Jisɛ̀ maŋ bà

¹⁴ Nààŋ aŋ Fɛlosiì nyaŋ naŋ wa tɛɛ̀ kòmò, àŋ naŋ hììlè wo Jisɛ̀, esaɓù kɛ̀ àŋ manaŋ nɛɛnɛŋ zimgbe.

¹⁵ Yèè wo Jisɛ̀ naŋ nyiŋ woò wààŋ, “Nyɛ̀iŋ nàŋ yaà anyùùŋ nyaŋ tɔɔ̀ wèè naŋ nɔ̀ŋ anyùùŋ tɔ̀ɔ̀nyaàŋ ko fɛ̀ɛ̀fèìŋ anyuùŋ joo, kɛɛ wo Dayà nyìmàŋ maŋ jiiŋ màŋ sùà. Esaɓù kɛ̀ manɛ̀ŋ maŋ anyùùŋ àŋ ɓemàŋ wèè maŋ nɔ̀ŋ gbee miŋ màŋ maŋ fè è nɛ̀ŋ gbiŋ kò fɛ̀ɛ̀fèìŋ Dayài.

¹⁶ “Anyùùŋ nyaŋ naŋ wa jɔ̀ɔ̀lɔ̀ maŋ Sàwà Dayà maŋ dìì yaà maŋ fɛi màŋ aŋ wɛ̀ijì nyaŋ naŋ wa sìngè maŋ, e hàì e teengaà wo Jɔ̀ɔŋ Gùà Nyùnɔ̀ɔŋ naŋ wa hnè lɛ. Kɛɛ e yìwìà e teengaà Ebò Siaàŋ naŋ wa nɔ̀ŋ wòo niŋ e nyaàiŋ dè e Kànà Dayà lɛ̀, wo nyùùŋ gbiŋ kòò wò yaà kààmè ɗewe wèè wo niŋ jàà kùàŋ dìì.

¹⁷ Ko àìjɛnɛ̀ŋ yaà e ɗuunyaàŋ do wa nàwèè nàŋ hàì ko dìa, kɛɛ e pɛɛ nɔ̀ŋ ke tomi jɔa maŋ Sàwà maŋ sùà, ke naàŋ nɔ̀ŋ dao ge nyiŋ.

¹⁸ “Wo felaaà gbiŋ naŋ gè wo jawèuŋ nɔɔ̀ŋ ɓie yèè wò naŋ ɓɛìŋ ɓèmè wo jɔùŋ joo bà wɔ, wò nyɛ̀nɛ̀ŋ hmɔŋtu. Wo felaaà yèɔ ɓemàŋ wo jɔùŋ bi wɔ̀, wò nyɛ̀nɛ̀ŋ hmɔŋtu wuŋ pɛɛ.

Ke kàɓànè wo kenàŋ bàneɔ̀ yaà wo Lazɔlɔ̀

¹⁹ “Wo kenàŋ bàne bà yaào wa wo yèɔ hewa kpàà maŋ deè nyìngà ɓaà tèènè maŋ dèè sɛ̀ìŋ tɔɔ yèè wò yaà ke nyɛɛnkɛŋ sùà ke ɗɔɔ gbiŋ.

²⁰ Wo felaa pɔ̀ɔ hɔ̀mɔɔŋ bà yaào wa wuŋ pɛɛ àŋ nyaaŋ nyààŋ Lazɔlɔ̀. Wo gbiŋ yaà wa manɛ̀ŋjèla, yèè àŋ heuŋ wa hìàŋ wɔŋ gbàngì kenàŋ bàneɔ̀ yɛmgbɛ̀.

²¹ Ke jii heuŋ wa fà wèè wo tùàŋ yèè wo jè e kò nyààŋ kenàŋ bàneɔ̀ sɔɔ ko dììnaŋ lɛ̀ e yìwìà wɔŋ gbɛ̀gbɛ̀ manɛ̀ŋ jeuŋ nɔɔ̀ŋ diɛŋ. Aŋ sùùŋ nyaŋ pɛɛ hewa hnàŋ ko jɛ̀ɛ̀wɛ̀ manɛ̀ŋ jèlauŋ màŋ.

²² Wo felaa pɔ̀ɔɔ̀ naŋ wa fɔ̀ yèè aŋ màikà nyaŋ nauŋ kɔɔ̀ aŋ jàà wo Eɓulɔhɛɛ̀ŋ kɔɔ ko àìjɛnɛ̀ŋ. Wo kenàŋ bàneɔ̀ wuŋ pɛɛ naŋ wa fɔ̀ yèè àŋ nauŋ sìè.

²³ Kpeiŋ wò naŋ gè fɛ̀ɛ̀ dìì e yìwìà ko jàhamaŋ, ko yèi wò yaà wa e keì nyìnga dìì lɛ, yèè wò naŋ yɛ̀mɛ̀ wo Eɓulɔhɛɛ̀ŋ koɓɛ̀ dii yaà wo Lazɔlɔ̀ àŋ jaa koɓɛ̀ guùŋ.

²⁴ Wo kenàŋ bàneɔ̀ naŋ wòò wo Eɓulɔhɛɛ̀ŋ wààŋ, ‘Dàa Eɓulɔhɛɛ̀ŋ, yɛ̀mɛ̀im ke nyowo! Tuàŋ wo Lazɔlɔ̀ wèè wo dè ke kiiòuŋ nɛɛ̀ŋ e wùìyè sùà yèè wo dè miŋ e milè, esaɓù kɛ̀ mìŋ yaà kùwìè e keì nyìnga zimgbe e hmɔ̀ɔ̀ŋ lɛɛ̀ sùà.’

²⁵ Kɛɛ wo Eɓulɔhɛɛ̀ŋ nauŋ fasàì wààŋ, ‘Dàwi miɔ̀ŋ, kɛ̀ɛ̀nɛɛ̀ŋ ke jii jàa kɛ̀ mùŋ kuwa wa e tɛ̀ɛ̀tɛ̀ɛ̀ɛ gbiŋ e teengaà mùŋ yaà wa wɔŋ nyiiŋ gèeɔ̀ sùà lɛ, yèè mùŋ naŋ wa gè maŋhɛɛ wèè maŋ tɔ̀ɔ̀ ke nyowo koɓɛ̀ Lazɔlɔ̀i jòòpɛɛ wò yaà wa kùwìè e keì nyìngaà gbiŋ. Kɛɛ kòò wò yaà naàŋ ke jii fàa sùà, yèè muàŋ mùŋ yaà kùwìè e keì nyìnga.

²⁶ Eɓìèmàŋjɛ̀wɛ̀ tii, wɔŋ goo gbee hawa yàwi yèè muàŋ e fèemàŋ, wèè kɛ̀ anyùùŋ nyaŋ wɔŋ fàà wɛɛ̀ŋ gò nàŋ kɔ̀ wɔŋ fàà wiiŋ, yèè wo bà guùŋ pɛɛ e yìwìà kuii go nàŋ nìè kià ko nɛ̀ɛ̀ŋ wiì.’

²⁷ Kɛɛ wo kenàŋ bàneɔ̀ nauŋ dawè wààŋ, ‘Kɛ̀ kɔ̀nɛɛ̀ŋ dèda Eɓulɔhɛɛ̀ŋ, tuàŋ wo Lazɔlɔ̀ ko gbòò dèda mio.

²⁸ Kòò mìŋ kuwao aŋ wùìyà nyùùŋ nɔɔnɔŋ. Wòouŋ wo ka wo kiɛ̀ŋ nyiŋ e goò wèè kɛ̀ aŋ go nàŋ hnè koɓɛ̀ keì nyìnga yaà.’

²⁹ Kpeiŋ wo Eɓulɔhɛɛ̀ŋ nauŋ woò wààŋ, ‘Aŋ wùìyaum nyàŋ kòò àŋ kuwao wo Mòòze yaà aŋ wɛ̀ijì nyaŋ wèè aŋ nyiŋ kìɛ̀ŋ e gòo. Tɔ̀ aŋ wùìyaum nyàŋ aŋ nyɛ̀nɛ̀ŋ e nɛ̀ɛ̀iŋ àŋ woà nyìŋ lɛ.’

³⁰ Yèè wo kenàŋ bàneɔ̀ naŋ woò wààŋ, ‘Tii gò gàŋ, dèda Eɓulɔhɛɛ̀ŋ! Kɛɛ sèè wo nyùùŋ bà wo weè yèwà e fàaà dìì yèè wo kà ko nɛ̀ɛ̀ŋ nyiŋ niìŋ, àŋ he weì nàŋ fè maŋ jùumù nyiŋ màŋ jɛwɛ.’

³¹ Kɛɛ wo Eɓulɔhɛɛ̀ŋ nauŋ woò janjai wààŋ, ‘Sèè àŋ go nyɛ̀nɛ̀ŋ e nɛ̀ɛŋ wo Mòòze yaà aŋ wɛ̀ijì nyaŋ naŋ nyiŋ woò lɛ, aŋ naàŋ haawè sèè pɛɛ wo nyùùŋ wo weì yèwà e fàaà dìì.’ ”