Luù 13 - WƆŊ FƐ̀Ì EBÒ SÌÀŊ DAYÀA

Fèeìŋ maŋ tùwo naanààiŋ màŋ jɛwɛ wèè niŋ go nàŋ fɔ̀

¹ E teenga lii sùà anyùùŋ bà yaào wa fɛɛ̀feìŋ yèè àŋ naŋ wòò wo Jisɛ̀ e kèè anyùùŋ Galaliì nyaŋ, aŋ yè nyaŋ wo Paalè naŋ wa jìwè e teengaà àŋ yaà wa gììyè maŋ saaà koɓɛ̀ Dayài lɛ̀.

² Wo Jisɛ̀ naŋ nyiŋ fasàì wààŋ, “Nìŋ naŋ gongò kɛ̀ anyùùŋ fùɔ̀ŋ Galaliì nyɛɛ̀ŋ wo Paalè naŋ yaà wa jìwè nyaŋ, àŋ yaà anyùùŋ maŋ jùumù naanààŋ e nìàŋ anyuùŋ gbànaŋ nyàŋ wɔŋ fùɔ̀ŋ Galaliìɔ sùà esàɓù e yèɛ naŋ nyiŋ kaaìŋ lɛ?

³ Kpele! Kɛɛ tɔ̀ miŋ woòiŋ kɛ̀ sèè nìŋ go fè maŋ jùumùiŋ màŋ jɛwɛ, nìŋ do nàŋ fɔ̀ nyɛ̀iŋ pɛɛ màànààŋ àŋ naŋ fɔ̀ lɛ.

⁴ Diè zà e kèè anyùùŋ zììyà jɛ̀wɛ̀ nɔɔnɔŋ le taai nyàŋ ke sààŋ fùùɛŋ naŋ wa sɔ̀ɔ̀ diɛŋ yèè àŋ naŋ fɔ̀ nyaŋ ko Sìloùm nyaŋ? Nìŋ gongà kɛ̀ anyùùŋ nyiiŋ naŋ wa nyɛ̀nɛ̀ŋ maŋ jùumù naanààŋ e nìàŋ anyuùŋ gbànaŋ nyàŋ gbiŋ ko Jùlusɛ̀làm?

⁵ Kpele! Kɛɛ tɔ̀ miŋ woòiŋ kɛ̀ sèè nìŋ go fè maŋ jùumùiŋ màŋ jɛwɛ, nìŋ do nàŋ fɔ̀ nyɛ̀iŋ pɛɛ màànààŋ àŋ naŋ fɔ̀ lɛ.”

Ke kàɓànè ke feè kùù gò kɛ̀ɛ̀nɛ̀ŋ kòmàaŋ

⁶ Wo Jisɛ̀ naŋ nyiŋ ɓɛìŋ wòò ke kàɓanè yɛɛ̀ wààŋ, “Wo felaa bà yaào wa wò naŋ nyùɔ̀ŋ ke kùlɛ̀ɛ àŋ nyaaŋ nyààŋ feè kùù wɔŋ ɓù gbɛɛwɛ̀jɛ̀wɛ̀uŋ nɔɔ̀ŋ sùà. Wò naŋ nyiŋ kɔ̀ dìì ke ɗɔ̀ɔ̀ guùŋ bà wèè wo kpàà maŋ feè kòmàŋ, kɛɛ wo gòo wa mɛ̀ɛ̀ŋ kè bà gbiŋ.

⁷ Kpeiŋ wo felaaà naŋ wòò wo nyùnɔ̀ɔŋ toomàŋ ko kpòkpò bi wɔ̀ wààŋ, ‘Yɛ̀mɛ̀ kià, kà naàŋ hnàŋ ke feè kùù yɛɛ̀ dìì wèè maŋ dòà taai ko kààmè maŋ feè kòmàŋ, kɛɛ kòò mìŋ mɛ̀ɛ̀ŋ nyiìŋ kè bà guùŋ pɛɛ kò dìì. Kɛɛ̀ nyiŋ! Wèè kiìŋ kè sia e dììɛ diɛŋ wèè foo?’

⁸ Wo nyùnɔ̀ɔŋ toomàŋ ko kpòkpòi wɔ̀ naŋ woò wààŋ, ‘Dàa, dàngè nyiŋ weè wèè wɔŋ dòà guùŋ ɓɛìŋ, mìŋ do nyiŋ nàŋ tòmò kɔɔ ka nyiŋ gɔ̀ɔ̀yɛ̀ e gòò manɛ̀ŋ wuiyè.

⁹ Kpeiŋ sèè kè komo maŋ feè kòmàŋ doa bà nàwèè, kɛ̀ è nɔ̀ŋ tɛ̀ɛ̀, kɛɛ sèè kè goò kòmàŋ, kɛ̀ màŋ nyiŋ noo kɛ̀ɛ̀.’ ”

Wo Jisɛ̀ naŋ sùngò wo nìe nɛ̀ɛ̀muŋ bà ke Ɗɔ̀ɔ̀ Zòòlò aŋ Juùù nyaŋ diɛŋ

¹⁰ Wo Jisɛ̀ yaà wa kàa sùà ko sààŋ zòòlò aŋ Juùù nyaŋ bà guùŋ ke Ɗɔ̀ɔ̀ Zòòlò aŋ Juùù nyaŋ bà diɛŋ.

¹¹ Wo nìe bà yaào wa wo yèɔ naŋ wa nɛɛmùŋ wèè maŋ dòà zììyà jɛ̀wɛ̀ nɔɔnɔŋ le taai esàɓù wo jinàŋ naanààaŋ yàaùŋ wa maŋjɛ̀wɛ wɔ̀. Wo nìeɔ̀ naŋ wa fungo e kìlà wo fè wa ɓɛìŋ ɓɛ̀nɛ̀ŋ sìe ɗeiŋ.

¹² Nààŋ wo Jisɛ̀ naŋ yɛ̀mɛ̀ wo nìeɔ̀, wò nauŋ nyààŋ yèè wò nauŋ woò wààŋ, “Nìe wɛɛ̀, e sàaŋ mɔ̀ɛ̀ èum jùà e kɔɔ sùà!”

¹³ Wo Jisɛ̀ nauŋ gbùwò maŋ kùàŋ diɛŋ, ko fɛɛ̀feìŋ wo nìeɔ̀ naŋ sie ɗeiŋ yèè wò naŋ tɛ̀nɛ̀ŋ wo Dayà.

¹⁴ Wo sìèfèìŋ ko sààŋ zòòlò aŋ Juùù nyaŋ naŋ wa tuù esaɓù kɛ̀ wo Jisɛ̀ naŋ wa sùngò wo nyùùŋ ke Ɗɔ̀ɔ̀ Zòòlò àŋ Juùù nyaŋ diɛŋ. Yèè wò naŋ wòò anyùùŋ nyàŋ wààŋ, “Ke wikì gbiŋ kuwa maŋ ɗɔ̀ɔ̀ nɔɔnɔŋ dièguùŋ maŋ yè maŋ è nyinìàŋ maŋ tòmo wi màŋ sùà. Weètii hnaàŋ maŋ ɗɔɔ miiŋ bà guùŋ diɛŋ wèè aŋ sùngàum, kɛɛ e fè nɔ̀ŋ kè Ɗɔ̀ɔ̀ Zòòlò àŋ Juùù nyaŋ diɛŋ.”

¹⁵ Wo Kanaà Jisɛ̀ nauŋ fasàì wààŋ, “Muàŋ e kpùlìà aŋ sìèfèìŋ zòòlo dàwium nyàŋ nìŋ yaà anyùùŋ fɛ̀ɛ̀ ɗòònààkeì! Nyɛ̀iŋ nyɛɛ̀ŋ bà gbiŋ niŋ fè gè wò dìii ɔ̀ɔ̀ wò ɗòsòo mɔɔ̀ŋ wɔ̀ŋ gbòlà màŋ nɛ̀ŋje nyiŋ nɔɔ̀ŋ sùà ke Ɗɔ̀ɔ̀ Zòòlò aŋ Juùù nyaŋ diɛ̀ŋ wèè mauŋ koà wo tìà?

¹⁶ Weètii yɛ̀mɛ̀ wo nìe wɛɛ̀, wo jɔ̀àjɔ̀ùŋ Eɓulɔhɛɛ̀ɔŋ bà guùŋ wo yèɔ wo Sɛ̀tanàaŋ naŋ wa naàŋ dìkìè maŋ jɔ̀ɔɔ wèè maŋ dòà zììyà jɛ̀wɛ̀ nɔɔnɔŋ le taai. Yèè mààŋ e fè è tɔ̀ɔ̀nyaàŋ wèè wo nɔ̀ŋ sùngauŋ kè Ɗɔ̀ɔ̀ Zòòlò àŋ Juùù nyaŋ diɛŋ?”

¹⁷ E sàngè naŋ wa nyɛ̀nɛ̀ŋ aŋ joouŋ nyàŋ gbiŋ wèè nyiŋ bi nààŋ wò naŋ nyiŋ wa tɛɛ̀ woò, nààŋ anyuùŋ gbànaŋ nyàŋ gbiŋ yaà wa gììyè zɔlɔ̀ wèè maŋ kèè mèè maŋ gbiŋ wò naŋ nyɛ̀nɛ̀ŋ maŋ.

Ke kàɓànè ke kaaŋ komaàŋ

¹⁸ Kpeiŋ wo Jisɛ̀ naŋ ɓɛìŋ woò wààŋ, “Dièsɔa e Kànà Dayàa è yaà? Kiìŋ mìŋ naŋ niŋ ɓɛ̀nɛ̀ŋ tèène?

¹⁹ E ɗewe lɛɛ̀ e Kànà Dayàa è yaà. È yaà mààŋ sèè wo nyuùŋ tòmò ɓùɔ wo ɓèmè ke kaaŋ komaŋ wo nyiŋ nyùàŋ ko ɓùuŋ noo. Kè dɛɛ̀ ke nɔ̀ŋ ke kuù gbee, e kìlà aŋ wòì nyaŋ ko fùùiŋ hnàŋ aŋ nyɛ̀lɛ̀ maŋ jie nyiŋ màŋ maŋ kpee nyiŋ màŋ sùà.”

Ke kàɓànè e sòi jùwìà gbɔ̀uɛ̀

²⁰ Kpeiŋ wo Jisɛ̀ naŋ ɓɛìŋ woò wààŋ, “Kiìŋ mìŋ naŋ ɓɛ̀nɛ̀ŋ tèènè e Kànà Dayàa wèè e nɔ̀ŋ?

²¹ E ɗewe lɛɛ̀ è yaà. È yaà mààŋ e yèɛ kaaìŋ sèè wo jɔùŋ wo ɓèmè e sòi bàànè gbɔ̀u jɔa wo niŋ kàànè kàànè maŋ fìlàwà pòùm gbèègbèè taai. Kpeiŋ ko diemeì kɛ̀ e gbɔ̀uɛ̀ gbiŋ è jòwà.”

Ko nyɛmgbɛ̀ suulìi

²² Wo Jisɛ̀ naŋ wa kɔ̀ɛ̀ maŋ jawa yèè maŋ vàa sùà wò yaà kàa sùà anyùùŋ nààŋ wò yaà wa kɔ̀ɔ̀yɛ̀ e tèèngà ko Jùlusɛ̀làm.

²³ Wo nyùùŋ bà nauŋ dawè wààŋ, “Kanaà, anyuùŋ kpàka nɔŋ nàŋ do nàŋ jòèyè?” Wo Jisɛ̀ naŋ nyiŋ fasàì wààŋ,

²⁴ “Nyɛ̀nɛìŋ e tɛ̀ɛ̀tɛ̀ɛ̀ɛ gbiŋ nìŋ naŋ ɓɛ̀nɛ̀ŋ nyɛ̀nɛŋ lɛ̀ wèè niŋ jɔɔyɛ̀ wɔŋ gbemgbee suulìɔ sùà. Esaɓù kɛ̀ aŋ zimgbe nyiŋ do nàŋ kàmè ɗewe wèè aŋ jɔ̀à ko àìjɛnɛ̀ŋ wɔŋ dòmaŋ nyaaŋ joo bà, kɛɛ aŋ naàŋ jɔ̀.

²⁵ Wo kɛ̀ɛ̀nɛ̀ŋ saaàŋ do nàŋ yèwè dìì wo yìlà wɔŋ gbemgbeeɔ̀. Kpeiŋ nìŋ do nàŋ sìè ko jɔɔlèi naŋ tɔ̀ɔ̀tù wɔŋ gbemgbeeɔ̀ kpùla nìŋ yaà woo nààŋ, ‘Dàa, yìlè wɔŋ gbemgbeeɔ̀ weè wi!’ Kɛɛ wò doiŋ nàŋ fasàì wààŋ, ‘Miŋ nyimààŋ kɛ̀ kòò nìŋ yewe!’

²⁶ Kpeiŋ kɛ̀ nàŋ woò nààŋ, ‘Yàwiiŋ nààŋ gbiŋ naiŋ wa jììyè nɛ̀ŋ koɓɛ̀ guùŋ yèè è naiŋ tììyè koɓɛ̀ guùŋ, e kìlà mùŋ naŋ wi kaà maŋ jawa wi màŋ sùà.’

²⁷ Kɛɛ wò doiŋ ɓɛìŋ naŋ woò wààŋ, ‘Miŋ nyimààŋ kɛ̀ kòò nìŋ yewe, yèwa nìim feìŋ, nyɛ̀iŋ nààŋ nyùùŋ kpèè naanààŋ nyɛɛ̀ŋ!’

²⁸ Kpeiŋ sèè àŋ gbìɛ̀ìŋ ko jɔɔlèi, nìŋ do nàŋ gòlò e kìlà naŋ gbìlà le sìaiŋ nɛ̀ esaɓù kɛ̀ nìŋ do nàŋ yɛ̀mɛ̀ wo Eɓulɔhɛɛ̀ŋ, wo Ààze, wo Jègɔ, yaà aŋ wɛ̀ijì nyaŋ gbiŋ e Kànà Dayàa sùà.

²⁹ Anyùùŋ do wa nàwèè nàŋ yèwè maŋ tàta màŋ gbiŋ sùà, aŋ jɛ̀ì ko jììyè nɛ̀ŋ e Kànà Dayàa sùà.

³⁰ Kpeiŋ anyùùŋ nyaŋ yaà naàŋ aŋ dìàmaŋ nyàŋ lɛ, do nàŋ nɔ̀ŋ anyuùŋ jiɛ̀jiɛ̀ nyaŋ, anyùùŋ nyaŋ yaà naàŋ aŋ jiɛ̀jiɛ̀ nyaŋ lɛ̀, do nàŋ nɔ̀ŋ anyuùŋ dìàmaŋ nyàŋ.”

E mànaàŋ wo Jisɛ̀ kuwa wèè ko Jùlusɛ̀làm lɛ

³¹ E tèèngà guùŋ lii sùà aŋ Fɛlosiì nyaŋ bà nyiŋ naŋ hnè koɓɛ̀ Jisɛ̀i yèè àŋ nauŋ woò nyààŋ, “Wo Hɛɛlɔ̀ manaŋ wèè woum jìwà, weètii yewà kià muŋ ka.”

³² Wo Jisɛ̀ naŋ nyiŋ fasàì wààŋ, “Kɔ̀aìŋ niŋ woò wo kààŋ wii nààŋ, ‘Mìŋ yaà nyìmaŋ sùà aŋ jinàŋ naanààŋ, nàaŋ yèè nàwèè mìŋ yaà sùngìè anyùùŋ, yèè mìŋ do nàŋ kpɛɛyɛ̀ maŋ ɗɔ̀ɔ̀ taai sùà.’

³³ Kɛɛ mìŋ do nàŋ dè dòmàŋ nàaŋ, nàwèè yèè ke ɗɔɔɛ̀ bàa. Esaɓù kɛ̀ ko Jùlusɛ̀làm nàŋ siaŋ wèè ao jìwìà wo wɛ̀ijì.”

³⁴ Wo Jisɛ̀ wààŋ, “Kuoo nyɛ̀iŋ nààŋ nyùnòò Jùlusɛ̀làm nyaŋ! Anyunùiŋ nyàŋ naŋ wa jìwè aŋ wɛ̀ijì nyaŋ, àŋ naŋ hɔ̀wɔ̀ aŋ keela nyàŋ wo Dayà naŋ wa tùɔ̀ŋ ko nɛ̀ɛ̀iŋ niìŋ nyaŋ. E teenga zimgbe mìŋ naŋ nyɛ̀nɛ̀ŋ wànàŋ wèè kaiŋ gbònògbònò koɓɛ̀ guùŋ, màànààŋ wo tɔɔ boolìɔ gbonàŋ aŋ tɔɔjɔauŋ nyàŋ maŋ gbauŋ màŋ dìì lɛ. Kɛɛ niŋ gò wa nyimèè wèè mìŋ doiŋ gbònò kòɓɛ̀ guùŋ.

³⁵ Weètii kùmiaìŋ tɛɛ̀, wo Dayà do nàŋ fè ke Saaŋ Zòòlò Dayàiŋ nɛɛ̀ŋ jɛwɛ. Miŋ woòiŋ e tɔɔɓaaà kɛ̀, niŋ naàim wa nàwèè ɓɛìŋ yɛmɛ̀ e jèèsùà e teengaà e wa nàwèè hnàŋ yèè naŋ woò nààŋ, ‘Wo Dayà kpuumàŋ wo nyùnɔ̀ɔŋ hnàŋ e dèè Kanaà diɛŋ wɔ̀.’ ”