Luù 11 - WƆŊ FƐ̀Ì EBÒ SÌÀŊ DAYÀA

Wo Jisɛ̀ naŋ kàà e ɗèwè zòòlo

¹ Ke ɗɔ̀ɔ̀ guùŋ wo Jisɛ̀ yaà wa zoolo koɓɛ̀ bà. Nààŋ wò naŋ wa kpɛ̀ɛ̀yɛ̀ zòòlo, wo nyùùŋ màŋjɛ̀wɛ̀uŋ nɔɔ̀ŋ bà guùŋ naŋ hnè ko nɛ̀ɛ̀uŋ niìŋ wò nauŋ woò wààŋ, “Kanaà, kàà wi e ɗèwè zòòlo, màànààŋ nɔŋ wo Jɔ̀ɔŋ naŋ wa kàà anyùùŋ màŋjɛ̀wɛ̀uŋ nyàŋ lɛ.”

² Wo Jisɛ̀ naŋ nyiŋ woò wààŋ, “Sèè nìŋ nɔ̀ŋ zoolo, tɛɛ̀ nìŋ woà, ‘Dèda, tɔ̀ e dèè nɛɛmaŋ mɔ̀ɛ̀ nɔ̀ŋ jòòwo niŋ. Tɔ̀ e Kana mɔ̀ɛ̀ hnàŋ,

³ Kìɛ̀ŋ wi e nɛ̀ŋjè nyaàŋ wilɛ̀ ke ɗɔɔ gbiŋ.

⁴ Jùùyaà wi hakɛ̀ wèè maŋ keì naanààŋ maŋ è naiŋ nyɛ̀nɛ̀ŋ maŋ, màànààŋ nɔŋ è juuyà aŋ dàwi wi nyàŋ hakɛ̀ wèè maŋ keì naanààŋ maŋ àŋ jàà wì maŋ. Ɓɔ̀ mùŋ koà wi è wàa nyìnga dìì.’ ”

⁵ Kpeiŋ wo Jisɛ̀ naŋ wòò anyùùŋ màŋjɛ̀wɛ̀uŋ nyàŋ wààŋ, “Sèè nyɛ̀iŋ nààŋ bà guùŋ maŋ weè kà ko gbòò dàwi mɔɔ̀ŋ wɔŋ duùm hàì tɛ mauŋ dawè mààŋ, ‘Dàwi miɔ̀ŋ, gbiàim e gbɔ̀ù taai kpàŋ.

⁶ Wo dàwiim bà yaà kɔ̀ɔ̀yɛ̀ koɓɛ̀ bà kɛɛ wò naŋ nɔŋ hnè ko gboo miìŋ sààmɛ, yèè miŋ kuwà è nɛ̀ŋje gbiŋ wèè wo jè.’

⁷ Kɛɛ sèè wo dàwi mɔɔ̀ŋ woum fasàì ko saaìŋ wààŋ, ‘Ɓɔ̀ mùŋ mɔɔnɛ̀im! Wɔŋ gbemgbeeɔ̀ yaà naàŋ yìla, e kìlà yàwi nààŋ jɔ̀àim nyàŋ èiŋ naàŋ hawe. Miŋ naàŋ yèwè dìì wèè kaum kìɛ̀ŋ è nɛ̀ŋ gbiŋ.’

⁸ Sèè è nɔ̀ŋ yɛi, kɛ̀ kiìŋ mùŋ nyɛnɛŋ? Tɔ̀ miŋ woòum kɛ̀ sèè wo dàwi mɔɔ̀ŋ go pɛɛ yèwà dìì wèè woum kìɛ̀ŋ è nɛ̀ŋjeɛ̀ esaɓù kɛ̀ mùŋ yaà wo nyuùŋ mɔ̀ɔ̀nɔuŋ, kɛɛ wò do nàŋ yèwè dìì woum kìɛ̀ŋ e nɛ̀ɛŋ gbiŋ mùŋ manaŋ lɛ̀ esaɓù kɛ̀, e sàngè naàum nyɛ̀nɛ̀ŋ wèè mauŋ hɔ̀ànè dàwe.

⁹ Weètii tɔ̀ miŋ woòiŋ, dàweìŋ wo Dayà wèè e nɛ̀ɛŋ nìŋ naŋ kpɛɛ̀ŋ weè niŋ lɛ̀. Sèè nìŋ nyɛnɛŋ tii, wò doiŋ niŋ nàŋ kiɛ̀ŋ, kàmeìŋ koɓɛ̀i wo Dayà yaà lɛ, nìŋ douŋ nàŋ mɛɛ̀ŋ, kpùlaìŋ wɔŋ gbemgbeeɔ̀ koɓɛ̀i wo Dayà yaà lɛ, wò do wuŋ nàŋ yilè weèiŋ.

¹⁰ Esaɓù kɛ̀ wo Dayà dò nàŋ kìɛ̀ŋ anyùùŋ nyaŋ dawàuŋ wèè manɛ̀ŋ nyaŋ. Wò do nàŋ kìɛ̀ŋ manɛ̀ŋ koɓɛ̀ anyùùŋ nyaŋ kamàŋ mìŋ nyaŋ, e kìlà wò do nàŋ yìlè wɔŋ gbemgbeeɔ̀ wèè anyùùŋ aŋ yɛ̀mɛ̀ manɛ̀ŋ maŋ àŋ zoolà weè miŋ màŋ.

¹¹ Nyɛ̀iŋ nààŋ felaa kòmaŋ nyɛɛ̀ŋ bà gbiŋ ɓɛ̀nɛ̀ŋ kìɛ̀ŋ wo jɔ̀àfelaa mɔɔ̀ŋ wo kaì sèè wò dawàùm wèè wo kɛì?

¹² Ɔ̀ɔ̀ màŋ ɓɛ̀nɛ̀ŋ kìɛ̀ŋ wo jɔ̀àfelaa mɔɔ̀ŋ wo lèèmàngbìlà sèè wò dawàùm wèè ke kùò tɔɔ?

¹³ Jòòpɛɛ nìŋ kuwa maŋ kpèè naanààŋ, kɛɛ nàŋ nyìmàŋ e ɗèwè manɛ̀ŋ kɛnɛ kìɛŋ koɓɛ̀ aŋ jɔ̀àiŋ nyàŋ. Dièsɔa nìŋ naŋ ɓɛ̀nɛ̀ŋ gòngo kɛ̀ wo Dèdaiŋ nɔɔ̀ŋ ko àìjɛnɛ̀ŋ wo naàŋ kìɛ̀ŋ wò Jìnàŋ Nɛɛmaàŋ kòɓɛ̀ ànyùùŋ nyaŋ dawàuŋ nyaŋ?”

Wo Jisɛ̀ yaà wo Bɛɛziɓù, wo kànà aŋ jinàŋ naanààŋ nyaŋ

¹⁴ Wo Jisɛ̀ naŋ wa gè wo jinàŋ naanààŋ wo felaa bà maŋjɛ̀wɛ wo yèɔ fè wa ɓɛ̀nɛ̀ŋ gbòa wɔ̀. Wo felaaà naŋ tɔ̀ɔ̀tù gbòa nààŋ wo jinàŋ naanààaŋ nauŋ wa fòlò sùà, tɛɛ̀ naŋ wa fòònò anyùùŋ nyaŋ.

¹⁵ Anyùùŋ nyaŋ bà nyiŋ naŋ wa woò nyààŋ, “Wo Bɛɛziɓù wo, wo kànà aŋ jinàŋ naanààŋ nyaŋ, wuŋ nàŋ kiɛ̀ŋ Jisɛ̀ e gààaŋ wèè wo gè aŋ jinàŋ naanààŋ nyaŋ anyùùŋ maŋjɛ̀wɛ.”

¹⁶ Anyùùŋ nyaŋ bà nyiŋ manaŋ wa aŋ kùwìà wo Jisɛ̀ ke gbaù sùà, kpeiŋ àŋ nauŋ dawè wèè wo nyɛ̀nɛ̀ŋ e kèè mèè weè nyiŋ wèè wo tɔɔ̀ kɛ̀ wo Dayà e yìwìà ko àìjɛnɛ̀ŋ nauŋ gè nyààŋ diɛŋ.

¹⁷ Wo Jisɛ̀ wa nyìmàŋ kɛ̀ kiìŋ àŋ yaà wa goongo, yèè wò naŋ nyiŋ woò wààŋ, “Sèè e kànà wɔŋ fuɔŋ ɗi e gòònò maŋ gbòò sùà wèè e sùmìàŋ tiiŋ bi e fèemàŋ, e kana lii do nàŋ pɔɔpɔ̀ɔ̀. Sèè ke kpoo ke gòònò maŋ gbòò sùà wèè ke sùmìàŋ kiiŋ bi e fèemàŋ, ke kpoo bi do nàŋ pɔɔpɔ̀ɔ̀.

¹⁸ Weètii sèè e kànà Sɛ̀tanàaŋ e gòònò tɛɛ maŋ gbòò sùà wèè e sumiàŋ tiiŋ bi, dièsɔa è do nàŋ kòlò? Nìŋ naŋ woò nààŋ mìŋ gè aŋ jinàŋ naanààŋ anyùùŋ maŋjɛ̀wɛ̀ esaɓù kɛ̀ wo Bɛɛziɓù nàŋ kiɛ̀ìm e gààaŋ wèè ka niŋ nyɛ̀nɛ̀ŋ.

¹⁹ Sèè mààŋ e gààŋ Bɛɛziɓùɛ sùà mìŋ gè anyùùŋ aŋ jinàŋ naanààŋ maŋjɛ̀wɛ, kɛ̀ dièsɔa anyùùŋ màŋjɛ̀wɛ̀iŋ nyàŋ àŋ gè aŋ jinàŋ naanààŋ anyùùŋ maŋjɛ̀wɛ? Anyùùŋ màŋjɛ̀wɛ̀ nyɛ̀iŋ bi nyàŋ nàŋ doiŋ wa nàwèè nàŋ gbaì yèè aiŋ jèè e keì.

²⁰ Kɛɛ sèè mààŋ è gààŋ Dayàa sùà le kɛ̀ mìŋ gè aŋ jinàŋ naanààŋ anyùùŋ maŋjɛ̀wɛ, tɛɛ̀ è tɔɔ̀ kɛ̀ e Kànà Dayàa è naàŋ hnàŋ ko nɛ̀ɛ̀iŋ niìŋ tɛ.

²¹ “Sèè wo nyùùŋ gààaŋ wo kɛ̀ɛ̀nɛ̀ŋ manɛ̀ŋ sùmiauŋ màŋ gbiŋ, e kìlà wo tùnìàŋ ko jɔ̀ɔ̀lègbèè ke sààŋ hàwè wuŋ biɛ̀, wo nyùùŋ gbiŋ fè wùà manɛ̀ŋ siwèuŋ màŋ kò saauŋ niìŋ, e kìlà wò do nàŋ nɔ̀ŋ ke jii fàa sùà.

²² Kɛɛ sèè wo nyuùŋ kɛ̀ɛ̀nɛ̀ŋ gààŋ gbee wò hnàŋ wò ɓulo wo kɛ̀ɛ̀nɛ̀ŋ saaŋ wii, kɛ̀ wò kòà manɛ̀ŋ sùmiaŋ màŋ gbiŋ wo kɛ̀ɛ̀nɛ̀ŋ saaàŋ naŋ tùlìè jii màŋ, yèè wo ka wo gòònò manɛ̀ŋ maŋ wò naŋ gè ko saaŋ wii màŋ koɓɛ̀ anyuùŋ joo.”

²³ Wo Jisɛ̀ naŋ ɓɛìŋ woò wààŋ, “Wo nyùnɔ̀ɔŋ gbiŋ gò dè kpèè miɛ̀ŋ màŋjɛ̀wɛ wɔ̀, wò yaà wo jooim. Wo nyùnɔ̀ɔŋ gbiŋ gòim kpuumàŋ wèè eiŋ gbònò àŋ ɓaawaa nyàŋ kòɓɛ̀ guùŋ wɔ wò do nyiŋ nàŋ nyɛ̀nɛ̀ŋ aŋ dùàŋ aŋ ɓaayè.”

Wo jinàŋ naanààaŋ kɛ̀ɛ̀ maŋjɛ̀wɛ

²⁴ Wo Jisɛ̀ naŋ ɓɛìŋ woò wààŋ, “Sèè wo jinàŋ naanààŋ folo wo nyùùŋ maŋjɛ̀wɛ, wò kɔɛ̀ ke fòùngà e diì wòaà sùà, wò yaà kààmè ko nɛ̀nɛ̀ŋ wèè wo gè nyiiŋ. Kɛɛ sèè wo jinàŋ naanààaŋ go yɛ̀mɛ̀ ko nɛ̀nɛ̀ŋ, kɛ̀ wò woò wààŋ, ‘Mìŋ yaà kɛ̀ɛ̀ sùà ko gbooì mìŋ yewe lɛ̀ wo nyùnɔ̀ɔŋ sùà.’

²⁵ Sèè wo jinàaŋ naanààaŋ kɛɛ̀o, wò mɛɛ̀ŋ wo nyùùŋ bi wò yaà mààŋ ko saaŋ kò yaà hàmaŋ fo, yèè kò zɛnɛŋ.

²⁶ Kpeiŋ kɛ̀ wò fòlà wò ka wò hìàŋ aŋ jinàŋ naanààŋ àŋ nɔɔnɔŋ le tìyèe aŋ yè nyaŋ ngèè nanaŋ aŋ nìàŋ wuŋ bi nyàŋ. Aŋ gbiŋ àŋ hnàŋ aŋ nyɛ̀nɛ̀ŋ ko gboo nyiŋ niìŋ wo nyùùŋ bi sùà. Sèè tii è maaŋ, wo nyùnɔ̀ɔŋ àŋ jɔ̀à ko sùà wɔ wò nɔ̀ŋ naanààŋ e nìàŋ e ɗeweɛ̀ wò yaà wa gɔu lɛ̀.”

E zɔlɔ̀ gèe e tɔ̀ɔ̀nyaàŋ sùà

²⁷ Nààŋ wo Jisɛ̀ naŋ wa tɛɛ̀ woò, wo nìe bà e faaàŋ sùà naŋ gbòò yèè wò naŋ woò wààŋ, “E zɔlɔ̀ yaà wo jɔunɔ̀ɔŋ naum kòmò yèè wò naum yaà wɔ!”

²⁸ Wo Jisɛ̀ naŋ fasàì wò naŋ woò wààŋ, “E zɔlɔ̀ yaà ngèè koɓɛ̀ anyùùŋ nyaŋ komo ke mìè gbìàŋ Dayàa yèè aŋ nyiŋ jàà kùàŋ dìì nyaŋ!”

Anyùùŋ nyaŋ naŋ dàwè wo Jisɛ̀ wèè wo nyɛ̀nɛ̀ŋ e kèè mèè

²⁹ Nààŋ anyùùŋ nyaŋ yaà wa gàŋ sùà wo Jisɛ̀ kɔɔ, wò naŋ nyiŋ tɔ̀ɔ̀tù woò wààŋ, “Anyùùŋ nyaŋ e ɗuunyaŋ lɛɛ̀ àŋ yaà anyùùŋ maŋ jùumù. Àŋ yaà daawè wèè tɔ̀ɔ̀màŋsèì e kèè mèè, kɛɛ miŋ naàŋ nyiŋ tɔ̀ɔ̀ è tɔ̀ɔ̀màŋsèì è kèè mèè gbiŋ. Sɔɔ̀ nɔŋ e tɔ̀ɔ̀màŋsèì e kèè mèè Joonàaŋ.

³⁰ E ɗèwè guùŋ nɛ sùà nɔŋ wo Joonàŋ naŋ nɔ̀ŋ e tɔ̀ɔ̀màŋsèì e kèè mèè lɛ wèè anyùùŋ nyaŋ ko Ninivà lɛ, yɛi nɔŋ miàim wo Jɔ̀àfèlàà Nyuùŋ Kpùnɔɔ̀ŋ do nàŋ nɔ̀ŋ e tɔ̀ɔ̀màŋsèì e kèè mèè wèè anyùùŋ nyaŋ e ɗuunyaŋ lɛɛ̀ nàaŋ ɗɔɔ yɛɛ̀.

³¹ Ke ɗɔɔɛ̀ wo Dayà do wa nàwèè nàŋ gbàì e ɗuunyaàŋ lɛ, wo Jɔùŋ Kana Gbeeɔ̀ wèè ko Siiɓà do wa nàwèè naŋ sie yèè wo jèè anyùùŋ e ɗuunyaŋ lɛɛ̀ nàaŋ ɗɔɔ yɛɛ̀ e keì, esaɓù kɛ̀ wò naŋ wa kààìŋ dìì ke dòmaŋ mùŋlaŋ e yìwìà wɔŋ fuɔuŋ nɔɔ̀ŋ wèè wo kòmàŋ e kèè e jììkɛ̀ɛ̀ Salemàaŋ. Yèè tɔ̀ miŋ woòiŋ kɛ̀ e nɛ̀ŋ bà kòò è yaà kià è kuwa e sɛmɛ e nìàŋ wo Salemàŋ.

³² Anyùùŋ nyaŋ ko Ninivà doiŋ wa nàwèè nàŋ sìè kɔɔ ke ɗɔɔɛ̀ wo Dayà do wa nàwèè nàŋ gbàì e ɗuunyaàŋ lɛ, yèè àŋ doiŋ nàŋ jèè e keì, esaɓù kɛ̀ àŋ naŋ wa fè maŋ jùumù nyiŋ màŋ jɛwɛ nààŋ àŋ naŋ wa kòmò wo Joonàŋ naŋ gbòò ke mìè Dayàa ko nɛ̀ɛ̀ŋ nyiŋ niìŋ. Yèè miŋ woòiŋ kɛ̀ e nɛ̀ŋ bà kòò è yaà kià è kuwa e sɛmɛ e nìàŋ wo Joonàŋ.”

E gbolòùŋ lɛ wèè ke kpùnaàŋ

³³ “Wo nyùùŋ gbiŋ fè sìà è laumpò kpeiŋ wo niŋ nyɛɛnɛ̀ŋ ɔ̀ɔ̀ wo niŋ hòà wɔ̀ŋ pòum dìì. Wò jàa niìŋ koɓɛ̀i e laumpòɛ jaà lɛ wèè e kìɛ̀ŋ anyùùŋ nyaŋ jɔ̀à ko saaìŋ nyaŋ e gbolòùŋ.

³⁴ Le fɛɛ̀ mɔ̀ɛ̀ è yaà mààŋ e laumpò wèè ke kpùnaŋ mɔɛ̀ŋ. Sèè le fɛɛ̀ mɔ̀ɛ̀ è nɔ̀ŋ sengei, e gbolòùŋ doum nàŋ kiliè nààŋ mùŋ manaŋ lɛ̀. Kɛ̀ɛ̀ sèè le fɛɛ̀ mɔ̀ɛ̀ è go nɔ̀ŋ sengei, ke kpùnaŋ mɔɛ̀ŋ do nàŋ nɔ̀ŋ ke nyìwì sùà.

³⁵ Weètii yɛ̀mɛ̀ muàŋ bi diɛŋ wèè kɛ̀ e gbolòùŋ lɛ yààùm ko sùà lɛ e go nàŋ nɔ̀ŋ ke nyìwì.

³⁶ Sèè ke kpùnaŋ mɔɛ̀ŋ gbiŋ kè nɔ̀ŋ e gbolòùŋ sùà, e yèɛ ke bà gbiŋ fè kè nyìwì sùà, ke gbiŋ do nàŋ mɛ̀ɛ̀ŋ, màànààŋ e gbòlòùŋ laumpòɛ mɛɛŋ ko nɛ̀ɛ̀ŋ muìŋ lɛ.”

Wo Jisɛ̀ naŋ gbùwò aŋ Fɛlosiì nyaŋ yaà aŋ kààmɔ̀ɔ̀ŋ maŋ Sàwà Dayà nyaŋ e keì ɗì

³⁷ Nààŋ wo Jisɛ̀ naŋ wa kpɛ̀ɛ̀yɛ̀ gbòa, wo Fɛlosiìɔ bà nauŋ dawè wèè wo ka ko gboouŋ noo wèè aŋ jènɛ̀ŋ. Yèè wò naŋ kɔ̀ wo jɛi wèè aŋ jènɛ̀ŋ.

³⁸ Kɛɛ è naŋ wa fòònò wo Fɛlosiìɔ nààŋ wò naŋ yɛ̀mɛ̀ wò Jisɛ̀ wo gò wa gùà màŋ kùàŋ paŋgàà wò naŋ wa tɔ̀ɔ̀tù è nɛ̀ŋ jèe.

³⁹ Wo Kanaà Jisɛ̀ nauŋ woò wààŋ, “Nyɛ̀iŋ nààŋ Fɛlosiì nyaŋ nìŋ guo maŋ kpòò tììyaiŋ màŋ yaà maŋ tɛnyɛ̀iŋ màŋ jɛwɛ paŋgàà nìŋ jiiyà mìŋ sùà. Kɛɛ e wànàŋ nɛ̀ŋ keekèè e hààwè maŋ keì naanààŋ naŋ dìè nyɛ̀iŋ bi sùà.

⁴⁰ Nyɛ̀iŋ nààŋ nyuùŋ gò nyìmàŋ keì fèemàŋ nyɛɛ̀ŋ! Wo Dayàa naŋ bànè ko jɔɔlèe wɔ̀, wuŋ nàŋ gò bànè kò sùài?

⁴¹ Kɛɛ kìɛ̀ŋ manɛ̀ŋ maŋ yaà maŋ kpòò tììyaiŋ màŋ yèè maŋ tɛnyɛ̀iŋ màŋ sùà koɓɛ̀ anyuùŋ pɔ̀ɔ nyàŋ, kɛ̀ e yèɛ gbiŋ nìŋ kuwa lɛ̀ è nɔ̀ŋ zɛ̀nɛŋ niŋ tɛ̀ɛ̀ koɓɛ̀ Dayài.”

⁴² “E keì nyìnga do nàŋ nɔ̀ŋ ko nɛ̀ɛ̀iŋ niìŋ, nyɛ̀iŋ nààŋ Fɛlosiì nyaŋ! Nìŋ kiɛ̀ŋ wo Dayà manɛ̀ŋ jeiŋ bà àŋ nyaaŋ nyààŋ mɛìŋ, yaà luù, e kpùlìà manɛ̀ŋ je gbànaiŋ màŋ e ɗì guùŋ e yiwià manɛ̀ŋ ɗì zììyà sùà, maŋ yè maŋ nìŋ gè maŋ kpòkpòiŋ màŋ sùà. Kɛɛ nìŋ fè e tɔ̀ɔ̀nyaàaŋ yèè nìŋ fè e mànàŋ Dayàa jɛwɛ. Maŋ keì mɛɛ̀ŋ nìŋ kuwa naŋ gbeè wèè naŋ nyɛ̀nɛ̀ŋ, e yèɛ niŋ fè kɔ̀ɔ̀yɛ̀ màŋ gbànaŋ màŋ fɛ̀ɛ̀ diɛŋ.”

⁴³ “E keì nyìnga do nàŋ nɔ̀ŋ ko nɛ̀ɛ̀iŋ niìŋ, nyɛ̀iŋ nààŋ Fɛlosiì nyaŋ! Nìŋ manaŋ maŋ jɛ̀i kɛnɛ màŋ àŋ naŋ jàà e ɓula titi màŋ maŋ sààŋ zòòlò aŋ Juùù nyaŋ dìì e kìlà wèè aiŋ kìɛ̀ŋ e ɓɛ̀ɛ̀jàa koɓɛ̀i àŋ nyiniàŋ maŋ bòli màŋ lɛ.

⁴⁴ E keì nyìnga do nàŋ nɔ̀ŋ ko nɛ̀ɛ̀iŋ niìŋ! Nìŋ yaà mààŋ maŋ hùàaŋ gò kɛ̀ɛ̀nɛ̀ŋ fee maŋ yè maŋ anyùùŋ kaaìŋ diɛŋ esaɓù kɛ̀ aŋ nyimààŋ è kiiŋ miŋ, e nyiŋ nyɛ̀nɛ̀ŋ aŋ nɔ̀ŋ anyuùŋ gò zɛ̀nɛ̀ŋ wo Dayà fɛɛ̀feìŋ.”

⁴⁵ Wo kààmɔ̀ɔ̀ŋ maŋ Sàwà Dayà maŋ bà guùŋ nauŋ woò wààŋ, “Kààmɔɔŋ, sèè mùŋ woà tɛɛ̀, kɛ̀ màŋ wi pɔ̀ɔ̀ɓɛ̀ɛ yàwi pɛɛ!”

⁴⁶ Wo Jisɛ̀ nauŋ woò wààŋ, “E keì nyìnga do nàŋ nɔ̀ŋ ko nɛ̀ɛ̀iŋ niìŋ nyɛ̀iŋ nààŋ kààmɔ̀ɔ̀ŋ maŋ Sàwà Dayà nyaŋ pɛɛ! Nìŋ gbuwo manɛ̀ŋ foo mùnga anyùùŋ jɛwɛ wèè aŋ miŋ koà, kɛɛ niŋ fè pɛɛ gè kè kiiyò dìì wèè naŋ nyiŋ kìɛ̀ŋ è kpùùmaŋ wèè aŋ kòà manɛ̀ŋ foo miiŋ.

⁴⁷ E keì nyìnga do nàŋ nɔ̀ŋ ko nɛ̀ɛ̀iŋ niìŋ! Nìŋ kpaa maŋ hùàŋ aŋ wɛ̀ijì nyaŋ, aŋ yè nyaŋ anyùùŋ kòmàŋ nyɛ̀iŋ bi nyàŋ naŋ wa jìwè nyaŋ.

⁴⁸ Nyɛ̀iŋ bi nìŋ naŋ kìɛ̀ŋ ke mìè seì, kɛ̀ nìŋ naŋ wa nyimèè wèè e nɛ̀ɛŋ anyuùŋ kòmaiŋ nyàŋ naŋ wa nyɛ̀nɛ̀ŋ lɛ. Àŋ naŋ wa jìwè aŋ wɛ̀ijì nyaŋ. Niŋ gò nyiŋ wa kìɛ̀ŋ ɓɛ̀ɛ̀jàa, nìŋ naŋ wa nɔŋ kpàà maŋ hùàaŋ nyiŋ màŋ.

⁴⁹ E wèè esaɓù lɛɛ̀, wo Dayà wo yèɔ kuwa jiikɛ̀ɛ wɔ̀ naŋ woò wààŋ, ‘Mìŋ do nyiŋ nàŋ tùɔ̀ŋ aŋ wɛ̀ijì yèè aŋ keela. Àŋ do nàŋ jìwè aŋ bà nyiŋ e kìlà aŋ jàà aŋ bà nyiŋ e keì nyìnga.’

⁵⁰ Weètii wo Dayà do nàŋ mɔ̀ɔ̀nɛ̀ŋ anyùùŋ nyaŋ e teenga lɛɛ̀ nàaŋ wèè aŋ wɛ̀ijì nyaŋ gbiŋ àŋ naŋ wa jìwè yèè àŋ naŋ wùɔ̀ŋ maŋ sɛìŋ nyiŋ màŋ nyaŋ e yìwìà ko tɔ̀ɔ̀tù e ɗuunyaàŋ,

⁵¹ e yìwìà maŋ sɛ̀ìŋ Eɓɛ̀ɛ̀ maŋ e kà koɓɛ̀ maŋ sɛ̀ìŋ Zakalayà maŋ, wo yèɔ nìŋ naŋ wa jìwìè e fèèmàŋ ke Saaŋ Zòòlò Dayàa yèè wɔŋ gbɛ̀gbɛ̀ zòòloɔ̀. Hɛ̀ɛɛ̀ŋ, tɔ̀ miŋ woòiŋ kɛ̀, maŋ keì nyìnga mɛɛ̀ŋ gbiŋ do nàŋ kààìŋ anyùùŋ nyaŋ gbiŋ yaà nàaŋ wɔŋ nyiiŋ gèeɔ̀ sùà nyaŋ.”

⁵² “E keì nyìnga do nàŋ nɔ̀ŋ ko nɛ̀ɛ̀iŋ niìŋ nyɛ̀iŋ nààŋ kààmɔ̀ɔ̀ŋ maŋ Sàwà Dayà nyaŋ! Nìŋ bànè e jìiìŋ nɛ hàa, e yèɛ yilà wɔŋ gbèmgbèè ke sààŋ jiikɛ̀ɛɛ̀. Nyɛ̀iŋ bi niŋ fè jɔ̀à, e kìlà nìŋ keewà anyùùŋ nyaŋ yaà kààmè ɗewe wèè aŋ jɔ̀à nyaŋ kùàŋ feìŋ wèè aŋ goonàŋ jɔ̀ nyiŋ pɛɛ.”

⁵³ Nààŋ wo Jisɛ̀ naŋ wa naàŋ wèè wo yèwà ko gbòò Fɛlosiìɔ wo yèɔ nauŋ wa nyààŋ wɔ, aŋ kààmɔ̀ɔ̀ŋ maŋ Sàwà Dayà nyaŋ yaà aŋ Fɛlosiì nyaŋ nauŋ tɔ̀ɔ̀tù gbùùya fììfìì yèè aŋ dawàuŋ maŋ mààŋdàwè e nyaàiŋ dè maŋ keì zimgbe,

⁵⁴ wèè aŋ nyɛ̀nɛ̀uŋ wo woò e keì naanààŋ.