Kòlo 2 - WƆŊ FƐ̀Ì EBÒ SÌÀŊ DAYÀA

¹ Mìŋ manaŋ naŋ nyìmàŋ e tòmo nyìngaà mìŋ naŋ nyɛ̀nɛ̀ŋ e weèiŋ yèè wèè anyuùŋ hààwe nyàŋ ko Làòdisià, yaà anyuùŋ hààwe nyiiŋ gbiŋ aŋ yè nyaŋ kòò àŋ yɛ̀mɛ̀ wa kè kpùnaŋ miɛ̀ŋ nyaŋ.

² Mìŋ nyɛnɛŋ tɛɛ̀ wèè ka nyiŋ kiɛ̀ŋ ke jii nyingè e kìlà ka nyiŋ jàànè koɓɛ̀ guùŋ e mànaŋ sùà, wo Dayà do nyiŋ nàŋ kìɛ̀ŋ e kpùùmaŋ gbee wèè aŋ nyìmàŋ kɛ̀ kiìŋ e nɛ̀ŋ nyìmaŋ kɛnɛ hiàŋ. E ɗewe lɛɛ̀ sùà, àŋ do nàŋ nyìmè ke gbùnù Dayàa. Ke gbùnu bi zà nàŋ yaà wo Jisɛ̀ Kulaì wuŋ bi.

³ Wuŋ nàŋ yaà e jìiìŋ nɛ yilà e sùlò Dayàa è yaà ko nyɛɛnɛŋ e nyaàiŋ dè e jiikɛ̀ɛɛ̀ yaà e keì nyìmàŋ fèemàuŋ nɛ̀.

⁴ Tɔ̀ miŋ woòiŋ, ɓɔ̀ nìŋ nyimèè wèè wò nyùùŋ gbiŋ wò doiŋ zùùwò màŋ mìè gbòa ɓuuyè, miŋ gò kpɛɛ̀ŋ diè kè naŋ ɓuuyè.

⁵ Jòòpɛɛ ke kpùnaŋ miɛ̀ŋ fèìŋ è tɛɛ, kɛɛ mìŋ yààìŋ e tɛɛ wɔŋ nyììŋ jinàŋ miɔ̀ŋ sùà. Ke jii naim fɔ̀ wèè ka nyìmàŋ kɛ̀ kòò nìŋ yaà nyìnìè wɔŋ nyiiŋ gèeiŋ nɔɔ̀ŋ e ɗewe kiiɛ̀ è naŋ tɛɛwɛ̀ lɛ, yèè nìŋ naŋ kùwò e hààweiŋ nɛ̀ kpaŋ wo Jisɛ̀ Kulaì sùà wèè e nɔ̀ŋ e sɛmɛmaŋ niŋ.

Wo Jisɛ̀ Kulaì naŋ hìɛ̀ŋ wɔŋ nyiiŋ gèe kɛnɛ

⁶ Nààŋ nìŋ naŋ jàà wo Jisɛ̀ Kulaì kùàŋ dìì wèè wo nɔ̀ŋ wo Kanaiŋ nɔɔ̀ŋ lɛ, nìŋ kuwa naŋ nɔ̀ŋ aŋ bàiŋbà wɔŋ nyiiŋ gèeuŋ nɔɔ̀ŋ sùà.

⁷ Nyùaìŋ e gulòiŋ nɛ̀ wo Jisɛ̀ Kulaì ko sùà, e kìlà niŋ kɛɛnɛ̀ŋ gààŋ e hààweiŋ nɛ̀ sùà, màànààŋ àŋ naiŋ wa kaà lɛ. Kɛ̀ɛ̀nɛìŋ ke sɛ̀ gèe e teenga gbiŋ koɓɛ̀ Dayài.

⁸ Ɓɔ̀ nìŋ nyimèè wèè wò nyùùŋ gbiŋ doiŋ zuwò wèè naŋ nyɛ̀nɛ̀ŋ è nyaàntàaŋ màŋ keì zùwo màŋjɛ̀wɛ. Maŋ kàa mɛɛ̀ŋ yewe anyuùŋ kpùuŋ sìwè yaà wo sìèfèìŋ aŋ jinàŋ naanààŋ nyaŋ e ɗuunyaàŋ. E kàa kii foo bi gò yìwìà wo Jisɛ̀ Kulaì sìwè.

⁹ E ɗewe kiiɛ̀ wo Dayàa yaà lɛ, e ɗèwè kìì guùŋ bi nɔŋ sùà wo Jisɛ̀ Kulaì naŋ tèènè wo Dayà e nɔ̀ŋ kiiuŋ nɛ̀ ke kpùnàŋ wɔŋ nyiiŋ gèeuŋ nɔɔ̀ŋ sùà,

¹⁰ e kìlà tɔɔɓaa wo Dayà naiŋ nyɛ̀nɛ̀ŋ naŋ nɔ̀ŋ aŋ bàiŋbà wɔŋ nyiiŋ gèeuŋ nɔɔ̀ŋ sùà. Wuŋ nàŋ kuwa e gààaŋ aŋ sìèfèìŋ aŋ jìnàŋ nyaŋ yaà anyùùŋ gbèègbèè nyiŋ nyàŋ diɛŋ.

¹¹ Nààŋ nìŋ yaà wa aŋ bàiŋbà wo Jisɛ̀ Kulaì sùà e teengaà àŋ naiŋ jàà kpùa lɛ̀, miŋ fè wòò è kèè kè kpùà jàà nyuùŋkpùuŋ wèè wɔ̀ŋ kɔɔiŋ nɔɔ̀ŋ, kɛɛ ke kpùa jàaà wo Jisɛ̀ Kulaì naŋ wa kɔ̀ɔ̀ feìŋ lɛ, e yèɛ e nyaàiŋ naŋ dè e ɗeweɛ̀ wò naiŋ wa bilɛ̀ŋ e yìwìà e gààŋ ke kpèè maŋ jùumù dìì lɛ.

¹² Nààŋ àŋ naiŋ wa gùò, è yaà wa mààŋ àŋ naiŋ sììyè nyɛ̀iŋ wo Jisɛ̀ Kulaì koɓɛ̀ guùŋ. E yìwìà e gùa lɛɛ̀ sùà, wo Dayà naiŋ wa gè e fàaà dìì nyɛ̀iŋ Jisɛ̀ Kulaì koɓɛ̀ guùŋ, esaɓù e hààweɛ̀ nìŋ kuwa e gààŋ Dayàa dìì lɛ, wo yèɔ naŋ wa gè wo Jisɛ̀ Kulaì e fàa dìì wɔŋ nyiiŋ gèeɔ̀ sùà wɔ.

¹³ E tèèngà guùŋ bà è yaà mààŋ nìŋ naŋ fɔ̀ wo jinàaŋ sùà ko fɛ̀ɛ̀fèìŋ Dayài esàɓù maŋ keì naanààiŋ màŋ, yèè aŋ gòiŋ wa jàà kpùa e kìlà niŋ fè wa ànyùùŋ Dayà aŋ yè nyaŋ kuwà màŋ sàwà maŋ nyàŋ. Kɛɛ wo Dayà wòiŋ naàŋ hìàŋ koɓɛ̀ wɔŋ nyiiŋ gèe wo Jisɛ̀ Kulaì sùà, nààŋ wò naŋ wi jùùyè hakɛ̀ wèè maŋ jùumù wi màŋ gbiŋ.

¹⁴ Wo Dayà naŋ sɛ̀ɛ̀sɛ̀ɛ̀ wɔŋ fɛ̀ì maŋ kpàŋ wi màŋ naŋ wi sɔ̀ dèè e nyaàiŋ dè maŋ keì naanààŋ wi màŋ gbiŋ diɛŋ, yèè wò naŋ miŋ kpùùnyɛ̀ŋ wɔŋ vànèkpaaà diɛŋ.

¹⁵ Wo Jisɛ̀ Kulaì wɔŋ vànèkpaa wiiŋ diɛŋ, naŋ wa bìlɛ̀ŋ wuŋ bi e yìwìà e gààŋ aŋ sìèfèìŋ aŋ jìnàŋ nyaŋ yaà e gààaŋ anyùùŋ gbeegbèè nyiŋ nyàŋ sìwè. Wò naŋ nyɛ̀nɛ̀ŋ anyùùŋ aŋ nyiŋ yɛmɛ̀ nààŋ àŋ yaà nyiŋ wa kòasùà mààŋ aŋ ɗò ɗùà e ɓùlauŋ nɛ̀ sùà.

¹⁶ Weètii, ɓɔ̀ nìŋ nyimèè wèè wò nyùùŋ gbiŋ wò do bànè màŋ sàwà è weèiŋ è nyaàiŋ dè è nɛɛ̀ŋ nìŋ jè lɛ ɔ̀ɔ̀ è nɛ̀ŋ tìa ɔ̀ɔ̀ maŋ ɗɔ̀ɔ̀ nɛɛmaŋ ɔ̀ɔ̀ wɔŋ Ɗàà gè Waà Jɛ̀ìɔ ɔ̀ɔ̀ ke Ɗɔ̀ɔ̀ Zòòlo.

¹⁷ Maŋ keì mɛɛ̀ŋ gbiŋ yaà nɔŋ wɔ̀ŋ mììmììŋ maŋ keì maŋ do nàŋ kaaìŋ maŋ. Kɛɛ e kɛnɛɛ̀ nàŋ yaà ke kpùnàŋ Jisɛ̀ Kulaìɛ.

¹⁸ Ɓɔ̀ nìŋ nyimèè wèè wò nyùùŋ gbiŋ woiŋ jèè keì, wo yèɔ naŋ tɔɔ̀ kɛ̀ wò yaà nyùùŋ sɛmɛmaŋ, esaɓù maŋ gɔa gòo titi yaà aŋ yè nyaŋ tɔɔ̀ kɛ̀ àŋ yaà tɛ̀ɛ̀ e kèè Dayàa sùà e kìlà àŋ zoolà aŋ màikà. Nààŋ aŋ kuwà èsaɓù bà lɛ, maŋ keì nyɛ̀nɛŋ nyiŋ miiŋ yaà nɔŋ e ɓàaɓàa esaɓù kɛ̀ maŋ gòngo nyiŋ màŋ yaà nɔŋ e ɗewe kiiɛ̀ anyuùŋ kpùuŋ gongà lɛ.

¹⁹ Aŋ fè ɓɛìŋ àŋ bà nyiŋ bà wò Jisɛ̀ Kulaì sùà, wo yèɔ yaà ɓɛ̀màŋɗì ke kpùnaàŋ wɔ. Wo Jisɛ̀ Kulaì nàŋ kiɛ̀ŋ ke kpùnaàŋ gààŋ, yèè wò toomàŋ maŋ suono suono màŋ yèè maŋ kèìŋ maŋ wèè maŋ kùwà koɓɛ̀ guùŋ kpaŋ, e kìlà kè dɛkɛ̀ màànààŋ wo Dayà manaŋ lɛ̀.

Wo Jisɛ̀ Kulaì naŋ hìɛ̀ŋ wɔŋ nyiiŋ jɛi

²⁰ Nyɛ̀iŋ yèè wo Jisɛ̀ Kulaì naŋ wa fɔ̀ɔ̀yɛ̀ koɓɛ̀ guùŋ, yèè wò naiŋ bilɛ̀ŋ e yìwìà e gààŋ wo ɓɛ̀màŋɗì aŋ jìnàŋ ɗuunyaàŋ. Wèè kiìŋ naàŋ nìŋ yaà maŋ nyiiŋ gèe sùà e teenè mààŋ nìŋ yaà wèè e ɗuunyaŋ lɛɛ̀? Wèè kiìŋ nìŋ jɔɔlɔ̀ maŋ langi mààŋ mɛɛ̀ŋ dìì?

²¹ “Ɓɔ̀ nìŋ mɛnlɛ̀ɛ̀ŋ tɛɛ̀,” “Ɓɔ̀ nìŋ wàà tii,” “Ɓɔ̀ nìŋ mɛnlɛ̀ɛ̀ŋ tii”?

²² Manɛ̀ŋ mɛɛ̀ŋ gbiŋ kile manɛ̀ŋ foo sèè àŋ kpɛɛyɛ̀ miìŋ tòòmo. Màŋ yaà nɔŋ maŋ langi yèè maŋ kàà nyuùŋkpùuŋ.

²³ Maŋ langi mààŋ mɛɛ̀ŋ, wɛ̀i ɓɛ̀nɛ̀ŋ tɔ̀ɔ̀ e jiikɛ̀ɛ siaŋ ko nɛ̀ɛ̀ŋ nyiŋ niìŋ, nààŋ àŋ zoolà aŋ màikà, e kìlà àŋ tɔɔ̀ nyiŋ bi kɛ̀ àŋ yaà tɛ̀ɛ̀ e kèè Dayàa sùà, yèè àŋ jaa maŋ kpùnaŋ nyiŋ màŋ maŋ keì keekèè zimgbe. Kɛɛ maŋ kuwà è gààŋ gbiŋ màŋ keì nyɛ̀nɛŋ wi màŋ diɛŋ màŋ kpùnaŋ wi màŋ sùà.