Kòlo 1 - WƆŊ FƐ̀Ì EBÒ SÌÀŊ DAYÀA

¹ E yìwìà miàim Pɔɔ̀ sìwè, wo yèɔ wo Dayà naŋ nyààŋ wèè ka nɔ̀ŋ wo keela tàeɗùù wèè wo Jisɛ̀ Kulaì wɔ, e kìlà e yìwìà wo wùìya wiɔ̀ Timetè sìwè,

² nàŋ yaà sìngìè wɔŋ fɛi wɛɛ̀ŋ koɓɛ̀ anyùùŋ hààwè nɛɛmaŋ nyàŋ ko Kòlosìà, aŋ yè nyaŋ yaà aŋ bà nyiŋ bà wo Jisɛ̀ Kulaì sùà nyaŋ. Tɔ̀ wo Dayà wo Dèda wiɔ̀ wo kiɛ̀iŋ e tɛ̀ɛ̀tɛ̀ɛ̀ yèè ke jii fàa.

E zòòlò ke sɛ̀ gèe

³ E teenga gbiŋ è kiɛ̀ìŋ ke sɛ̀ gèe koɓɛ̀ Dayài, wo Dèdà Kana wiɔ̀ Jisɛ̀ Kulaì, sèè è zoolà weèiŋ.

⁴ Èiŋ kòmàŋ e kèè e hààweɛ̀ niŋ kuwa wo Jisɛ̀ Kulaì sùà, yèè e mànaàŋ nìŋ kuwa wèè anyùùŋ nɛɛmaŋ nyàŋ gbiŋ lɛ̀.

⁵ E teengaà ke mìè gbìàŋ tɔ̀ɔ̀nyààŋ Ebò Siaàŋ naŋ wa hnè ko nɛ̀ɛ̀iŋ niìŋ jiɛ̀ lɛ, nìŋ naŋ wa kòmò e kèè ke jii tùliaà è kiɛ̀ŋ lɛ. Weètii e hààweɛ̀ yèè e mànaàŋ nìŋ kuwa lɛ̀, nàŋ yaà e yèɛ nìŋ yaà kaame ke jii tùlia sùà lɛ, e yèɛ yaà bàànè hàa weèiŋ ko àìjɛnɛ̀ŋ lɛ.

⁶ Ebò Siaàŋ kòò è yaà nɔŋ hìàŋ sùà e kpùùmaŋ e kìlà kòò è yaà ɓààye sùà e ɗuunyaàŋ gbiŋ sùà, màànààŋ nɔŋ è naiŋ ɓààyè e tɛɛ e teenga gɔu, e yìwìà ke ɗɔɔ jiɛ̀jiɛ̀ɛ nìŋ naŋ wa kòmò e kèè e tɛ̀ɛ̀tɛ̀ɛ̀ Dayàa, yèè nìŋ naŋ nyìmè e tɔ̀ɔ̀nyaàaŋ e nyaàiŋ e niŋ dè lɛ.

⁷ Nìŋ naŋ wa kòmò e kèè e tɛ̀ɛ̀tɛ̀ɛ̀ Dayàa e yìwìà wo Ɛpafilè sìwè, wo ɓɔìjɔ̀à tòmo dàwi siaŋ wiɔ̀. Wò yaà wo ɓɔìjɔ̀à tòmo tùlìà jii dàwì wi wo Jisɛ̀ Kulaì sùà.

⁸ Wuŋ naŋ wi ɓɛìŋ wòò e kèè e mànaàŋ wo Jìnàŋ Nɛɛmaàŋ naiŋ kiɛ̀ŋ lɛ.

⁹ E wèè esaɓù lɛɛ̀, è zoolà e weèiŋ e teenga gbiŋ e yìwìà ke ɗɔɔ jiɛ̀jiɛ̀ɛ è naiŋ wa kòmò e kèè hààweiŋ nɛ̀ lɛ. È zoolàìŋ wèè wo Dayà woiŋ tɔ̀ɔ̀ e nɛ̀ɛŋ gbiŋ wò manaŋ naŋ nyɛ̀nɛ̀ŋ lɛ, yèè woiŋ kìɛ̀ŋ e jiikɛ̀ɛ e kìlà woiŋ nyɛ̀nɛ̀ŋ naŋ nyìmàŋ e yèɛ wo Jinàuŋ nɔɔ̀ŋ kiɛ̀ŋ lɛ,

¹⁰ kɛ̀ nìŋ do nàŋ ɓɛnɛ̀ŋ wèè naŋ nyɛ̀nɛ̀ŋ wɔŋ nyiiŋ gèeiŋ nɔɔ̀ŋ e ɗeweɛ̀ wo Kanaà manaŋ lɛ̀, e kìlà e teenga gbiŋ nìŋ do nàŋ nyɛ̀nɛ̀ŋ e yèɛ wò manaŋ lɛ̀. Nìŋ do nàŋ nyɛ̀nɛ̀ŋ e keì sìàŋ maŋ nyiiŋ gèeiŋ màŋ sùà, e kìlà e jiikɛ̀ɛ̀iŋ nɛ̀ wèè naŋ nyìmàŋ wo Dayà tɛ̀ɛ̀ do nàŋ dɛ̀kɛ̀ sùà.

^11-12 È zoolà wo Dayà wèè woiŋ kìɛ̀ŋ e gààŋ e yìwìà e gaàŋ jòòwouŋ nɛ̀, e kìlà naŋ kɛ̀ɛ̀nɛ̀ŋ gààŋ wèè naŋ kɔ̀ɛ̀ e keì ɗewe gbiŋ sùà ke jii tɔumtɔ̀ùm sùà. E yìwìà e zɔlɔ̀ gèe sùà, kìɛìŋ ke sɛ̀ gè koɓɛ̀ wo Dèdaà, wo yèɔ naiŋ nyɛ̀nɛ̀ŋ nìŋ naŋ nɔ̀ŋ aŋ bàiŋbà wèè naŋ kɛ̀ɛ̀nɛ̀ŋ e nɛ̀ɛŋ bà wo Dayà naŋ bànè hàa wèè anyùùŋ nɛɛmauŋ nyàŋ e kànà e gbolòùŋ nɛ sùà.

¹³ Wo Dayà naŋ wi joeyè e yìwìà e gààŋ ke nyìwì Sɛ̀tanàaŋ, yèè wò naŋ wi hìɛ̀ŋ koɓɛ̀ e kànà wo Jɔ̀àfelaa mànauŋ nɔɔ̀ŋ,

¹⁴ e yìwìà esàɓù wo yèɔ è naiŋ nɔ̀ŋ bìlɛŋ wi wɔ̀, tii naŋ tɔɔ̀ kɛ̀ wò naŋ jùùyè maŋ jùumù wi màŋ hakɛ̀.

Wo nyùnɔ̀ɔŋ yaà e tòmò Jisɛ̀ Kulaìɛ

¹⁵ Wo Jisɛ̀ Kulaì nàŋ yaà wo yèɔ naŋ tèènè wo Dayàa e fèiŋ yɛmɛ̀ wɔ. Wuŋ nàŋ yaà wo Jɔ̀àfelaa jiɛ̀jiɛ̀ɔ naŋ nɔ̀ŋ kòmauŋ, wo yèɔ kuwa gààŋ manɛ̀ŋ bànè Dayà maŋ gbiŋ diɛŋ wɔ̀.

¹⁶ E saɓùuŋ nɛ̀ sùà wo Dayà naŋ wa bànè manɛ̀ŋ maŋ gbiŋ ko àìjɛnɛ̀ŋ yaà e dììɛ diɛŋ, maŋ yè maŋ nìŋ yɛmɛ̀ e kìlà niŋ fè yɛmɛ̀ maŋ, e kpùlìà aŋ jinàŋ nyaŋ e ɗùùnyàŋ àìjɛnɛ̀ɛŋ sùà, yaà anyuùŋ gbeegbèè nyiŋ nyàŋ. Wo Dayà naŋ wa bànè e ɗuunyaàŋ gbiŋ e saɓùuŋ nɛ̀ sùà yèè e weèuŋ.

¹⁷ Wo Jisɛ̀ Kulaì yaà wa wɔŋ nyiiŋ gèeɔ̀ sùà pangàà manɛ̀ŋ maŋ gbiŋ naŋ wa nɔ̀ŋ bàne miŋ, yèè nààŋ màŋ yaà maŋ bà miŋ bà ko nɛ̀ɛ̀uŋ niìŋ, maŋ gbiŋ jaa ko jɛ̀i miŋ niìŋ.

¹⁸ Wuŋ nàŋ yaà wo ɓɛ̀màŋɗì ke kpùnauŋ nɛɛ̀ŋ, ke gbòò anyuùŋ hààwe nyàŋ. Wuŋ nàŋ yaà ko tɔ̀ɔ̀tù wɔŋ nyììŋ ke gbòò anyuùŋ hààwe nyàŋ. Wuŋ nàŋ yaà wo Jɔ̀àfelaa jiɛ̀jiɛ̀ɔ naŋ nɔ̀ŋ kòmauŋ wɔ̀, wo yèɔ wo Dayà naŋ wa gè e fàaà dìì wɔŋ nyiiŋ gèeɔ̀ sùà, wèè e nyɛ̀nɛ̀ŋ wuŋ guùŋ wo ɓemè ko jɛ̀i jiɛ̀jiɛ̀i manɛ̀ŋ maŋ gbiŋ diɛŋ.

¹⁹ È yaà wa esàɓù e kìtì Dayàa wuŋ bi sùà wo Jɔ̀àfelaaà naŋ wa tèènè wo Dayà e nɔ̀ŋ kiiuŋ nɛ̀ gbiŋ sùà.

²⁰ E yìwìà esàɓù wo Jɔ̀àfelaauŋ nɔɔ̀ŋ sùà, wo Dayà naŋ wa ɗewè wèè wo kɛ̀lɛ̀ɛ̀ anyùùŋ nyaŋ gbiŋ ko àìjɛnɛ̀ŋ yèè e dììɛ diɛŋ koɓɛ̀ wuŋ biì. Wò naŋ wa hìàŋ jii fàa, nààŋ wò naŋ wa nyimèè wèè wo gììyà maŋ sɛ̀ìŋ wo Jɔ̀àfelaauŋ nɔɔ̀ŋ saaà wɔŋ vànèkpaaà diɛŋ. E ɗewe lɛɛ̀ sùà wò naŋ kɛ̀lɛ̀ɛ̀ manɛ̀ŋ maŋ gbiŋ ko àìjɛnɛ̀ŋ yaà e ɗuunyaàŋ koɓɛ̀ wuŋ biì.

²¹ E tèèngà guùŋ bà nìŋ naŋ wa gòò wo Dayà fauŋ, yèè nìŋ naŋ wa nɔ̀ŋ aŋ joouŋ esàɓù maŋ gòngo naanààŋ yèè maŋ keì naanààŋ maŋ nìŋ naŋ wa nyɛ̀nɛ̀ŋ maŋ,

²² kɛɛ esàɓù e fà ke kpùnàŋ wo Jɔ̀àfelaauŋ nɔɔ̀ŋ, wo Dayà wòiŋ nyɛ̀nɛ̀ŋ nàŋ nɔ̀ŋ anyuùŋ mɔ̀ɔ̀nɔuŋ, wèè wo nyɛ̀nɛ̀iŋ niŋ nɔ̀ŋ nɛɛmaŋ, niŋ zɛ̀nɛŋ, e kìlà ɓɔ̀ niŋ kɛɛnɛ̀ŋ tɔ̀mɛ kò fɛɛ̀fenùuŋ.

²³ Nìŋ kuwa naŋ jèè hààwe sɛmɛ sùà, e kìlà naŋ bànè ko tɔɔtu siaŋ. Ɓɔ̀ nìŋ dangè nyɛ̀iŋ bi nìŋ do mɛɛmɛ̀ɛ̀ŋ e yìwìà kè jii tùliaà nìŋ naŋ wa yɛmɛ̀ yɛ, e teengaà nìŋ naŋ wa kòmò Ebò Siaàŋ e yìwìà ko àìjɛnɛ̀ŋ lɛ. Wèè esàɓù Ebò Siaŋ lɛɛ̀, miàim Pɔɔ̀, naŋ nɔ̀ŋ wo ɓɔìjɔ̀à tòmo, yèè mìŋ naŋ wa gbòò ke mìè Dayàa koɓɛ̀ anyùùŋ nyaŋ gbiŋ e ɗuunyaàŋ.

E tòmò Pɔɔ̀ɛ mààŋ wo ɓɔìjɔ̀à wèè anyuùŋ hààwe nyàŋ

²⁴ E zɔlɔ̀ naim diè, wèè kɛ̀ mìŋ naŋ ɓɛ̀nɛ̀ŋ kà e mɔ̀ɔ̀nɛŋ dìì e weèiŋ. Esàɓù e mɔ̀ɔ̀nɛɛ̀ŋ mìŋ yaà kɔ̀ɔ̀yɛ̀ dìì lɛ, mìŋ yaà kìɛŋ sùà kpùùmaŋ wèè ka kpɛ̀ɛ̀yɛ̀ e mɔ̀ɔ̀nɛŋ kiiɛ̀ wo Jisɛ̀ Kulaì naŋ wa kɔ̀ dìì lɛ nààŋ wò naŋ wùɔ̀ŋ maŋ sɛ̀ìŋ, wèè esàɓù ke kpùnauŋ nɛɛ̀ŋ. Ke kpùnauŋ nɛɛ̀ŋ zà nàŋ yaà ke gbòò anyuùŋ hààwe nyàŋ.

²⁵ Wo Dayà naŋ wa ɗewè wèè woim nyɛ̀nɛ̀ŋ ka nɔ̀ŋ wo ɓɔìjɔ̀à tòmo wèè anyuùŋ hààweuŋ nyàŋ, yèè wèè woim tùàŋ wèè ka dàànè ebò ke miè gbìauŋ nɛɛ̀ŋ gbiŋ ko nɛ̀ɛ̀iŋ niìŋ,

²⁶ kiìŋ nàŋ yaà ke gbùnuɛ̀ wò naŋ wa nyɛɛnɛ̀ŋ e yìwìà aŋ nyuùŋkpùuŋ sìwè wèè maŋ doa jika jika bà sùà, kɛɛ wò nyiŋ naàŋ tɔɔ̀ koɓɛ̀ anyùùŋ nɛɛmauŋ nyàŋ.

²⁷ Wo Dayà naŋ wa ɗewè wèè wo tɔ̀ɔ̀ ke gbùnuuŋ nɛɛ̀ŋ koɓɛ̀ anyùùŋ nɛɛmauŋ nyàŋ, ke gbùnu kɛ̀ɛ̀nɛ̀ŋ bàne yaà e jòòwo yɛɛ̀, ke yèɛ wò kuwa wèè anyùùŋ nyaŋ gbiŋ nyàŋ. Ke gbùnu bi zà nàŋ yaà kɛ̀, wo Jisɛ̀ Kulaì joàìŋ ko sùà, yèè wuŋ nàŋ yaà ke jii tùliaiŋ nɛɛ̀ŋ wèè naŋ nɔ̀ŋ aŋ bàiŋbà e jòòwò Dayàa sùà.

²⁸ Weètii, è daanàìŋ ebò Jisɛ̀ Kulaìɛ koɓɛ̀ anyùùŋ nyaŋ gbiŋ. È toomàìŋ e jiikɛ̀ɛ wilɛ̀ gbiŋ wèè eiŋ kìɛ̀ŋ e gòo yèè eiŋ kàà anyùùŋ nyaŋ gbiŋ, e kìlà wèè e hìàŋ wo bà guùŋ gbiŋ ko fɛ̀ɛ̀fèìŋ Dayài, mààŋ wo nyuùŋ kàmaiŋ wo yèɔ yaà wo bàuŋbà wo Jisɛ̀ Kulaì sùà wɔ.

²⁹ Wèè ka nyɛ̀nɛ̀ŋ tɛɛ̀ e hɛɛnɛ̀ŋ, mìŋ naŋ tomo nyìnga, yèè mìŋ naŋ tòòmò e gaàŋ gbeeɛ̀ wo Jisɛ̀ Kulaì naim kiɛ̀ŋ è toomàìm ko sùà lɛ.