Jɔ̀ɔŋ 8 - WƆŊ FƐ̀Ì EBÒ SÌÀŊ DAYÀA

¹ Kɛɛ wo Jisɛ̀ naŋ wa kɔ̀ wɔŋ tòò maŋ Ɔlè Kùùɔ dìmɛ̀.

² Maŋ nyiìŋ tɛ̀tɛ̀ wɔŋ niìsìaà bàa wo Jisɛ̀ naŋ kɔ̀ ko Saaŋ Zòòlò Dayài. Anyuùŋ zimgbe nauŋ wa dèènè kɔɔ, yèè wò naŋ jɛi wò naŋ nyiŋ tɔ̀ɔ̀tù kàa.

³ Aŋ kààmɔ̀ɔ̀ŋ maŋ Sàwà Dayà nyaŋ yèè aŋ Fɛlosiì nyaŋ bà naŋ hìɛ̀ŋ wo nìe bà wo yèɔ àŋ naŋ kùwò wèè e hmɔŋtu nyɛ̀nɛŋ. Kpeiŋ àŋ naŋ sèèlè wo nìeɔ̀ nyiŋ gbiŋ ko fɛɛ̀feìŋ.

⁴ Yèè àŋ naŋ wòò wo Jisɛ̀ nyààŋ, “Kààmɔɔŋ, è naiŋ kùwò wo nìe wɛɛ̀ ko nyìnìè hmɔŋtu.

⁵ Ke Sàwà wiɛ̀ sùà wo Mòòze naŋ woò wààŋ aŋ hɔ̀wà wo jɔùŋ mààŋ wɛɛ̀ le dùò e jeèsùà wo fà. Sèè è nɔ̀ŋ yɛi, kiìŋ mùŋ kuwa maŋ woò e keì bi sùà?”

⁶ Àŋ naŋ wa dàwè wo Jisɛ̀ wɔŋ mààŋdàwè wɛɛ̀ŋ wèè auŋ wàà, esaɓù kɛ̀ àŋ manaŋ wa wèè auŋ gbùwà e keì ɗì. Kɛɛ wo Jisɛ̀ naŋ wa gbuwo wò yaà sìngìè ke kiiyòuŋ nɛɛ̀ŋ ko dììnaŋ.

⁷ Nààŋ àŋ naŋ wa kpèènè wo Jisɛ̀ dàwe e nyaàiŋ dè wò nìeɔ̀, wo Jisɛ̀ naŋ sie yèè wò naŋ nyiŋ woò wààŋ, “Nyɛ̀iŋ nyɛɛ̀ŋ gbiŋ sùà, wo nyùnɔ̀ɔŋ kòò wò nyɛ̀nɛ̀ŋ wa è jùumù wɔ wo nɔ̀ŋ wo jiɛ̀jiɛ̀ɔ wo hɔ̀wàuŋ ke dùò.”

⁸ Yèè wo Jisɛ̀ naŋ ɓɛìŋ gbuwo wò naŋ tɔ̀ɔ̀tù sìngà ko dììnaŋ.

⁹ Nààŋ àŋ naŋ wa kòmò e nɛ̀ɛŋ wò naŋ woò lɛ, e yìwìà wo gbeeɔ̀, aŋ gbiŋ naŋ kɔ̀ guùŋ guùŋ. Àŋ naŋ jòò wo Jisɛ̀ wuŋ guùŋ, wo nìeɔ̀ sia koɓɛ̀i àŋ nauŋ seelè lɛ wo Jisɛ̀ kɔɔ.

¹⁰ Wo Jisɛ̀ naŋ yèwè dìì wo sie yèè wò naŋ dàwè wo nìeɔ̀ wààŋ, “Kòò anyùùŋ nyaŋ gbiŋ yaà? Wo nyùùŋ gbiŋ wo gò joo wèè woum jèè keì?”

¹¹ Yèè wo nìeɔ̀ naŋ fasàì wààŋ, “Kpele dàa, wo nyùùŋ gbiŋ wo gòim jèè keì.” Yèè wo Jisɛ̀ nauŋ woò wààŋ, “Miàŋ pɛɛ miŋ naàum jèè è keì. Màŋ ɓɛ̀nɛ̀ŋ kàa, kɛɛ ɓɔ̀ mùŋ nyɛ̀nɛ̀ŋ ɓɛìŋ è kèì jùumù.”]

Wo Jisɛ̀ naŋ yaà e gbòlòùŋ anyùùŋ nyaŋ e ɗuunyaàŋ

¹² Wo Jisɛ̀ naŋ ɓɛìŋ gbòò koɓɛ̀ anyùùŋ nyaŋ wààŋ, “Miàŋ nàŋ yaà e gbolòùŋ nɛ wèè anyùùŋ nyaŋ e ɗuunyaàŋ! Dèe nìim maŋjɛ̀wɛ, yèè niŋ naàŋ kààìŋ kè nyìwìɛ sùà. Nìŋ do nàŋ yɛ̀mɛ̀ e gbolòùŋ nɛ kiɛ̀ŋ wɔŋ nyiiŋ lɛ̀.”

¹³ Aŋ Fɛlosiì nyaŋ gò wa jàà è keì wòo lɛɛ̀ kùàŋ dìì, yèè àŋ nauŋ woò nyààŋ, “Mùŋ yaà gbuuye wèè muàŋ bì. Ke mìè seì mɔɛ̀ŋ fè tɔ̀ɔ̀nyaàŋ.”

¹⁴ Wo Jisɛ̀ naŋ nyiŋ fasàì wààŋ, “Sèè pɛɛ ka kìɛ̀ŋ ke mìè seì wèè miàŋ bi, e yèɛ mìŋ woà lɛ è yaà e tɔ̀ɔ̀nyaàŋ. Kà nyìmàŋ kɛ̀ kòò mìŋ yewe, yèè kà nyìmàŋ kɛ̀ kòò mìŋ yaà kɔɔyɛ. Niŋ nyimààŋ kɛ̀ kòò mìŋ yewe ɔ̀ɔ̀ kòò mìŋ yaà kɔɔyɛ.

¹⁵ Nìŋ gbaì anyùùŋ e ɗèwè guùŋ nɛ sùà màànààŋ nɔŋ anyuùŋ gbànaŋ nyàŋ gbiŋ nyɛnɛŋ lɛ̀, kɛɛ miŋ fè gbàì wò nyùùŋ gbiŋ.

¹⁶ Kɛɛ sèè mìŋ nyɛnɛŋ yɛi weè, e kiti mɛ̀ henàŋ nɔ̀ŋ e tɔ̀ɔ̀nyaàŋ, esaɓù kɛ̀ miàŋ guùŋ nààŋ fè niìŋ nyinie. Wo Dèdaà naim tùɔ̀ŋ wɔ yèè miàŋ è yaà koɓɛ̀ guùŋ.

¹⁷ Wɔŋ fɛ̀ì maŋ Sàwàiŋ nɔɔ̀ŋ naŋ woò wààŋ sèè anyùùŋ tìyèe àŋ kìɛ̀ŋ ke mìè seì e kìlà aŋ gbùùyà e kèì guùŋ nɛ diɛŋ, kɛ̀ e tɔ̀ɔ̀nyaàŋ è yàà niìŋ ko sùà.

¹⁸ Mìŋ kiɛ̀ŋ ke mìè seì wèè miàŋ bì, yèè wo Dèdaà naim tùɔ̀ŋ wɔ wuŋ pɛɛ wò kiɛ̀ŋ ke mìè seì weèim.”

¹⁹ Àŋ naŋ dàwè wo Jisɛ̀ nyààŋ, “Kòò wo Dèda mɔɔ̀ŋ wò yaà?” Wo Jisɛ̀ naŋ nyiŋ fasàì wààŋ, “Niŋ nyimààìm miŋ dò nàŋ sɔ̀ wo Dèda miɔ̀ŋ. Sèè nìŋ nyìmèìm weè, nìŋ he weè nàŋ nyìmè wo Dèda miɔ̀ŋ wuŋ pɛɛ.”

²⁰ Wo Jisɛ̀ naŋ wa tɛɛ̀ woò e teengaà wò yaà wa kàà sùà anyùùŋ nyaŋ koɓɛ̀i e sùlò nɛɛnɛɛ̀ŋ yaà wa lɛ̀ ko Saaŋ Zòòlò Dayài. Kɛɛ wo nyùùŋ gbiŋ wo gòuŋ wa kùwà, esaɓù kɛ̀ e tèèngà e fàauŋ nɛ̀ kòò è hàì wa.

Wo Jisɛ̀ wààŋ wò yewe ko àìjɛnɛ̀ŋ

²¹ Wo Jisɛ̀ naŋ nyiŋ ɓɛìŋ woò wààŋ, “Mìŋ do nàŋ kɔ̀ koɓɛ̀ bà, yèè nìŋ doim nàŋ kamè. Kɛɛ niŋ naàŋ ɓɛ̀nɛ̀ŋ kà koɓɛ̀i mìŋ yaà kɔɔyɛ̀ lɛ̀, yèè nìŋ do nàŋ fɔ̀ɔ̀yɛ̀ maŋ jùumùiŋ màŋ gbiŋ sùà.”

²² Aŋ Juùù nyaŋ naŋ dàwè nyiŋ bi e fèemàŋ nyààŋ, “Ɓàà wò naŋ ɗewè wèè wo jìwà wuŋ bi, nààŋ wò naŋ woò wààŋ e naàìŋ ɓɛ̀nɛ̀ŋ kà koɓɛ̀i wò yaà kɔɔyɛ̀ lɛ̀?”

²³ Wo Jisɛ̀ naŋ nyiŋ woò wààŋ, “È ɗuunyaàŋ lɛɛ̀ dìì nìŋ kanaŋ, kɛɛ mìŋ yewe ko àìjɛnɛ̀ŋ. Nìŋ yewe e ɗuunyaŋ lɛɛ̀ sùà, kɛɛ miàŋ miŋ yiwià è ɗuunyaŋ lɛɛ̀ sùà.

²⁴ Esaɓùɛ lɛɛ̀ mìŋ naiŋ woò mìàŋ nìŋ do nàŋ fɔ̀ɔ̀yɛ̀ maŋ jùumùiŋ màŋ sùà. Sèè nìŋ goim haawè tɔɔɓaa kɛ̀ ɓòò nàŋ yààìm , nìŋ do nàŋ fɔ̀ɔ̀yɛ̀ maŋ jùumùiŋ màŋ sùà.”

²⁵ Aŋ Juùù nyaŋ naŋ dàwè wo Jisɛ̀ nyààŋ, “Ɓòò nàŋ yààùm?” Yèè wo Jisɛ̀ naŋ nyiŋ fasàì wààŋ, “E kèì guùŋ nɛ nɔŋ mìŋ naiŋ woò ko tɔɔtuì lɛ tiŋ nɔŋ mìŋ yààìŋ woo kɛ̀ tɔɔɓaa ɓòò nàŋ yààìm .

²⁶ Mìŋ kuwa e zimgbe niŋ wèè ka weè woò wèè kaiŋ jèè e keì, kɛɛ miŋ naàŋ tii woò. Nààŋ wo yèɔ naim tùɔ̀ŋ wɔ wò yaà e tɔ̀ɔ̀nyaàŋ, yèè mìŋ woàìŋ nyɛ̀iŋ nààŋ anyùùŋ nyaŋ e ɗuunyaŋ lɛɛ̀ e yèɛ mìŋ naŋ kòmò lɛ e yìwìà wo yèɔ naim tùɔ̀ŋ wɔ sìwè.”

²⁷ Anyùùŋ nyaŋ gò wa nyìmàŋ kɛ̀ wò Jisɛ̀ yaà nyiìŋ wa wòò è kèè wò Dèdà àìjɛnɛ̀ɔŋ.

²⁸ Yèè wo Jisɛ̀ naŋ nyiŋ ɓɛìŋ woò wààŋ, “Sèè nìŋ joowà wa nàwèè wo Jɔ̀àfèlàà Nyuùŋ Kpùnɔɔ̀ŋ ko fùùŋ wɔŋ vànèkpaaà diɛŋ, nìŋ do nàŋ nyìmè tɔɔɓaa kɛ̀ ɓòò nàŋ yààìm . Nìŋ do ɓɛìŋ nàŋ nyìmè kɛ̀ miŋ fè nyɛ̀nɛ̀ŋ è keì gbiŋ wɔ̀ŋ kùàŋ wùŋ maim. Mìŋ woà nɔŋ e yèɛ wo Dèdaà woàìm wèè ka woò lɛ.

²⁹ Wo nyùnɔ̀ɔŋ naim tùɔ̀ŋ wɔ kòò wò yààìm kɔɔ. Mìŋ nyɛnɛŋ e yèɛ wò manaŋ wèè ka nyɛ̀nɛ̀ŋ lɛ e teenga gbiŋ, yèè wo naàim wa nàwèè jòò miàŋ guùŋ.”

³⁰ Nààŋ wo Jisɛ̀ naŋ nyiŋ tɛɛ̀ woò, anyùùŋ nyaŋ zimgbe nyiŋ nauŋ wa haawè.

E tɔ̀ɔ̀nyaàaŋ nàŋ doum nàŋ joeyè

³¹ Wo Jisɛ̀ naŋ ɓɛìŋ wòò Juùù nyaŋ nauŋ haawè nyaŋ wààŋ, “Sèè nìŋ haawà yèè nìŋ jɔɔlɔ̀ e yèɛ mìŋ naiŋ woò lɛ dìì, kɛ̀ tɔɔɓaa nìŋ yaà anyùùŋ màŋjɛ̀wɛ̀im.

³² Nìŋ do nàŋ nyìmè e tɔ̀ɔ̀nyaàaŋ, yèè e tɔ̀ɔ̀nyaàaŋ doiŋ nàŋ joeyè.”

³³ Àŋ naŋ fasàì nyààŋ, “È yèwèìŋ ke kpòò Eɓulɔhɛɛ̀ɛŋ sùà, yèè kòò è nɔ̀ìŋ wa àŋ ɗo wò nyùùŋ gbiŋ dìì. Dièsɔa mùŋ naŋ ɓɛ̀nɛ̀ŋ wòo mààŋ, ‘È doiŋ nàŋ fòlò e ɗo dìì’?”

³⁴ Wo Jisɛ̀ naŋ nyiŋ fasàì wààŋ, “Miŋ woòiŋ e tɔɔɓaaà kɛ̀ wo nyùnɔ̀ɔŋ gbiŋ nyɛnɛŋ e jùumù wɔ wò yaà wo ɗo maŋ jùumùuŋ màŋ sùà.

³⁵ Yèè aŋ ɗo fè jèè kè kpooɛ̀ sùà kò gbooì wèè julɔfɔ, kɛɛ wo jɔ̀àfelaaà do nàŋ jèè ke kpooɛ̀ sùà wèè julɔfɔ.

³⁶ Sèè miàim wo Jɔ̀àfelaaà kaum dangè maŋ ka foo, kɛ̀ màŋ nɔ̀ŋ e jòèyeum julɔfɔ.

³⁷ Kà nyìmàŋ kɛ̀ nìŋ folo ke kpòò Eɓulɔhɛɛ̀ɛŋ sùà, yɛi nɔŋ è yaà nìŋ yaà kààmè ɗewe wèè naim jìwà, esaɓù kɛ̀ niŋ gò jàà è kàa mɛ̀ kùàŋ dìì.

³⁸ Mìŋ yààìŋ wòo sùà e kèè e yèɛ wo Dèda miɔ̀ŋ naim tɔɔ̀ lɛ, màànààŋ nɔŋ nìŋ nyɛnɛŋ e yèɛ wo dèdaiŋ nɔɔ̀ŋ naiŋ kaà lɛ.”

³⁹ Anyùùŋ nyaŋ naŋ wòò wo Jisɛ̀ nyààŋ, “Wo Eɓulɔhɛɛ̀ŋ naŋ yaà wo dèda wiɔ̀.” Yèè wo Jisɛ̀ naŋ nyiŋ fasàì wààŋ, “Sèè naŋ weè nɔ̀ŋ aŋ jɔ̀à kòmàŋ Eɓulɔhɛɛ̀ŋ nyaŋ, nìŋ he weè nàŋ nyɛ̀nɛ̀ŋ e nɛ̀ɛŋ wò naŋ wa nyɛ̀nɛ̀ŋ lɛ.

⁴⁰ Kɛɛ wèè niŋ go niŋ nàŋ jàà kùàŋ dìì, nìŋ manaŋ naim jìwà e fòfoo mìŋ yààìŋ wòò sùà e tɔ̀ɔ̀nyaàaŋ wo Dayà naim kiɛ̀ŋ lɛ. Wo Eɓulɔhɛɛ̀ŋ gò wa nyɛ̀nɛ̀ŋ è keì mààŋ tii.

⁴¹ Nìŋ yaà nyìnìè e nɛ̀ŋ guùŋ nɛ aŋ dèdaiŋ nyàŋ naŋ wa nyɛ̀nɛ̀ŋ lɛ.” Anyùùŋ nyaŋ naŋ fasàì nyààŋ, “Ɓɔ̀ mùŋ woò wi mààŋ è yààìŋ àŋ jɔ̀à hmɔŋtu. Wo Dayà wuŋ bi nàŋ yaà nɔŋ wo Dèdaà è kùwàìŋ wɔ.”

⁴² Wo Jisɛ̀ naŋ nyiŋ fasàì wààŋ, “Sèè wo Dayà wo weè nɔ̀ŋ wo Dèdaiŋ nɔɔ̀ŋ, nìŋ heim weè nàŋ mɔ̀nɔ̀ŋ, esaɓù kɛ̀ mìŋ yewe koɓɛ̀ Dayài yèè kòò mìŋ yààìŋ naàŋ ko fɛɛ̀feìŋ. Wuŋ naim tùɔ̀ŋ. Miŋ gò hnàŋ è gààŋ miàŋ biɛ̀ sùà.

⁴³ Wèè kiìŋ niŋ nyimààŋ è yèɛ mìŋ yààìŋ woo lɛ̀? Niŋ fè ɓɛ̀nɛ̀ŋ jàà è yèɛ mìŋ woàìŋ lɛ kùàŋ dìì esaɓù kɛ̀ è naŋ nìè e nɛ̀ŋ nyìmaiŋ nɛ̀.

⁴⁴ Wo dèdaiŋ nɔɔ̀ŋ naŋ yaà wo sìèfèìŋ wo nyuùŋ kɛ̀ɛ̀nɛ̀ŋ ke kpèè naanààaŋ, yèè nìŋ nyɛnɛŋ nɔŋ màànààŋ wò manaŋ lɛ̀. Wò wa nɔ̀ŋ wo nyuùŋ jìwà nyùùŋ yèè wo nyuùŋ tòa gɔu. E kèì tɔ̀ɔ̀nyaàŋ bà gbiŋ e fòuŋ kò kùàŋ sùà. Wò gboo wèè wuŋ bi, yèè e yèɛ gbiŋ wò woà lɛ è yaà e tòa. E fè nɔŋ kɛ̀ wuŋ bi wò yaà wò nyuùŋ tòa, kɛɛ wuŋ naŋ kòmò anyuùŋ tòa nyàŋ gbiŋ.

⁴⁵ Kɛɛ nààŋ mìŋ woàìŋ e tɔ̀ɔ̀nyaàaŋ, esaɓùɛ lii nìŋ naŋ gè maŋhɛɛ wèè naim haawè.

⁴⁶ Nyɛ̀iŋ nààŋ bà gbiŋ nàim ɓɛ̀nɛ̀ŋ wòo kɛ̀ mìŋ yaà wo nyùùŋ maŋ jùumù? Kɛɛ sèè mìŋ woàìŋ e tɔ̀ɔ̀nyaàaŋ, kɛ̀ wèè kiìŋ niŋ fèim haawè?

⁴⁷ Wo nyùnɔ̀ɔŋ gbiŋ yewe koɓɛ̀ Dayài wɔ wò do nàŋ kòmò ke mìè Dayàa. Kɛɛ nìŋ naŋ gè maŋhɛɛ wèè naŋ kòmàŋ ke mièuŋ nɛɛ̀ŋ, esaɓù kɛ̀ niŋ fè wèè wò Dayà.”

Wo Jisɛ̀ yèè wo Eɓulɔhɛɛ̀ŋ

⁴⁸ Aŋ Juùù nyaŋ naŋ wòò wo Jisɛ̀ nyààŋ, “È naum wa wòò e tɔɔɓaaà kɛ̀ mùŋ yaà wo nyùùŋ e yìwìà ko Sàmilià yèè kɛ̀ wo jinàŋ naanààŋ yààùm ko sùà.”

⁴⁹ Wo Jisɛ̀ naŋ nyiŋ fasàì wààŋ, “Wo jinàŋ naanààŋ fèìm kò sùà. Mìŋ kiɛ̀ŋ wo Dèda miɔ̀ŋ e ɓɛ̀ɛ̀jàa, yèè nìŋ naŋ gè maŋhɛɛ wèè naim kìɛ̀ŋ e ɓɛ̀ɛ̀jàa.

⁵⁰ Miŋ fè kààmè è ɓɛ̀ɛ̀jàa wèè miàŋ bi. Kɛɛ wo Dayà manaŋ wèè anyùùŋ aim kìɛ̀ŋ e ɓɛ̀ɛ̀jàa, yèè wuŋ guùŋ nɔŋ nàŋ gbaì anyùùŋ.

⁵¹ Mìŋ yààìŋ wòò e tɔɔɓaaà kɛ̀ sèè nìŋ jaa maŋ mìè gbòaim màŋ kùàŋ dìì, niŋ naàŋ wa nàwèè fɔ̀ julɔfɔ.”

⁵² Kpeiŋ aŋ Juùù nyaŋ nauŋ woò nyààŋ, “Èiŋ naàŋ nyìmàŋ kɛ̀ wo jinàŋ naanààŋ yààùm ko sùà. Wo Eɓulɔhɛɛ̀ŋ naŋ wa fɔ̀, e hààwè aŋ wɛ̀ijì nyaŋ. Dièsɔa mùŋ naŋ ɓɛ̀nɛ̀ŋ wòo mààŋ kɛ̀ wo nyùnɔ̀ɔŋ haawà maŋ mìè gbòaim màŋ wɔ wo naàŋ wa nàwèè fɔ̀ julɔfɔ?

⁵³ E sɛmɛmaŋ mɔ̀ɛ̀ naŋ nìè e jè wo dèda wiɔ̀ Eɓulɔhɛɛ̀ŋ? Wò naŋ wa fɔ̀, e hààwè aŋ wɛ̀ijì nyaŋ. Ɓòò mùŋ naŋ gongò kɛ̀ mùŋ yaà?”

⁵⁴ Wo Jisɛ̀ naŋ nyiŋ fasàì wààŋ, “Sèè ka tɛ̀nɛ̀ŋ miàŋ bi, è yaà wèè foo. Wo Dèda miɔ̀ŋ wuŋ bi nàŋ dɛɛkɛ̀ìm. Nìŋ naŋ woò kɛ̀ wuŋ nàŋ yaà wo Dayàiŋ nɔɔ̀ŋ,

⁵⁵ joo pɛɛ tɔɔɓaa kɛ̀ niŋ nyimààuŋ. Sèè ka woò kɛ̀ miŋ nyimààuŋ, mìŋ do nàŋ nɔ̀ŋ wo nyuùŋ tòa maàŋ nyɛ̀iŋ gbiŋ. Kɛɛ kàuŋ nyìmàŋ, yèè mìŋ nyɛnɛŋ e yèɛ wò woà lɛ.

⁵⁶ Wo dèdaiŋ nɔɔ̀ŋ Eɓulɔhɛɛ̀ŋ naŋ wa gè zɔlɔ̀ wèè wo wa yɛ̀mɛ̀ ke ɗɔ̀ɔ̀ hnaàŋ miɛ̀ŋ. Wò naŋ nyiŋ wa yɛmɛ̀ yèè e zɔlɔ̀ nauŋ wa diè.”

⁵⁷ Yèè aŋ Juùù nyaŋ nauŋ woò nyààŋ, “Kòò mùŋ nɔ̀ŋ pɛɛ màŋ doa kpɛ̀ɛ̀ùŋ tìyèe jɛ̀wɛ̀ zììyà, dièsɔa mùŋ naŋ wa yɛ̀mɛ̀ wo Eɓulɔhɛɛ̀ŋ?”

⁵⁸ Wo Jisɛ̀ naŋ nyiŋ woò wààŋ, “Mìŋ yààìŋ wòo sùà e tɔɔɓaaà kɛ̀, wèè paŋ aŋ kòmàŋ wa wo Eɓulɔhɛɛ̀ŋ, mìŋ yaào wa, yèè kòò miŋ yaà.”

⁵⁹ Kpeiŋ aŋ Juùù nyaŋ naŋ ɓèmè le dùò wèè aŋ hɔ̀wàuŋ, kɛɛ wo Jisɛ̀ naŋ nyiŋ wa jɔ̀ɔ̀nɔ̀ŋ fɛ̀ɛ̀ yèè wò naŋ fòlò ko Saaŋ Zòòlò Dayài.