Jɔ̀ɔŋ 11 - WƆŊ FƐ̀Ì EBÒ SÌÀŊ DAYÀA

Wo Lazɔlɔ̀ fà

¹ Wo felaa bà yaào wa àŋ nyaaŋ wo Lazɔlɔ̀, kɛɛ wò yaà wa siinyɛŋ ko jawauŋ niìŋ àŋ nyaaŋ ko Bɛfenè lɛ. Wo Lazɔlɔ̀ kuwa wa aŋ jàà nyùùŋ tìyèe, wo Mèèle yèè wo Mààta. Nyiŋ pɛɛ hewa jòò ko jawa bi.

² Wo Mèèle wɛɛ̀ nàŋ yaà wa wo yèɔ naŋ wa kpàlèè maŋ kuùmàì maŋ wo Kanaà Jisɛ̀ maŋ gòlò, yèè wò naŋ hààngè e ɗì dumuuŋ nɛ̀ maŋ gòlò Jisɛ̀ maŋ. Wo wùìyauŋ nɔɔ̀ŋ Lazɔlɔ̀ nàŋ yaà wa siinyɛŋ.

³ Aŋ jàà Lazɔlɔ̀ nyaŋ naŋ wa tùɔ̀ŋ ke miè gbìaŋ koɓɛ̀ Jisɛ̀i yèè àŋ nauŋ woò nyààŋ, “Kanaà, wo dàwi siaŋ mɔɔ̀ŋ Lazɔlɔ̀ wo yèɔ mùŋ manaŋ zimgbe wɔ̀ kòò wò yaà siinyɛŋ.”

⁴ Kɛɛ nààŋ wo Jisɛ̀ naŋ wa tɛɛ̀ kòmò, wò naŋ woò wààŋ, “Ko jee ɗìi wèè e sàauŋ nɛ̀ e naàŋ nɔ̀ŋ è fàa. È do nàŋ hìɛ̀ŋ e jòòwo koɓɛ̀ Dayài yèè miàim wo Jɔ̀àfèlàà Dayàa.”

⁵ Wo Jisɛ̀ manaŋ wa wo Mààta yaà wo nanàŋ jɔ̀àuŋ nɔɔ̀ŋ Mèèle yèè wo Lazɔlɔ̀.

⁶ Kɛɛ yɛi nɔŋ è yaà nààŋ wò nàŋ wa kòmò ebò e sààŋ Lazɔlɔ̀ɛ, wò naŋ wa jèè koɓɛ̀i wò yaà wa lɛ̀ wèè maŋ ɗɔ̀ɔ̀ tìyèe ɓɛìŋ.

⁷ Kpeiŋ eɓìèmàŋjɛ̀wɛ̀ tɛɛ̀, wo Jisɛ̀ naŋ wòò anyùùŋ màŋjɛ̀wɛ̀uŋ nyàŋ wààŋ, “Kɛ̀ɛ̀ wiìŋ maŋjɛ̀wɛ ko Jùdià.”

⁸ Yèè anyùùŋ màŋjɛ̀wɛ̀uŋ nyàŋ nauŋ woò nyààŋ, “Kààmɔɔŋ, aŋ Juùù nyaŋ koɓɛ̀ wii manaŋ wèè aum hɔ̀wà le dùò wèè maŋ fà. Wèè kiìŋ mùŋ manaŋ ɓɛìŋ wèè mao kɛɛ̀?”

⁹ Yèè wo Jisɛ̀ naŋ nyiŋ fasàì wààŋ, “Sɔ̀ɔ̀ è kùwàìŋ è hààwà zììyà jɛ̀wɛ̀ tìyèe kè ɗɔɔ gbiŋ sùà? Sèè mùŋ kaaìŋ maŋ gɔɛɛ, mùŋ do nàŋ kààìŋ e gbòlòùŋ e gɔɛɛ mɛ̀ɛɛ̀ŋ e ɗuunyaŋ lɛɛ̀, yèè mùŋ do nàŋ yɛ̀mɛ̀ dìì e kìlà muŋ naàŋ duonò.

¹⁰ Kɛɛ sèè mùŋ kaaìŋ e dùùm, mùŋ do nàŋ duonò, esaɓù kɛ̀ e gbolòùŋ fòùm kò feìŋ.”

¹¹ Kpeiŋ ngàà wo Jisɛ̀ naŋ nyiŋ woò wààŋ, “Wo dàwi wiɔ̀ wo Lazɔlɔ̀ sɛ̀ɛ̀ maŋ jàwè, kɛɛ mìŋ yaà kɔɔyɛ wèè kauŋ tùngà.”

¹² Anyùùŋ màŋjɛ̀wɛ̀uŋ nyàŋ nauŋ woò nyààŋ, “Kanaà, sèè wo Lazɔlɔ̀ sɛɛ̀ maŋ jàwè, wò do nàŋ kɛɛyɛ̀.”

¹³ E fàsàì Jisɛ̀ɛ wa kɛ̀ wo Lazɔlɔ̀ sɛ̀ɛ̀ maŋ jàwè, nàŋ yaà kɛ̀ wo Lazɔlɔ̀ wò fà. Kɛɛ nyiŋ àŋ naŋ wa gongò kɛ̀ e jìwie foo le wa nɔŋ.

¹⁴ Kpeiŋ wo Jisɛ̀ naŋ nyiŋ woò janyai wààŋ, “Wo Lazɔlɔ̀ wò fà!

¹⁵ Kɛɛ wèè esaɓùi nɛ̀ sùà, ke jii miɛ̀ŋ naŋ fɔ̀ kɛ̀ miŋ fòo dài wèè e kaaìŋ, wèè kɛ̀ niŋ haawè e tòmò Dayàa. Kà wiìŋ ko nɛ̀ɛ̀uŋ niìŋ.”

¹⁶ Wo Tàmaŋ, wo yèɔ àŋ hewa ɓɛìŋ nyààŋ wo Sewìɔ wɔ̀ naŋ wòò aŋ dàwiuŋ nyàŋ wààŋ, “Kàwiìŋ yàwi nààŋ Kààmɔɔŋ, wèè kɛ̀ yàwi nààŋ gbiŋ e fɔɔyɛ̀iŋ koɓɛ̀ guùŋ.”

Wo Jisɛ̀ nàŋ kuwa e gààaŋ wèè wo gè wo nyùùŋ fàa dìì wo kɛ̀ɛ̀ wɔŋ nyiiŋ gèeɔ̀ sùa

¹⁷ Nààŋ wo Jisɛ̀ naŋ wa hàì ko Bɛfenè, wò naŋ wa yɛmɛ̀ kɛ̀ wo Lazɔlɔ̀ wa fà yèè àuŋ sìà ke hùaàŋ sùà è nyɛ̀nɛ̀ŋ maŋ ɗɔ̀ɔ̀ tiinàŋ paŋgàà wò nao wa haì.

¹⁸ Ko Bɛfenè gò wa diidìì e yìwìà kò Jùlusɛ̀làm,

¹⁹ yèè aŋ Juùù nyuùŋ zimgbe naŋ wa hnè e yìwìà ko jawa gbeeì ko zùùmò Mààta yèè wo Mèèle wèè esàɓù e fà wo wùìya nyiŋ nɔɔ̀ŋ Lazɔlɔ̀.

²⁰ Nààŋ wo Mààta naŋ wa kòmò kɛ̀ wo Jisɛ̀ yaà wa hinie, wò naŋ wa kɔ̀ wèè wouŋ ɓeeè, kɛɛ wo Mèèle naŋ wa jòò ko gbooì.

²¹ Wo Mààta naŋ wòò wo Jisɛ̀ wààŋ, “Kanaà, sèè maŋ dài weè kià nɔ̀ŋ, wo wùìya miɔ̀ŋ naàŋ mɛ̀iŋ weè nàŋ fɔ̀!

²² Yèè kà ngèè pɛɛ nyìmàŋ kɛ̀ wo Dayà doum nàŋ kìɛ̀ŋ e nɛ̀ɛŋ gbiŋ mùŋ dawàuŋ weè niŋ lɛ̀.”

²³ Wo Jisɛ̀ nauŋ woò wààŋ, “Wo wùìya mɔɔ̀ŋ do nàŋ yèwè e fàaà dìì wɔŋ nyiiŋ gèeo sùà ɓɛìŋ.”

²⁴ Wo Mààta naŋ fasàì wààŋ, “Kà nyìmàŋ kɛ̀ wò do ɓɛìŋ nàŋ yèwè dìì ke ɗɔɔ dìàmaàŋ diɛŋ, sèè anyuùŋ fàa nyàŋ gbiŋ yewe wa nàwèè dìì.”

²⁵ Wo Jisɛ̀ nauŋ woò wààŋ, “Miàŋ nàŋ kuwa e gààaŋ wèè ka gè wo nyuùŋ fàa dìì wo kɛ̀ɛ̀ wɔŋ nyiiŋ gèeɔ̀ sùà. Anyùùŋ nyaŋ gbiŋ naim haawè nyaŋ do ɓɛìŋ nàŋ yèwè e fàaà dìì, jòòpɛɛ àŋ wa fà.

²⁶ Yèè aŋ yè nyaŋ yaà wɔŋ nyiiŋ gèeɔ̀ sùà àŋ naim haawè nyaŋ aŋ naàŋ wa nàwèè fɔ̀ julɔfɔ. Màŋ tɛɛ̀ haawè?”

²⁷ Yèè wo Mààta naŋ fasàì wààŋ, “Hɛ̀ɛɛ̀ŋ, Kanaà! Kà haawè kɛ̀ muàŋ nàŋ yaà wo yèɔ wo Dayà naŋ tùɔ̀ŋ wɔ wèè muŋ joeyè anyùùŋ nyaŋ e ɗuunyaàŋ, wo Jɔ̀àfèlàà Dayàa, wo yèɔ è yààìŋ yɛ̀ɛ̀mɛ̀ dòmaŋ wèè wo hnàŋ koɓɛ̀ anyùùŋ nyaŋ e ɗuunyaàŋ wɔ.”

Wo Jisɛ̀ naŋ gòlò ke nyowo sùà wèè e mànàŋ Lazɔlɔ̀ɛ

²⁸ Nààŋ wo Mààta naŋ tɛɛ̀ woò, wò naŋ kɔ̀ yèè wò naŋ nyààŋ wo nanàŋ jɔ̀àuŋ nɔɔ̀ŋ Mèèle mɔ̀ɔ̀ŋ, yèè wò nauŋ woò wààŋ, “Wo Kààmɔɔŋ kòò wò yaà kià, yèè wò yaà dààwè kiium.”

²⁹ Wo Mèèle naŋ nɔŋ tɛɛ̀ kòmò fa, wò yèwà dìì maŋ dùaŋ dùaŋ yèè wò naŋ kɔ̀ ko ɓèè wo Jisɛ̀.

³⁰ Wo Jisɛ̀ kòò wò hàì wa weè kò jawaì. Kɛɛ wò yaà wa nɔŋ koɓɛ̀i wo Mààta naŋ wa kɔ̀ yèè wò nauŋ mɛɛ̀ŋ lɛ.

³¹ Aŋ Juùù nyuùŋ zimgbe naŋ wa hnè koɓɛ̀ Mèèleì wèè aŋ gòlà ke nyowouŋ. Nààŋ àŋ nauŋ wa yɛmɛ̀ wò naŋ yèwè dìì fiò wò naŋ fòlò ko saaìŋ, àŋ naŋ wa gongò kɛ̀ wò yaà wa kɔ̀ɔ̀yɛ̀ koɓɛ̀ ke hùaàŋ ko gulie. Yèè àŋ nauŋ dè maŋjɛ̀wɛ.

³² Wo Mèèle naŋ wa kɔ̀ koɓɛ̀i wo Jisɛ̀ yaà wa lɛ̀. Nààŋ wo Mèèle nauŋ wa yɛmɛ̀, wò naŋ dè maŋ gɛ̀ɛ̀nùuŋ màŋ dììnaŋ yèè wò naŋ woò wààŋ, “Kanaà, sèè maŋ dài weè kià nɔ̀ŋ, wo wùìya miɔ̀ŋ naàŋ mɛ̀iŋ weè nàŋ fɔ̀.”

³³ Nààŋ wo Jisɛ̀ naŋ wa yɛ̀mɛ̀ wo Mèèle yaà aŋ Juùù nyuuŋ nyàŋ yàuŋ wa maŋjɛ̀wɛ nyàŋ àŋ yaà gulie, ke nyowo gbee naŋ wa jɔ̀ ke jiiuŋ nɛɛ̀ŋ wo jinàaŋ sùà.

³⁴ Wò naŋ nyiŋ dawè wààŋ, “Kòò nìŋ nauŋ siiyè?” Yèè anyùùŋ nyaŋ nauŋ fasàì nyààŋ, “Kanaà, hnaàŋ muŋ yɛmɛ̀ koɓɛ̀ bi.”

³⁵ Yèè wo Jisɛ̀ naŋ tɔ̀ɔ̀tù gòla.

³⁶ Aŋ Juùù nyaŋ naŋ woò nyààŋ, “Yɛ̀mɛ̀ weè e ɗeweɛ̀ wò manaŋ yɛi wo Lazɔlɔ̀ le.”

³⁷ Anyùùŋ nyaŋ bà nyiŋ naŋ woò nyààŋ, “Wò naŋ gbàì le fɛ̀ɛ̀ nyuùŋ zììlè le fɛ̀ɛ̀ɔ. Wèè kiìŋ wo gò mɛ̀iŋ jòèyè wò Lazɔlɔ̀ wèè wo go dai nàŋ fɔ̀?”

Wo Lazɔlɔ̀ yèwà e fàaà dìì wɔŋ nyiiŋ gèeo sùà

³⁸ Ke nyowo gbee yɛɛ̀ kòò kè yaà wa nɔŋ wo Jisɛ̀ ke jiio sùà. Kpeiŋ wò naŋ kɔ̀ koɓɛ̀ ke hùaàŋ ke yèɛ kè yaà wa ke duò gbee àŋ naŋ tòmò sùà yɛ, yèè àŋ naŋ nyiŋ ɓùwìè wɔŋ duò tàà gbee ko yɛmgbɛ̀.

³⁹ Wo Jisɛ̀ naŋ nyiŋ woò wààŋ, “Geìŋ wɔŋ duò fààa ke hùaàŋ yɛmgbɛ̀!” Kɛɛ wo Mààta, wo jàà gbèè nyuùŋ fàaà naŋ woò wààŋ, “Kanaà, màŋ nyìmàŋ kɛ̀ wo Lazɔlɔ̀ naàŋ fà è nyɛ̀nɛ̀ŋ maŋ ɗɔ̀ɔ̀ tiinàŋ, e dòuŋ nɛ̀ do nàŋ ɓaayè sèè mùŋ yilà ke hùaàŋ.”

⁴⁰ Wo Jisɛ̀ nauŋ woò wààŋ, “Miŋ gòum woò mìàŋ kɛ̀ sèè mùŋ kɛɛnɛ̀ŋ e hààwe mùŋ do nàŋ yɛ̀mɛ̀ e jòòwò Dayàa?”

⁴¹ Yèè anyùùŋ nyaŋ nao gè wɔŋ duò fààa. Yèè wo Jisɛ̀ naŋ yɛ̀mɛ̀ e tèèngà ko àìjɛnɛ̀ŋ wò naŋ woò wààŋ, “Dèda, mìŋ naum gè esɛ̀ wèè mùŋ naŋ jàà e zòòlo mɛ̀ kùàŋ dìì lɛ.

⁴² Kà nyìmàŋ kɛ̀ mùŋ jaa e zòòlo mɛ̀ kùàŋ dìì e teenga gbiŋ, kɛɛ mìŋ naŋ tɛɛ̀ woò wèè esàɓù anyùùŋ nyɛɛ̀ŋ kià, wèè kɛ̀ aŋ haawè kɛ̀ muàŋ naim tùɔ̀ŋ.”

⁴³ Nààŋ wo Jisɛ̀ naŋ tɛɛ̀ kpɛ̀ɛ̀yɛ̀ wòo, wò naŋ nyaanè ke miè gbeeo sùà wààŋ, “Lazɔlɔ̀, yewà dìì muŋ fòlà!”

⁴⁴ Wo Lazɔlɔ̀ naŋ fòlò, wò yaà maŋ dèè maŋ àŋ nauŋ siiyè maŋ sùà, yèè wɔŋ deè fàà ɓùùwaùŋ wɔŋ feìŋ. Yèè wo Jisɛ̀ naŋ nyiŋ woò wààŋ, “Fìle nùuŋ, niŋ dangèuŋ wo ka.”

Ke gbùnuɛ̀ wèè aŋ jìwà wo Jisɛ̀

⁴⁵ Anyùùŋ nyaŋ fè àŋ Juùù nyaŋ zimgbe nyiŋ naŋ wa hnè ko zùùmò Mèèle nyàŋ naŋ yɛ̀mɛ̀ e nɛ̀ɛŋ wo Jisɛ̀ naŋ nyɛ̀nɛ̀ŋ lɛ, yèè àŋ nauŋ sìè e hààwe sùà.

⁴⁶ Kɛɛ aŋ yè nyaŋ gò wa haawè nyaŋ, aŋ bà nyiŋ naŋ wa kɛ̀ɛ̀ koɓɛ̀ aŋ Fɛlosiì nyaŋ yèè àŋ naŋ nyiŋ gbàìè jii e nyaàiŋ dè e nɛ̀ɛŋ wo Jisɛ̀ naŋ nyɛ̀nɛ̀ŋ lɛ.

⁴⁷ Kpeiŋ aŋ Fɛlosiì nyaŋ yèè aŋ kànà sìèfèìŋ zòòlo nyàŋ naŋ nyààŋ aŋ màmànkùmɛ̀ŋ fuɔɔ̀ŋ koɓɛ̀ guùŋ yèè àŋ naŋ nyiŋ woò nyààŋ, “Kiìŋ è naiŋ naàŋ ɓɛ̀nɛ̀ŋ nyɛ̀nɛŋ? Wo felaa wɛɛ̀ kòò wò yaà nyìnìè maŋ kèè mèè zimgbe.

⁴⁸ Sèè euŋ dangè wo nɔ̀ŋ kòasùà ke kpèè yɛɛ̀ feìŋ, anyùùŋ nyaŋ gbiŋ douŋ nàŋ sìè e hààwe sùà, e kìlà anyùùŋ gbèègbèè anyùùŋ ko Luùm nyaŋ do nàŋ hnè aŋ pɔ̀ɔ̀pɔ̀ɔ̀ ke Sààŋ Zòòlò Dayà wiɛ̀ yaà wɔŋ fuɔŋ wiɔ̀.”

⁴⁹ Wo màmàŋkùmɛɔ̀ŋ bà guùŋ e tɛɛ nyiŋ àŋ nyaaŋ wo Kaifɔ̀ wɔ, wo yèɔ yaà wa wo Kànà Sìèfèìŋ Zòòlo Gbee wɔŋ doa wiiŋ, naŋ nyiŋ woò wààŋ, “Nyɛ̀iŋ nààŋ nyùùŋ nyɛɛ̀ŋ niŋ kuwà è jiikɛ̀ɛ gbiŋ.

⁵⁰ Yèè wààŋ niŋ gò gongò kɛ̀ è yaà tɛ̀ɛ̀ wèè wo nyùùŋ guùŋ wo fà wèè anyùùŋ nyaŋ e nɛ̀ɛŋ nyɛ̀nɛ̀ŋ wɔŋ fuɔɔ̀ŋ gbiŋ wɔŋ pɔɔpɔ̀ɔ̀ lɛ?”

⁵¹ Kɛɛ tɔɔɓaa wo Kaifɔ̀ gò wa tɛɛ̀ woò wɔ̀ŋ kùàŋ wuŋ bi. Yèè nààŋ wò yaà wa Kànà Sìèfèìŋ Zòòlo Gbeeɔ̀ wɔŋ doa wiiŋ, wo Dayà wuŋ bi nauŋ wa gbùùyè ko sùà wèè wo woò aŋ Juùù nyaŋ kɛ̀ wo Jisɛ̀ yaà wa hinie wèè wo fà wèè anyùùŋ nyaŋ gbiŋ wɔŋ fuɔɔ̀ŋ.

⁵² Yèè wo Kaifɔ̀ naŋ ɓɛìŋ woò wààŋ kɛ̀ wo Jisɛ̀ fè wa nɔŋ fà sùà wèè nyiŋ guùŋ. Wò yaà wa fàa sùà wèè wo hìàŋ anyùùŋ Dayà nyaŋ gbiŋ naŋ wa ɓaayè nyaŋ wèè aŋ nɔ̀ŋ mìèsùàguùŋ.

⁵³ E nɔŋ e yìwìà ke ɗɔɔ yii, anyùùŋ gbèègbèè aŋ Juùù nyaŋ naŋ wa kùùnò e ɗewe kàme wèè aŋ jìwà wo Jisɛ̀.

⁵⁴ Esàɓù ke gbùnu yɛɛ̀, wo Jisɛ̀ fè wa ɓɛìŋ tɔ̀ɔ̀ wuŋ bi janyai kò ɓài àŋ Juùù nyaŋ tɛɛ. Wò naŋ wa kɔ̀ koɓɛ̀ e jawa bà àŋ nyaaŋ ko Ɛfilàm, ko gbɛ̀ɛ̀ e dìì ke fòungà wòaà. Kuŋ wuŋ yaà anyùùŋ màŋjɛ̀wɛ̀uŋ nyàŋ naŋ wa nɔ̀ŋ.

⁵⁵ È naŋ wa naàŋ jòò maŋ ɗɔɔ kpàa wèè aŋ Juùù nyaŋ aŋ gè wɔŋ Ɗaa Gèe Hɔ̀ɛ̀ɛ̀ŋ Diɛɔ̀ŋ. Anyuùŋ zimgbe naŋ wa yèwè maŋ tiwi jawa màŋ sùà yèè àŋ naŋ hnè ko Jùlusɛ̀làm wèè aŋ banebànè nyiŋ bi e làngì zòòlo nyiŋ nɛ̀ sùà wèè aŋ nɔ̀ŋ zɛ̀nɛŋ nyiŋ paŋgàà wɔŋ ɗaaà wɔ̀ŋ haì.

⁵⁶ Anyùùŋ nyaŋ yaà wa kààmè wo Jisɛ̀ maŋ tàta màŋ gbiŋ sùà. Kpeiŋ nààŋ àŋ yaà wa naàŋ ko Saaŋ Zòòlò Dayài, àŋ naŋ kùùnò dàwe nyiŋ bi e fèemàŋ nyààŋ, “Niŋ gò gongò kɛ̀ wò do kià nàŋ hnè wɔ̀ŋ Ɗaa Gèe Hɔ̀ɛ̀ɛ̀ŋ Diɛŋ wɛɛ̀ŋ sùà?”

⁵⁷ Aŋ kànà sìèfèìŋ zòòlo nyàŋ yèè aŋ Fɛlosiì nyaŋ naŋ mììnyɛ̀ŋ ke sàwà àŋ naŋ wòò anyùùŋ nyaŋ wèè aŋ jàà fɛ̀ɛ̀ dìì wèè wo Jisɛ̀, yèè nyààŋ sèè àŋ yɛmɛ̀uŋ, kɛ̀ aŋ nyɛ̀nɛ̀ŋ nyiŋ aŋ nyìmàŋ. Yɛi àŋ naŋ wa ɗewè wèè aŋ wa kùwà wo Jisɛ̀.