Hiɓu 8 - WƆŊ FƐ̀Ì EBÒ SÌÀŊ DAYÀA

Wo Jisɛ̀, Kànà Sìèfèìŋ Zòòlo Gbee wiɔ̀

¹ E gbèìŋ gbèìŋ nɛ e nyaàiŋ dè e yèɛ è yààìŋ woo lɛ̀ nàŋ yaà kɛ̀, è kùwàìŋ wo Kànà Sìèfèìŋ Zòòlo Gbee wo yèɔ jaa ke kpùà Kanaà Dàyà Gaàŋ Gbeeɔ̀ kùàŋ jìka wɔ̀ ko àìjɛnɛ̀ŋ.

² Wò yaà wo ɓɔìjɔ̀à wèè wo Dayà, e kìlà wuŋ nàŋ yaà kànà sìèfèìŋ zòòlo gbeeɔ̀ wèè ko Nɛ̀nɛ̀ŋ Nɛɛmaŋ Gbeeì wèè Dayà, ke vààyà saaŋ kɛnɛɛ̀ dìì ke yèɛ wo Kanaà Dayà naŋ wa nyɛ̀lɛ̀ yɛ. Anyuùŋ kpùuŋ nàŋ gò nyiŋ wa nyɛ̀lɛ̀.

³ Wo Kanaà Dayà naŋ wa tà wo kànà sìèfèìŋ zòòlo gbee gbiŋ ɗùù wèè wo kiɛ̀ŋ manɛ̀ŋ kìɛŋ, yaà maŋ ɗolònɛ̀ŋ e saaà gèeo sùà koɓɛ̀ Dayài, weètii wo Kànà Sìèfèìŋ Zòòlo Gbee wiɔ̀ Jisɛ̀ Kulaì, kuwa wo kìɛ̀ŋ e nɛ̀ŋ bà wuŋ pɛɛ.

⁴ Sèè wò go weè nɔ̀ŋ e ɗuunyaàŋ, wo naàŋ weè nɔ̀ŋ wò sìèfèìŋ zòòlo gbiŋ, nààŋ aŋ sìèfèìŋ zòòlo kòò àŋ yaà kià aŋ yè nyaŋ kiɛ̀ŋ manɛ̀ŋ kìɛŋ e saaà gèeo sùà koɓɛ̀ Dayài nààŋ ke Sàwà Dayàa naŋ tɔɔ̀ wèè aŋ nyɛ̀nɛ̀ŋ lɛ.

⁵ E tòmò sìèfèìŋ zòòloɛ̀ aŋ sìèfèìŋ zòòlo nyɛɛ̀ŋ nyɛnɛŋ lɛ̀, è naŋ nɔŋ tèènè e kìlà è yaà wɔŋ mììmììŋ e yèɛ yaà ko àìjɛnɛ̀ŋ lɛ. È yaà nɔŋ mààŋ wo Mòòze naŋ wa nyɛ̀nɛ̀ŋ lɛ. Nààŋ wò naŋ wa ɗewè wèè wo nyɛ̀lɛ̀ ke Vààyà mìè sèì Dayàa wèè zòòlo, wo Dayà nauŋ woò wààŋ, “Kɛ̀ɛ̀nɛɛ̀ŋ jii jàa muŋ nyɛ̀lɛ̀ nyiŋ ke nɔ̀ŋ mààŋ e ɗewe kiiɛ̀ mùŋ naŋ nyiŋ wa yɛmɛ̀ lɛ wɔŋ toò gbeeɔ̀ dìmɛ̀.”

⁶ Wo Dayà naàŋ tà wo Jisɛ̀ ɗùù wèè wo nyɛ̀nɛ̀ŋ e tòmò sìèfèìŋ zòòlo, e yèɛ kuwa gààŋ e nìàŋ e je nyiŋ nɛ̀, màànààŋ nɔŋ e ɗààhìì e mìèsùàguùŋ nɛ wò naŋ bànè ke sàwà diɛŋ e fèèmàŋ Dayà yaà anyunùuŋ è yaà e kɛnɛ niŋ nɛ̀, esaɓù kɛ̀ e ɗààhiì bi e nyaàiŋ naŋ dè ke jii tùlia wèè manɛ̀ŋ kɛnɛ.

⁷ Sèè e ɗààhìì mìèsùàguùŋ jiɛ̀jiɛ̀ɛ e wa weè nyɛ̀nɛ̀ŋ e kèì tɔ̀ɔ̀nyaàŋ gbiŋ è kuwa wa e nyɛ̀nɛ̀ŋ lɛ, kɛ̀ esaɓù bà naàŋ wa weè nɔ̀ŋ wèè è ɗààhìì mìèsùàguùŋ jɛ̀ì.

⁸ Kɛɛ wo Kanaà Dayà naŋ wa sìè anyunùuŋ nyàŋ jii nààŋ wò naŋ nyiŋ woò wààŋ, “Maŋ ɗɔɔ màŋ kòò màŋ yaà hinie, e teenga bi sùà mìŋ do nàŋ bànè e ɗààhìì e mìèsùàguùŋ jɛ̀ì wèè anyùùŋ nyaŋ ko Ezɔ̀ɛ̀ yaà anyùùŋ nyaŋ ko Juɗà.

⁹ E ɗààhìì e mìèsùàguùŋ lii naàŋ nɔ̀ŋ mààŋ è yèɛ mìŋ naŋ wa banè kòɓɛ̀ àŋ nèwàènèwe nyiŋ nyàŋ lɛ, ke ɗɔɔɛ̀ mìŋ naŋ nyiŋ wa kùwò kùàŋ yèè mìŋ naŋ nyiŋ gè maŋ kpàlàùŋ kpàlàùŋ maŋ wɔŋ fùɔ̀ŋ Ijèɔ sùà. Aŋ gò wa nyɛ̀nɛ̀ŋ è yèɛ àŋ naŋ wa nyìmèè wèè aŋ nyɛ̀nɛ̀ŋ e nyaàiŋ dè è ɗààhìì mìèsùàguùŋ nɛ mìŋ naŋ wa banè kò nɛ̀ɛ̀ŋ nyiŋ niìŋ lɛ, weètii mìŋ naŋ nyiŋ wa hɔ̀ànè diɛŋ yɛ̀mɛ.”

¹⁰ Wo Kanaà Dayà naŋ ɓɛìŋ woò wààŋ, “Tɛɛ̀ nàŋ yaà e ɗààhìì e mìèsùàguùŋ nɛ mìŋ do nàŋ banè lɛ wèè anyùùŋ nyaŋ ko Ezɔ̀ɛ̀, maŋ ɗɔɔ màŋ yaà hinie màŋ, mìŋ do nàŋ sìè maŋ sàwàim màŋ maŋ gòngo nyiŋ màŋ sùà e kìlà ka miŋ sìngà maŋ jii komaŋ nyiŋ màŋ diɛŋ. Mìŋ do nàŋ nɔ̀ŋ wo Dayà nyiŋ nɔɔ̀ŋ, e kìlà àŋ do nàŋ nɔ̀ŋ anyunùum nyàŋ.

¹¹ Wo bà guùŋ pɛɛ naàŋ kɛ̀ɛ̀nɛ̀ŋ èsaɓù wèè wo kàà wò wùìyauŋ nɔɔ̀ŋ, ɔ̀ɔ̀ wo wòò ànyuùŋ kpùuŋ dàwi nyiŋ nyàŋ nyààŋ, ‘Nyìmaìŋ wo Kanaà.’ Aŋ gbiŋ doim nàŋ nyìmè, e yìwìà wo tòloòɔ e kà koɓɛ̀ wo gbeeɔ̀.

¹² Mìŋ do nyiŋ nàŋ jùùyè hakɛ̀ wèè maŋ jùumù nyiŋ màŋ, e kìlà miŋ naàŋ wa nàwèè ɓɛìŋ jàà màŋ keì naanààŋ nyiŋ màŋ jii.”

¹³ Nààŋ wo Kanaà Dayà naŋ wòò e kèè e ɗààhìì mìèsùàguùŋ jɛ̀ì, è naŋ tɔɔ̀ kɛ̀ e jiɛ̀jiɛ̀ɛ è jùà gààŋ. E nɛ̀ɛŋ gbiŋ zà naŋ kìlè e gɔu niŋ e kìlà è naŋ kɔlì lɛ, è do nàŋ jɔɔnɔ̀ŋ e teenga kpuu sùà.