Hiɓu 7 - WƆŊ FƐ̀Ì EBÒ SÌÀŊ DAYÀA

Wo sìèfèìŋ zòòloɔ̀ Mɛ̀kisiɗɛ̀

¹ Wo Mɛ̀kisiɗɛ̀ yaà wa wo kana wèè ko jawa gbeeì àŋ nyaaŋ Salɛ̀m, e kìlà e tèèngà guùŋ bi wò yaà wo sìèfèìŋ zòòlo wèè wo Dayà Gaàŋ Gbeeɔ̀. Wo Mɛ̀kisiɗɛ̀ naŋ wa mɛ̀ɛ̀ŋ wo Eɓulɔhɛɛ̀ŋ yèè wò nauŋ gbìɛ̀ŋ zòòlo maŋjɛ̀wɛ, e teengaà wo Eɓulɔhɛɛ̀ŋ naŋ wa jìwè aŋ kànà tiinàŋ nyàŋ, yèè wò yaà wa naàŋ kɛ̀ɛ̀ sùà maŋjɛ̀wɛ lɛ̀.

² Manɛ̀ŋ maŋ gbiŋ wo Eɓulɔhɛɛ̀ŋ kuwa wò naŋ wa gè ko sùmìè ɗùàa màŋ, wò naŋ miŋ goonò ɗì zììyà yèè wò naŋ fè e ɗì guùŋ koɓɛ̀ wo Kanaà Mɛ̀kisiɗɛ̀. E fàsàì e dèèɛ Mɛ̀kisiɗɛ̀ nàŋ yaà, “Wo Kànà Tɔ̀ɔ̀nyaàŋ.” Kɛɛ nààŋ e fàsàì e dèèɛ Salɛ̀m nàŋ yaà “jii fàa lɛ̀,” àŋ nyàaùŋ wa ɓɛìŋ “Wo Kànà Jii Fàa.”

³ Wɔŋ fɛi gò wi woò sèè mààŋ ɓòò nàŋ yaà wa wo dèdà Mɛ̀kisiɗɛ̀ɔ ɔ̀ɔ̀ wo yèyeuŋ nɔɔ̀ŋ, ɔ̀ɔ̀ ɓòò nyiŋ nàŋ yaà wa aŋ nèwàènèuŋ nyàŋ. Wɔŋ fɛi gò wi wòò è kèè è kòmàŋ kiiuŋ nɛ̀ ɔ̀ɔ̀ kò jèè ɗì wɔ̀ŋ nyiiuŋ nɔɔ̀ŋ. Wò yaà mààŋ wo Jɔ̀àfèlàà Dayàa, yèè wò do nàŋ nɔ̀ŋ wo sìèfèìŋ zòòlo wèè julɔfɔ.

⁴ Yɛ̀mɛ̀ e ɗeweɛ̀ wo Mɛ̀kisiɗɛ̀ kuwa wa gààŋ lɛ! Wo nèwàènèwe wiɔ̀ Eɓulɔhɛɛ̀ŋ, wo yèɔ yaà wo dèdaà wèè e hààwe wilɛ̀ wɔ, naŋ wa gòònò manɛ̀ŋ maŋ gbiŋ wò naŋ wa gè ko sùmìè ɗùàa màŋ, e ɗì zììyà yèè wò naŋ fè e ɗì guùŋ koɓɛ̀ wo kanaà Mɛ̀kisiɗɛ̀.

⁵ Ke Sàwà Dayàa naŋ tɔɔ̀ kɛ̀, manɛ̀ŋ maŋ gbiŋ aŋ jɔ̀ɛ̀jɔ̀ɛ̀ Eɓùlɔhɛɛ̀ŋ nyaŋ àŋ nyaaŋ Liivaà nyaŋ, aŋ yè nyaŋ yaà aŋ sìèfèìŋ zòòlo nyàŋ, kuwa aŋ gè aŋ wùìyà nyiŋ bi nyàŋ sìwè, e nɛ̀ŋ kìɛ̀ŋ ɗì guùŋ e yìwìà manɛ̀ŋ ɗì zììyà maŋ yè maŋ àŋ kuwa màŋ sùà, jòòpɛɛ àŋ yewe ke kpòò Eɓulɔhɛɛ̀ɛŋ sùà.

⁶ Wo Mɛ̀kisiɗɛ̀ gò wa fòlà kè kpòò Liivaà sùà, kɛɛ wo Eɓulɔhɛɛ̀ŋ naŋ wa goonò manɛ̀ŋ maŋ wò kuwa màŋ ɗì zììyà yèè wò naŋ fè e ɗì guùŋ koɓɛ̀ wo kanaà Mɛ̀kisiɗɛ̀. Wo Mɛ̀kisiɗɛ̀ naŋ wa dàwè wo Dayà wèè wo kpuumàŋ Eɓulɔhɛɛ̀ŋ, wo yèɔ wo Dayà naŋ wa jɔ̀ɔ̀ ɗààhiì sìwè wèè wo nyɛ̀nɛ̀ŋ ke kpoouŋ nɛɛ̀ŋ ke gàŋ wɔ̀.

⁷ Èiŋ nyìmàŋ tɔɔɓaa kɛ̀ wo nyùnɔ̀ɔŋ kpuumàŋ wo nyùùŋ wɔ, wò kuwa sɛmɛmaŋ e nìàŋ wo nyùnɔ̀ɔŋ yɛmɛ̀ e kpùùmaàŋ wɔ.

⁸ E yìwìà e keì wòo sùà e nyaàiŋ dè aŋ sìèfèìŋ zòòlo nyàŋ, aŋ yè nyaŋ kuwa aŋ fà ke ɗɔ̀ɔ̀ guùŋ nyaŋ, àŋ fè nyiìŋ e nɛ̀ŋ kìɛ̀ŋ ɗì guùŋ e yìwìà manɛ̀ŋ kàme màŋ anyùùŋ kuwa màŋ, sèè àŋ goonàŋ miìŋ e ɗì zììyà. Kɛɛ sèè è nɔ̀ŋ wèè wo Mɛ̀kisiɗɛ̀, àŋ naŋ wa fè è nɛ̀ŋ kìɛ̀ŋ ɗì guùŋ nɛ̀ koɓɛ̀ wo nyùnɔ̀ɔŋ yaà wɔŋ nyiiŋ gèeɔ̀ sùà wɔ, wo yèɔ wɔŋ fɛ̀ì Dayàa naŋ kìɛ̀ŋ mìè seì wààŋ wò yaà wɔŋ nyiiŋ gèeɔ̀ sùà wɔ.

⁹ Weètii èiŋ ɓɛ̀nɛ̀ŋ woò wìà, e teengaà wo Eɓulɔhɛɛ̀ŋ naŋ wa fè e nɛ̀ŋ kìɛ̀ŋ ɗì guùŋ nɛ koɓɛ̀ Mɛ̀kisiɗɛ̀i lɛ̀, è yaà nɔŋ mààŋ ke kpòò Liivaà kiŋ bi ke yèɛ yɛmɛ̀ manɛ̀ŋ kìɛ̀ŋ ɗì guùŋ maŋ e yìwìà anyùùŋ nyaŋ sìwè nyaŋ, naŋ wa fè e nɛ̀ŋ kìɛ̀ŋ ɗì guùŋ nɛ koɓɛ̀ Mɛ̀kisiɗɛ̀i nyiŋ pɛɛ.

¹⁰ Jòòpɛɛ kòò àŋ kòmò wa weè wò Liivaà è teenga bi, kɛɛ èiŋ ɓɛ̀nɛ̀ŋ wòo wìà wò yaà wa ke kpùnàŋ Eɓulɔhɛɛ̀ɛŋ sùà e teengaà wo Mɛ̀kisiɗɛ̀ nauŋ wa mɛɛ̀ŋ lɛ.

¹¹ Wo Dayà naŋ wa kìɛ̀ŋ maŋ sàwà koɓɛ̀ anyunùuŋ nyàŋ e yìwìà ko Ezɔ̀ɛ̀, e teengaà wò naŋ wa kìɛ̀ŋ maŋ sàwà e nyaàiŋ dè aŋ sìèfèìŋ zòòlo nyàŋ. Sèè e yèɛ aŋ sìèfèìŋ zòòlo nyàŋ e yìwìà ke kpòò Liivàa sùà naŋ wa nyɛ̀nɛ̀ŋ lɛ, naŋ wa weè ɓɛ̀nɛ̀ŋ nyɛ̀nɛŋ wèè wò Dayà jùùyà anyùùŋ hakɛ̀ kpɛlɛmɛɛŋ, kɛ̀ tɔɔɓaa esaɓù bà fè weè ɓɛìŋ wèè wò sìèfèìŋ zòòlo joo bà wo hnàŋ, wo yèɔ yewe ke gbòò aŋ sìèfèìŋ zòòlo nyàŋ sùà e nyaàiŋ dè wo Mɛ̀kisiɗɛ̀, kɛɛ e fè e yìwìà ke gbòò aŋ sìèfèìŋ zòòlo nyàŋ ke kpòò Èlɔuɛ̀ŋ sùà.

¹² Èiŋ nyìmàŋ kɛ̀ sèè e tòmò ke gbòò e sìèfèìŋ zòòloɛ̀ kile wa nàwèè, maŋ sàwà maŋ kuwa maŋ kìlà miiŋ pɛɛ.

¹³ Wèè esàɓù wo Kana wiɔ̀ Jisɛ̀, wo yèɔ è woàìŋ maŋ keì mɛɛ̀ŋ wɔ, yewe e ziì joo sùà, e kìlà wo nyùùŋ gbiŋ e yìwìà e ziì bi sùà kòò wò nɔ̀ŋ wa wò bàuŋbà è tòmò sìèfèìŋ zòòlo nyàŋ sùà wèè wo zòòlò wɔ̀ŋ gbɛ̀gbɛ̀ zòòloɔ̀ diɛŋ.

¹⁴ Anyùùŋ nyaŋ gbiŋ àŋ nyìmàŋ kɛ̀ wo Kana wiɔ̀ Jisɛ̀ naŋ yìwìè e zìì Juɗàa sùà, kɛɛ wo Mòòze gò wa woò wààŋ wò sìèfèìŋ zòòlo do wa nàŋ nɔ̀ŋ e ziì lii sùà.

Wo sìèfèìŋ zòòlo joo, mààŋ wo Mɛ̀kisiɗɛ̀

¹⁵ E keì lɛɛ̀ gbiŋ naŋ ngèè ɓɛìŋ nɔ̀ŋ janjai. Wo sìèfèìŋ zòòlo joo bà wò hnàŋ, wo yèɔ yaà mààŋ wo Mɛ̀kisiɗɛ̀ wɔ.

¹⁶ Wo Dayà nauŋ wa tàeɗùù wouŋ nyɛ̀nɛ̀ŋ wo nɔ̀ŋ wo sìèfèìŋ zòòlo, kɛɛ e fè wa è yìwìà màŋ sàwà nyuùŋkpùuŋ, è yaà wa e yìwìà e gààŋ wɔŋ nyiiŋ gèe wɔŋ yèɔ kuwà kò dìa wɔ̀ŋ.

¹⁷ Wɔŋ fɛ̀ì Dayàa naŋ woò wààŋ, “Mùŋ do nàŋ nɔ̀ŋ wo sìèfèìŋ zòòlo wèè julɔfɔ, màànààŋ nɔŋ wo Mɛ̀kisiɗɛ̀ yaà lɛ.”

¹⁸ Ke sàwà gɔuɛ̀ naŋ wa nɔ̀ŋ e ɓula jàa nyiŋ esaɓù kɛ̀, ke kuwà wa gààŋ e kìlà kè yaà wa wèè foo,

¹⁹ esaɓù kɛ̀, maŋ Sàwà Dayà màŋ fè wa ɓɛ̀nɛ̀ŋ nyɛ̀nɛ̀ŋ è nɛ̀ŋ gbiŋ è do zɛ̀nɛ̀ŋ. Wo Dayà naŋ wi naàŋ kìɛ̀ŋ ke jii tùlia kɛnɛ, ke yèɛ hiàŋ wì koɓɛ̀ Dayài fɔ̀ɔ̀ yɛ.

²⁰ Eɓìèmàŋjɛ̀wɛ̀ ke jii tùlia kɛnɛɛ̀ è kùwàìŋ yɛ, wo Dayà wuŋ bi naŋ wa jɔ̀ɔ̀ ɗààhiì. Kɛɛ wo gò wa ɓèmè ɗààhiì mààŋ tɛɛ̀, è teengaà wò naŋ wa tà aŋ sìèfèìŋ zòòlo gbànaŋ nyàŋ ɗùù lɛ.

²¹ E ɗewe gbio sùà, wo Dayà naŋ wa jɔ̀ɔ̀ ɗààhiì e teengaà wo Jisɛ̀ naŋ wa nɔ̀ŋ wo sìèfèìŋ zòòlo lɛ̀. “Wo Kanaà Dayà naŋ jɔ̀ɔ̀ ɗààhiì yèè wo naàŋ kìlè kè jiiuŋ nɛɛ̀ŋ. ‘Mùŋ do nàŋ nɔ̀ŋ wo sìèfèìŋ zòòlo wèè julɔfɔ.’ ”

²² E fèèmàŋ keì wòo lɛɛ̀, è naŋ tɔɔ̀ kɛ̀ wo Jisɛ̀ naŋ wi kìɛ̀ŋ ke jii tùlia, kɛ̀ wò yaà e ɗààhìì e mìèsùàguùŋ kɛnɛɛ̀.

²³ E fèemàŋ joo bà yaào ɓɛìŋ. Aŋ sìèfèìŋ zòòlo zimgbe bà yaào wa ɓɛìŋ, kɛɛ aŋ gbiŋ naŋ wa fɔ̀ e kìlà aŋ gò wa kpɛ̀ɛ̀yɛ̀ màŋ tòmo nyiŋ màŋ.

²⁴ Wo Jisɛ̀ do nàŋ nɔ̀ŋ wɔŋ nyiiŋ gèeɔ̀ sùà wèè julɔfɔ, e kìlà e tòmò sìèfèìŋ zòòlouŋ nɛ̀ naàŋ nɔ̀ŋ kìɛŋ niŋ kòɓɛ̀ wò nyuùŋ joo bà.

²⁵ Wò ɓɛnɛ̀ŋ sààmɛ, yèè e teenga gbiŋ, wèè wo jòèyè anyùùŋ nyaŋ gbiŋ hnàŋ koɓɛ̀ Dayài nyàŋ e saɓùuŋ nɛ̀ sùà, esaɓù kɛ̀ wò yaà wɔŋ nyiiŋ gèeɔ̀ sùà wèè julɔfɔ, wèè wo pɔwɔ̀ wo Dayà weè nyiŋ.

²⁶ Wo Jisɛ̀ nàŋ yaà wo Kànà Sìèfèìŋ Zòòlo Gbee wiɔ̀ wo yèɔ kiɛ̀ŋ wì e nɛ̀ɛŋ gbiŋ è naiŋ kpɛɛ̀ŋ weè niŋ lɛ. Wò yaà wo nyùùŋ nɛɛmaŋ. Wo kuwà è tɔ̀mɛ yèè màŋ jùumù. Wo Dayà nauŋ wa jàà ɓùla è gbà e yìwìà anyùùŋ jùumù nyàŋ fèemàŋ, yèè wò nauŋ joowò wouŋ nyɛ̀nɛ̀ŋ wo ɓɛ̀màŋɗì manɛ̀ŋ maŋ gbiŋ diɛŋ ko àìjɛnɛ̀ŋ.

²⁷ Wo fè mààŋ àŋ kànà sìèfèìŋ zòòlo gbànaŋ nyàŋ. Wo kuwà èsaɓù bà wèè wo gè màŋ saaà kè ɗɔɔ gbiŋ wèè maŋ jùùmù wuŋ bi màŋ jiɛ̀ yèèngàà wò gè ɓɛìŋ è saaà wèè màŋ jùùmù ànyuùŋ gbànaŋ nyàŋ. Wò naŋ wa gè e sàà ɗì guùŋ e sùà guùŋ yèè wèè anyùùŋ nyaŋ gbiŋ, e teengaà wò naŋ wa gììyè wuŋ bi saaà lɛ.

²⁸ Maŋ Sàwà Dayà màŋ naŋ wa tà anyùùŋ ɗùù, aŋ yè nyaŋ fè ànyuùŋ tùlìà jii nyàŋ wèè aŋ nɔ̀ŋ aŋ kànà sìèfèìŋ zòòlo gbèè. Kɛɛ e ɗààhiìɛ wo Dayà naŋ wa ɓemè yèè wò naŋ niŋ gbòònò diɛŋ lɛ̀, e yèɛ naŋ wa hnè eɓìèmàŋjɛ̀wɛ̀ ke Sàwàa lɛ̀ nàŋ yaà, wò naŋ tà wo Jɔ̀àfelaaà ɗùù, wo yèɔ wò naŋ nyɛ̀nɛ̀ŋ wo nɔ̀ŋ wo nyuùŋ tùlìà jii wèè julɔfɔ wɔ̀.