Hiɓu 5 - WƆŊ FƐ̀Ì EBÒ SÌÀŊ DAYÀA

¹ Wo kànà sìèfèìŋ zòòlo gbee gbiŋ, wo Dayà nauŋ tàeɗùù wèè wo tomo wèè anyuùŋ joo, yèè wèè wo hiàŋ manɛ̀ŋ kìɛŋ e saaà gèe sùà wèè wo Dayà juuyà maŋ jùùmù anyunùuŋ nyàŋ hakɛ̀.

² Wo kànà sìèfèìŋ zòòlo gbeeɔ̀ wuŋ bi kuwa e zɔ̀kpɔ̀ e kɔɔuŋ nɛ̀ sùà, weètii wò kɛɛnɛ̀ŋ ke nyowo wèè anyùùŋ ɓàaɓàa yaà anyuùŋ nyɛ̀nɛ̀ŋ maŋ keì naanààŋ.

³ Nààŋ wuŋ bi kuwa e zɔ̀kpɔ̀ e kɔɔuŋ nɛ̀ sùà, esaɓùɛ lɛɛ̀ wò kuwa wo hìàŋ e nɛ̀ŋ saaà koɓɛ̀ Dayài wèè maŋ jùùmù wuŋ bi màŋ yèè maŋ jùùmù anyuùŋ joo.

⁴ Wo nyùùŋ gbiŋ fè ɓɛ̀nɛ̀ŋ dɛ̀ɛ̀kɛ̀ wuŋ bi wèè wo nyɛ̀nɛ̀ŋ wuŋ bi wo nɔ̀ŋ wò kànà sìèfèìŋ zòòlo. Wo Dayà nɔŋ nàŋ tà wo nyùùŋ ɗùù wèè wo nɔ̀ŋ wo kànà sìèfèìŋ zòòlo, yèè wuŋ naŋ wa tà wo Elɔ̀ùŋ ɗùù.

⁵ E ɗèwè guùŋ bi sùà nɔŋ, wo Jisɛ̀ Kulaì gò wa kìɛ̀ŋ wuŋ bi è dɛ̀ɛ̀kɛ wèè wo nɔ̀ŋ wò kànà sìèfèìŋ zòòlo gbee. Kɛɛ wo Dayà nauŋ wa woò wààŋ, “Muàŋ nàŋ yaà wo Jɔ̀àfelaa miɔ̀ŋ, esaɓù kɛ̀ kà nàaŋ kìlà wo Dèda mɔɔ̀ŋ.”

⁶ Wɔŋ fɛ̀ì Dayàa naŋ ɓɛìŋ woò koɓɛ̀ bà wààŋ, “Mùŋ do nàŋ nɔ̀ŋ wo sìèfèìŋ zòòlo wèè julɔfɔ, màànààŋ nɔŋ wo Mɛ̀kisiɗɛ̀ yaà lɛ.”

⁷ E teengaà wo Jisɛ̀ yaà wa e ɗuunyaàŋ lɛ, wò naŋ wa zoolò yèè wò naŋ dàwè wo Dayà ke mìè gòla gbee sùà yaà maŋ fɛɛ̀màì sùà wèè wo joeyèuŋ. Wo Dayà kuwa wa e gààaŋ wèè wo jòèyè ke kpùnàŋ Jisɛ̀ɛ wèè wo gò wa nàŋ fɔ̀. Nààŋ wò naŋ wa dèèyè wùŋ bi wèè wo nyɛ̀nɛ̀ŋ e yèɛ wo Dayà manaŋ wa wo nyɛ̀nɛ̀ŋ lɛ, wo Dayà naŋ jàà e zòòlouŋ nɛ̀ kùàŋ dìì.

⁸ Jòòpɛɛ wo Jisɛ̀ naŋ yaà wa wo Jɔ̀àfèlàà Dayàa, kɛɛ sɔɔ̀ wò naŋ wa kɔ̀ e keì nyìnga dìì paŋgàà wò naŋ wa nyìmè kɛ̀ kiìŋ è naŋ tɔɔ̀ wèè maŋ jɔ̀ɔ̀lɔ̀ wo Dayà dìì.

⁹ E keì nyìngaà wo Jisɛ̀ naŋ wa kɔ̀ dìì lɛ, naŋ nyɛ̀nɛ̀ŋ wò naŋ wa nɔ̀ŋ wo nyuùŋ tùlìà jii dìà sùà, e kìlà wò naŋ nɔ̀ŋ ko tɔɔtuì wèè e jòèyè anyùùŋ nyaŋ jɔɔlɔ̀uŋ dìì nyaŋ,

¹⁰ Eɓìèmàŋjɛ̀wɛ̀ tii, wo Dayà naŋ tà wo Jisɛ̀ ɗùù wèè wo nɔ̀ŋ wo kànà sìèfèìŋ zòòlo gbee mààŋ wo Mɛ̀kisiɗɛ̀.

Mìè gòo e nyaàiŋ dè e hààwe gììyà kɛ̀ɛ

¹¹ È zimgbe niŋ yaào wèè e weè nɔ̀ŋ wòo niŋ e nyaàiŋ dè keì lɛɛ̀, kɛɛ è naŋ nyìngè wòo, esaɓù kɛ̀ nìŋ naŋ gbɔ̀mgbɔ̀ɔ̀ maŋ jii wèè naŋ nyìmàŋ e nɛ̀ŋ.

¹² Nìŋ kuwa wa e teenga zimgbe wèè naŋ nɔ̀ŋ aŋ kààmɔɔŋ, kɛɛ è naŋ tɛɛwɛ̀ wèè wo nyùùŋ bà woiŋ kàà e keì jiɛ̀jiɛ̀ɛ e nyaàiŋ dè e yèɛ wo Dayà naŋ woò lɛ. Nìŋ yaà mààŋ aŋ jɔaa, kòò nìŋ hàì wèè naŋ jè è nɛ̀ŋje nyìnga, sɔɔ̀ wo yaa màŋ yaà màì.

¹³ Wo nyùnɔ̀ɔŋ gbiŋ yaa nɔŋ maŋ yaà màì wèè e nɔ̀ŋ e nɛ̀ŋjeuŋ wɔ̀, wò yaà mààŋ wo jɔaa wo yèɔ nyimààŋ kɛ̀ kiìŋ nàŋ yaà è tɔ̀ɔ̀nyaàŋ yèè è keì naanààŋ.

¹⁴ E nɛ̀ŋje nyìnga yaà wèè anyùùŋ nyaŋ naŋ kamàìŋ nyaŋ, esaɓù kɛ̀ àŋ nyìmàŋ e fèèmàŋ e tɔ̀ɔ̀nyaàŋ yaà e keì naanààŋ.