Hiɓu 4 - WƆŊ FƐ̀Ì EBÒ SÌÀŊ DAYÀA

¹ Nààŋ wo Dayà naŋ woò wààŋ wò do wi nàŋ kìɛ̀ŋ e nyiiŋ gèe, e yèɛ wò naŋ jɔ̀ɔ̀ ɗààhiì wèè wo wi kiɛ̀ŋ lɛ, è kuwa eiŋ yɛ̀mɛ̀ yàwi bi diɛŋ, wèè yàwi nààŋ bà guùŋ gbiŋ go niŋ nàŋ sòò yɛ̀mɛ.

² È naiŋ wa kòmò Ebò Siaàŋ, màànààŋ nɔŋ àŋ naŋ niŋ wa kòmò lɛ, kɛɛ e gò nyiŋ wa nyìnìàŋ è keì kɛnɛ gbiŋ, esaɓù kɛ̀ àŋ naŋ wa gè maŋhɛɛ wèè aŋ hààwè e yèɛ àŋ naŋ wa kòmò lɛ.

³ Yàwi nyàŋ naŋ niŋ wa haawè nyaŋ, nàŋ do nàŋ yɛ̀mɛ̀ e nyiiŋ gèeɛ̀ màànààŋ nɔŋ wo Dayà naŋ jɔ̀ɔ̀ ɗààhiì lɛ. Wɔŋ fɛ̀ì Dayàa naŋ woò wààŋ, “Wo Dayà naŋ wa tùù anyùùŋ nyaŋ sìwè yèè wò naŋ nyiŋ woò wààŋ, ‘Julɔfɔ niŋ naàŋ wa nàwèè hàì è dììɛ diɛŋ ko yèi mìŋ he nyiŋ weè nàŋ kìɛ̀ŋ e nyiiŋ gèe lɛ̀.’ ” Wo Dayà naŋ wa tɛɛ̀ woò jòòpɛɛ e tòmouŋ nɛ̀ è wa jùà e yìwìà e teengaà wò naŋ wa bànè e ɗuunyaàŋ lɛ.

⁴ È yaà sìnga niŋ koɓɛ̀ bà wɔŋ fɛ̀ì Dayàa sùà yèè kò naŋ woò wààŋ, “Wo Dayà naŋ wa kpɛ̀ɛ̀yɛ̀ e tòmouŋ nɛ̀ e gɔ̀ì nɔɔnɔŋ dièguùŋ, yèè wò naŋ gè nyiiŋ e gɔ̀ɛ̀ɛ̀ nɔɔnɔŋ le tìyèeɛ̀ diɛŋ.”

⁵ Wo Dayà naŋ ɓɛìŋ wòò e kèì guùŋ lɛɛ̀ wààŋ, “Julɔfɔ niŋ naàŋ wa nàwèè hàì è dììɛ diɛŋ ko yèi mìŋ he nyiŋ weè nàŋ kìɛ̀ŋ e nyiiŋ gèe lɛ̀.”

⁶ Anyuùŋ jiɛ̀jiɛ̀ nyaŋ naŋ wa kòmò Ebò Siaàŋ nyaŋ, aŋ gò wa yɛ̀mɛ̀ è nyiiŋ gèe lii, esaɓù kɛ̀ aŋ gò niŋ wa haawè. Anyùùŋ bà kòò àŋ yaà, aŋ yè nyaŋ wo Dayà naŋ nyiŋ gè nyààŋ diɛŋ wèè aŋ niŋ yɛmɛ̀.

⁷ Tɛɛ̀ naŋ tɔɔ̀ kɛ̀ wo Dayà naŋ wa jàà ke ɗɔɔ joo e ɓula, ke yèɛ àŋ nyaaŋ “Nàaŋ.” Maŋ doa bà naŋ mààŋ yèè wò naŋ gbùùyè wo Kanaà Dèèwe sùà e nyaàiŋ dè ke ɗɔɔ bi. Wɔŋ fɛ̀ì Dayàa naŋ woò wààŋ, “Sèè nìŋ komo nàaŋ kè mìè Dayàa, ɓɔ̀ nìŋ nyìngà màŋ jiiŋ màŋ.”

⁸ Sèè wo Jàasùà wo wa weè kìɛ̀ŋ anyùùŋ e nyiiŋ gèeɛ̀ wo Dayà naŋ wa jɔ̀ɔ̀ ɗààhiì wèè wo nyiŋ kiɛ̀ŋ lɛ, wo Dayà naàŋ wa weè ɓɛìŋ wòò è kèè kè ɗɔ̀ɔ̀ nyiiŋ gèe joo bà.

⁹ Kɛɛ wo Dayà naŋ jɔ̀ɔ̀ ɗààhiì wèè wo wi kìɛ̀ŋ ke ɗɔ̀ɔ̀ nyiiŋ gèe, màànààŋ wo Dayà wuŋ bi naŋ wa gè nyiiŋ ke ɗɔ̀ɔ̀ nɔɔnɔŋ le tìyèeɛ̀ diɛŋ lɛ̀, jòòpɛɛ ke ɗɔɔ bi kòò kè hnè weè.

¹⁰ Ke ɗɔɔ yii diɛŋ wa nàwèè, anyùùŋ Dayà nyaŋ do nàŋ gè nyiiŋ wèè e tòmo nyiŋ nɛ̀ àŋ naŋ wa nyɛ̀nɛ̀ŋ lɛ, màànààŋ nɔŋ wo Dayà naŋ wa gè nyiiŋ wèè e tòmouŋ nɛ̀ wò naŋ wa nyɛ̀nɛ̀ŋ lɛ.

¹¹ Weètii nyɛ̀nɛ̀ŋ wiìŋ e tɛ̀ɛ̀tɛ̀ɛ̀ɛ gbiŋ è naiŋ ɓɛ̀nɛ̀ŋ nyɛ̀nɛŋ wèè e yɛmɛ̀iŋ e nyiiŋ gèe lii, wèè kɛ̀ yàwi nààŋ bà guùŋ gbiŋ gòiŋ niŋ nàŋ sòò yɛ̀mɛ, màànààŋ àŋ naŋ wa nyɛ̀nɛ̀ŋ esàɓù e hààwe gò kɛ̀ɛ̀nɛ̀ŋ nyiŋ nɛ̀.

¹² Ke mìè gbòà Dayàa kè yaà wɔŋ nyiiŋ gèe sùà yèè kè kuwa gààŋ. Kè nɔ̀ŋ ke nìàŋ e kòyà fòò maŋ nyààŋ tìyèe. Kè kɛɛ ke hàì koɓɛ̀i wo jinàaŋ yaà wɔŋ nyììŋ jinàaŋ deenàŋ lɛ, ko yèi maŋ sunosuno màŋ yaà e bù lɛ maŋ gòà maŋ hnàŋ koɓɛ̀ guùŋ lɛ. Kè fulià janjai e gòngò nyuùŋkpùuŋ nɛ̀ e kpùlìà e yèɛ wò naŋ ɗewè ke jiiuŋ nɛɛ̀ŋ sùà lɛ.

¹³ E nɛ̀ŋ gbiŋ fè wèè e nɔ̀ŋ kò nyɛɛnɛŋ kò fɛ̀ɛ̀fèìŋ Dayài. Manɛ̀ŋ maŋ gbiŋ e ɗuunyaàŋ màŋ yaà yìle miŋ yèè maŋ hawa janjai ko fɛɛ̀fenùuŋ niìŋ. Ko nɛ̀ɛ̀uŋ niìŋ è kuwa euŋ tɔ̀ɔ̀ e jìwààjɛ̀wɛ̀ e tɔ̀ɔ̀nyaàaŋ è naiŋ nyɛ̀nɛ̀ŋ lɛ.

Jisɛ̀ wo Kànà Sìèfèìŋ Zòòlo Gbeeɛ̀

¹⁴ È kùwàìŋ wo Kànà Sìèfèìŋ Zòòlo Gbee wo yèɔ naŋ kɔ̀ ko àìjɛnɛ̀ŋ wɔ, yèè wuŋ nàŋ yaà wo Jisɛ̀ wo Jɔ̀àfèlàà Dayàa. Esaɓùɛ lɛɛ̀ è kùwàìŋ eiŋ jèè e hààwe sùà e nyaàiŋ dè e yèɛ è naiŋ woò wèè wo Jisɛ̀ Kulaì lɛ.

¹⁵ Wo Kànà Sìèfèìŋ Zòòlo Gbee wiɔ̀ Jisɛ̀ nyìmàŋ e zɔ̀kpɔ̀ɛ e kɔɔ wilɛ̀ sùà, esaɓù kɛ̀ wò naŋ wa kɔ̀ e wàa dìì maŋ dòmaŋ nyaaŋ màŋ gbiŋ màànààŋ nɔŋ è kɔ̀àìŋ e wàa dìì lɛ, kɛɛ wo gò wa nyɛ̀nɛ̀ŋ è kèè jùumù gbiŋ.

¹⁶ Kɛ̀ɛ̀nɛŋ wiìŋ ke jii tùlia e kìlà e kaiŋ ko gbɛ̀ɛ̀ ke kpùà kanaà Dayà ko yèi è doiŋ nàŋ yɛ̀mɛ̀ e tɛ̀ɛ̀tɛ̀ɛ̀. Kuŋ wo Dayà do wi nàŋ tɔ̀ɔ̀ ke nyowo yèè wo wi kìɛ̀ŋ e kpùùmaàŋ è naiŋ kpɛɛ̀ŋ weè niŋ lɛ̀.