Hiɓu 2 - WƆŊ FƐ̀Ì EBÒ SÌÀŊ DAYÀA

E jòèye gbeeɛ̀

¹ Esaɓùɛ lɛɛ̀ è kuwa eiŋ gbìàŋ e gòngo wilɛ̀ gbiŋ koɓɛ̀ e tɔ̀ɔ̀nyaàaŋ è naiŋ kòmò lɛ maŋjɛ̀wɛ, wèè kɛ̀ e goiŋ niŋ nàŋ fè jɛwɛ.

² Ke miè gbìaàŋ aŋ màikà nyaŋ naŋ wa kìɛ̀ŋ aŋ nèwàènèwe wi nyàŋ lɛ, naŋ wa tɔɔ̀ kɛ̀ kè yaà tɔ̀ɔ̀nyaàŋ, yèè anyùùŋ nyaŋ gò nyiŋ wa dè màŋjɛ̀wɛ ɔ̀ɔ̀ aŋ nyiŋ jɔ̀ɔ̀lɔ̀ dìì nyaŋ, naŋ wa kùwò e nimilàa naŋ nyiŋ wa sɔ̀ dèè lɛ.

³ Dièsɔa è naiŋ ɓɛ̀nɛ̀ŋ fòlà e kèì nyìngà Dayàa dìì sèè è gèìŋ maŋhɛɛ wèè eiŋ nyìmàŋ e ɗewe kii gbeeɛ̀ wò do nàŋ mɔ̀nɔ̀ŋ wèè wo wi joeyè lɛ? Wo Kanaà Jisɛ̀ wuŋ bi jiɛ̀ naŋ wòò e kèè e jòèye lɛɛ̀, yèè anyùùŋ nyaŋ naŋ wa kòmò ke miè gbìaàŋ nyaŋ, naŋ wi tɔɔ̀ janjai kɛ̀ è yaà wa e tɔ̀ɔ̀nyaàŋ.

⁴ Wo Dayà wuŋ bi naŋ kìɛ̀ŋ ke mìè seì, nààŋ wò naŋ tɔ̀ɔ̀ maŋ tɔ̀ɔ̀màŋsèì keì, yèè maŋ kèè mèè, e kìlà wò naŋ wa kìɛ̀ŋ wo Jìnàŋ Nɛɛmaàŋ koɓɛ̀ wo nyùnɔ̀ɔŋ gbiŋ wò manaŋ wouŋ kiɛ̀ŋ wɔ.

Wo nyùnɔ̀ɔŋ sià wì ko feìŋ wèè eiŋ yɛ̀mɛ̀ jòèye wɔ̀

⁵ Èiŋ nyìmàŋ kɛ̀ wo Dayà gò wa gbìàŋ è ɗuunyaŋ jɛiɛ̀ è woàìŋ kɛ̀ è do nàŋ hnè lɛ è gààŋ àŋ màikà nyaŋ dìì.

⁶ Wo nyùùŋ bà naŋ sìngè wɔŋ fɛ̀ì Dayàa sùà koɓɛ̀ bà wò naŋ woò wààŋ, “Oo Dayà, ɓòò nàŋ yaà anyuùŋ kpùuŋ, wèè maŋ kɛ̀ɛ̀nɛ̀ŋ gòngo weè nyiŋ? Àŋ yaà nɔŋ anyuùŋ kpùuŋ, wèè kiìŋ mùŋ naŋ kpɛɛ̀ŋ weè nyiŋ?

⁷ Mùŋ naŋ bànè anyuùŋ kpùuŋ wèè e teenga kpuu yèè mùŋ naŋ nyiŋ kìɛ̀ŋ e gaàŋ jɔ̀à aŋ màikà nyaŋ diɛŋ. Mùŋ naŋ nyiŋ joowò yè mùŋ naŋ nyiŋ kìɛ̀ŋ e ɓɛ̀ɛ̀jàa gbee,

⁸ yèè mùŋ naŋ nyiŋ nyɛ̀nɛ̀ŋ aŋ kana manɛ̀ŋ maŋ gbiŋ diɛŋ.” E sìngaà naŋ woò wààŋ wo Dayà naŋ nyiŋ nyɛ̀nɛ̀ŋ “aŋ kana manɛ̀ŋ maŋ gbiŋ diɛŋ.” Tɛɛ̀ naŋ tɔɔ̀ janjai kɛ̀ wo Dayà naŋ nyiŋ nyɛ̀nɛ̀ŋ aŋ kana manɛ̀ŋ maŋ gbiŋ wò naŋ banè maŋ diɛŋ. Kɛɛ e ɗewe gbio sùà, kòò è yɛ̀mɛ̀ìŋ naàŋ ànyuùŋ kpùuŋ aŋ kɛ̀ɛ̀nɛ̀ŋ gààŋ mànɛ̀ŋ bànè Dayà maŋ gbiŋ diɛŋ.

⁹ Kɛɛ è yɛmɛ̀ìŋ wo Jisɛ̀, wo yèɔ wo Dayà naŋ wa kìɛ̀ŋ e gaàŋ jɔ̀à wèè e teenga kpuu aŋ màikà nyaŋ diɛŋ, wèè kɛ̀ esàɓù e tɛ̀ɛ̀tɛ̀ɛ̀ Dayàa wo fà wèè anyùùŋ nyaŋ gbiŋ. È yɛmɛ̀uŋ naàŋ kɛ̀ wo Dayà nauŋ joowò yèè wò nauŋ kìɛ̀ŋ e ɓɛ̀ɛ̀jàa mààŋ wo kana esàɓù e fàuŋ nɛ̀ yaà e keì nyìngaà wò naŋ kɔ̀ dìì lɛ.

¹⁰ Wo Dayà nàŋ kanaŋ manɛ̀ŋ bàne màŋ gbiŋ, yèè e gaàuŋ nɛ̀ sùà wò naŋ wa bànè manɛ̀ŋ maŋ gbiŋ. Yèè è yaà wa e kèì tɔ̀ɔ̀nyaàŋ wo Dayà naŋ wa nyɛ̀nɛ̀ŋ, e teengaà wò naŋ nyɛ̀nɛ̀ŋ wo Jisɛ̀ naŋ nɔ̀ŋ wo nyuùŋ tùlìà jii dìà sùà nààŋ wò naŋ wa kɔ̀ e keì nyìnga dìì, wèè wo nyɛ̀nɛ̀ŋ aŋ jɔ̀à Dayà nyaŋ zimgbe nyiŋ aŋ nɔ̀ŋ jòèye nyiŋ, yèè aŋ nɔ̀ŋ aŋ bà nyiŋ bà wèè e jòòwò Dayàa.

¹¹ Wo Jisɛ̀ yaà anyùùŋ nyaŋ wò naŋ nyɛ̀nɛ̀ŋ àŋ naŋ nɔ̀ŋ nɛɛmaŋ sùà nyaŋ, aŋ gbiŋ kuwa wo Dèdà gunɔ̀ɔŋ. Esaɓùɛ lɛɛ̀ e sàngè fè wò Jisɛ̀ wèè wo nyiŋ nyààŋ àŋ wùìyauŋ nyàŋ.

¹² Wo Jisɛ̀ naŋ wòò wo Dayà wààŋ, “Mìŋ do nàŋ tɔ̀ɔ̀ aŋ wùìyaim nyàŋ e deè mɔ̀ɛ̀ e nyaàiŋ dè e tòmoɛ̀ mùŋ naŋ nyɛ̀nɛ̀ŋ lɛ. Mìŋ do nàŋ tɛ̀nɛ̀ŋ e deè mɔ̀ɛ̀ koɓɛ̀ ke gbòò anyuùŋ hààwe nyàŋ sèè àŋ deenàŋ koɓɛ̀ guùŋ wèè zòòlo.”

¹³ Wo Jisɛ̀ naŋ ɓɛìŋ woò wààŋ, “Mìŋ do nàŋ sìè ke jii tùlia miɛ̀ŋ wo Dayà sùà.” Wò naŋ ɓɛìŋ woò wààŋ, “Miàŋ wɛɛ̀ kià yàwi nààŋ jɔ̀à nyaŋ wo Dayà naim kiɛ̀ŋ nyaŋ.”

¹⁴ Aŋ jɔ̀à nyiiŋ kuwa maŋ kèìŋ yaà maŋ sɛ̀ìŋ, yèè wo Jisɛ̀ naŋ wa nɔ̀ŋ wo bà nyiŋ bà e nɔ̀ŋ kii nyiŋ nɛ̀ sùà. Wò naŋ tɛɛ̀ nyɛ̀nɛ̀ŋ wèè kɛ̀ esàɓù e fàuŋ nɛ̀, wo pɔɔpɔ̀ɔ̀ e gààŋ Dɛwìɔ, wo yèɔ kuwa wa e gààŋ e fàa diɛŋ wɔ̀.

¹⁵ Wo Jisɛ̀ naŋ wa tii nyɛ̀nɛ̀ŋ wèè wo bilɛ̀ŋ anyùùŋ nyaŋ gbiŋ yaà mààŋ aŋ ɗo maŋ nyiiŋ gèe nyiŋ màŋ gbiŋ sùà nyaŋ, esaɓù kɛ̀ àŋ yaà e jùù wèè aŋ go nàŋ fɔ̀.

¹⁶ È yaà janjai kɛ̀ aŋ màikà nyaŋ nàŋ wo gò wa kìɛ̀ŋ kpuumàŋ, kɛɛ wò naŋ wa kìɛ̀ŋ kpùùmaŋ ke kpòò Eɓulɔhɛɛ̀ɛŋ.

¹⁷ Tɛɛ̀ naŋ tɔɔ̀ kɛ̀ wò kuwa wa wo nɔ̀ŋ mààŋ aŋ wùìyauŋ nyàŋ e ɗèwè kìì guùŋ nɛ àŋ yaà lɛ, wèè wo nɔ̀ŋ wo nyuùŋ tùlìà jii nyiŋ nɔɔ̀ŋ yèè wo Kànà Sìèfèìŋ Zòòlo Gbee kɛ̀ɛ̀nɛ̀ŋ ke nyowo e tòmò Dayàa sùà, wèè wo Dayà juuyà maŋ jùùmù nyiŋ màŋ hakɛ̀.

¹⁸ Wò Jisɛ̀ naàŋ ɓɛ̀nɛ̀ŋ kpùùmàŋ anyùùŋ nyaŋ naŋ wa kɔ̀ e wàa dìì nyaŋ, esaɓù kɛ̀ wuŋ bi naŋ wa kɔ̀ e keì nyìnga yaà e wàa dìì.