Gàla 4 - WƆŊ FƐ̀Ì EBÒ SÌÀŊ DAYÀA

¹ Wo jɔ̀àfelaaà yèɔ do naŋ ɓèmè maŋ nɛ̀ŋ èdàà dèdauŋ màŋ wɔ àŋ kùwoùŋ mààŋ wo ɗo e teengaà wò yaà jɔ̀àkàiŋ jɔa lɛ̀, jòòpɛɛ wuŋ nàŋ yaà kai wo kɛ̀ɛ̀nɛ̀ŋ maŋ nɛ̀ŋ èdàà maŋ gbiŋ.

² E teengaà wò yaà jɔ̀àkàiŋ jɔa lɛ̀, anyuùŋ joo kɛɛnɛ̀ŋ e gààŋ wèè wo yɛ̀mɛ̀ e kèè maŋ nɛ̀ŋ èdààuŋ màŋ dìì sùà e jèèsùà e teengaà wo dèdauŋ naŋ jàà ɓula lɛ̀ e haì.

³ E ɗèwè guùŋ nɛɛ̀ sùà, yàwi pɛɛ è yààìŋ aŋ ɗo koɓɛ̀ ke sàwà e gààŋ aŋ jìnàŋ ɗuunyaàŋ lɛɛ̀, pangàà è doiŋ nàŋ kɛ̀ɛ̀nɛ̀ŋ ke jiikɛ̀ɛ kɛ̀ kiìŋ nàŋ yaà e tɔ̀ɔ̀nyaàaŋ.

⁴ Kɛɛ nààŋ e teenga kɛnɛɛ̀ naŋ wa haì, wo Dayà naŋ tùɔ̀ŋ wo Jɔ̀àfelaauŋ nɔɔ̀ŋ, yèè wo jɔùŋ nauŋ kòmò. Wo Jɔ̀àfelàà Dayàa naŋ wa jɔ̀ɔ̀lɔ̀ ke Sàwà aŋ Juùù nyaŋ dìì,

⁵ wèè wo bìlɛ̀ŋ aŋ yè nyaŋ yaà wa ke Sàwàa dìì nyaŋ, e kìlà wèè yàwi pɛɛ eiŋ nɔ̀ŋ aŋ jɔ̀à Dayà.

⁶ Kɛɛ nààŋ è yààìŋ aŋ jɔ̀à Dayà lɛ, wo Dayà naŋ tùɔ̀ŋ wo Jìnàŋ Jɔ̀àfelaauŋ nɔɔ̀ŋ maŋ jii wi màŋ sùà. E kìlà wo Jìnàaŋ naŋ gòlò wààŋ, “Dèda miɔ̀ŋ, Dèda miɔ̀ŋ wɔ.”

⁷ Niŋ fè ɓɛìŋ aŋ ɗo. Nààŋ nìŋ yaà naàŋ aŋ jɔ̀à Dayà lɛ, wò Dayà doiŋ nàŋ kìɛ̀ŋ e yèɛ wò naŋ ɓèmè e ɗààhiì wèè wo kìɛ̀ŋ aŋ jɔ̀àuŋ nyaŋ lɛ.

E gòngò Pɔɔ̀ɛ wèè anyùùŋ nyaŋ ko Gàlatìà

⁸ E teenga gɔu sùà niŋ nyimààŋ wa wo Dayà, nìŋ yaà wa aŋ ɗo wèè aŋ yè nyaŋ fè àŋ dayà kɛnɛ nyàŋ.

⁹ Kɛɛ nààŋ nìŋ naŋ naàŋ nyìmàŋ wo Dayà, ɔ̀ɔ̀ miŋ woò mìàŋ, wo Dayà woiŋ nyìmàŋ, diè nìŋ naŋ ɓɛìŋ ɓɛ̀nɛ̀ŋ kɛ̀ɛ̀ maŋjɛ̀wɛ koɓɛ̀ aŋ jìnàŋ e zɔ̀kpɔ̀ yèè e gààŋ nyowo nyiŋ nɛ̀? Wèè kiŋ nìŋ manaŋ ɓɛìŋ naŋ nɔ̀ŋ aŋ ɗo e weè nyiŋ?

¹⁰ Nìŋ giiyà maŋ ɗɔɔ, maŋ wàà, maŋ teenga titi wɔŋ doaà sùà, yèè maŋ doa zimgbe e zɔlɔ̀.

¹¹ Mìŋ yaà e jùù yèè e gòngo sùà e nyaàiŋ eiŋ dè. Tɛɛ̀ ɓɛ̀nɛ̀ŋ nɔŋ kɛ̀ e tòmo mɛ̀ gbiŋ tɛɛiŋ è nɔ̀ŋ e wèè foo?

¹² Nyɛ̀iŋ nààŋ wùìyaim nyaŋ, mìŋ yààìŋ pɔ̀wɔ̀ sùà wèè naŋ nɔ̀ŋ màànààŋ mìŋ yaà lɛ, e ɗewe gbiŋ sùà mìŋ yaà nɔŋ màànààŋ nìŋ yaà lɛ. Nyɛ̀iŋ nyɛɛ̀ŋ bà gbiŋ niŋ gòim wa nyìnìàŋ è keì naanààŋ.

¹³ Nìŋ naŋ jàà jii nààŋ mìŋ naŋ wa dàànè ke mìè gbìàŋ Ebò Sìàaŋ ko nɛ̀ɛ̀ŋ niìŋ e teenga jiɛ̀jiɛ̀ɛ lɛ̀, esaɓù nàŋ yaà kɛ̀ mìŋ yaà wa siinyɛŋ e kɔɔ mɛ̀ sùà.

¹⁴ E sàaŋ mɛ̀ èiŋ wa wèè ɓɛ̀nɛ̀ŋ hìàŋ maŋ keì nyìnga bà diɛŋ, kɛɛ niŋ gòim wa wùàŋ ɔ̀ɔ̀ naim fè jɛwɛ esàɓù sàaàŋ e kɔɔ mɛ̀ sùà. Nìŋ naim wa jàà kùàŋ dìì e teenè mààŋ mìŋ yaà wo màìkà Dayàa bà guùŋ, ɔ̀ɔ̀ mààŋ wo Jisɛ̀ Kulaì wuŋ bi.

¹⁵ Nìŋ yaà wa kai e zɔlɔ̀ sùà! Kiìŋ naŋ wa kaaìŋ? Miaŋ bi kà ɓɛ̀nɛ̀ŋ fè ke mìè seì kɛ̀ nàŋ wa ɓɛ̀nɛ̀ŋ gè maŋ fɛ̀ɛ̀ kòmàŋ nyɛiŋ bi màŋ e zɔlɔ̀ sùà, sèè nìŋ ɓɛnɛ̀ŋ, e kìlà naim miŋ kiɛ̀ŋ.

¹⁶ Ka naàŋ nɔ̀ŋ wo jooiŋ, esaɓù kɛ̀ mìŋ naiŋ wòò e tɔ̀ɔ̀nyaàaŋ?

¹⁷ Anyùùŋ nyiiŋ tɔɔ̀ wa kɛ̀ àŋ mànàìŋ zimgbe, kɛɛ maŋ ɗèwè nyiŋ màŋ fè wa tɛ̀ɛ̀. E yèɛ nɔŋ àŋ manaŋ wa lɛ̀, nàŋ yaà wèè aŋ wi gòònò tɛɛ naim yèwà maŋ jɛwɛ, yèè naŋ nyiŋ sìà ke jii tùlia sùà.

¹⁸ E kìla, è yaà tɛ̀ɛ̀ wèè naŋ kùwìè ke jii tùlia zimgbe wèè e nɛ̀ɛŋ gbiŋ yaà tɛ̀ɛ̀ lɛ sùà, tɛɛ̀ yaà e tɔ̀ɔ̀nyaàŋ dòmaŋ nyààŋ ɗewe gbiŋ sùà, yèè e fè nɔŋ wèè sèè mìŋ nɔ̀ìŋ tɛɛ.

¹⁹ Jɔ̀àim nyàŋ, kaiŋ ɓɛìŋ woò kɛ̀, mìŋ yaà e gòngo nyìnga sùà e weèiŋ màànààŋ nɔŋ wo jɔùŋ nɔ̀ŋ yɛi e suà hɛ̀ɛ kòmaŋ sùà le, e jèèsùà naŋ dè ke kpèè sìàŋ Jisɛ̀ Kulaìɛ maŋjɛ̀wɛ.

²⁰ Mìŋ manaŋ weè kai wèè ka nɔ̀ŋ ko nɛ̀iŋ niìŋ sààmɛ lɛɛ̀ sùà, e wèè kaiŋ weè ɓèèmè ke kpèè joo bà diɛŋ. Mìŋ yaà kai e gòngo nyìnga sùà e weèiŋ.

E tɔ̀ɔ̀màŋsèì Hegà yaà wo Sèèla

²¹ Tɔ̀ weè miŋ dawè nyɛiŋ nyàŋ nìŋ manaŋ wèè naŋ nɔ̀ŋ ke Sàwàa wo Dayà naŋ wa kìɛ̀ŋ wo Mòòze yɛ̀ dìì, kɛɛ niŋ gò kòmàŋ è yèɛ ke Sàwàa naŋ woò lɛ?

²² Nààŋ è yaà sìnga niŋ wɔŋ Fɛ̀ì Dayàa sùà lɛ, kɛ̀ wo Eɓulɔhɛɛ̀ŋ kuwa wa aŋ jɔ̀àfèlàà tìyèe. Wo bà guùŋ yaà wa wo jɔ̀à kòmàŋ ɗo jɔunɔ̀ɔŋ, yèè wo gbànaŋ wɛɛ̀ wo yèyeuŋ nɔɔ̀ŋ fè wa è ɗò dìì.

²³ Wo ɗo jɔunɔ̀ɔŋ gò wa kòmàŋ wò jɔ̀àfelaauŋ nɔɔ̀ŋ è yìwìà ɗààhiì Dayà sùà. Kɛɛ jɔunɔ̀ɔŋ fè wa è ɗo dìì wɔ, wò naŋ wa kòmò wo jɔ̀àfelaauŋ nɔɔ̀ŋ esàɓù e ɗààhiìɛ wo Dayà naŋ wa ɓeme lɛ sùà.

²⁴ Maŋ keì mɛɛ̀ŋ gbiŋ màŋ kuwa e fasàì joo. Aŋ jɔ̀ùŋ tìyèe nyɛɛ̀ŋ naŋ tɔ̀ɔ̀ ɗààhìì e mìèsùàgùùŋ tìyèeɛ̀ wo Dayà naŋ wa banè wèè anyunùuŋ nyàŋ lɛ. Wo jɔunɔ̀ɔŋ naŋ kùmìè aŋ jɔ̀àuŋ nyàŋ e ɗo dìì nyaŋ nàŋ yaà Hegà, wuŋ zà naŋ dè bɛ̀ŋ ke mìèsùàgunɛ̀ɛŋ wo Dayà naŋ wa banè wɔŋ Tòò Sanàa dìmɛ̀ yɛ. Wo nyùnɔ̀ɔ̀ŋ gbiŋ àŋ naŋ kùmìè ke kpoouŋ nɛɛ̀ŋ sùà wɔ wò yaà wo ɗo.

²⁵ Wo Hegà naŋ dè bɛ̀ŋ wɔŋ Tòò Sanàa ko Àlàbià, yèè ko jawa gbeeì Jùlusɛ̀làm, yèè wuŋ yaà aŋ jɔ̀àuŋ nyàŋ àŋ yaà e ɗo dìì.

²⁶ Kɛɛ wo yèye wiɔ̀ nàŋ yaà ko jàwà gbèè Jùlusɛ̀làm ko yèi yaà ko àìjɛnɛ̀iŋ lɛ̀, yèè wo fè è ɗo dìì.

²⁷ Wɔŋ fɛ̀ì Dayàa naŋ wò wààŋ, “E zɔlɔ̀ e nɔ̀ìŋ, nyɛiŋ nààŋ jɔùŋ gò kùwìè àŋ jɔ̀à nyaŋ! Kpàaìŋ, yèè niŋ gòlà e zɔlɔ̀ sùà, nyɛ̀ìŋ nyàŋ kò nìŋ kùwò wa è sùàhɛ̀ɛ̀ kòmaŋ lɛ̀! Wo jɔunɔ̀ɔŋ àŋ naŋ wa gbàŋ wɔ, wò do naŋ kɛ̀ɛ̀nɛ̀ŋ aŋ jɔ̀à zimgbe e nìàŋ wo jɔunɔ̀ɔŋ yèɔ wo faiŋ gò wa dangè wɔ.”

²⁸ Wùìyaim nyàŋ, esàɓù e ɗààhiì lɛɛ̀ àŋ naiŋ wa kòmò, màànààŋ nɔŋ àŋ naŋ wa kòmò wo Ààze lɛ̀.

²⁹ Kɛɛ wo jɔ̀àa àŋ naŋ wa kòmò e kèìŋ nɛ sùà wɔ, naŋ hìɛ̀ŋ keì nyìnga koɓɛ̀ wo jɔ̀àa àŋ naŋ kòmò esàɓù wo Jìnàŋ Dayàa sùà wɔ. E kei guùŋ nɛɛ̀ kò è yaà nàaŋ kaaiŋ.

³⁰ Kɛɛ kiìŋ wɔŋ fɛ̀ì Dayàa naŋ woò? Wɔ̀ŋ woò wààŋ, “Ɓɔ̀ mùŋ jàà wo ɗo jɔunɔ̀ɔŋ yaà wò jɔ̀àfelaauŋ nɔɔ̀ŋ kùàŋ dìì kò gboo moo, esaɓù naŋ yaà kɛ̀ wo jɔ̀àfèlàà ɗo jɔunɔ̀ɔŋ naàŋ kɛ̀ɛ̀nɛ̀ŋ màŋ nɛ̀ŋ èdàà dèdauŋ maŋ bà. Wo jɔ̀àfèlàà wo jɔunɔ̀ɔŋ yèɔ fè e ɗo dìì wɔ, nàŋ do naŋ kɛ̀ɛ̀nɛ̀ŋ maŋ nɛ̀ŋ èdàà maŋ gbiŋ.”

³¹ Wùìyaim nyàŋ, e fèìŋ àŋ jɔ̀à wò ɗo jɔunɔ̀ɔŋ, è yààìŋ aŋ jɔ̀à kòmàŋ wo jɔunɔ̀ɔŋ yèɔ fè è ɗo dìì wɔ.