3Jɔ̀ɔŋ 1 - WƆŊ FƐ̀Ì EBÒ SÌÀŊ DAYÀA

¹ E yìwià koɓɛ̀ wo màmàŋkùmɛɔ̀ŋ, wo sìèfèìŋ anyuùŋ hààwe nyàŋ. E kà koɓɛ̀ wo dàwi miɔ̀ŋ Gayɔ̀i, wo yeɔ̀ mìŋ naŋ kaì mɔ̀nɔ̀ŋ e tɔ̀ɔ̀nyaàŋ sùà wɔ.

² Dàwi miɔ̀ŋ, mìŋ yaà zoolo wèè e keìɛ gbiŋ e nɔ̀ŋ tɛ̀ɛ̀ ko nɛ̀ɛ̀ŋ muìŋ yèè muŋ nɔ̀ŋ e kɔɔ gbài sùà. Nààŋ mìŋ naŋ nyìmè kɛ̀ mùŋ yaà tɛ̀ɛ̀ wɔŋ nyììŋ jinàaŋ sùà lɛ.

³ Mìŋ yaà wa e zɔlɔ̀ gbee sùà nààŋ anyuùŋ hààwe nyàŋ bà nyiŋ naŋ hnè yèè àŋ naìm wòò e ɗeweɛ̀ nìŋ kuwa hààwe e tɔ̀ɔ̀nyaàŋ sùà, màànààŋ nɔŋ nìŋ yaà e tɔ̀ɔ̀nyaàŋ wɔŋ nyiiŋ gèeɔ̀ sùà lɛ.

⁴ E keì bà gbiŋ fèim nyìnìàŋ è zɔlɔ̀ mààŋ sèè mìŋ komo kɛ̀ aŋ jɔ̀àim nyàŋ àŋ dè è tɔ̀ɔ̀nyaàaŋ maŋjɛ̀wɛ.

Àŋ naŋ tɛ̀nɛ̀ŋ wo Gayɔ̀

⁵ Wùìya mànaŋ miɔ̀ŋ, mùŋ naŋ sìè e hààwe e tòmoɛ̀ mùŋ nyɛnɛŋ wèè anyuùŋ hààwe nyàŋ sùà lɛ̀, sèè pɛɛ aŋ nɔ̀ŋ aŋ nyùùŋ nèè nyɛiŋ.

⁶ Àŋ naŋ fè ke mìè seì koɓɛ̀ ke gbòò anyuùŋ hààwe nyàŋ e nyaàìŋ dè e mànaàŋ mùŋ kuwa lɛ̀. Kɔ̀nɛɛ̀ŋ kpùùmàŋ nyiŋ aŋ nyɛ̀nɛ̀ŋ e kààiŋ nyiŋ nɛ̀ wèè e fɔɔyɛ̀ wo Dayà jii.

⁷ Àŋ naŋ dè ke dòmàŋ kààiŋ nyiŋ nɛɛ̀ŋ diɛŋ wèè e tòmò Jisɛ̀ Kulaìɛ e yèɛ aŋ gò gèe è kpùùmaŋ anyuùŋ gò hààwè Dayà sìwè lɛ.

⁸ Wèètii, yaà wi nààŋ nyuùŋ hààwe nyàŋ, sɔɔ̀ eiŋ kpùùmàŋ anyùùŋ nyɛɛ̀ŋ, wèè eiŋ nɔ̀ŋ anyuùŋ tòmo dàwi nyiŋ wèè e tɔ̀ɔ̀nyaàaŋ.

Dìɔ̀tifɔ̀ yaà Dɛ̀mɛ̀tiliɔ̀

⁹ Mìŋ naŋ sìngè wɔŋ fɛi kpuu koɓɛ̀ ke gbòò anyuùŋ hààwe nyàŋ, kɛɛ wo Dìɔ̀tifɔ̀, wo yèɔ manaŋ wo nɔ̀ŋ sìèfeìŋ wɔ, wo nààŋ kùmìè e yèɛ mìŋ naŋ woò lɛ.

¹⁰ Sèè mìŋ hnàŋ, mìŋ do nàŋ gè maŋ keì maŋ gbiŋ wò naŋ nyɛ̀nɛ̀ŋ maŋ dìì, maŋ keì naanààŋ maŋ wò woà nyaàiŋ e wi dè yèè e tòaà wò tɔɔ̀ lɛ! Kɛɛ tii pɛɛ fè è gbiŋ weèuŋ, wo naàŋ jàà kè gbòò ànyuùŋ hààwe nyàŋ kùàŋ dìì sèè àŋ hnàŋ, yèè wùìyaiŋ nyàŋ pɛɛ manaŋ wèè aŋ nyiŋ jàà kùàŋ dìì nyaŋ, wò nyiŋ kìlìà kùàŋ feìŋ e kìlà wò fɛɛ wèè wo nyiŋ nyìmàŋ aŋ fòlà ke Sààŋ zòòloɛ̀ dìì!

¹¹ Dàwi mànaŋ miɔ̀ŋ, ɓɔ̀ mùŋ fɔɔnɔ̀ŋ keì naanààŋ, kɛɛ fɔ̀ɔ̀nɔɔ̀ŋ keì sìàŋ. Wo nyùnɔ̀ɔŋ gbiŋ naŋ nyɛ̀nɛ̀ŋ keì sìàŋ wɔ̀, wò yaà wo nyùùŋ Dayà. Wo nyùnɔ̀ɔŋ gbiŋ naŋ nyɛ̀nɛ̀ŋ keì naanààŋ wɔ wo fè wò nyùùŋ Dayà.

¹² Aŋ anyùùŋ nyaŋ gbiŋ naŋ fè ke mìè seì tɛ̀ɛ̀ nyaàiŋ dè wo Dɛ̀mɛ̀tiliɔ̀, yèè e tɔ̀ɔ̀nyaàaŋ tiŋ bi naŋ gbòò tɛ̀ɛ̀ e nyaàìŋ euŋ dè. Yèè è naiŋ tìè ke mìè seì bi sɛijɛwɛ nyaàìŋ euŋ dè, yèè nàŋ nyìmàŋ kɛ̀ e yèɛ gbiŋ è woò lɛ è yaà e tɔ̀ɔ̀nyaàŋ.

E zùùmo dìàmaàŋ

¹³ Mìŋ kuwa maŋ keì zimgbe wèè kaìŋ woò, kɛɛ miŋ manàŋ wèè ka miŋ nyìnìàŋ kè kuù sìngìà ɔ̀ɔ̀ è nɛ̀ŋ sìngìà.

¹⁴ Mìŋ kuwa e hààweɛ̀ yèè mìŋ yààìŋ yɛ̀ɛ̀mɛ̀ dòmaŋ e teenga kpuu sùà, wèè yàwi nààŋ gbiŋ eiŋ kùwìè maŋ di ɓùla titi koɓɛ̀ guùŋ.

¹⁵ Ke jii fàa nɔ̀ŋ ko nɛ̀ɛ̀iŋ niìŋ. Aŋ dàwiiŋ nyàŋ gbiŋ dawàìŋ. Yèè è yaà e zùùmo titi koɓɛ̀ anyùùŋ nyaŋ gbiŋ.