2Tɛsè 2 - WƆŊ FƐ̀Ì EBÒ SÌÀŊ DAYÀA

Wo nyuùŋ naanààaŋ

¹ Wèè e kèè e hnàŋ Kanaà Jisɛ̀ Kulaìɛ, yèè e gbòno wilɛ̀ koɓɛ̀ guùŋ wèè eiŋ nɔ̀ŋ ko nɛ̀ɛ̀uŋ niìŋ, mìŋ yààìŋ dàwe sùà nyɛ̀iŋ nààŋ wùìyaim nyàŋ,

² ke jii ɓɔ̀ kè diiyèiŋ nɔŋ fɔ̀ɔ̀yɔ̀ è gòngoiŋ nɛ̀ sùà ɔ̀ɔ̀ naŋ kùwìè màŋ jii sùlia, wèè è wòoɛ̀ kɛ̀ ke ɗɔ̀ɔ̀ Kanaà kè haì. Ɗɔɔ bà è yaà wɔ̀i e gòngo sùà è naŋ tɛɛ̀ woò e teengaà è yààìŋ fèe sùà maŋ mìè nyààŋ wɛ̀ijì, ɔ̀ɔ̀ è yààìŋ wòò ke mìè Dayà, ɔ̀ɔ̀ kɛ̀ è naiŋ sìngè wɔŋ fɛi sùà.

³ Ɓɔ̀ nìŋ dangè wò nyùùŋ gbiŋ doiŋ zuwò ɗewe gbiŋ sùà. Ke ɗɔɔ yii naàŋ hnè e jèèsùà e keì gànga dìàmaàŋ e kaaìŋ, yèè Wo Nyuùŋ Naanààŋ gàngà dììɔ wo fòlà, wo yèɔ do nàŋ kɔ̀ ko jàhamaŋ wɔ̀.

⁴ Wò do nàŋ gììyè manɛ̀ŋ maŋ gbiŋ àŋ naŋ nyààŋ dayà ɔ̀ɔ̀ manɛ̀ŋ maŋ gbiŋ àŋ naŋ zoolà maŋ maŋhɛɛ, wò do nàŋ nyɛ̀nɛ̀ŋ mààŋ wò kuwa e gààŋ maŋ gbiŋ diɛŋ. Wò do ngèè pɛɛ nàŋ kɔ̀ ko Saaŋ Zòòlò Dayài wo woò wààŋ wuŋ nàŋ yaà wo Dayà.

⁵ Niŋ fè jàà è keì jii? Mìŋ naiŋ wòò màŋ keì mɛɛ̀ŋ gbiŋ è teengaà mìŋ yaà kò nɛ̀ɛ̀iŋ niìŋ lɛ.

⁶ Kɛɛ e nɛ̀ŋ bà naiŋ kìlìè kùàŋ feìŋ wèè e naàŋ kaaìŋ sààmɛ, yèè nàŋ nyìmàŋ kɛ̀ kiìŋ ne. Sèè e teengàiŋ nɛ̀ nɔŋ haì, kɛ̀ Wo Nyuùŋ Naanààaŋ do nàŋ fòlò.

⁷ Ke gbùnù kpèè naanààŋ kòò kè yaà naàŋ toomo tɛ, kɛɛ e nɛ̀ɛŋ yaà hinie wèè e kaaìŋ lɛ, e naàŋ kaaìŋ e jèèsùà wo nyùnɔ̀ɔŋ naŋ niŋ kìlìè kùàŋ feìŋ wɔ wo Dayà wouŋ niŋ gè feìŋ.

⁸ Kpeiŋ kɛ̀ wo Dayà do nàŋ fùlìè Wo Nyuùŋ pɔ̀ɔ̀ maŋ sàwàa, kɛɛ sèè wo Kanaà Jisɛ̀ hnàŋ, wò douŋ nàŋ jìwìè wɔŋ fòìɔ fòloùŋ nyààŋ wɔŋ, yèè e mɛ̀ɛ̀ŋ Kanaà, e dɛngò dɛngòiŋ nii euŋ pɔɔpɔ̀ɔ̀.

⁹ Wo Nyuùŋ Naanààŋ do nàŋ hìɛ̀ŋ e gààŋ Sɛ̀tanàaŋ wo nyɛ̀nɛ̀ŋ maŋ kèè mèè tòa kà tinàŋ gbiŋ yaà maŋ keì fòònò nyùùŋ,

¹⁰ yèè anyùùŋ nyaŋ do nàŋ fɔ̀ nyaŋ, wò do nyiŋ nàŋ tòòmò maŋ tòa naanààŋ diɛ̀ŋ. Àŋ do nàŋ fɔ̀ esaɓù kɛ̀ aŋ gò wa mànàŋ è tɔ̀ɔ̀nyaàaŋ aiŋ jàà kùàŋ dìì wèè aŋ yɛ̀mɛ̀ è jòèyè.

¹¹ E wèètii wo Dayà tuɔŋ e gààŋ keì ɓàa wèè e nyiŋ toomò aŋ hààwè e tòa.

¹² E jìwààjɛ̀wɛ̀ tii nàŋ yaà kɛ̀ anyùùŋ nyaŋ gbiŋ gò hààwè è tɔ̀ɔ̀nyaàaŋ lɛ̀, yèè àŋ naŋ nyìnìè ke nyɛɛkɛŋ nyiŋ nɛɛ̀ŋ maŋ jùumù sùà nyaŋ wo Dayà do nyiŋ nàŋ gbààì keì.

Wo Dayà wòiŋ tàeɗùù wèè naŋ yɛ̀mɛ̀ wɔŋ nyiiŋ gèe gò jùà

¹³ È kuwa eiŋ gè wo Dayà ke sɛ̀ e teenga gbiŋ e weèiŋ, nyɛ̀iŋ nààŋ wùìya wi nyàŋ, nyɛ̀iŋ nyàŋ wo Kanaà Jisɛ̀ manaŋ nyàŋ. Wo Dayà naiŋ tàeɗùù e yìwìà ko tɔɔtuì wèè naŋ nɔ̀ŋ anyuùŋ jiɛ̀jiɛ̀ naŋ yɛ̀mɛ̀ e jòèye e yìwìà e gààŋ Jinàaŋ Nɛɛmaàŋ sùà wèè woiŋ mììnè anyùùŋ nɛɛmauŋ nyàŋ e gààŋ Jinàaŋ sùà, yèè wèè e hààweiŋ nɛ̀ e tɔ̀ɔ̀nyaàaŋ sùà.

¹⁴ Wò naiŋ nyààŋ e keì lɛɛ̀ sùà esàɓù Ebò Siaàŋ è naiŋ woò lɛ, wò naiŋ nyààŋ wèè naŋ ɓèmè ko jeiŋ sìeì e jòòwò Kana wiɔ̀ Jisɛ̀ Kulaìɛ sùà.

¹⁵ E wèètii nyɛ̀iŋ nààŋ wùìya wi nyàŋ, nyìngaìŋ sùà niŋ kùwìè e tɔ̀ɔ̀nyaàŋ è naiŋ woò ke mìè Dayà gbòa wiɛ̀ sùà yèè è naŋ niŋ ɓɛìŋ sìngè wɔŋ fɛi wiɔ̀ sùà lɛ.

¹⁶ Tɔ̀ wo Kana wiɔ̀ Jisɛ̀ Kulaì wuŋ bi yèè wo Dayà wo Dèdaà, wo yèɔ mànàŋ wì e kìlà wò kiɛ̀ŋ wì keì sìàŋ yèè e yìwìà e tɛ̀ɛ̀tɛ̀ɛ̀uŋ nɛ̀ sùà wò kiɛ̀ŋ wi ke jìì nyìngè nyiiŋ gèe gò jùà, yèè ke jii tùlia nyìngà sùà wɔ,

¹⁷ wo sìàiŋ ke di jiio sùà yèè wo fèiŋ e gààŋ wèè julɔfɔ niŋ woò yèè niŋ nyɛ̀nɛ̀ŋ e yèɛ yaà tɛ̀ɛ̀ lɛ.