2 Kɔliìŋ 7 - WƆŊ FƐ̀Ì EBÒ SÌÀŊ DAYÀA

¹ Nyɛ̀iŋ nààŋ wùìya wi nyàŋ, wo Dayà ɓèmè maŋ ɗààhiì mɛɛ̀ŋ gbiŋ ko nɛ̀ɛ̀ŋ wiì, e wèètii, gùà wiìŋ yàwi bi sengei e gèiŋ maŋ tɔ̀mɛ màŋ gbiŋ yaà maŋ keìŋ wi màŋ sùà yèè aŋ jinàŋ wi nyàŋ sùà lɛ, e nɔ̀iŋ e nɛɛmaŋ sùà kpɛlɛmɛɛŋ esàɓù e jùùɛ yaà wì kɔɔ wèè Dayà lɛ.

Ke jìì fà Pɔɔ̀ɛ

² Kàmeìŋ ko nɔ̀ŋ wi maŋ jiiiŋ màŋ sùà. E gòiŋ kààɓì nyùùŋ gbiŋ, e gòiŋ pɔ̀ɔ̀pɔ̀ɔ̀ è nɛ̀ŋ nyùùŋ gbiŋ sùà, ɔ̀ɔ̀ wèè eiŋ fɛ̀ɛ̀ wèè eiŋ nììngè wò nyùùŋ gbiŋ fɛ̀ɛ̀.

³ Miŋ gò tɛɛ̀ woò wèè kaiŋ jèè keì, màànààŋ nɔŋ mìŋ naŋ woò lɛ, nìŋ yaà maŋ jii wi màŋ diɛŋ è doiŋ nàŋ nɔ̀ŋ wɔŋ nyiiŋ gèeɔ̀ sùà koɓɛ̀ guùŋ, yèè eiŋ fɔ̀ɔ̀yɛ̀ koɓɛ̀ guùŋ.

⁴ Mìŋ kùwàìŋ ke jii tùlia gbee sùà, yèè mìŋ kuwa e ɓɛ̀ɛ̀jàa gbee weèiŋ. E kìlà ke di naim diè, yèè kpùlìà maŋ keì nyìnga wi màŋ gbiŋ sùà, mìŋ naŋ dìè, ke jii nyingè yèè e zɔlɔ̀ zimgbe yaà jii miɛ̀ŋ.

⁵ E teengaà pɛɛ è naiŋ hàì ko Mɛ̀sèdonià lɛ, e gòiŋ gè nyiiŋ. È naŋ mɛ̀ɛ̀ŋ maŋ keì nyìnga ko nɛ̀nɛ̀ŋ gbiŋ, maŋ nyaàŋ tàaŋ anyùùŋ fèemàŋ, yèè e jùù naŋ wi sɛ̀ɛ̀ kɔɔ sùà.

⁶ Kɛɛ wo Dayà wo yèɔ kiɛ̀ŋ wo nyuùŋ kùwìè ke jii mɔ̀ɔ̀nɛɔ̀ŋ ke jii nyingè wɔ, naŋ wi fè jii nyingè nààŋ wo Taitɔ̀ naŋ hnè.

⁷ E hnàuŋ nɛ̀ nɔŋ nààŋ e gò gììyà zɔlɔ̀, kɛɛ ke jii gbàiuŋ nɛɛ̀ŋ sùà, e ɗeweɛ̀ nìŋ nauŋ fè jii nyingè lɛ. Wo naŋ wi wòò e ɗeweɛ̀ nìŋ naŋ haamìŋ zimgbe wèè naim yɛmɛ̀ lɛ, ke nyowoɛ̀ yààìŋ weèim nɛ̀, yèè e ɗeweɛ̀ nìŋ naŋ banebànè wèè naim sìè jɛwɛ lɛ, tii naim ɓɛìŋ nyìnìè zɔlɔ̀.

⁸ Sèè mààŋ wɔ̀ŋ fɛiɔ̀ mìŋ naiŋ sìngè wèè kaiŋ kìlà màŋ jii wɔ̀ŋ naiŋ mɔ̀ɔ̀nɛ̀ŋ jii, e gòim nyìnìàŋ nyowo jòòpɛɛ ke nyowo naim nyɛ̀nɛ̀ŋ esaɓù kɛ̀ mìŋ naŋ yɛmɛ̀ kɛ̀ wɔŋ fɛiɔ̀ naiŋ mɔ̀ɔ̀nɛ̀ŋ jii wèè e teenga kpuu sùà.

⁹ Kɛɛ sààmɛ e zɔlɔ̀ yààìm , e fè wèè mìŋ naŋ nyɛ̀nɛ̀ŋ màŋ jiiiŋ màŋ naŋ mɔɔnɛ̀ŋ lɛ, kɛɛ esàɓù maŋ jii mɔ̀ɔ̀nɛŋ mɛɛ̀ŋ sùà nàŋ fè maŋ keì naanààiŋ màŋ jɛwɛ. Maŋ jii mɔ̀ɔ̀nɛŋ mɛɛ̀ŋ, wo Dayà naiŋ miŋ tòòmò diɛŋ e gòiŋ jàà è keì naanààŋ bà gbiŋ.

¹⁰ Ke jii mɔ̀ɔ̀nɛɛ̀ŋ wo Dayà naiŋ tòòmò diɛŋ yɛ̀ kè naŋ hìɛ̀ŋ e vɔ̀ɔ̀nɔŋ e yèɛ joeyàìŋ nɛ, yèè ke jii mɔ̀ɔ̀nɛŋ bà gbiŋ fè kìlà kè jiiuŋ nɛɛ̀ŋ. Kɛɛ ke jìì mɔ̀ɔ̀nɛ̀ŋ ɗuunyaàŋ kè hiàŋ e fàa.

¹¹ Yɛ̀mɛìŋ naàŋ e ɗeweɛ̀ wo Dayà naŋ tòòmò ke jìì mɔ̀ɔ̀nɛ̀ŋ nyɛiŋ biɛ̀ lɛ, kè naàŋ nyɛ̀nɛ̀ŋ nìŋ manaŋ naàŋ kai wèè naŋ tɔɔ̀ kɛ̀ maŋ keì fèìŋ, nìŋ naŋ tuù. Nìŋ yaà e jùù dìì. E wùànàŋ yààìŋ zimgbe wèè naŋ yɛ̀mɛ̀ e tɔ̀ɔ̀nyaàŋ nɔ̀ŋ gbài niŋ. Nàŋ tɔ̀ɔ̀ nyɛ̀iŋ bi kɛ̀ nìŋ yaà sengei e tɔ̀mɛ bà gbiŋ fèìŋ kɔɔ è keì lɛɛ̀ gbiŋ sùà.

¹² E wèètii, jòòpɛɛ mìŋ naŋ sìngè wɔŋ fɛiɔ̀, kɛɛ e fè wèè wò nyùnùɔŋ naŋ nyɛ̀nɛ̀ŋ è nànàaŋ wɔ̀ ɔ̀ɔ̀ wò nyùnùɔŋ àŋ naŋ kaaɓì wɔ. Kɛɛ mìŋ naŋ sìngè wèè kaiŋ nyɛ̀nɛ̀ŋ sengei ko nɛ̀ɛ̀ŋ niìŋ, ko fɛ̀ɛ̀fèìŋ Dayà, wèè e ɗeweɛ̀ e wuanàŋ wi yààìŋ, yèè nìŋ naŋ kai kpɛɛ̀ŋ weè wilɛ̀.

¹³ Tii naŋ nyɛ̀nɛ̀ŋ è naiŋ kùwìè jii nyingè. E fè nɔŋ kɛ̀ è naiŋ kùwìè kè jii nyingè, kɛɛ è naiŋ yɛ̀mɛ̀ e ɗeweɛ̀ wo Taitɔ̀ yaà e zɔlɔ̀ sùà lɛ, esaɓù kɛ̀ niŋ gòuŋ tɔ̀ɔ̀ è nɛ̀ŋ bà gbiŋ wèè wɔ̀ŋ nyiiuŋ nɔɔ̀ŋ sɛ̀ɛ̀ jii.

¹⁴ Mìŋ naŋ kɛ̀ɛ̀ maŋ nyòngà ko nɛ̀ɛ̀uŋ niìŋ e nyaàiŋ eiŋ dè, yèè kòò nìŋ sìèìm sàngè. E teenga gbiŋ è woàìŋ e tɔ̀ɔ̀nyaàaŋ, yèè maŋ nyongà guùŋ maŋ è naŋ kɛ̀ɛ̀ koɓɛ̀ Taitɔ̀i màŋ nàŋ tɔ̀ɔ̀ e tɔ̀ɔ̀nyaàŋ.

¹⁵ E wèètii e mànauŋ nɛ̀ weèiŋ naŋ ngèè ɓɛìŋ nyìngè sùà, nààŋ wò naŋ jàà jii e ɗeweɛ̀ nyɛ̀iŋ nààŋ gbiŋ nìŋ naŋ banebànè wèè naŋ jɔ̀ɔ̀lɔ̀ e mìè nyaàuŋ nɛ̀ dìì, e ɗeweɛ̀ nìŋ nauŋ ɓèè e jùù yaà e kɔɔ jèla sùà lɛ.

¹⁶ E zɔlɔ̀ yààìm esaɓù kɛ̀ kàiŋ ɓɛ̀nɛ̀ŋ tùlìà jii kpɛlɛmɛɛŋ.