2 Kɔliìŋ 2 - WƆŊ FƐ̀Ì EBÒ SÌÀŊ DAYÀA

¹ Wèètii mìŋ naŋ ɗewè wèè ɓɔ̀ mìŋ hnàŋ ɓɛìŋ kò nɛ̀ɛ̀ŋ niìŋ wèè ka nyɛ̀nɛ̀ŋ màŋ jiiiŋ màŋ mɔɔnɛ̀ŋ.

² Sèè ka weè n yɛ̀nɛ̀ŋ maŋ jiiiŋ màŋ mɔɔnɛ̀ŋ, kɛ̀ ɓòò nàŋ do nàŋ joo wèè wo nyɛ̀nɛ̀ŋ ke jii miɛ̀ŋ ke fà? Sɔɔ̀ nɔŋ anyùùŋ guùŋ nyaŋ mìŋ naŋ mɔ̀ɔ̀nɛ̀ŋ maŋ jii nyàŋ.

³ Wèètii mìŋ naŋ sìngè wɔŋ fɛi wiiŋ ko nɛ̀ɛ̀ŋ niìŋ. Miŋ gò mànàŋ wèè ka hnàŋ kò nɛ̀ɛ̀ŋ niìŋ wèè kè jii miɛ̀ŋ ke mɔɔnɛ̀ŋ è yìwìà ànyùùŋ guùŋ nyaŋ mìŋ naŋ tùlìè jii wèè aŋ nyɛ̀nɛ̀ŋ jii miɛ̀ŋ ke fà nyaŋ. Kà nyìmàŋ kɛ̀ sèè mìŋ nɔ̀ŋ ke jii fàa sùà, kɛ̀ nyɛ̀ìŋ nààŋ gbiŋ nìŋ yaà ke jii fàa sùà nyɛ̀iŋ pɛɛ.

⁴ Mìŋ naŋ sìngìè wɔŋ fɛi wɛɛ̀ŋ e keì nyìnga gbee yèè ke jii mɔ̀ɔ̀nɛŋ keekèè yaà maŋ fɛɛ̀màì zimgbe, diɛŋ e fè kɛ̀ mìŋ manaŋ wèè ka nyɛ̀nɛ̀ŋ maŋ jiiiŋ màŋ mɔɔnɛ̀ŋ, kɛɛ è yaà wèè naŋ nyìmàŋ e ɗeweɛ̀ mìŋ manaŋ nyɛ̀iŋ nààŋ gbiŋ lɛ̀.

Wo nyuùŋ kàmè gbòòɔ jùùyà hakɛ̀

⁵ Sèè wo nyùùŋ gbiŋ nyɛ̀nɛ̀ŋ wo nyùuŋ bà jiiuŋ nɛɛ̀ŋ mɔɔnɛ̀ŋ, wo gò miŋ nyinìàŋ sɔɔ̀ nyɛ̀iŋ nààŋ gbiŋ e ɗewe bà sùà, tòloò pɛɛ. Mìŋ woà tɛɛ̀ esaɓù kɛ̀ miŋ manàŋ wèè ka fè nyùùŋ wɛɛ̀ è keì nyìnga zimgbe.

⁶ E wèè wo nyùùŋ mààŋ wii, e ngàìŋɓu lɛɛ̀ anyùùŋ nyaŋ gbiŋ nauŋ yɛi fè le, è yaà naàŋ tɛ̀ɛ̀ weèuŋ.

⁷ E ɗewe gbiŋ sùà, nìŋ kuwa nauŋ jùùyà hakɛ̀ yèè nauŋ fè ke jii nyingè, e wèè ke nyowo gouŋ nàŋ mààŋ nyiiŋ zimgbe wo dàà kùàŋ kpɛlɛmɛɛŋ.

⁸ Wèètii, mìŋ yààìŋ dàwe sùà wèè nauŋ nyɛ̀nɛ̀ŋ wo nyìmàŋ tɔɔɓaa kɛ̀ nìŋ mànaŋ wo nyùùŋ bi.

⁹ E wèè e nɛ̀ɛŋ mìŋ naŋ sìngè wɔŋ fɛi wiiŋ ko nɛ̀ɛ̀ŋ niìŋ lɛ tiŋ tɛɛ̀, e wèè kaiŋ tùàŋ maŋ nɔnɔŋ sèè mààŋ nàŋ mààŋ è wòaà sùà, e kìlà sèè mààŋ kòò nìŋ yaà è bànèbaneiŋ teenga gbiŋ wèè naŋ jɔ̀ɔ̀lɔ̀ mànɛ̀ŋ maŋ gbiŋ dìì mìŋ naiŋ woò wèè naŋ nyɛ̀nɛ̀ŋ maŋ.

¹⁰ Sèè nìŋ juuyà anyùùŋ hakɛ̀ wèè e nɛ̀ɛŋ àŋ naŋ nyɛ̀nɛ̀ŋ lɛ, miàŋ pɛɛ mìŋ juuyà nyiìŋ hakɛ̀. Sèè mìŋ juuyà nyùùŋ hakɛ̀, sèè tɔɔɓaa mìŋ kuwa wèè ka jùùyà nɛ̀ŋ gbiŋ hakɛ̀, mìŋ nyɛ̀nɛìŋ ko fɛ̀ɛ̀fèìŋ Jisɛ̀ Kulaì esàɓù nyɛ̀iŋ sùà,

¹¹ e wèè wo Sɛ̀tanàaŋ go nàŋ kùwìè wɔŋ kùàŋ gààŋ ko diɛŋ wi, esaɓù kɛ̀ èiŋ nyìmàŋ maŋ ɗèweuŋ màŋ.

Wo Pɔɔ̀ naŋ sɛ̀ɛ̀ jii ko Toà

¹² E teengaà mìŋ naŋ hàì ko Toà wèè ka wòò ke mìè gbìàŋ Ebò Siaàŋ nyaàiŋ dè wo Jisɛ̀ Kulaì lɛ, mìŋ naŋ yɛmɛ̀ kɛ̀ wo Kanaà yìlè wɔŋ gbemgbee wèè e tòmo ka feìŋ koɓɛ̀ bi.

¹³ Kɛɛ ke jii miɛ̀ŋ naŋ sɛɛɛ̀ tiwìtiwì esaɓù kɛ̀ miŋ gòo mɛ̀ɛ̀ŋ wò wùìya wiɔ̀ Taitɔ̀. Wèètii mìŋ naŋ gbìɛ̀ŋ anyùùŋ nyaŋ e dìàmaaŋ, yèè mìŋ naŋ kɔ̀ ko Mɛ̀sèdonià.

Esàɓù Jisɛ̀ Kulaì sùà è yɛmɛ̀ìŋ gɛŋ

¹⁴ Kɛɛ mìŋ naŋ gè Dayà ke sɛ̀! E nɔ̀ŋ wilɛ̀ aŋ bàwibà Jisɛ̀ Kulaì sùà, e teenga gbiŋ wo Dayà sià wì feìŋ nààŋ è yààìŋ anyùùŋ keì wɔŋ gɛ̀ŋ yɛ̀mɛ̀ Jisɛ̀ Kulaìɔ wò kanaŋ wɔ̀ŋ sùà. Wo Dayà toomàŋ wì wèè eiŋ ɓààyè e jiikɛ̀ɛɛ̀ nyaàiŋ dè wo Jisɛ̀ Kulaì koɓɛ̀ gbiŋ mààŋ e dòmaŋ kuùmàì sìàŋ.

¹⁵ È yààìŋ mààŋ e nɛ̀ŋ dò siaŋ wo Jisɛ̀ Kulaì naŋ kìɛ̀ŋ Dayà, e yèɛ naŋ ɓààyè anyùùŋ nyaŋ gbiŋ do nàŋ jòèyè nyaŋ, yèè aŋ yè nyaŋ gbiŋ do nàŋ go nyàŋ e fèemàŋ.

¹⁶ E wèè aŋ yè nyaŋ do nàŋ go nyàŋ, e nɛ̀ŋ hùmòò dò naanààŋ nàŋ jìwè nyiìŋ. Kɛɛ wèè aŋ yè nyaŋ do nàŋ jòèyè nyaŋ, e nɛ̀ŋ hùmòò dò siaŋ nàŋ hiàŋ wɔŋ nyiiŋ gè ko nɛ̀ɛ̀ŋ nyiŋ niìŋ. Kɛ̀ ɓòò, naŋ naàŋ ɓɛ̀nɛ̀ŋ e tòmo mààŋ tɛɛ̀?

¹⁷ E fèìŋ mààŋ ànyuùŋ zimgbe bà, àŋ yè nyaŋ ɓemàŋ kè mìè gbìàŋ Dayàa mààŋ è bòli, kɛɛ esaɓù kɛ̀ wo Dayà naŋ wi tùɔ̀ŋ, è gbòòìŋ e jìlɛŋ sùà ko fɛ̀ɛ̀fèìŋ wuŋ Dayài, mààŋ aŋ keela tàeɗùù wèè Jisɛ̀ Kulaì.