2 Kɔliìŋ 12 - WƆŊ FƐ̀Ì EBÒ SÌÀŊ DAYÀA

E gɔ̀à gò e jɛ̀ì Pɔɔ̀ɛ yèè ebò dààneuŋ nɛ̀

¹ Mìŋ yaà kɛ̀ɛ sùà maŋ nyòngà jòòpɛɛ e jìwà jɛ̀wɛ̀ fè miìŋ màŋjɛ̀wɛ̀. Kɛɛ mìŋ do nàŋ wòò e kèè maŋ gɔ̀à gò e jɛ̀ì yèè maŋ bò dààne màŋ wo Kanaà naim fè maŋ.

² Mìŋ naŋ nyìmè wo nyuùŋ hààwè Jisɛ̀ Kulaìɔ bà guùŋ, maŋ dòà zììyà jɛ̀wɛ̀ tiinàŋ naàŋ mààŋ. Wò naŋ wa jòwò ko àìjɛnɛ̀ŋ dìà taaiì, kɛ̀ɛ̀ ɓàà tɔɔɓaa tɛɛ̀ naŋ wa kààìŋ kè kpùnaàŋ sùà ɔ̀ɔ̀ wò fè wa kè kpùnaàŋ sùà, tɛɛ̀ nààŋ miŋ nyimààŋ, wo Dayà naŋ tii nyìmè.

^3-4 Nààŋ mìŋ naŋ woò lɛ, kà nyìmàŋ kɛ̀ wo felaa wɛɛ̀ àŋ nauŋ jùwìè ko àìjɛnɛ̀iŋ wo Dayà yaà lɛ. Nààŋ mìŋ naŋ woò lɛ, miŋ nyimààŋ sèè mààŋ tɔɔɓaa tɛɛ̀ naŋ kai hɛɛnɛ̀ŋ kè kpùnauŋ nɛɛ̀ŋ sùà ɔ̀ɔ̀ sèè mààŋ è gɔ̀à gò kè jɛ̀ì wò naŋ gò, wo Dayà nɔŋ naŋ nyìmè. Kuŋ wò naŋ kòmò manɛ̀ŋ maŋ wo nyùùŋ fè ɓɛ̀nɛ̀ŋ gbìàŋ màŋ mìè gbòa sùà maŋ, manɛ̀ŋ maŋ fè nyaàŋ gè diɛŋ miŋ wèè wɔ̀ŋ nyààŋ nyuùŋkpùuŋ wɔŋ miŋ woò maŋ.

⁵ E wèètii, mìŋ do nàŋ kɛ̀ɛ̀ maŋ nyòngà e wèè felaa wɛɛ̀ kɛɛ miŋ naàŋ kɛ̀ɛ̀ màŋ nyòngà è wèè miàŋ bi, sɔɔ̀ nɔŋ maŋ keì maŋ tɔɔ̀ e yɔ̀kpɔ̀ kii mɛ̀ maŋ.

⁶ Sèè ka weè mànàŋ wèè ka kɛ̀ɛ̀ maŋ nyòngà, miŋ naàŋ weè nɔ̀ŋ wò nyuùŋ zùwo, e fèfoo mìŋ henàŋ nɔ̀ŋ ko wòò e tɔɔɓaaà. Kɛɛ miŋ naàŋ kɛ̀ɛ̀ màŋ nyòngà, esaɓù kɛ̀ miŋ manàŋ wèè nyɛ̀iŋ nyɛɛ̀ŋ bà gbiŋ naŋ gongò zimgbe weèim, èsàɓù è yèɛ nìŋ naŋ yɛmɛ̀ mìŋ yaà sùà lɛ ɔ̀ɔ̀ nìŋ naŋ kòmò mìŋ naŋ woò lɛ.

⁷ E wèè miŋ go nàŋ ɓèmè miàŋ bi gbee zimgbe esàɓù maŋ kèì mèè gbeegbèè zimgbe màŋ mìŋ naŋ wa yɛmɛ̀ maŋ, mìŋ naŋ wa kɔ̀ e keì nyìnga dìì ke kpùnaŋ miɛ̀ŋ sùà, nààŋ wo Sɛ̀tanàaŋ naŋ wa tùɔ̀ŋ wo keelauŋ nɔɔ̀ŋ wèè woim ɓùlà, e kìlà woim nyɛ̀nɛ̀ŋ ka dèèyè miàŋ bi e kìlà ka jɔɔlɔ̀.

⁸ E sùà taai mìŋ naŋ hùmò Kanaà Dayà wèè nyaàiŋ dè e keì nyìnga lɛɛ̀ yèè mìŋ nauŋ dawè wèè woim gè e keì nyìnga bi diɛŋ.

⁹ Kɛɛ wò naŋ fasàì wààŋ, “E kìɛŋ tɛ̀ɛ̀tɛ̀ɛ̀ mɛ̀ nɔŋ mùŋ kuwa maŋ kɛɛnɛ̀ŋ, yèè e gaàŋ mɛ̀ nàŋ yaà e gbeeɛ̀ sèè mùŋ yɔkpɔ̀.” Kpeiŋ kɛ̀ ke jii kèim fà wèè ka kɛ̀ɛ̀ maŋ nyòngà wèè e yɔ̀kpɔ mɛ̀, e wèè ka yɛ̀mɛ̀ e gààŋ Jisɛ̀ Kulaìɛ yɛmɛ̀ nyùùŋ diɛŋ lɛ̀ ko diɛim.

¹⁰ Hɛ̀ɛɛ̀ŋ, ke jii maim fɔ̀ wèè ka yɔkpɔ̀ ɔ̀ɔ̀ aim pɔ̀ɔ̀ɓɛ̀ɛ ɔ̀ɔ̀ aim kùwà naanààŋ ɔ̀ɔ̀ ka kùwìè maŋ keì nyìnga yèè ka mɔɔnɛ̀ŋ, sèè è nɔ̀ŋ nɔŋ e wèè Jisɛ̀ Kulaì. E fèfoo sèè mìŋ yɔkpɔ̀ kpeiŋ, kɛ̀ kà kùwìè e gààŋ.

Wo Pɔɔ̀ kuwa e gòngo wèè anyuùŋ hààwe nyaŋ

¹¹ Mìŋ yaà guùŋ nyinie mààŋ wo nyuùŋ zùwo, kɛɛ nyɛ̀iŋ naŋ nɔ̀ŋ saɓù wèè ka niŋ nyɛ̀nɛ̀ŋ. È yaà weè e kpàŋ è kɔɔiŋ wèè naŋ nɔ̀ŋ ko gbuuye weèim. Sèè pɛɛ miŋ gò nɔ̀ŋ è nɛ̀ŋ gbiŋ sùà, mìŋ yaà nɔ̀ŋ tɛ̀ɛ̀ mààŋ aŋ keela nyàŋ nìŋ nyaaŋ aŋ keela tàeɗùù titiiŋ nyàŋ lɛ.

¹² Maŋ kèè mèè maŋ yaà maŋ tòmò gààŋ gbee màŋ naŋ kaaìŋ wèè maŋ tɔɔ̀ kɛ̀ mìŋ yaà wo keela tàeɗùù lɛ, mìŋ naŋ kùwò ke jii ka kààìŋ maŋ gbiŋ e tɛɛiŋ.

¹³ Dièsɔa mìŋ naiŋ nyɛ̀nɛ̀ŋ naanààŋ e nìàŋ ke gbòò anyuùŋ hààwe nyàŋ, ɓàà zà miŋ gòiŋ kpɛɛ̀ŋ wèè è kpùùmàŋ nɛɛnɛŋ? Kɔ̀nɛɛ̀ŋ jùùya nìim hakɛ̀ wèè miŋ gò nɔ̀ŋ tɔ̀ɔ̀nyaàŋ kò nɛ̀ɛ̀ŋ niìŋ wèètii lɛ̀!

¹⁴ E dìà taaà lɛɛ̀ naàŋ mìŋ yaà e bànèbaneim wèè ka hnàŋ kaiŋ jaamè, yèè miŋ naìŋ dawè wèè è nɛ̀ŋ gbiŋ. Nyɛ̀iŋ bi mìŋ manaŋ, e fè è nɛɛnɛiŋ nɛ̀. Aŋ jɔ̀à nyaŋ nààŋ kuwà wèè aŋ kàmè è nɛ̀ŋ kìɛ̀ŋ ànyuùŋ kòmaŋ nyiŋ nyàŋ, kɛɛ anyuùŋ kòmaŋ nyàŋ nàŋ kuwa wèè aŋ kàmè e nɛ̀ŋ kìɛ̀ŋ aŋ jɔ̀à nyiŋ nyàŋ.

¹⁵ Ke jii doim nàŋ fɔ̀ wèè ka mààŋ e nɛ̀ɛŋ gbiŋ mìŋ kuwa lɛ̀ e hàwè miàŋ bi diɛŋ, wèè maŋ nyiiiŋ màŋ. Sèè mìŋ kuwìà e mànaŋ zimgbe weèiŋ, nìŋ do nàŋ kùwìè e mànaŋ jɔa weèim?

¹⁶ Nìŋ do nàŋ nyimèè kɛ̀ miŋ gòiŋ kpɛɛ̀ŋ. Kɛɛ wo nyùuŋ bà do nàŋ woò wààŋ mìŋ yaà yɛi wa nɔŋ nyinie wèè kaiŋ gbùwà yèè kaiŋ kùwìà maŋ gbàù tòa.

¹⁷ Anyùùŋ nyaŋ kinɛiŋ mìŋ naŋ tùɔ̀ŋ ko nɛ̀ɛ̀ŋ niìŋ nyaŋ, wo bà gbiŋ naiŋ wa nyìnìè kàaɓì?

¹⁸ Mìŋ naŋ pɔ̀wɔ̀ wo Taitɔ̀ wèè wo ka, yèè mìŋ nauŋ dè wo wùìyaà bà maŋjɛ̀wɛ yaà nyaàuŋ naŋ kɔ̀. Nìŋ do nàŋ woò nààŋ wo Taitɔ̀ naiŋ nyìnìè kàaɓì? Yàwi Taitɔ̀ gò tòòmò è gòngò guùŋ nɛ yèè maŋ nyɛ̀nɛŋ wi màŋ naŋ nɔ̀ŋ è ɗèwè guùŋ nɛ?

¹⁹ Ɓàà nìŋ yaà wa goongo e teenga lii gbiŋ kɛ̀ è yaà wa nɔŋ fɛ̀ɛ sùà wèè e dè yàwi bi gòlò jɛwɛ ko fɛɛ̀ feìiŋ? Kpele! È gboo màànààŋ nɔŋ wo Jisɛ̀ Kulaì manaŋ wèè e gbòà ko fɛ̀ɛ̀fèìŋ Dayà lɛ, yèè e nɛ̀ŋ gbiŋ è naŋ nyɛ̀nɛ̀ŋ, nyɛ̀iŋ nààŋ wùìya wi nyàŋ, è yaà wèè e nyɛ̀nɛ̀ŋ e hààweiŋ nɛ̀ e nyìngà sùà.

²⁰ E jùù yààìm kɔɔ kɛ̀ sèè mìŋ hnàŋ, ɗɔɔ bà, nìŋ do nàŋ nɔ̀ŋ è gbà. Miŋ naìŋ mɛɛ̀ŋ wèè naŋ nɔ̀ŋ è ɗeweɛ̀ mìŋ henàŋ mɔ̀ɔ̀nɔ̀ŋ wèè naŋ nɔ̀ŋ lɛ, yèè mìŋ do nàŋ nɔ̀ŋ è gbà, e yìwìà e ɗeweɛ̀ nìŋ henàŋ mɔ̀ɔ̀nɔ̀ŋ wèè ka nɔ̀ŋ lɛ. E jùù yààìm kɔɔ kɛ̀ mìŋ do nàŋ mɛɛ̀ŋ nìŋ yaà tììnyɛ̀ŋ nyààŋ, yèè nìŋ yaà gììyè koo, ɔ̀ɔ̀ e wùàŋ yààìŋ, yèè wo nyùùŋ gbiŋ naŋ nɔŋ kpɛɛ̀ŋ wèè wuŋ bi, maŋ dìène yèè nyuùŋ fìè fie, e tɛɛmànaŋ yèè maŋ keì gɔ̀àgɔ̀à sùà.

²¹ E jùù yààìm kɛ̀ sèè mìŋ hnàŋ ɓɛìŋ ko nɛ̀ɛ̀ŋ niìŋ wo Dayà miɔ̀ŋ doim nàŋ sìè sàngè ko fɛɛ̀fenìiŋ, mìŋ do nàŋ gòlò esaɓù kɛ̀ nyɛ̀iŋ nààŋ zimgbe nyiŋ kòò nìŋ kìlè wèè naŋ fè màŋ jùumù gɔugɔ̀ù maŋ nìŋ naŋ wa nyɛ̀ɛ̀nɛ̀ŋ maŋ kùàŋ sùà. Kòò nìŋ yaà nɔŋ nyìnìè maŋ hmɔŋtu naanààŋ, maŋ keì kùwà ninaŋ, yèè maŋ kèì sàngè.