2 Kɔliìŋ 11 - WƆŊ FƐ̀Ì EBÒ SÌÀŊ DAYÀA

Wo Pɔɔ̀ yaà aŋ keela tòa nyàŋ

¹ Kɔ̀nɛɛ̀ŋ gèim fɛ̀ɛ̀ diɛŋ sèè pɛɛ mìŋ nyɛnɛŋ e zùwo jɔa!

² Mìŋ yaà le koo zimgbe wèè muàŋ, nààŋ nɔŋ wo Dayà yaà lɛ, mùŋ yaà mààŋ wo jɔ̀ùŋ jɔ̀à bɛ̀ɛ̀ zɛ̀nɛŋ wo yèɔ mìŋ naŋ ɓèmè e ɗààhiì ke yɛɛ̀ gbìàuŋ koɓɛ̀ wo fèlàà guùŋ kpò nɔŋ wɔ̀, tèènè mààŋ wo Jisɛ̀ Kulaì wuŋ bi.

³ Kɛɛ e jùù yààìm kɔɔ kɛ̀ àŋ doum nàŋ zuwò, màànààŋ nɔŋ wo kaìɔ naŋ wa zùwò wo Màmaŋ Hàwa e tòa sùà lɛ. E jùù yààìm kɔɔ kɛ̀ mùŋ do nàŋ hùànè e gòngo sengèì mɔ̀ɛ̀ kùwie wèè e kèè Jisɛ̀ Kulaìɛ jɔ̀ɔ̀lɔ̀ dììɛ.

⁴ È naiŋ wòò e kèè Jisɛ̀ Kulaì, yèè nìŋ naŋ jàà wo Jìnàŋ Dayàa yaà ke miè gbìaŋ Ebò Siaŋ wiɛ̀ kùàŋ dìì. Kɛɛ aŋ anyùùŋ bà àiŋ wòò e kèè wo Jisɛ̀ joo. Nàŋ naàŋ banebànè wèè naŋ jàà wo jinàŋ joo yèè ke mìè gbìaŋ joo kùàŋ dìì.

⁵ Mìŋ naŋ gongò kɛ̀ mìŋ yaà nɔŋ wo keela tàeɗùù siaàŋ bà guùŋ mààŋ àŋ keela gbànàŋ nyàŋ àŋ nyaaŋ aŋ keela tàeɗùù titi nyàŋ lɛ.

⁶ Miŋ fè wɔ̀i ɓɛ̀nɛ̀ŋ gbòa tɛ̀ɛ̀ màànààŋ àŋ gboo lɛ̀, kɛɛ e fè wèè è jiikɛ̀ɛ sùà, èiŋ tɛɛ̀ nyɛ̀nɛ̀ŋ nàŋ niŋ nyìmàŋ e teenga gbiŋ sùà, yèè e nɔ̀ŋ kii kà tinàŋ gbiŋ sùà.

⁷ Miŋ gòiŋ kìlìà è ɓàà nɛ̀ŋ gbiŋ è teengaà mìŋ yaà wòo sùà kè mìè gbìàŋ Èbò Siaàŋ nyaàiŋ dè Dayà kò nɛ̀ɛ̀ŋ niìŋ lɛ. Mìŋ naŋ dèèyè miàŋ bi wèè ka nyɛ̀nɛ̀ŋ naŋ kùwìè zùlù. Ke kpèè naanààŋ mìŋ naŋ nyɛ̀nɛ̀ŋ?

⁸ E teengaà mìŋ yààìŋ tòòmò e tɛɛiŋ lɛ̀, ke gbòò anyuùŋ hààwe nyàŋ nàŋ paawàìm wa. È yaà mààŋ mìŋ he nyiŋ wa wùà ke gbòò anyuùŋ hààwe joo sìwè, esaɓù kɛ̀ mìŋ he nyiŋ wa gè e nɛɛnɛŋ sìwè wèè kaiŋ kpuumàŋ.

⁹ E teengaà mìŋ yààìŋ e tɛɛ lɛ̀, miŋ gòiŋ kpɛɛ̀ŋ wèè naim kpuumàŋ. Sèè mìŋ mɔnɔŋ nɛɛnɛŋ, aŋ wùìya nyàŋ naŋ yèwè ko Mɛ̀sèdonià nyaŋ naim hìɛ̀ŋ e nɛ̀ɛŋ gbiŋ mìŋ manaŋ lɛ̀. Miŋ gò nɔ̀ŋ è kpɛ̀ɛŋ kò nɛ̀ɛ̀ŋ niìŋ kò tɔɔtuì, miŋ naàŋ nɔ̀ŋ è kpɛ̀ɛŋ kò nɛ̀ɛ̀ŋ niìŋ kò dòmàŋ feìŋ yaà!

¹⁰ Esàɓù e tɔ̀ɔ̀nyààŋ Jisɛ̀ Kulaìɛ yààìm sùà lɛ, kà ɓèmè e ɗààhiì kɛ̀ maŋ nyongà kɛ̀ɛim màŋ, wo nyùùŋ gbiŋ naìm kìlìè kùàŋ feìŋ wɔ̀ŋ fùɔ̀ŋ Àkaayàa sùà wèè wòò niŋ.

¹¹ Mìŋ yaà tɛɛ̀ woo esaɓù kɛ̀ miŋ kuwà è mànaŋ weèiŋ? Wo Dayà nyìmàŋ kɛ̀ mìŋ mànàìŋ!

¹² Mìŋ do nàŋ nɔ̀ŋ ko nyìnìè e nɛ̀ɛŋ mìŋ yaà naàŋ ko nyinie lɛ̀, e wèè kɛ̀ aŋ yè nyaŋ àŋ nyaaŋ aŋ keela tàeɗùù titi nyàŋ lɛ go nàŋ kùwìè è ɗewe wèè aŋ kɛ̀ɛ̀ màŋ nyòngà kɛ̀ àŋ yaà toomo e ɗèwè guùŋ nɛ nɔŋ è yaà toomo lɛ̀.

¹³ Aŋ felaa nyiiŋ àŋ yaà aŋ kèèlà kàaɓì, àŋ yaà aŋ keela tòa, aŋ yè nyaŋ tɔɔ e nyaàiŋ dè e tòmo nyiŋ nɛ̀ yèè àŋ ɓemàŋ e kìlà àŋ tɔɔ̀ nyiŋ bi wèè aŋ nɔ̀ŋ mààŋ aŋ keela kɛnɛ wèè Jisɛ̀ Kulaì.

¹⁴ Kɛɛ, tɛɛ̀ ɓɔ̀ è foonò nyùùŋ! Wo Sɛ̀tanàŋ wuŋ bi pɛɛ naŋ wa ɓemè, e kìlà wo tɔ̀ɔ̀ wuŋ bi wèè wo nɔ̀ŋ mààŋ wo màìkà e gbolòùŋ gbee bà!

¹⁵ E wèètii, e fè guùŋ è keì gbee bà sèè àŋ ɓɔìjɔ̀àuŋ nyàŋ ɓemàŋ yèè àŋ tɔɔ̀ nyiŋ bi wèè aŋ nɔ̀ŋ mààŋ anyùùŋ tɔ̀ɔ̀nyaàŋ. Ko jee e ɗìi, àŋ do nàŋ yɛ̀mɛ̀ e nɛ̀ɛŋ maŋ nyɛ̀nɛŋ nyiŋ màŋ kanaŋ lɛ̀.

E mɔ̀ɔ̀nɛ̀ŋ Pɔɔ̀ɛ mààŋ wo keela tàeɗùù

¹⁶ Tɔ̀ miŋ woòiŋ ɓɛìŋ, wo nyùùŋ gbiŋ ɓɔ̀ wò gongò kɛ̀ mìŋ yaà wò nyuùŋ zùwo. Kɛɛ sèè wò gongà yɛi, kɛ̀ jaàim pɛɛ nɔŋ kùàŋ dìì e wèè kàìsa miŋ kuwìè e ɗewe miŋ kɛ̀ɛ̀ maŋ nyongà jɔa.

¹⁷ Jòòpɛɛ e nɛ̀ɛŋ mìŋ yaà naàŋ ko woo lɛ̀, tiŋ nààŋ fè è nɛ̀ɛŋ wò Kanaà heim nàŋ gè nyààŋ diɛŋ wèè ka woò lɛ. E kèè maŋ nyongà gbùùyà jii tùlia sùà lɛɛ̀, mìŋ yaà kai gbuuye mààŋ wo nyuùŋ zùwo.

¹⁸ Kɛɛ nààŋ anyuùŋ zimgbe kɛɛ maŋ nyòngà maŋ kèìŋ maŋ sùà lɛ, miàŋ pɛɛ mìŋ do nàŋ nyɛ̀nɛ̀ŋ e kèì guùŋ bi bà.

¹⁹ Nààŋ nyɛ̀iŋ bi nìŋ naŋ kɛ̀ɛ̀jii lɛ̀, nìŋ giiyà wo nyuùŋ zùwoɔ̀ e kɛ̀ɛ e zɔlɔ̀ diɛŋ!

²⁰ Nìŋ nyimààŋ wo nyùùŋ gbiŋ woiŋ kùwìè e gààŋ diɛŋ, wò gɔɛnɛŋ gɔ̀ɛ̀nɛ̀ìŋ maŋ fàà maŋ gbiŋ, ɔ̀ɔ̀ woiŋ kɔ̀ɔ̀yɛ̀ fɛ̀ɛ̀ sùà, ɔ̀ɔ̀ woiŋ kaaɓì, ɔ̀ɔ̀ wo gòiŋ ngèè nyààŋ è nɛ̀ŋ gbiŋ, ɔ̀ɔ̀ woiŋ hàà fɛ̀ɛ̀ nyààŋ wɔ.

²¹ E sàngè yààìm nyinie wèè ka woò mìàŋ è naiŋ yɔkpɔ̀ wèè eiŋ nyɛ̀nɛ̀ŋ maŋ keì mààŋ mɛɛ̀ŋ! Sèè àŋ ɓɛ̀nɛ̀ŋ kɛ̀ɛ̀ maŋ nyòngà, miàŋ pɛɛ kà ɓɛnɛ̀ŋ, kɛɛ è yaà e zùwo wèè wo nyùùŋ woiŋ nyɛ̀nɛ̀ŋ.

²² Àŋ yaà aŋ Hiɓulù nyuuŋ? Mìŋ yaà wo bà. Àŋ yaà anyùùŋ ko Ezɔ̀ɛ̀? Mìŋ yaà wo bà. Àŋ folo ke kpòò Eɓulɔhɛɛ̀ɛŋ sùà? Yɛi nɔŋ mìŋ yaà.

²³ Àŋ yaà aŋ ɓɔ̀ìjɔ̀à Jisɛ̀ Kulaì? Mìŋ yaà gbuuyè mààŋ wo nyuùŋ zùwo, kɛɛ mìŋ yaà wo ɓɔìjɔ̀à kɛnɛ e nyiŋ nìàŋ! Mìŋ naŋ tomo nyìnga, àim gbìàŋ ko sààŋ nyìwì e teenga zimgbe sùà, àim vuwò nyìnga yèè kà gbɛ̀ɛ̀ ko nyɛ̀mgbɛ̀ fàa e teenga zimgbe sùà.

²⁴ Aŋ Juùù nyaŋ àim vuwò e suà kpɛ̀ɛ̀ùŋ jɛ̀wɛ̀ è zììyà jɛ̀wɛ̀ nɔɔnɔŋ le tiinàŋ e sùà nɔɔnɔŋ.

²⁵ Anyùùŋ fùɔ̀ŋ Luùm nyaŋ naim vuwò e sùà taai gbìnìì gbìnìì kaiŋ yèè àŋ naim hɔ̀wɔ̀ e sùà guùŋ. Kà nɔ̀ŋ maŋ meeè sùà màŋ pɔɔpɔ̀ɔ̀ e sùà taai, yèè kà nɔ̀ŋ e wùìyè sùà wèè e haawà kpɛ̀ɛ̀ùŋ jɛ̀wɛ̀ tiinàŋ sùà guùŋ.

²⁶ Yèè maŋ kààiŋ zimgbe màŋ miŋ naŋ kaaìŋ màŋ sùà, mìŋ naŋ kɔ̀ɛ̀ e kèì nyìngà wuiyè jòwa yèè anyuùŋ wùa dìì, yèè mìŋ naiŋ kɔ̀ɛ̀ dìì e yìwìà anyùùŋ miàŋ bi nyàŋ sìwè yèè e yìwìà anyùùŋ nyaŋ fè àŋ Juùù nyaŋ sìwè. Maŋ kèì fɛɛ̀ nyùwò naŋ nɔ̀ŋ maŋ jawa gbeegbèè maŋ sùà, maŋ kèì fɛɛ̀ nyùwò naŋ nɔ̀ŋ maŋ keì gɔ̀àgɔ̀à sùà maŋ sùà, maŋ kèì fɛɛ̀ nyùwò naŋ nɔ̀ŋ maŋ juwo màŋ diɛŋ, yèè maŋ kèì fɛɛ̀ nyùwò naŋ yìwìè aŋ wùìya nyuuŋ tòa sìwè.

²⁷ Mìŋ naŋ tomo yèè mìŋ naŋ fɛ̀ɛ̀, mìŋ naŋ kpèèwù maŋ jàwè. E jìè naim nyɛ̀nɛ̀ŋ yaà ke jòòmàì, e teenga zimgbe mìŋ kuwo ke tɔùŋ, è nɛ̀ŋje teenga fè, ko hàwe fè ɔ̀ɔ̀ maŋ dèè maŋ fè.

²⁸ Kɛɛ eɓìèmàŋjɛ̀wɛ̀ tii gbiŋ, e niìsìa gbiŋ mìŋ yaà ke jii sɛ̀ɛ̀ sùà wèè ke gbòò anyuùŋ hààwe nyàŋ gbiŋ dìì.

²⁹ Sèè e zɔ̀kpɔ̀ nɔ̀ŋ nyùùŋ, kɛ̀ miàŋ pɛɛ e zɔ̀kpɔ̀ eim nɔ̀ŋ. Sèè wo nyùùŋ sɛɛ̀ maŋ jùumù sùà, ke jii miɛ̀ŋ mɔɔnɛ̀ŋ.

³⁰ Sèè mìŋ nɔ̀ŋ wo nyùùŋ wèè ka kɛ̀ɛ̀ maŋ nyòngà, mìŋ do nàŋ kɛ̀ɛ̀ maŋ nyòngà e nyaàiŋ dè maŋ keì maŋ tɔɔ̀ e ɗeweɛ̀ mìŋ yaà e zɔ̀kpɔ̀ lɛ.

³¹ Wo Dayà wo Dèdaà wèè Kanaà Jisɛ̀ Kulaì e tɛ̀nɛŋ nɔ̀ŋ e deèuŋ nɛ̀ wèè julɔfɔ! Wò nyìmàŋ kɛ̀ miŋ fè tòa sùà.

³² E teengaà mìŋ yaà ko Dàmakɔ̀ lɛ wo nyùùŋ gbèè fuɔɔ̀ŋ toomàŋ wo Kanaà Àlità dìì wɔ naŋ sèèlè anyùùŋ gààŋ wɔŋ gbàngì jawa gbeeì Dàmakɔ̀ feìŋ wèè aim kùwà.

³³ Kɛɛ àŋ naim kɔ̀ɔ̀yɛ̀ ko jèwì wɔŋ gɔ̀ɔ̀ŋ jawaà sùà wɔŋ pòum sùà yèè mìŋ nauŋ dùɔ̀ŋ sìwè.