2 Kɔliìŋ 10 - WƆŊ FƐ̀Ì EBÒ SÌÀŊ DAYÀA

Wo Pɔɔ̀ naŋ dè tòmouŋ nɛ̀ gòlò jɛwɛ

¹ Esàɓù ke jìì sìàŋ Jisɛ̀ Kulaì yaà e tɛ̀ɛ̀tɛ̀ɛ̀uŋ nɛ̀ sùà, è yaà e dàwe titi miàim Pɔɔ̀ mìŋ yààìŋ dàwe sùà, miàŋ wo yèɔ àŋ wòà nyààŋ mìŋ yaà e jùù, yèè mìŋ naŋ tɔumtɔ̀ùm sèè mìŋ nɔ̀ìŋ nèè tɛɛ̀, kɛɛ mìŋ nɔ̀ŋ e hmɔ̀ɔ̀ŋ weèiŋ sèè mìŋ nɔ̀ŋ koɓɛ̀ dii mìŋ goiŋ gbɛ̀ɛ̀ wɔ.

² Mìŋ yààìŋ dàwe sùà wèè niŋ goim nàŋ jɛ̀ì è gbèìŋ wèè kaiŋ fè keì nyìnga sèè mìŋ hnàŋ, mìŋ kiɛ̀ŋ anyùùŋ keì nyìnga, aŋ yè nyaŋ woà nyààŋ è nyɛ̀nɛ̀ìŋ nɔŋ mààŋ anyùùŋ nyaŋ maŋ kèìŋ maŋ sùà nyaŋ.

³ È yààìŋ wɔŋ nyiiŋ gèeɔ̀ sùà e ɗuunyaŋ lɛɛ̀, kɛɛ e fèìŋ sùmìè è ɗuà màŋ kèìŋ ɗuunyaŋ màŋ.

⁴ Manɛ̀ŋ sùmiaŋ màŋ è sumìàìŋ maŋ, maŋ fè mànɛ̀ŋ sùmiaŋ è yìwìà è ɗuunyaŋ lɛɛ̀ sùà, sɔɔ̀ manɛ̀ŋ sùmìàŋ gààŋ maŋ wo Dayà kuwa màŋ, miiŋ è toomàìŋ eiŋ pɔ̀ɔ̀pɔ̀ɔ̀ ko gììyè nyììŋ aŋ joo nyàŋ. È pɔɔpɔ̀ɔ̀ìŋ maŋ hɛ̀ɛ̀ gè tòa

⁵ yaà e kpààwaa gbiŋ e yèɛ kilìà nyùùŋ kùàŋ feìŋ wo fè nyìmàŋ Dayà lɛ. È kuwo maŋ gòngò anyùùŋ e nyiŋ nyɛ̀nɛ̀ŋ aŋ jɔ̀ɔ̀lɔ̀ Jisɛ̀ Kulaì dìì.

⁶ Sèè mùŋ jɔɔlɔ̀ naàŋ è juo kpɛlɛmɛɛŋ, kɛ̀ è ngàìnɓù wo nyùùŋ gbiŋ wo yèɔ gangà wèè wo jɔɔlɔ̀ wɔ.

⁷ Yɛ̀mɛìŋ maŋ keì kààŋ kii màŋ yàà wì fɛɛ̀feìŋ maŋ. Sèè wo nyùùŋ gbiŋ naŋ gongò kɛ̀ wò tùlìè wo Jisɛ̀ Kulaì jii, wo nyɛ̀nɛ̀ŋ wuŋ bi nyìmàŋ kɛ̀ nààŋ nɔŋ wò naŋ tùlìè Jisɛ̀ Kulaì ke jii, yɛi nɔŋ yàwi pɛɛ è yaà.

⁸ Sèè weè pɛɛ eiŋ kɛ̀ɛ̀ maŋ nyòngà e mààŋ nyààŋ tòloò e nyaàiŋ dè e gààaŋ wo Kanaà naŋ wi kiɛ̀ŋ wèè eiŋ nyɛ̀nɛ̀ŋ naŋ nyìngà sùà lɛ, e yèɛ e fè wèè eiŋ pɔɔpɔ̀ɔ̀ gbiŋ lɛ̀, e sàngè fèiŋ nyɛ̀nɛ̀ŋ.

⁹ Miŋ fè fɛ̀ɛ sùà wèè ka nyɛ̀nɛ̀ŋ wɔ̀ŋ fɛi miɔ̀ŋ wɔiŋ sìà è jùù.

¹⁰ Wo nyùuŋ bà do nàŋ woò wààŋ, “Maŋ fɛ̀ì sìngà Pɔɔ̀ maŋ màŋ yaà ke haaŋ, yèè màŋ naŋ nyìngè sùà, kɛɛ sèè e kpùnuŋ nɛ̀ wuŋ bi wò nɔ̀ŋ wì e tɛɛ, wò naŋ yɔkpɔ̀, yèè maŋ mìè gbòauŋ màŋ fè nɛ̀ŋ bà gbiŋ sùà.”

¹¹ Anyùùŋ mààŋ nyiiŋ aŋ nyìmàŋ kɛ̀ e nɛ̀ɛŋ è singe fɛi diɛŋ sèè è goiŋ noo nɔ̀ŋ lɛ, tiiŋ è nyɛnɛŋ sèè è nɔ̀ìŋ fɛɛ̀feìŋ.

¹² E fèiŋ gbɛ̀ɛ̀nɛ̀ŋ yàwi bi kòɓɛ̀ ànyùùŋ nyaŋ yè nyaŋ gongà tiwìtiwì wèè nyiŋ bi nyàŋ. Kɛɛ àŋ naŋ zuwò wèè aŋ gbɛ̀ɛ̀nɛ̀ŋ nyiŋ bi koɓɛ̀ nyiŋ biì.

¹³ E wèè yàwi, e ɗewe gbiŋ, maŋ nyongà kɛ̀ɛ wi màŋ fè gɛ̀ɛ̀ kò dìa titi miŋ niìŋ, màŋ do nàŋ dìè koɓɛ̀ e tòmo wilɛ̀ wo Dayà naŋ wi kiɛ̀ŋ lɛ, yèè e tòmo bi naŋ kpùlìè e tòmo wilɛ̀ e tɛɛiŋ.

¹⁴ Nààŋ nìŋ yaà maŋ dìa titi bi sùà lɛ, e fèìŋ weè gɛ̀ɛ sùà màŋ dìa bi nààŋ è naiŋ hìɛ̀ŋ kè mìè gbìàŋ Èbò Siaàŋ nyaàiŋ dè wò Jisɛ̀ Kulaì ko nɛ̀ɛ̀ŋ niìŋ.

¹⁵ E wèètii e fèiŋ kɛ̀ɛ̀ màŋ nyòngà wèè è tòmoɛ̀ è yèɛ anyùuŋ bà naŋ nyɛ̀nɛ̀ŋ è naŋ gɛ̀ɛ̀ kò dìaì wo Dayà naŋ tɔɔ̀ weè wilɛ̀. Kɛɛ è kuwa jii tùlia kɛ̀ e hààweiŋ nɛ̀ do nàŋ dɛɛ̀, wèè eiŋ ɓɛ̀nɛ̀ŋ nyɛ̀nɛ̀ŋ e tòmo gbee e tɛɛiŋ, e teenga gbiŋ eiŋ tòòmò ko dìa wiì wo Dayà naŋ tɔɔ̀ lɛ.

¹⁶ Kpeiŋ kɛ̀ èiŋ ɓɛ̀nɛ̀ŋ gbòà ke mìè gbìàŋ Ebò Siaàŋ maŋ fuɔŋ joo bà sùà, yèè e naìŋ ɓɛ̀nɛ̀ŋ kɛ̀ɛ̀ màŋ nyòngà wèè è tòmoɛ̀ nyùuŋ bà naŋ kpɛ̀ɛ̀yɛ̀ nyɛ̀nɛŋ wɔ̀ŋ faàuŋ nɔɔ̀ŋ lɛ.

¹⁷ Nààŋ wɔŋ fɛ̀ì Dayàa naŋ woò lɛ, “Wo nyùnɔ̀ɔŋ gbiŋ manaŋ wèè wo kɛ̀ɛ̀ maŋ nyòngà wɔ, wo kɛ̀ɛ̀ maŋ nyòngà wèè e nɛ̀ɛŋ wo Kanaà naŋ nyɛ̀nɛ̀ŋ lɛ.”

¹⁸ Wo nyùnɔ̀ɔŋ tɛnɛ̀ŋ wuŋ bi wɔ̀ wuŋ nààŋ wo Kanaà fè jàà kùàŋ dìì, sɔɔ̀ wo yèɔ wuŋ Kanaà tɛnɛ̀ŋ wɔ.