1Time 6 - WƆŊ FƐ̀Ì EBÒ SÌÀŊ DAYÀA

¹ Aŋ yè nyaŋ yaà dìkia nyiŋ e ɗo dìì nyaŋ, aŋ dɛɛkɛ̀ aŋ kana nyiŋ nyàŋ e ɓɛ̀ɛ̀jàa ɗewe gbiŋ sùà, e wèè wo nyùùŋ bà go nàŋ wòò e keì naanààŋ è dèè Dayàa diɛŋ yaà e kàa kii wilɛ̀.

² Aŋ yè nyaŋ yaà aŋ ɗo anyuùŋ hààwe dìì nyaŋ ɓɔ̀ àŋ niingè àŋ kana nyiŋ nyàŋ fɛ̀ɛ̀, e fèfoo nyiiŋ pɛɛ àŋ yaà anyuùŋ hààwe. Àŋ kuwa aŋ tomo weè nyiŋ tɛ̀ɛ̀ kaiŋ, esaɓù kɛ̀ aŋ yè nyaŋ yɛmɛ̀ e nàfa e yìwìà e tòmo nyiŋ nɛ̀ sùà nyaŋ àŋ yaà anyuùŋ mànaŋ nyiŋ e hààweɛ̀ sùà. Sɔɔ̀ maŋ kàà anyuùŋ nyaŋ, e kìlà maŋ nyiŋ wòò maŋ keì mɛɛ̀ŋ gbiɛŋ.

E kàa tòa yaà e bàne e tɔ̀ɔ̀nyaàŋ sùà

³ Wo nyùnɔ̀ɔŋ gbiŋ naŋ kàà e hààwe joo, yèè wo fè nyìmèè màŋ mìè gbòà tɔ̀ɔ̀nyààŋ Kana wiɔ̀ Jisɛ̀ Kulaì maŋ, yèè è nɛ̀ɛŋ e hààwe wilɛ̀ kàa lɛ,

⁴ wo nyùùŋ mààŋ wii tɔɔ̀ wuŋ bi e dɛ̀ɛ̀kɛ sùà, yèè wo nyimààŋ è nɛ̀ŋ gbiŋ. Wò yaà ngèè siinyɛŋ ke jiikɛ̀ɛuŋ nɛɛ̀ŋ sùà, yèè e gòngò maŋhɛɛ gèe yaà e nyaàŋ tàaŋ e nyaàiŋ dè maŋ mìè gbòa màŋ yè maŋ hiàŋ e koo, e tɛɛ gòòno, e ɓɛ̀ɛ̀pɔ̀ɔ, yèè maŋ keì naanààŋ,

⁵ yèè maŋ nyaàŋ tàaŋ gò kɛ̀ɛ̀nɛ̀ŋ dìa e yìwìà anyuùŋ kùwìè maŋ jiikɛ̀ɛ gò tomo nyàŋ, yèè aŋ yè nyaŋ kuwà wa ɓɛìŋ è tɔ̀ɔ̀nyaàŋ lɛ̀. Àŋ gongà kɛ̀ e hààwe nyiŋ nɛ nàŋ yaà e ɗeweɛ̀ wèè aŋ banè.

⁶ E hààwe wilɛ̀ nyɛnɛŋ wèè eiŋ banè zimgbe, sèè ke jii fà wì wèè e yèɛ è kùwaiŋ lɛ.

⁷ Kiìŋ è naiŋ hiɛ̀ŋ e ɗuunyaŋ lɛɛ̀ sùà? E gòiŋ hìàŋ è nɛ̀ŋ bà gbiŋ! Kiìŋ è naiŋ ɓɛ̀nɛ̀ŋ gè e ɗuunyaŋ lɛɛ̀ sùà? E fèìŋ noo ɓɛ̀nɛ̀ŋ gè è nɛ̀ŋ bà gbiŋ!

⁸ Kpeiŋ sèè è naiŋ kɛ̀ɛ̀nɛ̀ŋ e nɛ̀ŋje yaà maŋ dèè, tii e nɔ̀ŋ tɛ̀ɛ̀ e weè wi.

⁹ Kɛɛ aŋ yè nyaŋ manaŋ aŋ banè nyaŋ, àŋ sɔɔ e wàa dìì, yèè àŋ sɛɛ̀ maŋ gbàù ɓàaɓàa zimgbe yaà maŋ gòngò keì nyìnga sùà, maŋ yè maŋ gɔ̀ɛ̀ nyiìŋ yèè maŋ nyiŋ pɔɔpɔ̀ɔ̀ maŋ.

¹⁰ E gùlòɛ wèè keì naanààŋ gɛ̀wɛɛ̀ zimgbe nàŋ yaà e wùànàŋ nɛɛnɛŋ keekèè. Anyùùŋ nyaŋ bà nyiŋ fɔɔnɔ̀ŋ e wùànàŋ nɛɛnɛŋ aŋ kɛ̀ɛ̀ e hààweɛ̀ maŋjɛ̀wɛ, yèè àŋ fè nyiŋ bi maŋ jii mɔ̀ɔ̀nɛ̀ŋ zimgbe.

Maŋ kɛì wòo titi koɓɛ̀ Timetèi

¹¹ Kɛɛ muàŋ, Timetè, mùŋ yaà wo nyùùŋ Dayà, weètii, kɛ̀ɛ̀ maŋ keì mɛɛ̀ŋ gbiŋ maŋjɛ̀wɛ. Fɛɛ̀ wèè muŋ nɔ̀ŋ wo nyùùŋ tɔ̀ɔ̀nyaàŋ, muŋ nɔ̀ŋ kèè Dayàa maŋjɛ̀wɛ, muŋ nɔ̀ŋ wo nyuùŋ hààwe, muŋ kuwiè e mànaŋ wèè nyùùŋ gbiŋ, muŋ kuwiè jii nyingè wèè keì nyìnga kà dìì, yèè muŋ nyɛ̀nɛ̀ŋ e keì sìàŋ koɓɛ̀ nyùùŋ gbiŋ.

¹² Nyììneè sùà muŋ dùàŋ e dùàŋ hààweɛ̀ sùà, wèè muŋ kɛɛnɛ̀ŋ wɔŋ nyiiŋ gèe gò jùàa, wɔŋ yèɔ wo Dayà naum wa nyààŋ wèè woum kiɛ̀ŋ nààŋ mùŋ naŋ wa fè ke mìè seì sìàŋ ko fɛ̀ɛ̀fèìŋ aŋ seì zimgbe e nyaàiŋ dè hààwe mɔ̀ɛ̀ lɛ.

¹³ Ko fɛ̀ɛ̀fèìŋ Dayài, wo yèɔ kiɛ̀ŋ wɔŋ nyiiŋ gèe koɓɛ̀ manɛ̀ŋ maŋ gbiŋ wɔ̀, yèè ko fɛ̀ɛ̀fèìŋ Jisɛ̀ Kulaì, wo yeɔ̀ naŋ fè ke mìè seì janjai ko fɛ̀ɛ̀fèìŋ Pɔuŋtiɔ̀ Paalèi e nyààìŋ dè e hààweuŋ nɛ̀ wɔ, mìŋ yààùm wòò sùà

¹⁴ wèè naŋ jɔ̀ɔ̀lɔ̀ maŋ mìè gbòa mɛɛ̀ŋ dìì, yèè maŋ miŋ sìà e hààwe zɛ̀nɛŋ gò kɛ̀ɛ̀nɛ̀ŋ è tɔ̀mɛ sùà, e jèèsùà ke Ɗɔɔɛ̀ wo kana wiɔ̀ Jisɛ̀ Kulaì do nàŋ hnè yɛ.

¹⁵ E hnàauŋ nɛ̀ do naŋ nɔ̀ŋ e teenga kɛnɛɛ̀ wo Dayà naŋ jàà e ɓula lɛ̀, wuŋ guùŋ nɔŋ nàŋ yaà wo Kana jòèyeɔ̀, wo Kana gbee aŋ kana nyàŋ gbiŋ diɛŋ, yèè wo Kààmɔɔŋ gbee aŋ kààmɔɔŋ nyaŋ gbiŋ diɛŋ.

¹⁶ Wuŋ guùŋ nɔŋ nàŋ yaà wo Dàyà nyiiŋ gèe gò jùà, tɔɔɓaa wò yaà e gbolòùŋ sùà e yèɛ wo nyùùŋ fè ɓɛ̀nɛ̀ŋ gbɛ̀ɛ̀ kɔɔ lɛ̀. Wo nyùùŋ bà gbiŋ kòò wò yɛ̀mɛùŋ wa, e kìlà wo nyùùŋ gbiŋ fòuŋ yɛmɛ̀. E jòòwo yèè e gaàŋ gò kɛ̀ɛ̀nɛ̀ŋ dìa nɔ̀ŋ koɓɛ̀ Dayài wèè julɔfɔ! Àmiinàŋ.

¹⁷ Wòò anyùùŋ nyaŋ naŋ bàne wɔŋ nyììŋ gè ɗuunyaŋ lɛɛ̀ sùà nyaŋ ɓɔ̀ àŋ joowò nyiiŋ bi, e kìlà ɓɔ̀ àŋ sìà màŋ jii tùlia nyiŋ màŋ è bànè ɗuunyaŋ lɛɛ̀ sùà. Wòò nyiŋ aŋ kɛɛnɛ̀ŋ e hààwe wo Kanaà Dayà sùà, wo yèɔ kpuumàŋ wiì yèè wo wi kìɛ̀ŋ manɛ̀ŋ maŋ gbiŋ è jikàìŋ maŋ nyiiŋ gèe wi màŋ sùà maŋ.

¹⁸ Wòò nyiŋ wèè aŋ nyɛ̀nɛ̀ŋ e keì sìàŋ, aŋ nɔ̀ŋ bàne nyiŋ e tòmo siaŋ sùà, aŋ banebànè wèè aŋ kiɛ̀ŋ anyuùŋ joo.

¹⁹ Sèè àŋ nyɛnɛŋ maŋ keì sìàŋ mààŋ mɛɛ̀ŋ, àŋ do nàŋ kɛ̀ɛ̀nɛ̀ŋ e sùlò e yèɛ do nàŋ nɔ̀ŋ e kpèe nyìngàà sùà wèè ko dòmàŋfeìŋ nyiŋ niìŋ. E kìlà àŋ do nàŋ ɓɛ̀nɛ̀ŋ yɛ̀mɛ̀ wɔŋ nyiiŋ gèe wɔŋ yèɔ yaà nyììŋ gè tɔ̀ɔ̀nyaàaŋ wɔŋ.

²⁰ Timetè, yɛ̀mɛ̀ e yèɛ gbiŋ wo Dayà naum tùlìè jii yèè wò naŋ muiŋ kiɛ̀ŋ lɛ diɛŋ. Gè kùàŋ maŋ mìè gbòà ɓɛ̀ɛ̀pɔ̀ɔ sùà, yaà maŋ nyaàŋ tàaŋ zùwo, maŋ yè maŋ anyuùŋ zimgbe e tòaà sùà àŋ nyààŋ “ke jiikɛ̀ɛ lɛ̀.”

²¹ Anyùùŋ nyaŋ bà nyiŋ woà nyààŋ àŋ kuwa jiikɛ̀ɛ yɛ̀, yèè e jìwààjɛ̀wɛ̀ɛ naŋ nɔ̀ŋ kɛ̀ àŋ naŋ fè e hààwe nyiŋ nɛ̀ jɛwɛ. Tɔ̀ wo Dayà kiɛ̀ŋ nyɛ̀iŋ gbiŋ e tɛ̀ɛ̀tɛ̀ɛ̀.