1Time 4 - WƆŊ FƐ̀Ì EBÒ SÌÀŊ DAYÀA

Aŋ kààmɔɔŋ tòa nyàŋ

¹ Wo Jìnàŋ Nɛɛmaàŋ naŋ woò janjai wààŋ anyuùŋ nyaŋ bà nyiŋ do naŋ fè e hààweɛ̀ jɛwɛ teenga kpuu sùà, àŋ do naŋ jɔ̀ɔ̀lɔ̀ aŋ jinàŋ tòa dìì, e kìlà aŋ dè e kàà aŋ jinàŋ naanààŋ maŋjɛ̀wɛ.

² Anyuùŋ jàà fɛ̀ɛ̀ keì tòa nyàŋ nàŋ ɓaayà maŋ kàa mààŋ mɛɛ̀ŋ, aŋ yè nyaŋ maŋ gòngo nyiŋ màŋ naŋ fɔ̀ nyaŋ, mààŋ koɓɛ̀i ke kaì bìya sùɔŋ nyiìŋ yɛi le.

³ Anyuùŋ tòa mààŋ nyɛɛ̀ŋ naŋ kaà kɛ̀, e fè è tɔ̀ɔ̀nyaàŋ wèè wò nyùùŋ wo ɓèmè wo jɔùŋ ɔ̀ɔ̀ wo felaa, yèè wo jè mànɛ̀ŋ je gɛ̀wɛɛ̀ bà. Kɛɛ wo Dayà naŋ bànè maŋ nɛ̀ŋje mɛɛ̀ŋ wèè eiŋ miŋ jììyà è zòòlò ke sɛ̀ gèe sùà, wèè anyuùŋ hààwe nyàŋ nyìmàŋ e tɔ̀ɔ̀nyaàaŋ.

⁴ E nɛ̀ɛŋ gbiŋ wo Dayà naŋ banè lɛ è yaà tɛ̀ɛ̀, yèè ɓɔ̀ nìŋ dèmàŋ è nɛ̀ŋ gbiŋ, kɛɛ jàaiŋ niŋ kùàŋ dìì e zòòlò sɛ̀ gèe sùà.

⁵ Esaɓùɛ nàŋ yaà kɛ̀, ke mìè Dayàa yèè e zòòlo wilɛ̀ koɓɛ̀ Dayài nyɛnɛŋ wo jàà nɛ̀ŋje bi kùàŋ dìì.

Wo ɓɔìjɔ̀à tòmo siaàŋ wèè wo Jisɛ̀ Kulaì

⁶ Sèè maŋ kàà maŋ keì wòo mɛɛ̀ŋ koɓɛ̀ anyuùŋ hààwe nyàŋ, mùŋ do nàŋ nɔ̀ŋ wo ɓɔìjɔ̀à tòmo siaŋ wèè wo Jisɛ̀ Kulaì, mùŋ do naŋ dììyè muàŋ bi e nɛɛmaŋ e yìwìà ke mìè hààweɛ̀ yèè e kàà tɔ̀ɔ̀nyaàaŋ e yèɛ mùŋ naŋ dè maŋjɛ̀wɛ lɛ̀.

⁷ Kɛɛ ke nyɛ̀nɛŋ mɔɛ̀ŋ ɓɔ̀ kè nɔ̀ŋ màŋ mìè gbòa gò kɛ̀ɛ̀nɛ̀ŋ ɓɛ̀ɛ̀jàa koɓɛ̀ Dayài yaà màŋ kàɓanè gò kùwìè jiikɛ̀ɛ, maŋ yè maŋ gò tɛ̀ɛ̀wɛ̀ wòo màŋ. Kɛɛ ke nyɛ̀nɛɛ̀ŋ wɔŋ nyiiŋ gèe mɔɔ̀ŋ sùà ke nɔŋ ke yèɛ fɔɔyɛ̀ wo Dayà jii yɛ̀.

⁸ Sèè è gɔɔyɛ̀ìŋ maŋ kpùnaŋ màŋ e tòmò nyìnga sùà, è kuwa e kpùùmaŋ bà, kɛɛ sèè eiŋ tomo nyìnga wo Jìnàŋ Nɛɛmaàŋ sùà, è kuwa e kpùùmaŋ maŋ fàà maŋ gbiŋ, esaɓù kɛ̀ è yaà e ɗààhiì wèè wɔŋ nyiiŋ gèe wɛɛ̀ŋ, yèè wɔŋ nyiiŋ gèeɔ̀ ko dòmàŋfeìŋ.

⁹ E keì wòo lɛɛ̀ yaà tɔ̀ɔ̀nyaàŋ, wèè eiŋ niŋ jàà kùàŋ dii yèè eiŋ niŋ hààwe.

¹⁰ È fɛ̀ɛ̀ìŋ e kìlà eiŋ tomo nyìnga, esaɓù kɛ̀ èiŋ sìà ke jii tùlia wiɛ̀ wo Dàyà nyiiŋ gèeɔ̀ sùà, wo Nyuùŋ Jòèyeɔ̀ wèè anyùùŋ nyaŋ gbiŋ, ɓɔɔɓɔɔ ngèè anyuùŋ hààwe nyàŋ.

¹¹ Kìɛìŋ nyiŋ maŋ keì wòo mɛɛ̀ŋ yèè niŋ kaà nyiŋ maŋ kàa mɛɛ̀ŋ.

¹² Ɓɔ̀ mùŋ dangè wò nyùùŋ gbiŋ doim nììngè fɛ̀ɛ̀ esaɓù kɛ̀, mùŋ yaà wo nyuùŋ bɔwɔ, kɛɛ nɔ̀ŋ e tɔ̀ɔ̀màŋseì wèè anyuùŋ hààwe nyàŋ maŋ mìè gbòàum màŋ sùà, maŋ kpèèum màŋ sùà, e mànaŋ mɔ̀ɛ̀ sùà, e hààwe mɔ̀ɛ̀ sùà, yèè maŋ kpèè siaŋ sùà.

¹³ E jèèsùà ka hnàŋ, kɛ̀ɛ̀nɛ̀ŋ ke jii nyingè ko kpìnìè wɔŋ fɛ̀ì Dayàa ko ɓài, e kìlà muŋ gbòà ke mìè Dayàa, yèè muŋ kàa nyiŋ anyùùŋ nyaŋ.

¹⁴ Ɓɔ̀ mùŋ giiyà è kìɛ̀ŋ Jìnàŋ Nɛɛmaàŋ yààùm sùà lɛ è kɛ̀ɛ, wo yèɔ wo Dayà naùŋ wa kiɛ̀ŋ e teengaà aŋ wɛ̀ijì nyàŋ naŋ wa gbòò yèè ke gbòò aŋ màmàŋkùmɛŋ nyàŋ naùm wa gbùwò maŋ kùàŋ diɛŋ àŋ naùm zoolò lɛ.

¹⁵ Gbèè maŋ kei mɛɛ̀ŋ yèè muŋ gbìàŋ miŋ e gòngò muàŋ bi lɛ̀ sùà, wèè anyùùŋ nyaŋ gbiŋ aŋ yɛmɛ̀ e keì kɛnɛɛ̀ mùŋ yaà nyinie lɛ̀.

¹⁶ Yɛ̀mɛ̀ muaŋ bi diɛŋ, yèè e nɛ̀ɛŋ mùŋ kaà anyùùŋ nyaŋ lɛ̀ diɛŋ. Jèèe ko nyìnìè maŋ keì mɛɛ̀ŋ, efefoo sèè mùŋ nyɛ̀nɛ̀ŋ miìŋ, mùŋ do nàŋ jòèyè muaŋ bi yèè aŋ yè nyaŋ gbiŋ mùŋ naŋ kàa nyaŋ.