1Tɛsè 1 - WƆŊ FƐ̀Ì EBÒ SÌÀŊ DAYÀA

¹ E yìwìà miàim Pɔɔ̀ sìwè, wo Sailɔ̀ yaà wo Timetè nàŋ yaà sìngìè wɔŋ fɛi wɛɛ̀ŋ koɓɛ̀ ke gbòò anyuùŋ hààwe nyàŋ kè yaà ko Tɛsèlonikà yɛ, aŋ yè nyaŋ wo Dayà, wo Dèdaà yèè wo Kanaà Jisɛ̀ Kulaì kanaŋ nyàŋ. Tɔ̀ wo Dayà kiɛ̀iŋ e tɛ̀ɛ̀tɛ̀ɛ̀ yèè ke jii fàa.

Maŋ nyììŋ anyùùŋ nyaŋ yaà ko jawaì Tɛsèlonikà nyaŋ yèè e hààwe nyiŋ nɛ̀.

² E teenga gbiŋ è gèìŋ wo Dayà ke sɛ̀ wèè nyɛ̀iŋ nààŋ gbiŋ, yèè è nyaaŋ maŋ deèiŋ màŋ maŋ zòòlo wi màŋ sùà.

³ Esaɓù kɛ̀ èiŋ jàà jii ko fɛ̀ɛ̀fèìŋ Dayà wo Dèdaà wiɔ̀ e ɗeweɛ̀ nìŋ naŋ gbìɛ̀ŋ e hààweiŋ nɛ̀ e gbèe maŋjɛ̀wɛ yèè eɗewɛ̀ e mànaiŋ nɛ̀ naŋ nyɛ̀nɛ̀ŋ nìŋ naŋ tomo nyìnga, e kìlà e ɗeweɛ̀ ke jii tùliaiŋ nɛɛ̀ŋ wo Kana wiɔ̀ Jisɛ̀ Kulaì sùà naŋ nyìngè sùà lɛ.

⁴ Nyɛ̀iŋ nààŋ wùìya wi nyàŋ, eiŋ nyìmàŋ kɛ̀ wo Dayà mànàìŋ yèè wò naiŋ tàeɗùù wèè naŋ nɔ̀ŋ anyunùuŋ.

⁵ E gòiŋ nɔŋ hìàŋ Èbò Siaàŋ màŋ mìè gbòa sùà nɔŋ, è naŋ niŋ kpùlìè e gààŋ yaà wo Jìnàŋ Nɛɛmaàŋ, yèè e hààwe jùà sùà gbɛlɛiŋ nyaàiŋ dè e tɔ̀ɔ̀nyaàŋ niŋ nɛ̀. Nàŋ nyìmàŋ kɛ̀ diè è naiŋ nɔ̀ŋ e gòlò, è yaà wa wèè e kèì sìàŋ nyɛ̀iŋ bi lɛ̀.

⁶ Nìŋ naŋ wi fɔɔnɔ̀ŋ yèè nìŋ naŋ fɔ̀ɔ̀nɔ̀ŋ wo Kanaà Jisɛ̀. Jòòpɛɛ nìŋ naŋ mɔɔnɛ̀ŋ zimgbe, kɛɛ nìŋ naŋ jàà ke miè gbìaàŋ kùàŋ dìì e zɔlɔ̀ sùà ke yèɛ yewe wo Jìnàŋ Nɛɛmaàŋ sìwè lɛ.

⁷ Wèètii nìŋ naŋ nɔ̀ŋ e tɔ̀ɔ̀màŋseì koɓɛ̀ anyuùŋ hààwe nyàŋ gbiŋ maŋ kpàlàùŋ kpàlàùŋ ko Mɛ̀sèdonià yèè ko Àkaayà maŋ sùà.

⁸ Ke miè gbìaàŋ nyaàiŋ de wo Kanaà ke gòiŋ nɔŋ yèwà sìwè wèè ke ɓààyè maŋ kpàlàùŋ kpàlàùŋ ko Mɛ̀sèdonià maŋ yèè kò Àkaayà, kɛɛ ebò e hààweiŋ nɛ̀ wo Dayà sùà è naŋ ɓààyè koɓɛ̀ gbiŋ. E keì bà nààŋ fè ɓɛìŋ wèè e nɔ̀ŋ wòo niŋ.

⁹ Anyùùŋ nyiiŋ gbiŋ woà e kèè e ɗeweɛ̀ nìŋ naŋ wi jàà kùàŋ dìì e teengaà è naiŋ jaamè lɛ, yèè e ɗeweɛ̀ nìŋ naŋ gè kùàŋ kèè aŋ dayà joo zòòlo sùà wèè naŋ tomo wèè wo Dàyà tɔ̀ɔ̀nyaàaŋ wo yèɔ yaà wɔŋ nyiiŋ gèeɔ̀ sùà wɔ,

¹⁰ yèè wèè naŋ fòlà jɔ̀àfelaauŋ nɔɔ̀ŋ Jisɛ̀ Kulaì e yìwìà ko àìjɛnɛ̀ŋ wo yèɔ wò naŋ gè e fàaà dìì yèè wò naŋ wi joeyè e yìwìà e wùàŋ Dayàa yaà hinie lɛ̀.