1Jɔ̀ɔŋ 5 - WƆŊ FƐ̀Ì EBÒ SÌÀŊ DAYÀA

E gààaŋ è ɓuliàìŋ e ɗuunyaàŋ lɛ

¹ Wo nyùnɔ̀ɔŋ gbiŋ naŋ haawè kɛ̀ wo Jisɛ̀ nàŋ yaà wo Kulaìɔ wɔ̀ wò yaà wo jɔ̀à Dayà. Yèè wo nyùnɔ̀ɔŋ gbiŋ manaŋ wo nyuùŋ kòmaŋ wɔ̀, wò manaŋ wo jɔ̀à nyùùŋ bi wuŋ pɛɛ.

² Sèè è mɔ̀nɔ̀ìŋ wo Dayà e kìlà eiŋ jɔ̀ɔ̀lɔ̀ maŋ sàwàuŋ màŋ dìì, èiŋ nyìmàŋ kɛ̀ è doiŋ nàŋ mɔ̀nɔ̀ŋ aŋ jɔ̀àuŋ nyàŋ nyiŋ pɛɛ.

³ E mànaàŋ è kùwàìŋ wèè wo Dayà lɛ nàŋ yaà wèè eiŋ jɔ̀ɔ̀lɔ̀ maŋ sàwàuŋ màŋ dìì. Yèè maŋ sàwàuŋ màŋ gò nyìngà weè wi.

⁴ Wo jɔ̀à Dayà gbiŋ ɓɛ̀nɛ̀ŋ ɓùlà e ɗuunyaàŋ. Yèè e hààwe wilɛ̀ nàŋ kiɛ̀ŋ wì e gààŋ bi.

⁵ Ɓòò nàŋ kuwa e gààŋ wèè wo gèe e ɗuunyaàŋ? Wo nyùnɔ̀ɔŋ nɔŋ naŋ haawè kɛ̀ wo Jisɛ̀ nàŋ yaà wo Jɔ̀àfèlàà Dayàa lɛ̀.

Wo seìɔ e nyaàiŋ dè Jisɛ̀ Kulaì

⁶ Wo Jisɛ̀ Kulaì nàŋ yaà wo yeɔ̀ naŋ wa hìɛ̀ŋ e wuiyè gùùyeuŋ nɛ̀ yèè maŋ sɛ̀ìŋ e fàauŋ nɛ̀. Wo gò wa nɔŋ hìàŋ è wùìyèɛ tiŋ guùŋ, kɛɛ wò naŋ wa hìɛ̀ŋ e wùìyèɛ yaà maŋ sɛ̀ìŋ maŋ. Yèè wo Jinàaŋ Dayàa wuŋ bi naŋ kìɛ̀ŋ ke mìè seì kɛ̀ tɛɛ̀ yaà e tɔ̀ɔ̀nyaàŋ, esaɓù kɛ̀ wo Jinàaŋ Dayàa wuŋ bi yaà e tɔ̀ɔ̀nyaàŋ.

⁷ Aŋ sèì taai naŋ kìɛ̀ŋ ke mìè seìɛ.

⁸ Aŋ sèì taai nyàŋ nàŋ yaà wo Jinàaŋ Dayàa, e wùìyèɛ, yèè maŋ sɛ̀ìŋ maŋ, yèè nyiŋ taai naŋ wòò e kèì ɗì guùŋ nɛ.

⁹ È naiŋ hààwè ke mìè sèì nyuùŋ kpùnɔɔ̀ŋ. Kɛɛ ke mìè sèì Dayàa kè kuwa gaàŋ gbee, yèè wò naŋ kìɛ̀ŋ ke mìè seì yɛɛ̀ e nyaàiŋ dè wo Jɔ̀àfelaauŋ nɔɔ̀ŋ.

¹⁰ Wo nyùnɔ̀ɔ̀ŋ gbiŋ naŋ sìè e hààwe wo Jɔ̀àfèlàà Dayaà sùà wɔ, wò kuwa ke mìè seìɛ ke jiiuŋ nɛɛ̀ŋ sùà. Kɛɛ wo nyùnɔ̀ɔ̀ŋ gbiŋ gò hààwè wò Dayà wɔ wò mììnè Dayà nyuùŋ tòa, e fèfoo wo gò hààwè kè mìè seìɛ wò Dayà naŋ fè è nyaàiŋ dè wò Jɔ̀àfelaauŋ nɔɔ̀ŋ lɛ.

¹¹ Ke mìè seì bi nàŋ yaà, kɛ̀ wo Dayà naŋ wi kìɛ̀ŋ wɔŋ nyiiŋ gèe gò jùà, yèè wɔŋ nyiiŋ gèe wɛɛ̀ŋ wɔ̀ŋ folo wo Jɔ̀àfelaauŋ nɔ̀ɔ̀ŋ sùà.

¹² Wo nyùnɔ̀ɔŋ gbiŋ naŋ hààwè wo Jɔ̀àfèlàà Dayàa wɔ̀ wò kuwa wɔŋ nyiiŋ gèe, wo nyùnɔ̀ɔŋ gbiŋ zà gò hààwè wò Jɔ̀àfèlàà Dayàa wɔ̀ wo kuwà wɔ̀ŋ nyiiŋ gèeɔ̀.

Wɔŋ nyiiŋ gèe gò jùàa

¹³ Mìŋ naŋ tɛɛ̀ sìngè ko nɛ̀ɛ̀iŋ niìŋ nyɛ̀iŋ nyàŋ naŋ hààwè e dèè Jɔ̀àfèlàà Dayàa sùà nyaŋ, wèè naŋ nyìmàŋ kɛ̀ nìŋ kuwa wɔŋ nyiiŋ gèe gò jùà.

¹⁴ È kùwàìŋ ke jii nyingè ko fɛ̀ɛ̀fèìŋ Dayà, esaɓù èiŋ nyìmàŋ kɛ̀ wò komo ke miè wiɛ̀ sèè è dawàuŋ wèè e keì ɗewe gbiŋ e yìwìà e mànauŋ nɛ̀ sùà wò do wi niŋ nàŋ kiɛ̀ŋ.

¹⁵ Wo Dayà komo e mìè nyaàŋ wilɛ̀ e teenga gbiŋ sèè è dawàuŋ. Yèè nààŋ è naiŋ nyìmè kɛ̀ tɛɛ̀ yaà e tɔɔɓaa, eiŋ ɓɛìŋ nyìmàŋ kɛ̀ e nɛ̀ɛ̀ŋ gbiŋ è dawàuŋ wèè niŋ lɛ̀ wò kiɛ̀ŋ wiì nìŋ.

¹⁶ Sèè maŋ yɛ̀mɛ̀ wo wùìya mɔɔ̀ŋ bà wò nyɛ̀nɛ̀ŋ e kèì jùumù e yèɛ fòuŋ wa nàwèè gè wɔ̀ŋ nyiiŋ gèe gò jùàa sùà lɛ, dàwè Dayà wèè wo kiɛ̀ŋ wo nyùùŋ wii wɔŋ nyiiŋ gèe gò jùà. Kɛɛ ɓɔ̀ è nɔ̀ŋ è jùumùɛ yèɛ do nàŋ nyɛ̀nɛ̀ŋ wò nyùùŋ wii nàwèè sòò wɔ̀ŋ nyiiŋ gèe gò jùà lɛ.

¹⁷ E keì naanààŋ gbiŋ yaà e jùumù, kɛɛ maŋ jùumù kòò màŋ yaào maŋ yè maŋ fè nyɛ̀nɛ̀ŋ wò nyùùŋ do sòò nɔ̀ŋ wɔ̀ŋ nyiiŋ gèe gò jùàa sùà lɛ.

¹⁸ Èiŋ nyìmàŋ kɛ̀ aŋ jɔ̀à Dayà fè nɔŋ nɔ̀ŋ nyɛ̀nɛ̀ŋ sùà màŋ keì naanààŋ keleiŋ, esaɓù kɛ̀ wo Jɔ̀àfèlàà Dayàa yɛmɛ̀ nyiìŋ diɛŋ, yèè wo Nyuùŋ kɛ̀ɛ̀nɛ̀ŋ ke Kpèè naanààaŋ fè nyiŋ jàà keì nyìnga.

¹⁹ Èiŋ nyìmàŋ kɛ̀ wo Dayà nàŋ kànàŋ wì, jòòpɛɛ e ɗuunyaàŋ gbiŋ è yaà e gààŋ wo Nyuùŋ kɛ̀ɛ̀nɛ̀ŋ ke Kpèè naanààaŋ sìwè.

²⁰ Yèè èiŋ nyìmàŋ kɛ̀ wo Jɔ̀àfèlàà Dayàa naŋ hnè yèè wò naŋ wi fè jiikɛ̀ɛ, wèè eiŋ nyìmàŋ wo Dàyà tɔ̀ɔ̀nyaàaŋ. È yààìŋ anyùùŋ guùŋ wo Dayàa tɔ̀ɔ̀nyaàaŋ sùà, yèè anyùùŋ guùŋ wo Jɔ̀àfelaauŋ nɔɔ̀ŋ Jisɛ̀ Kulaì sùà. Wuŋ nàŋ yaà wo Dàyà tɔ̀ɔ̀nyaàaŋ, yèè wuŋ nàŋ yaà wɔŋ nyiiŋ gèe gò jùàa.

²¹ Nyɛ̀iŋ nààŋ jɔ̀àim nyàŋ, yɛ̀mɛìŋ nyɛ̀iŋ bi diɛŋ wèè aŋ dayà joo nyàŋ.