1 Kɔliìŋ 5 - WƆŊ FƐ̀Ì EBÒ SÌÀŊ DAYÀA

Maŋ kpèè naanààŋ e hmɔtu nyɛ̀nɛŋ sɛ̀ɛ̀ anyuùŋ hààwe nyàŋ sùà

¹ Tɔɔɓaa, è naàŋ nɔ̀ŋ wòòiŋ kɛ̀ e kèì nàànààŋ hmɔŋtu nyɛ̀nɛŋ èiŋ sɛ̀ɛ̀ tɛɛ naanààŋ kàìŋ, e yèɛ anyuùŋ gò hààwè Dayà nyaŋ kàìŋ nyaŋ fè niìŋ nyinie lɛ̀. Àim woò kɛ̀ wo felaa yaà wo jàwè dèdauŋ nɔɔ̀ŋ jawe ko gbùmàŋ guùŋ.

² Diè nìŋ naŋ naàŋ ɓɛ̀nɛ̀ŋ ɓèmè nyiŋ bi gbee? Kɛɛ ke nyowo heiŋ nàŋ diè, yèè wo felaaà naŋ nyɛ̀nɛ̀ŋ e keì mààŋ tii wɔ̀, nauŋ gè ke gboòiŋ nɛɛ̀ŋ sùà.

^3-4 Jòòpɛɛ miŋ gòiŋ gbɛ̀ɛ̀ kè kpùnaŋ miɛ̀ŋ sùà, kɛɛ è yààìŋ koɓɛ̀ guùŋ wo jinàaŋ sùà, yèè nààŋ nɔŋ mìŋ heo nàŋ nɔ̀ŋ lɛ, kà kpɛ̀ɛ̀yɛ̀ gbààì wo felaaà naŋ nyɛ̀nɛ̀ŋ e keì naanààŋ mààŋ tii wɔ̀ e dèè Kanaà Jisɛ̀ɛ sùà. Nààŋ nìŋ deenàŋ koɓɛ̀ guùŋ, yèè miàŋ pɛɛ mìŋ nɔ̀o wo jinàaŋ sùà, e kìlà e gààŋ Kana wiɔ̀ Jisɛ̀ɛ nɔ̀ŋ wì e tɛɛ lɛ̀,

⁵ nìŋ kuwa naŋ gè wo felaaà wɛɛ̀ kùàŋ nauŋ fè wo Sɛ̀tanàaŋ. Wèè maŋ kèìŋ felaa wɛɛ̀ maŋ nɔ̀ŋ pɔ̀ɔ̀pɔɔ miŋ, kɛ̀ wɔŋ nyiiuŋ nɔɔ̀ŋ yɛ̀mɛ̀ e jòèye ke ɗɔɔɛ̀ wo Kanaà hnàŋ lɛ.

⁶ E fè tɔ̀ɔ̀nyaàŋ è wèè naŋ kɛ̀ɛ̀ màŋ nyòngà. Nàŋ nyìmàŋ e nɛ̀ɛŋ àŋ woà lɛ nyààŋ, “E sòi jùwìà gbɔ̀u jɔa tòloò è nyɛnɛŋ ke gbɔ̀uɛ̀ gbiŋ ke jòwà gbee.”

⁷ Sɔɔ̀ nao gè e sòì jùwìà e gbɔ̀ù maŋ jùumù gɔu lii, wèè naŋ nɔ̀ŋ zɛ̀nɛiŋ kpɛlɛmɛɛŋ. Kpeiŋ kɛ̀ nàŋ nɔ̀ŋ mààŋ e gbɔ̀u jɛi gò bàànè sòi, màànààŋ tɔɔɓaa mìŋ naŋ nyìmè nìŋ yaà lɛ. Ke ɗɔ̀ɔ̀ wɔŋ Ɗaa Gèe Hɔ̀ɛ̀ɛ̀ŋ Diɛɔ̀ŋ kè haì, wo Jisɛ̀ Kulaì nàŋ yaà wo ɓààwaaà wèè wɔŋ Ɗaaà, yèè àuŋ naàŋ gììyà saàà tɛ.

⁸ Wèètii, gè wiìŋ e zɔ̀lɔ̀ ɗaa wiɔ̀, ɓɔ̀ è giiyàiŋ niŋ è gbɔ̀u bàànè è sòì màŋ jùumù gɔu diɛŋ, sɔɔ̀ e gbɔ̀u gò bàànè è sòi, e gbɔ̀uɛ̀ zɛnɛŋ yèè è yaà e tɔ̀ɔ̀nyaàŋ lɛ.

⁹ Wɔŋ fɛiɔ̀ mìŋ naŋ sìngè wɔŋ, mìŋ naiŋ woò kɛ̀ ɓɔ̀ nìŋ gbɛ̀ɛ̀ ànyùùŋ màŋ kpèè nàànààŋ hmɔŋtu nyɛ̀nɛŋ è kɔɔ.

¹⁰ Kɛɛ miŋ sɔ̀ɔ̀ ànyùùŋ kpùùŋ ɗuunyaŋ nyàŋ, àŋ yè nyaŋ yaà màŋ kpèè nàànààŋ hmɔŋtu sùà ɔ̀ɔ̀ àŋ yaà è kèè nɛ̀ŋje ɔ̀ɔ̀ àŋ wuo, ɔ̀ɔ̀ àŋ zoolà maŋ gòò nyaŋ. E wèè naŋ yèwà anyùùŋ nyɛɛ̀ŋ e kɔɔ, kɛ̀ sɔɔ̀ nɔŋ naŋ fòlà e ɗuunyaàŋ sùà kpɛlɛmɛɛŋ.

¹¹ Kɛɛ e nɛ̀ɛŋ mìŋ yaà wòo sùà lɛ nàŋ yaà kɛ̀, wo nyùnɔ̀ɔŋ naŋ nyààŋ wuŋ bi wo wùìya, è hààweɛ̀ sùà wɔ, kɛɛ wò yaà maŋ kpèè nàànààŋ hmɔŋtu sùà, ɔ̀ɔ̀ wò yaà e kèè nɛ̀ŋje ɔ̀ɔ̀ wò zoolà maŋ gòò, ɔ̀ɔ̀ wò yaà nyuùŋ nàànààŋ ko nyààŋ, ɔ̀ɔ̀ wo nyuùŋ tìà maŋ mùàŋ, ɔ̀ɔ̀ wò wuo, nyɛ̀iŋ nyùùŋ mààŋ wii ɓɔ̀ nìŋ mɔɔnɔ̀ŋ yèè ɓɔ̀ nìŋ jiiyà è nɛ̀ŋje kòɓɛ̀ guùŋ.

^12-13 E ɗewe gbiŋ sùà, e fè è kpàŋ è kɔɔim wèè ka gbààì ànyuùŋ joo bà aŋ yè nyaŋ fè kè gbòòɛ sùà nyaŋ. Wo Dayà nàŋ gbaaì nyiìŋ. Kɛɛ wèè kiìŋ muŋ fè ɓɛ̀nɛ̀ŋ gbààì wò nyùnɔ̀ɔŋ yèɔ yaà kè gboò mɔɛ̀ŋ sùà wɔ? Nààŋ wɔŋ fɛ̀ì Dayàa naŋ woò lɛ, “Gè wo nyuùŋ nàànààaŋ ke gboò mɔɛ̀ŋ sùà.”