1 Kɔliìŋ 15 - WƆŊ FƐ̀Ì EBÒ SÌÀŊ DAYÀA

Wo Dayà naŋ wa gè wo Jisɛ̀ Kulaì e fàa dìì ke hùaàŋ sùà

¹ Mìŋ manaŋ wèè kao dìkà maŋ jiiiŋ màŋ, nyɛ̀iŋ nààŋ wùìyaim nyàŋ, koɓɛ̀ Ebò Siaàŋ mìŋ yaà woo ko nɛ̀ɛ̀ŋ niìŋ lɛ, e yèɛ nìŋ naŋ jàà kùàŋ dìì lɛ, yèè e yèɛ nìŋ sia diɛŋ lɛ̀.

² Tiŋ nàŋ yaà e tɔɔɓaaà, ke miè gbìàŋ Ebò Siaàŋ mìŋ naŋ wòò ko nɛ̀ɛ̀ŋ niìŋ lɛ. E hààweɛ̀ èiŋ joeyè sèè nìŋ kùwò niìŋ kpaŋ, sɔɔ̀ zà naŋ wa nɔŋ haawè wèè foo.

³ E nɛ̀ɛŋ naim sɛ̀ɛ̀ sìwè lɛ mìŋ naiŋ niŋ woò, e yèɛ yaà e keì kɛnɛ gbeeɛ̀ lɛ kɛ̀ wo Jisɛ̀ Kulaì naŋ fɔ̀ wèè maŋ jùumù wi màŋ, màànààŋ è yaà sìngaiŋ wɔŋ fɛ̀ì Dayàa sùà lɛ,

⁴ kɛ̀ àŋ nauŋ sìè, yèè wo Dayà nauŋ gè e fàaà dìì e gɔ̀ɛ̀ taaà diɛŋ màànààŋ è yaà sìngaiŋ wɔŋ fɛ̀ì Dayàa sùà lɛ̀,

⁵ wò naŋ fòlò wo Pììlɛ feìŋ yèè wò naŋ fòlò aŋ nyùùŋ màŋjɛ̀wɛ̀ zììyà jɛ̀wɛ̀ tìyèe nyàŋ gbiŋ feìŋ.

⁶ E kìlà wò naŋ ɓɛìŋ fòlò aŋ wùìya nyàŋ bà feìŋ àŋ nìàŋ anyùùŋ hɔ̀nɔ̀ɔ̀ nɔɔnɔŋ e tèèngà guùŋ diɛŋ aŋ yè nyaŋ aŋ bà nyiŋ kòò àŋ yaà fuɔŋ nyàŋ, jòòpɛɛ aŋ bà nyiŋ naàŋ fà.

⁷ Wò naŋ fòlò wo Jìiiŋ feìŋ, tii naŋ mààŋ yèè wò naŋ fòlò aŋ keela tàeɗùù nyaŋ gbiŋ feìŋ.

⁸ Ko diemeì, wò naim fòlò feìŋ jòòpɛɛ mìŋ yaà mààŋ wo nyùnɔ̀ɔŋ yèɔ aŋ gò wa kùmìàŋ e teenga diɛŋ wɔ̀.

⁹ Miàŋ nàŋ yaà wo keela tàeɗùù tòloòɔ aŋ keela tàeɗùù nyaŋ sùà, miŋ fè tɛ̀ɛ̀ wèè aim nyààŋ wò keela tàeɗùù, esaɓù kɛ̀ mìŋ naŋ ɓùlò anyùùŋ e yìwìà ke gbòò anyuùŋ hààwe Dayà nyaŋ sùà.

¹⁰ Kɛ̀ɛ̀ esàɓù e kèì sìàŋ Dayàa sùà, mìŋ yaà naàŋ wo nyùnɔ̀ɔŋ mìŋ yaà wɔ, yèè e kìɛɛ̀ŋ wò naim kiɛ̀ŋ lɛ e gò nɔ̀ŋ wèè foo. Wɔŋ fàa bàa, mìŋ naŋ tomo nyìnga e nìàŋ aŋ keela tàeɗùù gbànaŋ nyàŋ bà gbiŋ, jòòpɛɛ e gò guùŋ nɔ̀ŋ kè nyɛ̀nɛ̀ŋ miàŋ bi sùà, sɔɔ̀ e kìɛ̀ŋ Dayàa yèɛ yààìm maŋjɛ̀wɛ lɛ̀.

¹¹ E wèètii, sèèpɛɛ eim naàŋ yiwià ɔ̀ɔ̀ e nyiŋ yiwià, kɛɛ̀ nàŋ yaà ke miè gbìaàŋ è naiŋ woò yɛ, yèè kiiŋ nìŋ naŋ haawè.

Anyùùŋ Dayà nyaŋ do nàŋ yèwè e fàaà dìì wɔŋ nyiiŋ gèeɔ̀ sùà

¹² Nààŋ ke miè gbìaŋ wiɛ̀ naŋ woò kɛ̀ wo Dayà naŋ gè wo Jisɛ̀ Kulaì e fàa dìì, dièsɔa nyɛ̀iŋ nààŋ bà nyiŋ nìŋ woà nààŋ anyuùŋ fàa nyàŋ naàŋ fòlò è fàa dìì?

¹³ Sèè tɛɛ̀ naŋ ɓɛ̀nɛ̀ŋ nɔ̀ŋ tɔɔɓaà, kɛ̀ è naŋ tɔɔ̀ kɛ̀ wo Jisɛ̀ Kulaì gò fòlà è fàa dìì.

¹⁴ Sèè wo Dayà gò wa weè gè wò Jisɛ̀ Kulaì è fàa dìì, kɛ̀ e nɛ̀ɛŋ gbiŋ è naŋ wòò ko nɛ̀ɛŋ niìŋ lɛ̀ è yaà wèè foo, yèè niŋ kuwà è nɛ̀ŋ bà wèè naŋ haawè.

¹⁵ Eɓìèmàŋjɛ̀wɛ̀ tii, è do nàŋ nɔ̀ŋ tɔ̀ɔ sùà kɛ̀ è yààìŋ tòa sùà e nyaàiŋ dè Dayà. Esaɓù, è naiŋ woò kɛ̀ wò naŋ gè wo Jisɛ̀ Kulaì e fàa dìì. Kɛɛ sèè e nɔ̀ŋ tɔɔɓaa kɛ̀ anyuùŋ fàa nyàŋ naàŋ yèwè è dìì wɔŋ nyiiŋ gèeɔ̀ sùà, kɛ̀ wo Dayà gò wa gè wò Jisɛ̀ Kulaì è fàa dìì.

¹⁶ Sèè wo Dayà gò wa weè gè ànyuùŋ fàa nyàŋ è fàa dìì, kɛ̀ wo Dayà gò wa gè wò Jisɛ̀ Kulaì è fàa dìì.

¹⁷ Sèè wo Dayà gò wa weè gè wò Jisɛ̀ Kulaì è fàa dìì, kɛ̀ e hààweiŋ nɛ̀ è yaà e foofòò niŋ, yèè kɛ̀ kòòìŋ yaà nɔŋ maŋ jùumùiŋ màŋ sùà.

¹⁸ È he weè ɓɛìŋ nàŋ tɔɔ̀ kɛ̀ anyuùŋ hààwè Jisɛ̀ Kulaì sùà nyaŋ naŋ fɔ̀ lɛ àŋ go.

¹⁹ Sèè ke jii tùlia wiɛ̀ wo Jisɛ̀ Kulaì sùà e nɔŋ nɔ̀ŋ wèè wɔŋ nyiiŋ wɛɛ̀ŋ sùà e bà gbiŋ gò ɓɛìŋ nɔ̀ŋ jɛ̀wɛ̀, kɛ̀ e kii wilɛ̀ kuwa ke nyowo zimgbe e nìàŋ nyùùŋ gbiŋ e ɗuunyaŋ lɛɛ̀.

²⁰ Kɛɛ e tɔɔɓaaà nàŋ yaà kɛ̀ wo Jisɛ̀ Kulaì fòlà e fàa dìì, tii nàŋ yaà ke jii tùliaà kɛ̀ aŋ yè nyaŋ àŋ yaà maŋ jàwè e fàa dìì nyaŋ àŋ do nàŋ fòlò e fàa dìì.

²¹ Nààŋ nɔŋ è doiŋ nàŋ fɔ̀ esàɓù Adamàaŋ sùà lɛ, yɛi nɔŋ è doiŋ nàŋ fòlò e fàa dìì esàɓù Jisɛ̀ Kulaìɛ sùà.

²² Nààŋ nɔŋ anyuùŋ kpùuŋ nyàŋ gbiŋ naŋ nɔ̀ŋ aŋ bà nyiŋ bà wo Adamàaŋ sùà yèè àŋ naŋ fɔ̀ lɛ, yɛi nɔŋ anyùuŋ kpùuŋ nyàŋ gbiŋ naŋ nɔ̀ŋ aŋ bà nyiŋ bà wo Jisɛ̀ Kulaì sùà nyaŋ do nàŋ kɛ̀ɛ̀ wɔŋ nyiiŋ gèeɔ̀ sùà esàɓù Jisɛ̀ Kulaìɛ.

²³ Wo nyùùŋ gbiŋ do nàŋ yèwè e fàaà dìì e ɗewe kii titi bà sùà, wo Jisɛ̀ Kulaì, wuŋ jiɛ̀, kpeiŋ e tèèngà hnàuŋ nɛ̀ sùà, aŋ yè nyaŋ yaà weèuŋ nyàŋ wo nyiŋ hiàŋ.

²⁴ Kpeiŋ kɛ̀ e teengaà haì wèè e ɗuunyaàŋ e jùà, wo Jisɛ̀ Kulaì do nàŋ pɔ̀ɔ̀pɔ̀ɔ̀ anyùùŋ gbèègbèè gààŋ nyaŋ gbiŋ wo pɔ̀ɔ̀pɔ̀ɔ̀ maŋ gààŋ maŋ gbiŋ, kɛ̀ wò gè e kanaà kùàŋ wò niŋ kìɛ̀ŋ wo Dayà wo Dèdaà.

²⁵ Sɔɔ̀ wo Jisɛ̀ Kulaì kɛ̀ɛ̀ e kana e jèèsùà wo Dayà ɓùlà aŋ joouŋ nyàŋ gbiŋ wouŋ nyiŋ hɔ̀à gòlò dìì.

²⁶ Wo joo dìàmaàŋ wèè wo Dayà ɓùlà nàŋ yaà e fàa.

²⁷ Wɔŋ fɛ̀ì Dayà wààŋ, “Wo Dayà do nàŋ nɔ̀ŋ saɓù wo hɔ̀à manɛ̀ŋ maŋ gbiŋ wo Kulaì gòlò dìì.” Wɔŋ Golà mieɔ̀ “Manɛ̀ŋ maŋ gbiŋ” wo Dayà gò gbìàŋ wuŋ bi mànɛ̀ŋ bi sùà, wuŋ hɔɔ manɛ̀ŋ maŋ gbiŋ wo Kulaì gòlò dìì wɔ.

²⁸ Kɛɛ sèè manɛ̀ŋ maŋ gbiŋ nɔ̀ŋ naàŋ e gààŋ Kulaìɛ dìì, kpeiŋ kɛ̀ wuŋ bi, wo jɔ̀àa, do nàŋ hɔ̀ɔ̀ wuŋ bi wo Dayà dìì, wo yèɔ nauŋ hɔ̀ɔ̀ manɛ̀ŋ maŋ gbiŋ dìì wɔ, kpeiŋ kɛ̀ wo Dayà do nàŋ kùwìè e gààŋ nɛ̀ŋ gbiŋ diɛŋ.

²⁹ Kiìŋ, nàŋ yaà e fàsàì anyùùŋ nyaŋ guà wèè anyuùŋ fàa nyàŋ lɛ? Sèè wo Dayà gò wa weè gè ànyuùŋ fàa nyàŋ è fàa dìì gbiŋ, kɛ̀ wèè kiìŋ anyùùŋ nyaŋ guà ebɛ̀ŋ nyiŋ?

³⁰ Yèè e wèè yàwi, wèè kiìŋ è siàìŋ e keì nyìnga feìŋ wɔŋ haawà gbiŋ?

³¹ Nyɛ̀iŋ nààŋ wùìyaim nyàŋ, mìŋ sia e fàa fɛɛ̀feìŋ ke ɗɔɔ gbiŋ. E zɔlɔ̀ɛ mìŋ kuwa e nyaàiŋ eiŋ dè wɔŋ nyiiŋ gèe wiɔ̀ sùà, nààŋ è yààìŋ aŋ bàwibà Jisɛ̀ Kulaì wo Kana wiɔ̀ sùà lɛ, naim nyɛ̀nɛ̀ŋ mìŋ naŋ tɛɛ̀ woò.

³² Kiìŋ nàŋ yaà e jìwà jɛ̀wɛ̀ mɛ̀ wèè anyìlì ɓie sùmiaŋ ko Ɛfesɔ̀? Kɛ sèè wo Dayà gò wa weè gè ànyuùŋ fàa nyàŋ è fàa dìì, kɛ̀ màànààŋ nɔŋ àŋ woà lɛ, “Tɔ̀ e jèiŋ nɛ̀ŋ, yèè e tìàiŋ nɛ̀ŋ saɓù kɛ̀ nàwèè è doiŋ nàŋ fɔ̀.”

³³ Ɓɔ̀ nìŋ zuwò nyɛ̀iŋ bi. “Aŋ dàwi nyàŋ nyɛnɛŋ tɛ̀ɛ̀ nyaŋ, aŋ naanààŋ nyaŋ pɔɔpɔ̀ɔ̀ nyiìŋ.”

³⁴ Ɓèmeìŋ e jiikɛ̀ɛ niŋ gè kùàŋ maŋ jùumùiŋ màŋ sùà. Mìŋ yààìŋ wòo sùà e kèì sàngè tiŋ nàŋ yaà kɛ̀ nyɛ̀iŋ nɛɛ̀ŋ bà nyiŋ niŋ nyimààŋ Dayà.

Ke kpùnaàŋ naŋ fòlò ke hùaàŋ sùà yɛ

³⁵ Wo nyùuŋ bà do nàŋ dawè wààŋ, “Dièsɔa wo Dayà gè nyuùŋ fàa e fàa dìì wo kɛ̀ɛ̀ wɔŋ nyiiŋ gèeɔ̀ sùà? Kiìŋ kè kpùnaŋ wò do nàŋ kɛɛnɛ̀ŋ?”

³⁶ Muàŋ felaa zùwo wɛɛ̀, sèè mùŋ nyuɔŋ ke kuù kòmàŋ ko dììnaŋ, sɔɔ̀ ke fà pangàà kè kɛɛ̀ wɔŋ nyiiŋ gèe sùà ke wùìyà.

³⁷ Ke kòmàaŋ mùŋ naŋ nyùɔ̀ŋ lɛ kè yaà ke komàŋ kpùnaŋ, e teenga bà ke kpàli komaŋ ɔ̀ɔ̀ ke komàŋ joo bà, e fè kè kuù wùìyèɛ naŋ wùìyè tɛ yɛ̀.

³⁸ Wo Dayà nàŋ sie ke kòmàŋ yii ke kpùnaŋ, ke yèɛ wò manaŋ lɛ̀ sùà, wò kiɛ̀ŋ ke kòmàŋ gbiŋ ke kpùnàŋ e wùmaŋ nyiŋ nààŋ wò manaŋ lɛ̀.

³⁹ Maŋ kèìŋ nɛ̀ŋ gè nyiiŋ màŋ gbiŋ fè màŋ keìŋ zìì guùŋ, maŋ kèìŋ nyuùŋkpùuŋ màŋ yaà è gbà, maŋ kèìŋ yilì yaà è gbà, maŋ kèìŋ woì yaà è gbà, yèè maŋ kèìŋ kɛì màŋ yaà è gbà.

⁴⁰ E kìlà maŋ kpùnàŋ ko àìjɛnɛ̀ŋ màŋ yaà, yèè maŋ kpùnàŋ ɗuunyaŋ màŋ yaà. E jòòwoɛ̀ yaà wèè maŋ kpùnàŋ àìjɛnɛ̀ŋ maŋ lɛ̀ è yaà è gbà yèè e jòòwoɛ̀ yaà wèè maŋ kpùnàŋ ɗuunyaŋ màŋ lɛ è yaà è gbà.

⁴¹ E gɔɛɛ̀ kuwa e sìàŋ tiŋ bi, yèè wɔŋ wààa kuwa e sìàŋ wuŋ bi, e kìlà maŋ ɗu màŋ kuwa e sìàŋ joo, yèè maŋ ɗu màŋ kàìŋ maŋ fèemàŋ, e sìàŋ joo bà yaào.

⁴² Yɛi è do nàŋ nɔ̀ŋ sèè anyuùŋ fàa nyàŋ folo e fàa dìì wɔŋ nyiiŋ gèeɔ̀ sùà. Sèè àŋ sie ke kpùnaàŋ kè yaà e fà nyiŋ, sèè wo Dayà gè nyiìŋ e fàaà dìì, ke fè ɓɛìŋ fà julɔfɔ.

⁴³ Sèè àŋ sie ke kpùnaàŋ kè nanaŋ kìlà kè yɔkpɔ̀. Wo Dayà gè nyiìŋ e fàa dìì e jòòwo sùà, yèè kè kuwa gààŋ.

⁴⁴ Àŋ nɔ̀ŋ yɛ̀ɛ̀mɛ̀ ke kpùnaàŋ aŋ nyiŋ sìà, sèè wo Dayà gè nyiìŋ naàŋ e fàa dìì, wo Jìnàŋ Dayàa nàŋ nɔ̀ŋ naàŋ ke kpùnaŋ yii sùà. Ke kpùnàŋ ke fòolà kè yaà wèètii, ke kpùnaŋ e kɔ̀ɔ̀ Jinàaŋ sùà kuwa wèè ke nɔ̀ŋ.

⁴⁵ Wɔŋ fɛ̀ì Dayàa wààŋ, “Wo felaa jiɛ̀jiɛ̀ɔ, Adamàŋ, àŋ nauŋ wa banè wò yaà wa wo nyuùŋkpùuŋ gè nyiiŋ.” Kɛ̀ɛ̀ wo Adamàŋ dìàmaàŋ, wò yaà wo Jinàŋ kìɛ̀ŋ wɔŋ nyiiŋ.

⁴⁶ Wo nyuùŋkpùuŋ jiɛ̀ nàŋ hnàŋ, yèèngàà wo nyuùŋ kpùnɔɔ̀ŋ wo Jinàaŋ yaà sùà wɔ wò hnàŋ.

⁴⁷ Wo Adamàŋ jiɛ̀jiɛ̀ɔ naŋ fòlò e dììɛ sùà, yèè wo Adamàŋ dìà tìyèeɔ̀ naŋ fòlò ko àìjɛnɛ̀ŋ.

⁴⁸ Aŋ yè nyaŋ yaà wèè e dììɛ nyàŋ, àŋ yaà mààŋ aŋ yè nyaŋ naŋ fòlò e dììɛ sùà nyaŋ, aŋ yè nyaŋ yaà wèè ko àìjɛnɛ̀ŋ nyaŋ, àŋ yaà mààŋ aŋ yè nyaŋ naŋ fòlò ko àìjɛnɛ̀ŋ nyaŋ.

⁴⁹ Nààŋ nɔŋ è naiŋ tèènè wo nyùnɔ̀ɔŋ àŋ naŋ bàànè e dìì wɔ, yɛi è doiŋ nàŋ tèènè wo nyùnɔ̀ɔŋ naŋ fòlò ko àìjɛnɛ̀uŋ wɔ.

⁵⁰ Nyɛ̀iŋ nààŋ wùìyaim nyàŋ, e nɛ̀ɛŋ mìŋ yaà woo lɛ̀ nàŋ yaà kɛ̀, e nɛ̀ɛŋ gbiŋ wo Dayà naŋ bàànè maŋ kèìŋ yaà maŋ sɛ̀ìŋ nɛ, e fè nɔ̀ŋ bàiŋbà è Kànà Dayàa sùà, yèè e yèɛ è fà lɛ, e fè kɛ̀ɛ̀nɛ̀ŋ è yèɛ jeeyà wèè julɔfɔ lɛ̀.

^51-52 Kùmiàŋ ke gbùnù tɔ̀ɔ̀nyaàŋ yɛɛ̀, yàwi nààŋ gbiŋ nààŋ naìŋ fɔ̀, kɛɛ sèè e pòtanàaŋ dìàmaàŋ wuiye wa nàwèè, yàwi nààŋ gbiŋ doiŋ nàŋ vɔɔnɔ̀ŋ fiò, mààŋ e kpɔ̀wa gbàì le fɛ̀ɛ̀. Sèè e pòtanàaŋ dìàmaàŋ wuiye wa nàwèè, wo Dayà do wa nàwèè nàŋ gè anyuùŋ fàa nyaŋ gbiŋ e fàa dìì wèè julɔfɔ, yèè yàwi nààŋ gbiŋ doiŋ nàŋ vɔɔnɔ̀ŋ.

⁵³ Maŋ kpùnaŋ wi màŋ fà màŋ hewe lɛ do nàŋ vɔɔnɔ̀ŋ koɓɛ̀ maŋ kpùnaŋ gò fà ɔ̀ɔ̀ maŋ hèwà.

⁵⁴ Sèè tii kaaàŋ, maŋ kpùnaŋ wi màŋ è kuwa màŋ naŋ yɔkpɔ̀ yèè màŋ fà lɛ, màŋ do nàŋ vɔɔnɔ̀ŋ koɓɛ̀ maŋ kpùnaŋ gò fà wèè julɔfɔ. Kpeiŋ kɛ̀ e mìè sùà fɛ̀ì Dayàa è nɔ̀ŋ tɔ̀ɔ̀nyaàŋ, “E fàa è nɔ̀ŋ pɔ̀ɔ̀pɔɔ niŋ, wo Dayà ɓùlà ke gùnɛɛ̀ŋ è jùà jɛ̀wɛ̀ kpɔ̀.”

⁵⁵ “Fàa, muŋ gò ɓùlà. Fàa, mùŋ jele, kòò e gaàum mɔ̀ɛ̀ yaà naàŋ wèè e jèlà?”

⁵⁶ E fàa gè e gààŋ e jèla niŋ nɛ̀ e yìwìà maŋ jùumù sùà, yèè maŋ jùumù gè e jeiŋ gààaŋ ke sàwàa sùà.

⁵⁷ Kɛɛ Dayà esɛ̀ wèè mùŋ naŋ dàngè wo Kana wiɔ̀ Jisɛ̀ Kulaì wò naŋ wi nyɛ̀nɛ̀ŋ è naiŋ ɓùlò ke gùnɛɛ̀ŋ.

⁵⁸ Wèètii nyɛ̀iŋ nààŋ wùìyaim nyàŋ, sìeìŋ gbàùŋ gbàùŋ, yèè ɓɔ̀ nìŋ jèlà kpàkpà. Kùnoìŋ nɔŋ tòmo e teenga gbiŋ sùà wèè Kanaà, nààŋ nìŋ naŋ nyìmè tɛ kɛ̀ e nɛ̀ŋ gbiŋ nìŋ naŋ nyɛ̀nɛ̀ŋ e tòmò Kanaà sùà e fè nɔ̀ŋ wèè foo lɛ̀.