1 Kɔliìŋ 14 - WƆŊ FƐ̀Ì EBÒ SÌÀŊ DAYÀA

Maŋ keì maŋ bà miŋ nyaàiŋ dè maŋ kìɛ̀ŋ e yìwìà Jìnàŋ Dayàa sìwè

¹ Kpeiŋ kɛ̀ e mànaŋ nàŋ yaà e nɛ̀ɛŋ wèè naŋ kamè. Maŋ kìɛ̀ŋ Jìnàŋ Dayàa maŋ nɔ̀iŋ jii, kaka ngèè e kìɛ̀ŋ ke mìè gbìàŋ aŋ wɛ̀ijì nyaŋ.

² Anyùùŋ nyaŋ gboo maŋ kaìŋ joo sùà nyaŋ, aŋ fè gbòà kòɓɛ̀ anyùùŋ sɔɔ̀ koɓɛ̀ Dayài, esaɓù kɛ̀ e nɛ̀ɛŋ àŋ woà lɛ e fè dìkà nyùùŋ è jiikɛ̀ɛ. Àŋ yaà gbùùyè e tɔ̀ɔ̀nyààŋ maŋ gbùnu e gààŋ Jìnàŋ Dayàa sùà.

³ Kɛɛ, anyùùŋ wòò ke mìè gbìàŋ wɛ̀ijì nyaŋ àŋ gboo anyùùŋ kɔɔ wèè e nɔ̀ŋ e kpùùmaŋ e nyɛ̀nɛ̀ŋ e hààwe wilɛ̀ e nyìngà sùà, aŋ nyiŋ sìà ke ɗi, yèè aŋ nyiŋ fè jii nyingè.

⁴ Anyùùŋ nyaŋ gbuuyà maŋ kaìŋ joo sùà nyaŋ, àŋ kpuumàŋ nɔŋ nyiŋ bi, kɛɛ anyùùŋ nyaŋ naŋ wòò ke mìè gbìàŋ wɛ̀ijì nyaŋ lɛ̀, àŋ kpuumàŋ anyuùŋ nyaŋ ke gbòò anyuùŋ hààwe nyàŋ sùà.

⁵ Mìŋ manaŋ wèè nyɛ̀iŋ gbiŋ naŋ gbùùyà maŋ kaiŋ joo sùà, kɛɛ mìŋ henàŋ mɔ̀nɔ̀ŋ wèè naŋ wòò ke mìè gbìàŋ aŋ wɛ̀ijì nyaŋ. Wo nyùnɔ̀ɔŋ woà ke mìè gbìàŋ aŋ wɛ̀ijì nyaŋ wɔ̀, e nàfa yàaùŋ sùà e nìàŋ wo nyùnɔ̀ɔŋ gboo maŋ kaìŋ joo sùà wɔ, sɔɔ̀ nɔŋ wo nyùùŋ nɔ̀ŋ fɛɛ̀feìŋ wo yèɔ naŋ ɓɛ̀nɛ̀ŋ gɔ̀àì e nɛ̀ɛŋ wo nyùnɔ̀ɔŋ naŋ woò lɛ sùà, wèè ke gbòò anyuùŋ hààwe nyàŋ gbiŋ, e nɔ̀ŋ e kpùùmaŋ e nyɛ̀nɛ̀ŋ e hààwe wilɛ̀ e nyìngà sùà.

⁶ E wèètii nyɛ̀iŋ nààŋ wùìyaim nyàŋ, sèè mìŋ hnàŋ ko nɛ̀ɛ̀iŋ niìŋ, kiìŋ kpùùmaŋ mìŋ naiŋ ɓɛ̀nɛ̀ŋ kìɛŋ sèè mìŋ gbuuyà maŋ kaìŋ joo sùà? E kpùùmaŋ gbiŋ fè niìŋ sùà, sɔɔ̀ kaiŋ hìàŋ èbò dààne è yìwìà Dayà sìwè ɔ̀ɔ̀ e jiikɛ̀ɛ ɔ̀ɔ̀ ke miè gbìàŋ aŋ wɛ̀ijì nyaŋ ɔ̀ɔ̀ e kàa.

⁷ Sèè manɛ̀ŋ wùìya màŋ gbiŋ weè fè e gììmè guùŋ kpò, diè nìŋ henàŋ nyìmè e fèèmàŋ e gììmè e ɓuu yaà e gììmè ke kɔningai?

⁸ Sèè wo nyuùŋ fùàŋ e pòtanàaŋ wo gò niŋ fùàŋ wèè wo nyaanè janjai, kɛ̀ ɓòò nàŋ do nàŋ banebànè wèè ke gùnɛɛ̀ŋ?

⁹ Yɛi è yaà, sèè mùŋ nɔ̀ŋ gbùùyè wɔŋ kaìŋ joo sùà. Sèè wo nyùùŋ gbiŋ gò kòmàŋ kɛ̀ kiìŋ mùŋ yaà woo, mùŋ do nɔŋ nàŋ nɔ̀ŋ ko gbuuye wèè foo.

¹⁰ Maŋ kaìŋ gɛ̀wɛɛ̀ zimgbe nàŋ yaà e ɗuunyaŋ lɛɛ̀, kɛɛ wɔŋ bà gbiŋ kuwà e fasàì.

¹¹ Wɔŋ kànɔ̀ɔŋ miŋ kuwà è gààŋ wèè ka gbòà wɔŋ, anyùùŋ nyaŋ gbòò wuùŋ nyaŋ, àŋ yaà anyùùŋ maŋ fuɔŋ joo ko nɛ̀ɛ̀ŋ miìŋ yèè mìŋ yaà wo nyùùŋ fuɔŋ joo ko nɛ̀ɛ̀ŋ nyiŋ niìŋ.

¹² Nààŋ nìŋ naŋ haamìŋ wèè naŋ kùwìè e kìɛ̀ŋ Jìnàŋ Nɛɛmaàŋ lɛ, sɔɔ̀ naŋ fɛ̀ɛ̀ e nìàŋ manɛ̀ŋ maŋ gbiŋ wèè naŋ tòòmò anyùùŋ nyaŋ naŋ kpuumò wèè ke sààŋ Dayàa yɛ̀mɛ̀ nyɛ̀lɛ nyàŋ.

¹³ Kpeiŋ wo nyùnɔ̀ɔŋ gboo maŋ kaìŋ joo sùà wɔ, sɔɔ̀ wo zoolò wèè wo kɛɛnɛ̀ŋ e kìɛɛ̀ŋ wèè maŋ mìè gbòauŋ màŋ fàsai.

¹⁴ Sèè mìŋ zoolà wɔŋ kaìŋ joo sùà, wo Jinàŋ miɔ̀ŋ zoolà, kɛɛ ke jii miɛ̀ŋ fè nɔ̀ŋ è bàiŋbà.

¹⁵ Kɛ̀ kiìŋ mìŋ nyɛnɛŋ naàŋ? Yàwi jinàŋ miɔ̀ŋ do nàŋ zoolò, e kìlà yàwi jii miɛ̀ŋ e zoolò. Yàwi jinàŋ miɔ̀ŋ do nàŋ gbeemè, e kìlà yàwi jii miɛ̀ŋ e gbeemè.

¹⁶ Sèè mùŋ ge Dayà esɛ̀ wo Jinàaŋ sùà nɔŋ, dièsɔa anyuùŋ gbànaŋ nyàŋ àŋ yaà e dèèneɛ̀ sùà nyaŋ kuwo nyààŋ, “Tɔɔɓaa” koɓɛ̀ e zòòlò ke sɛ̀ gèe muɛ̀ŋ? Aŋ kuwà è ɗewe bà wèè aŋ nyìmàŋ è nɛ̀ɛŋ mùŋ yaà woo lɛ̀.

¹⁷ Sèè weè pɛɛ e zòòlò Dayà gè sɛ̀ mùɔ̀ŋ e nɔ̀ŋ tɛ̀ɛ̀, anyuùŋ gbànaŋ nyàŋ fè yɛ̀ɛ̀mɛ̀ è kpùùmaŋ bà gbiŋ.

¹⁸ Mìŋ naŋ gè wo Dayà ke sɛ̀ mìŋ gboo maŋ kaìŋ joo sùà zimgbe e nìàŋ nyɛ̀iŋ nààŋ bà nyiŋ.

¹⁹ Kɛɛ ke gbòò anyuùŋ hààwe nyàŋ sùà, kà mànàŋ wèè ka gbòà maŋ mìè nɔɔnɔŋ maŋ yè maŋ wo nyùùŋ naŋ ɓɛ̀nɛ̀ŋ jàà jii màŋ, e wèè ka kàà anyùùŋ bà, wèè ka gbòà maŋ miè tààsùùŋ guùŋ maŋ kaìŋ joo sùà.

²⁰ Nyɛ̀iŋ nààŋ wùìyaim nyàŋ, ɓɔ̀ nìŋ gongò mààŋ àŋ jɔ̀à kaiŋ gòngoìŋ mààŋ anyuùŋ kàmaiŋ e kìla niŋ nɔ̀ŋ mààŋ aŋ jɔaa bɔwɔ gò nyìmàŋ keì naanààŋ è fèemàŋ.

²¹ Wɔŋ fɛ̀ì Dayàa sùà wo Kanaà naŋ woò wààŋ, “Esàɓù anyuùŋ gbòà maŋ kaìŋ joo sùà wo Kanaà wààŋ, Mìŋ do nàŋ gbòò koɓɛ̀ anyunùim nyàŋ. Mìŋ do nàŋ gbùùyè aŋ nyùnèènyɛiŋ sùà. Kɛɛ Ka yɛi pɛɛ nyɛ̀nɛ̀ŋ anyunùim nyàŋ naàŋ kòmò è nɛ̀ɛŋ mìŋ woà nyiìŋ nɛ.”

²² Wèètii maŋ kaìŋ joo gbùùyà sùà è yaà e tɔ̀ɔ̀màŋsèì keì wèè anyuùŋ gò kùwìè è hààwe nyàŋ, kɛɛ e fè wèè ànyuùŋ kùwìè è hààwe nyàŋ. E kìɛɛ̀ŋ wèè ke mìè gbìàŋ aŋ wɛ̀ijì nyaŋ wòo è yaà wèè anyuùŋ kùwìè e hààwe nyàŋ e fè wèè ànyuùŋ gò kùwìè è hààwe nyàŋ.

²³ Sèè ke gbòò anyuùŋ hààwe nyàŋ gbiŋ aŋ deenè aŋ tɔ̀ɔ̀tù gbòà maŋ kaìŋ joo sùà, kpeiŋ anyuùŋ joo bà ɔ̀ɔ̀ anyuùŋ gò kùwìè è hààwe nyàŋ bà hnàŋ aŋ jɔ̀à, aŋ naàŋ woò nyààŋ nìŋ naŋ sààŋ kè gbòà?

²⁴ Kɛɛ sèè anyùùŋ nyaŋ gbiŋ nɔ̀ŋ wòò ke mìè gbìàŋ Dayàa sèè anyuùŋ gò kùwìè è hààwe nyàŋ bà ɔ̀ɔ̀ anyuùŋ joo aŋ jɔ̀à, àŋ do nàŋ fè maŋ jùumù nyiŋ màŋ jɛwɛ aŋ gbeè, esàɓù e nɛ̀ɛŋ àŋ komo lɛ̀. E nɛ̀ɛŋ àŋ komo lɛ̀ do nyiŋ nàŋ tùɔ̀ŋ maŋ nɔnɔŋ,

²⁵ maŋ gòngò gbùnu nyiŋ màŋ jii nyiŋ màŋ sùà do nàŋ fòlò ko ɓài, e kìlà aŋ gbuwo aŋ zoolò kɛ̀, “Tɔɔɓaa wo Dayà kòò wò yaà nyiìŋ e tɛɛ.”

E jɛ̀ì kìì ke gbòò anyuùŋ hààwe nyàŋ

²⁶ Nyɛiŋ nààŋ wùìyaim nyàŋ, e nɛ̀ɛŋ mìŋ yaà woo lɛ̀ tiŋ tɛɛ̀. Sèè nìŋ deenàŋ wèè zòòlo, wo nyùùŋ guùŋ nɔ̀o wò kuwa wɔŋ nùŋ wèè dàa, wo bàa kuwa e kàa wèè wo kaà, wo bà kuwa ebò dààne e yìwìà Dayà sìwè, wo bà kuwa ke miè gbìaŋ maŋ kaìŋ joo sùà, yèè wo nyùùŋ gɔ̀ì maŋ kaìŋ joo bi sùà nɔ̀o. Tii gbiŋ e nɔ̀ŋ kpùùmaŋ koɓɛ̀ ke gbòò anyuùŋ hààwe nyàŋ.

²⁷ Sèè wo nyùuŋ bà nɔ̀ŋ kɔɔyɛ wèè wo gbùùyà wɔŋ kaìŋ joo sùà, anyùùŋ tìyèe ɔ̀ɔ̀ taai nɔŋ naŋ gboo e tèèngà guùŋ guùŋ. Hɔɛ̀ gboo wò yeweo wo bàa woo mààŋ, yèè wo nyùùŋ bà nɔ̀o wo yèɔ gɔì e nɛ̀ɛŋ àŋ naŋ woò lɛ sùà.

²⁸ Kɛɛ sèè wo nyùùŋ gò nɔ̀ŋ wèè wo gɔ̀ì è mìè nyààŋ bi sùà, kɛ̀ wo nyùnɔ̀ɔ̀ŋ gboo maŋ kaìŋ joo màŋ sùà wɔ, ɓɔ̀ wò gbòà kè gbòò ànyuùŋ hààwe nyàŋ sùà. Wo gbòà nɔŋ koɓɛ̀ wuŋ biì yèè Dayà.

²⁹ Aŋ wɛ̀ìjì tìyèe ɔ̀ɔ̀ taai aŋ yè nyaŋ wo Dayà naŋ fè ke miè gbìauŋ nɛɛ̀ŋ nyaŋ aŋ gbòà, anyuùŋ gbànaŋ nyàŋ aŋ tùàŋ e nɛ̀ŋ wòo nyiŋ nɛ̀ maŋ nɔnɔŋ.

³⁰ Kɛɛ sèè wo nyùuŋ bà nɔ̀ŋ e dèèneɛ̀ sùà wo kòmàŋ ke miè gbìàŋ e yìwìà Dayà sìwè, kɛ̀ wo nyùnɔ̀ɔŋ yaà gbuuye wɔ̀ wo huànè gbòa, wo dangè wo nyuùŋ kùwìè ke miè gbìaàŋ gbòà.

³¹ Nyɛ̀iŋ nààŋ gbiŋ nàŋ ɓɛ̀nɛ̀ŋ ke mìè gbìàŋ aŋ wɛ̀ijì nyaŋ wòo, guùŋ guùŋ, e wèè nyɛ̀iŋ nààŋ gbiŋ naŋ gbeè, e kìlà naŋ kùwìè jii nyingè.

³² Wo wɛ̀ijìɔ, wo nyimèè wèè wo huanè gbòa e kìlà wo dangè nyuùŋ joo wo gbòà,

³³ esaɓù kɛ̀ wo Dayà manàŋ wèè è doiŋ nyɛ̀nɛ̀ŋ nyaàtàaŋ kɛɛ e mɔɔnɔ̀iŋ yèè e nɔ̀iŋ jii fàa sùà. Màànààŋ è yaà maŋ gbòò anyùùŋ hààwè nɛɛmaŋ nyàŋ gbiŋ sùà lɛ,

³⁴ aŋ jɔ̀ùŋ jɛi kpɛ maŋ dèènè ke gbòò anyuùŋ hààwe nyàŋ sùà. Aŋ fè nyaàŋ gè diɛŋ nyiŋ wèè aŋ gbòà, nààŋ maŋ sàwà Mòòze màŋ naŋ woò lɛ, ɓɔ̀ àŋ nɔ̀ŋ àŋ sìèfeìŋ.

³⁵ Sèè aŋ jɔùŋ nyaŋ ke gbòò anyuùŋ hààwe nyàŋ sùà àŋ manaŋ wèè aŋ nyìmàŋ e keì bà sùà, aŋ dawè aŋ faiŋ nyiŋ nyàŋ maŋ gboo nyiŋ màŋ sùà. È yaà e kèì sàngè wèè wo jɔùŋ gbòà e dèènè anyuùŋ hààwe nyaŋ sùà.

³⁶ Ɓàà ko nɛ̀ɛ̀iŋ niìŋ ke mìè Dayàa naŋ tɔɔtù? Ɓàà ko nɛ̀ɛ̀iŋ niìŋ zà nɔŋ kè naŋ hnè?

³⁷ Sèè wo nyùùŋ gbiŋ naŋ gongò kɛ̀ wò yaà wo wɛ̀ijì ɔ̀ɔ̀ wò kuwa e kìɛ̀ŋ Jinàaŋ, wo nyìmàŋ kɛ̀ e nɛ̀ɛŋ mìŋ yaà sìnga sùà ko nɛ̀ɛ̀iŋ niìŋ lɛ, ke sàwà Kanaà ye.

³⁸ Kɛɛ sèè wo nyùùŋ gbiŋ gò kìlà wèè wo yɛ̀mɛ̀ è nɛ̀ɛŋ mìŋ yààìŋ sìnga sùà lɛ, ɓɔ̀ nìŋ kìlà nìŋ douŋ yɛmɛ̀.

³⁹ E wèètii nyɛ̀iŋ nààŋ wùìyaim nyàŋ, maŋ jiiiŋ màŋ nɔ̀ŋ e kèè maŋ mìè gbòà aŋ wɛ̀ijì nyaŋ wòo maŋjɛ̀wɛ, kɛɛ ɓɔ̀ nìŋ dangè è kèè màŋ kaìŋ joo gbùùyà sùà.

⁴⁰ Nyɛ̀nɛìŋ e nɛ̀ɛŋ gbiŋ nààŋ è kanaŋ lɛ̀, yèè e nɔ̀ŋ dòmaŋ diɛŋ.