1 Kɔliìŋ 12 - WƆŊ FƐ̀Ì EBÒ SÌÀŊ DAYÀA

Maŋ kìɛŋ e yìwìà wo Jìnàŋ Dayàa sìwè

¹ E nɛ̀ɛŋ nìŋ naŋ sìngè e nyaàiŋ dè e kèè maŋ kìɛŋ e yìwìà wo Jìnàŋ Dayà sìwè lɛ. Nyɛ̀iŋ nààŋ wùìyaim nyàŋ, mìŋ manaŋ naŋ nyìmàŋ e tɔɔɓaaà e nyaàiŋ e miŋ dè.

² Nàŋ nyìmàŋ kɛ̀ e teengaà pɛɛ nìŋ yaà wa anyùùŋ nyaŋ fè àŋ Juùù nyaŋ, àŋ naiŋ wa kɔ̀ɔ̀ maŋ dòmaŋ nyaaŋ zimgbe ko zòòlò aŋ dayà joo gò gè nyiiŋ.

³ Wèètii, mìŋ manaŋ wèè naŋ nyìmàŋ kɛ̀ wo nyùnɔ̀ɔŋ gbiŋ wo Jìnàŋ Dayàa yaà maŋjɛ̀wɛ wɔ̀ wo fè woò wààŋ, “E gbòòno yaà wo Jisɛ̀ Kulaì màŋjɛ̀wɛ!” Wo nyùùŋ gbiŋ fè ɓɛ̀nɛ̀ŋ wòo wààŋ, “Jisɛ̀ Kulaì yaà Kana,” è yèɛ wo Jìnàŋ Dayàa fèeùŋ màŋjɛ̀wɛ lɛ̀.

⁴ Maŋ kìɛ̀ŋ Jìnàŋ Dayàa naŋ gàŋ maŋ ziì, kɛɛ wo Jìnàŋ gunɔ̀ɔŋ nàŋ kiɛ̀ŋ maŋ gbiŋ.

⁵ Maŋ tòmo kii màŋ gbiŋ yaà gbàgbà, kɛɛ wo Kànà guùŋ wɛɛ̀ nɔŋ àŋ tomàŋ.

⁶ Yàwi nààŋ gbiŋ è nyɛ̀nɛ̀ìŋ maŋ tòmo gbàgbà, kɛɛ wo Dàyà gunɔ̀ɔŋ nàŋ fè gààŋ koɓɛ̀ nyùùŋ gbiŋ wèè maŋ tòmo titi nyiŋ màŋ nyɛ̀nɛŋ.

⁷ Wo Jinàaŋ e nɔ̀uŋ nɛ̀ fɛɛ̀feìŋ, è tɔɔ̀ e ɗewe bà wo nyùùŋ gbiŋ sùà, wèè e tɛ̀ɛ̀tɛ̀ɛ̀ anyùùŋ nyaŋ gbiŋ.

⁸ Wo Jinàaŋ kiɛ̀ŋ wo nyùùŋ guùŋ ke miè gbìàŋ e gòngo sengèì, wo Jìnàŋ gunɔ̀ɔŋ wo kìɛ̀ŋ wo nyùnɔ̀ɔŋ bàa ke miè gbìaŋ dìà e jììkɛ̀ɛ̀ nyìmaŋ.

⁹ Wo Jìnàŋ gunɔ̀ɔŋ kiɛ̀ŋ wo nyùnɔ̀ɔŋ bà e hààwe, koɓɛ̀ nyùnɔ̀ɔŋ bà, wouŋ kìɛ̀ŋ e gààŋ nyuùŋ sùnga.

¹⁰ Wo Jìnàŋ Dayàa kiɛ̀ŋ wo nyùnɔ̀ɔŋ bàuŋ e gààŋ wèè wo nyɛ̀nɛ̀ŋ maŋ tòmò gaàŋ gbeegbèè nyaàiŋ dè maŋ kèì mèè nyɛ̀nɛŋ. Koɓɛ̀ wo bà, wo fè e kìɛ̀ŋ ke mìè gbìàŋ Dayàa gbòa, yèè wo gbàuŋ, wò fè e gààŋ wèè wo nyìmàŋ e fèèmàŋ maŋ kìɛŋ màŋ folo wo Jìnàŋ Dayàa sìwè maŋ yaà maŋ yè màŋ fòuŋ fòlà sìwè maŋ. Wo nyùnɔ̀ɔŋ bà, wò kiɛ̀uŋ e gààŋ wèè wo gbòà maŋ kaìŋ joo sùà, e kìlà wo kìɛ̀ŋ wo bàuŋ e gààŋ wèè wo gɔ̀ì e keìɛ wo nyùnɔ̀ɔŋ naŋ woò lɛ sùà.

¹¹ Kɛɛ wo Jìnàŋ guùŋ kpò wɛɛ̀ nàŋ nyɛnɛŋ maŋ keì mɛɛ̀ŋ gbiŋ, nààŋ wò manaŋ lɛ̀. Maŋ kìɛŋ màŋ gbiŋ yaà gbàgbà koɓɛ̀ nyùùŋ gbiŋ.

Ke kpùnàŋ guùŋ kùwìè manɛ̀ŋ è kɔɔ zimgbe

¹² Wo Jisɛ̀ Kulaì wò yaà mààŋ ke kpùnàŋ guùŋ, ke yèɛ kuwa manɛ̀ŋ è kɔɔ zimgbe lɛ̀, kɛɛ kè yaà nɔŋ ke kpùnàŋ guùŋ kpò, jòòpɛɛ manɛ̀ŋ è kɔɔ nyiŋ màŋ yaà gbàgbà.

¹³ Yɛi nɔŋ, yàwi nààŋ gbiŋ è yààìŋ, èiŋ nɔ̀ŋ aŋ Juùù, ɔ̀ɔ̀ ànyùùŋ nyaŋ fè àŋ Juùù nyaŋ, èiŋ nɔ̀ŋ àŋ ɗo ɔ̀ɔ̀ e fèìŋ àŋ ɗo, wo Jinàŋ guùŋ wɛɛ̀, wò wi gùà e kìlà wò wi gbìàŋ ke kpùnàŋ guùŋ yɛɛ̀ sùà. Yàwi nààŋ gbiŋ è tìèìŋ e yìwìà wo Jìnàŋ guùŋ wɛɛ̀ sìwè.

¹⁴ Ke kpùnaàŋ kiiŋ bi wo Dayà gò nyiŋ nɔŋ bàànè è nɛ̀ŋ è kɔ̀ɔ̀ guùŋ, kè kuwa manɛ̀ŋ è kɔɔ zimgbe.

¹⁵ Sèè ke gòlò weè woò wààŋ, “Nààŋ miŋ fè yɛi wɔ̀ŋ kùàŋ le, miŋ fè kè kpùnaàŋ bà,” tii naàŋ nyɛ̀nɛ̀ŋ wèè gòlò do sòò nɔ̀ŋ kè kpùnaàŋ bà.

¹⁶ Sèè ke nùŋ ke weè woò kɛ̀, “Nààŋ miŋ fè yɛi è fɛ̀ɛ̀ le, miŋ fè kè kpùnaàŋ bà,” tii fè nyɛ̀nɛ̀ŋ wèè kè nùŋ do sòò nɔ̀ŋ kè kpùnaàŋ bà.

¹⁷ Sèè ke kpùnaàŋ gbiŋ ke weè nɔ̀ŋ e fɛ̀ɛ̀, diè kè henàŋ kòmò maŋ kàìŋ? E kìlà sèè ke weè nɔ̀ŋ ke nùŋ, diè kè henàŋ kòmò e dò nɛ̀ŋ?

¹⁸ Kɛɛ nààŋ è yaà yɛi le, wo Dayà naŋ gbìɛ̀ŋ manɛ̀ŋ è kɔɔ gbàgbà ke kpùnàŋ guùŋ sùà nààŋ wò manaŋ wa wèè e nɔ̀ŋ lɛ.

¹⁹ Ke kpùnaŋ fè weè nɔ̀ŋ sèè ke gbiŋ weè nɔ̀ŋ e nɛ̀ŋ ɗì guùŋ!

²⁰ Nààŋ è yaà yɛi le, manɛ̀ŋ è kɔ̀ɔ̀ màŋ naŋ gàŋ kɛɛ ke kpùnaàŋ yaà kè guùŋ kpò.

²¹ Sèè è nɔ̀ŋ yɛi, e fɛ̀ɛ̀ fè ɓɛ̀nɛ̀ŋ wòò wɔ̀ŋ kùàŋ wààŋ, “Miŋ manàùm.” Ɔ̀ɔ̀ è ɗì lɛ e ɓɛnɛ̀ŋ wòò gòlò wààŋ, “Ɗewe gbiŋ, miŋ manàùm.”

²² E wèètii, e fèiŋ ɓɛ̀nɛ̀ŋ nyɛ̀nɛ̀ŋ è nɛ̀ŋ bà gbiŋ èɓìèmàŋjɛ̀wɛ̀ mànɛ̀ŋ è kɔ̀ɔ̀ kè kpùnaàŋ yè maŋ yaà mààŋ màŋ naŋ yɔ̀kpɔ maŋ.

²³ Manɛ̀ŋ è kɔ̀ɔ̀ ke kpùnaàŋ yè maŋ è naiŋ gongò kɛ̀ e nàfà teenga fè sùà maŋ miiŋ è kuwìàìŋ le siwè sìàŋ gbee kaiŋ, e kìlà maŋ yè maŋ gò guùŋ nyɛ̀nɛ̀ŋ è sìàŋ tɛ̀ɛ̀ maŋ miiŋ è yɛmɛ̀ìŋ diɛŋ tɛ̀ɛ̀tɛ̀ɛ̀ kaiŋ,

²⁴ e yèɛ e kuwà wèè eiŋ tii nyɛ̀nɛ̀ŋ wèè manɛ̀ŋ è kɔɔ siaŋ sìàŋ maŋ lɛ̀. Wo Dayà wuŋ bi naŋ gbìɛ̀ŋ manɛ̀ŋ kɔ̀ɔ̀ ke kpùnaàŋ koɓɛ̀ guùŋ e ɗewe bà sùà wèè maŋ fè e ɓɛ̀ɛ̀jàa gbee koɓɛ̀ maŋ yè maŋ mànàŋ niìŋ lɛ.

²⁵ Wèètii e fèemàŋ gòòno bà gbiŋ fè kè kpùnaàŋ sùà, kɛɛ manɛ̀ŋ è kɔɔ gbàgbà miiŋ gbiŋ kuwa e gòngò guùŋ wèè maŋ dàwi miŋ màŋ.

²⁶ Sèè manɛ̀ŋ è kɔ̀ɔ̀ ke kpùnaàŋ bà guùŋ gbiŋ kà e keì nyìnga dìì, maŋ gbiŋ kɔ̀à e keì nyìnga lii dìì, sèè e bà gbiŋ yɛ̀mɛ̀ e ɓɛ̀ɛ̀jàa, maŋ gbiŋ gè zɔlɔ̀.

²⁷ Nyɛ̀iŋ nààŋ gbiŋ nàŋ yaà ke kpùnàŋ Kulaìɛ, yèè wo nyùùŋ gbiŋ yaà e bàumbà weè nyiŋ.

²⁸ Wo Dayà naŋ tà anyùùŋ maŋ ɗùù, ke gbòò anyuùŋ hààwe nyàŋ sùà. Aŋ jiɛ̀jiɛ̀ nyaŋ, naŋ yaà aŋ keela tàeɗùù nyaŋ. Aŋ dìà tìyèei nyàŋ, aŋ wɛ̀ijì nyaŋ. Aŋ dìà taai nyàŋ, aŋ kààmɔɔŋ. Aŋ yè nyaŋ nyɛnɛŋ maŋ tòmò gaàŋ gbeegbèè nyaàiŋ dè maŋ kèì mèè nyɛ̀nɛŋ. Aŋ gbànaŋ nyàŋ nàŋ yaà, aŋ yè nyaŋ wò naŋ kìɛ̀ŋ e gààŋ wèè aŋ sùngà anyùùŋ, ɔ̀ɔ̀ aŋ kpùùmàŋ anyùùŋ ɔ̀ɔ̀ aŋ nyiŋ dè ke dòmaŋ siaŋ diɛŋ, ɔ̀ɔ̀ wèè aŋ gbùùyà maŋ kaìŋ joo sùà.

²⁹ Aŋ gbiŋ nɔŋ nààŋ fè àŋ keela tàeɗùù ɔ̀ɔ̀ àŋ wɛ̀ijì ɔ̀ɔ̀ àŋ kààmɔ̀ɔ̀ŋ. Anyùùŋ nyaŋ gbiŋ nààŋ kuwà gààŋ wèè màŋ kèì è mèè nyɛ̀nɛŋ

³⁰ ɔ̀ɔ̀ wèè aŋ kùwìè e kìɛ̀ŋ àŋ nyuùŋ sùngà màŋ sàaŋ ɔ̀ɔ̀ wèè aŋ gbùùyà màŋ kaiŋ joo sùà ɔ̀ɔ̀ aŋ gɔ̀ì è keìɛ wò nyùnɔ̀ɔŋ woà lɛ sùà.

³¹ Kùwieìŋ maŋ kìɛŋ kpɛnɛ màŋ jiiŋ màŋ diɛŋ. E ɗewe gbiŋ sùà, mìŋ doiŋ nàŋ tɔ̀ɔ̀ ke dòmaŋ kɛnɛ.