1 Kɔliìŋ 10 - WƆŊ FƐ̀Ì EBÒ SÌÀŊ DAYÀA

E gòo nyaàiŋ dè aŋ dayà joo

¹ Mìŋ manaŋ naŋ jàà jii nyɛ̀iŋ nààŋ wùìyaim nyàŋ, kɛ̀ aŋ nèwàènèwe wi nyàŋ gbiŋ yaà wa ko fuùŋ kùwaì dìì kò yaà nyiìŋ yɛ̀ɛ̀mɛ̀ diɛŋ, e jèèsùà aŋ gbiŋ kɔ̀ɛ̀ wɔŋ Juwo Wɛinɔɔ̀ŋ sùà bòìbòì aŋ nìàŋ.

² Ko fuùŋ kùwa dìì yèè wɔŋ juwoɔ̀ sùà aŋ gbiŋ naŋ wa nɔ̀ŋ gùa nyiŋ yèè àŋ naŋ nɔ̀ŋ anyùùŋ màŋjɛ̀wɛ̀ Mòòze.

³ Aŋ gbiŋ naŋ gbìlè ke gbɔ̀ù gunɛ̀ɛŋ e yìwìà e gààŋ Dayàa sùà

⁴ yèè àŋ naŋ tìè e tìà guùŋ nɛ e gààŋ Dayàa sùà. Àŋ naŋ tìè e yìwìà ke dùò e gààŋ Dayàa sùà, yèè ke dùò bi nàŋ yaà wa wo Jisɛ̀ Kulaì wuŋ bi.

⁵ Kɛɛ ke jii fàa fè wa wò Dayà wèè àŋ zimgbe nyiŋ, wèètii nyiiŋ kinɛiŋ naŋ wa fɔ̀ yèè maŋ die nyiŋ màŋ naŋ kpɛ̀lɛ̀ e dìì ke foungà wòaà diɛŋ.

⁶ Tɛɛ̀ gbiŋ, è yaà e tɔ̀ɔ̀màŋseì ko nɛ̀ɛ̀ŋ wiì wèè e wi kìɛ̀ŋ e gòo, wèè ɓɔ̀ è ɗewèiŋ màŋ keì naanààŋ wèè nyɛ̀nɛŋ, màànààŋ aŋ bà nyiŋ naŋ wa nyɛ̀nɛ̀ŋ lɛ.

⁷ Ɓɔ̀ è zoolòiŋ maŋ gòò, nààŋ aŋ bà nyiŋ naŋ wa nyɛ̀nɛ̀ŋ lɛ. Nààŋ fɛ̀ì Dayàa naŋ woò lɛ, “Anyùùŋ nyaŋ naŋ jɛi wèè aŋ jènɛ̀ŋ e kìlà aŋ tìà e dèènè ɗaa gèe sùà yèè àŋ nyɛ̀nɛ̀ŋ gbana wèè aŋ jɔɔlɔ̀ aŋ dayà joo dìì.”

⁸ Ɓɔ̀ è gbìàiŋ kùàŋ màŋ kèì nàànààŋ hmɔŋtu nyɛ̀nɛŋ sùà, nààŋ aŋ bà nyiŋ yaà miìŋ wa sùà, yèè ke gɔ̀ɛ̀ guùŋ sùà anyuùŋ taasùùŋ kpɛ̀ùŋ jɛ̀wɛ̀ taai naŋ fɔ̀ lɛ.

⁹ Ɓɔ̀ è gɛɛ̀iŋ wò Jisɛ̀ Kulaì jɛ̀wɛ̀, nààŋ àŋ bà nyiŋ naŋ wa nyɛ̀nɛ̀ŋ, yèè aŋ kàì naŋ nyiŋ jìwè lɛ.

¹⁰ Ɓɔ̀ è kamèiŋ gbòò nààŋ àŋ bà nyiŋ naŋ wa nyɛ̀nɛ̀ŋ yèe wo màikà jìwà nyùnɔ̀ɔŋ naŋ nyiŋ wa jìwè lɛ.

¹¹ Maŋ keì mɛɛ̀ŋ gbiŋ naŋ nyiŋ kaaìŋ wèè e nɔ̀ŋ tɔ̀ɔ̀màŋseì koɓɛ̀ anyùùŋ, yèè è naŋ nɔ̀ŋ sìngaiŋ wèè e gòo ko nɛ̀ɛ̀ŋ wiì. È yààìŋ e tèèngà e ɗuunyaŋ jùaà sùà.

¹² Sèè nìŋ gongà kɛ̀ nìŋ sia tììŋ tììŋ, sɔɔ̀ naŋ yɛ̀mɛ̀ nyɛiŋ bi diɛŋ ɓɔ̀ nìŋ sɔ̀à.

¹³ E wàa gbiŋ mùŋ naŋ jàà jii kɛ̀ mùŋ naŋ kɔ̀ dìì lɛ, tii nàŋ yaà e wàa ziìɛ è hnàŋ wa koɓɛ̀ nyùùŋ gbiŋ lɛ̀. Kɛɛ wo Dayà yɛmɛ̀ e ɗààhiìuŋ nɛ̀ diɛŋ, yèè wo naàŋ dangè wèè è jɛwɛ̀ gɛ̀ɛ̀ɛ nìnyaum è yèɛ mùŋ fè ɓɛnɛ̀ŋ lɛ eum hnàŋ feìŋ. Wò doum nàŋ kìɛ̀ŋ e gààaŋ wèè maŋ niŋ kà dìì, yèè woum tɔ̀ɔ̀ ke dòmaŋ wèè maŋ niŋ fòlà sùà.

¹⁴ E wèètii nyɛ̀iŋ nààŋ wùìyaim nyàŋ, ɓɔ̀ nìŋ gbɛ̀ɛ̀ è kèè àŋ dayà joo zòòlo è kɔɔ.

¹⁵ Mìŋ yààìŋ gbùùyè e kɔɔ mààŋ anyuùŋ kɛ̀ɛ̀jii. Hàaìŋ kiti nyɛ̀iŋ bi wèè nɛ̀ɛŋ mìŋ naŋ woò lɛ.

¹⁶ Wɔŋ kpòòɔ è tiiyàìŋ maŋ tala muaŋ màŋ sùà sèè è dawàìŋ Dayà wèè wo kpuumàŋ wɔŋ, tii gò tɔɔ̀ kɛ̀ è yààìŋ àŋ bàwibà kè gbòò ànyuùŋ hààwè màŋ sɛ̀ìŋ Jisɛ̀ Kulaì maŋ sùà? E kìlà ke gbɔ̀uɛ̀ è nyìmèìŋ yɛ, sèè è gbìlèìŋ nyiìŋ, kɛ̀ tii gò tɔɔ̀ kɛ̀ è yààìŋ aŋ bàwibà kè kpùnàŋ Jisɛ̀ Kulaìɛ sùà?

¹⁷ Ke gbɔ̀uɛ̀ kè yaà kè guùŋ, wèè yàwi nààŋ gbiŋ, jòòpɛɛ è naiŋ mùŋgò, kɛɛ è yààìŋ ke kpùnàŋ guùŋ, esaɓù kɛ̀ è yààìŋ aŋ bàiŋbà koɓɛ̀ ke gbɔ̀ù guùŋ bi.

¹⁸ Gòngoìŋ weè e kèè anyùùŋ ko Ezɔ̀ɛ̀ nyaŋ, anyùùŋ nyaŋ jè maŋ nɛ̀ŋjè saaà maŋ wɔŋ gbɛ̀gbɛ̀ saaà diɛŋ nyàŋ, aŋ fè àŋ bàiŋbà kè gbòò Dayà zòòloɛ̀ sùà?

¹⁹ E keìɛ mìŋ yaà woo lɛ̀ nàiŋ jàà jii kɛ̀ e nɛ̀ŋjè saaà wèè aŋ dayà joo è yaà e nɛ̀ŋ bà? Ɔ̀ɔ̀ kɛ̀ wo dayà joowò yaà e nɛ̀ŋ bà?

²⁰ Kpele, e nɛ̀ɛŋ mìŋ yaà woo lɛ̀ nàŋ yaà kɛ̀ e nɛ̀ɛŋ anyuùŋ gò nyìmàŋ Dayà nyaŋ giiyà saàà lɛ, aŋ jinàŋ naanààŋ nyaŋ àŋ fè niìŋ, aŋ fè niŋ kìɛ̀ŋ Dayà. Miŋ manàŋ wèè naŋ nɔ̀ŋ àŋ bàiŋbà kòɓɛ̀ àŋ jinàŋ naanààŋ.

²¹ Niŋ fè ɓɛ̀nɛ̀ŋ nɔ̀ŋ àŋ bàiŋbà wèè naŋ tììyà wɔŋ kpòò Kanaà sùà, e kìlà naŋ ɓɛìŋ nɔ̀ŋ àŋ bàiŋbà wèè naŋ tììyà wɔ̀ŋ kpòò jinàŋ naanààŋ sùà, niŋ fè ɓɛ̀nɛ̀ŋ nɔ̀ŋ bàiŋbà wɔ̀ŋ gbɛ̀gbɛ̀ Kanaà diɛŋ, e kìlà naŋ nɔ̀ŋ bàiŋbà wɔ̀ŋ gbɛ̀gbɛ̀ jinàŋ naanààŋ diɛŋ.

²² È doiŋ nàŋ nyɛ̀nɛ̀ŋ wo Kanaà wo gè le koo sèè è nyɛ̀nɛ̀ìŋ tɛɛ̀. È gongàìŋ kɛ̀ èiŋ nyìngà sùà èiŋ wuŋ nìàŋ?

²³ “È yààìŋ nyaàŋ gè diɛŋ wi wèè eiŋ nyɛ̀nɛ̀ŋ e nɛ̀ŋ gbiŋ,” tii àŋ woà. Tɛɛ̀ yaà tɔɔɓaa, kɛɛ e nɛ̀ɛŋ gbiŋ nààŋ fè tɛ̀ɛ̀. “È yààìŋ nyaàŋ gè diɛŋ wi wèè eiŋ nyɛ̀nɛ̀ŋ e nɛ̀ŋ gbiŋ,” kɛɛ e nɛ̀ɛŋ gbiŋ nààŋ fè kpuumàŋ.

²⁴ Nyɛ̀iŋ nyɛɛ̀ŋ wo bà gbiŋ ɓɔ̀ wò ka è kèè jiiuŋ màŋjɛ̀wɛ, sɔɔ̀ e kèè jìì dàwiuŋ nɔɔ̀ŋ.

²⁵ Nìŋ yaà e nyaàŋ gè diɛiŋ wèè naŋ gbìlà yilì gbiŋ e yìwìà e bòliɛ̀ sùà, e yèɛ niŋ fè tùàŋ màŋ nɔnɔŋ gbiŋ èsàɓù è gòngoiŋ nɛ̀ sùà.

²⁶ Nààŋ fɛ̀ì Dayàa naŋ woò lɛ, “E ɗuunyaàŋ yèè e nɛ̀ɛŋ gbiŋ yààìŋ sùà lɛ̀, wo Kanaà nàŋ kànàŋ niìŋ.”

²⁷ Sèè wo nyuùŋ gò hààwè Dayà woum nyààŋ wèè e nɛ̀ŋje, maŋ nyimèè wèè mao ka, jè e yèɛ gbiŋ àŋ jààùm feìŋ nɛ. Ɓɔ̀ mùŋ tùàŋ màŋ nɔnɔŋ gbiŋ èsàɓù è gòngo mɔ̀ɛ̀ sùà.

²⁸ Kɛɛ sèè wo nyùuŋ bà woum woò wààŋ, “E nɛ̀ŋje lɛɛ̀ è yaà e nɛ̀ŋjè saàà,” kɛ̀ ɓɔ̀ùm jè è nɛ̀ŋje bi esàɓù nyùnɔ̀ɔŋ naum yɛi woò wɔ sùà, yèè wèè e gòngo sùà.

²⁹ Tiŋ nàŋ yaà, kɛ̀ e fè è gòngò muàŋ bi, e gòngò nyùnɔ̀ɔŋ bàa le. Kpeiŋ kɛ̀ wo nyùuŋ bà dawè wààŋ, “Wèè kiìŋ e nyaàŋ gè diɛŋ mɛ̀ wèè ka nyɛ̀nɛ̀ŋ keì bà kuwìà ko dìa esàɓù e gòngò nyùuŋ bà sùà?

³⁰ Sèè mìŋ gè wo Dayà ke sɛ̀ wèè e nɛ̀ŋje mɛ̀, wèè kiìŋ wo nyùuŋ bà woàìm maŋ mìè ɓɛ̀ɛ̀pɔ̀ɔ wèè e nɛ̀ŋjeɛ̀ mìŋ naŋ gè Dayà ke sɛ̀ weè niŋ lɛ̀?”

³¹ E ɗewe gbiŋ sùà, e yèɛ gbiŋ mùŋ nyɛnɛŋ lɛ̀, màŋ jènɛ̀ŋ, màŋ tìà nɛ̀, nyɛnɛ̀ŋ niŋ e jòòwo Dayà sùà.

³² Ɓɔ̀ mùŋ nyɛ̀nɛ̀ŋ wèè àŋ Juùù nyaŋ ɔ̀ɔ̀ ànyùùŋ nyaŋ fè àŋ Juùù nyaŋ ɔ̀ɔ̀ wò nyùùŋ gbiŋ kè gbòò ànyuùŋ hààwe nyàŋ sùà wèè aŋ sɛ̀ɛ̀ màŋ jùumù sùà.

³³ Nyɛ̀nɛìŋ nɔŋ màànààŋ mìŋ nyɛnɛŋ lɛ̀, mìŋ fɛɛ wèè ka nyɛ̀nɛ̀ŋ wo nyùùŋ gbiŋ ke jiiuŋ nɛɛ̀ŋ ke fà maŋ nɛ̀ŋ nyɛ̀nɛim màŋ gbiŋ sùà. Miŋ fè gongò wèè è kèì sìàŋ miàŋ biɛ̀, sɔɔ̀ e kèì sìàŋ wèè anyùùŋ nyaŋ gbiŋ e wèè aŋ yɛmɛ̀ e jòèye.