Màʼlə kə Jud tə̀ ghə̂ a Kəzə̀ ghə 1 - Kaa n Kəzə̀ n fəghə mə

Tɔŋɔ zow i Jud

¹ À màʼlə kən tɔ̀ɔ bə mə Jud wən n loʼ waazə Jems nsə wù kəfwaʼ a Yeso Klisto. N màʼlə kən tɔ̀ɔ bə tə̀ ghə̂ ghən adzəm, Zə̀ kən kə loʼnə Bày saa ləghənə, sày naŋa nə̀ ghə doʼo n tənə Yeso Klisto.

² N gɔŋŋə nə̀ Zə̀ kə i khə sî i kwɔɔlə zə n kow ghaa, tə fuu ghaa n buulə zə, tə dii soʼo ghaa n ləghə i wi zə naʼ idzəm.

Ghə̂ ghən ghə khə way Zə̀ kə i koʼo ngoʼ

³ Fə ghuŋ a dzuŋu ghə, nghee mə â tsəm ngii khə kənə zày ni tɔ̀ɔ bə tə ghaa nghee Zə̀ kə i dzəŋi bəghəshiənə saa adzəm tii, mə n koʼ tsu nə̀, i dzɔbənu tə mə ni tɔ̀ɔ bə tə ghaa, n dza bə tə̀ ghaa nə̀ ghaa təmi taw tsu n bəghəm i fə̀ŋ zən Zə̀ kə â fuu naŋanə tə ghə̂ a wi a zow ghə adzəm, ney nuu kəwɔɔ.

⁴ N dza sey n təŋkey, ghə̂ a loʼ ghə n bə tsɔŋ tsəghə nyi fey n fəŋŋə kə ghaa nə̀ ghə khə way Zə̀ kə. Ghə ney kɔʼ ndzuŋ zən Zə̀ kə diinə tə saa fəd naŋa kɔʼ nə̀ a loʼ jii tə ghə ni ghəŋŋə ghəə a laŋŋə ghə. Ghə tuu maʼa soʼo Yeso Klisto wən à loʼ kənə wi Bày saa nsə Mûkəbii saa.

⁵ Nghee ghaa tsəm khə kənə ghəə ghən adzəm, n dza n zəŋŋə bə ghaa nə̀, Mûkəbii Zə̀ kə mâ bəghəshi ghə̂ a wi ghə n naʼ zə Ijip. A n kee bə tə dzə doʼo kəŋə ndownə, tə n ləŋi maʼa tsu ghə̂ ghey ghə â ka bəghəm tə̀ wi.

⁶ N dza i zəŋŋə bə soʼo ghaa nə̀, tsətəndəghə tə Kəzə̀ tey tə â ka doʼo n bùʼ wey Zə̀ kə â naŋanə ghə nə̀ ghə i fwaʼa tii, tyi naŋa taʼa tsu soʼo baa baa luʼu tə ghə tə muulə tə. Zə̀ kə n kùm naŋa tsu ghə nə tətsaʼ, fìi naŋa ndow ghə n luʼu k-a-ləm nə̀ ghə doʼo tən fu tə tsuʼ fey Zə̀ kə i saʼanə mbi tii, fə i bə.

⁷ N jii i mɔʼɔ zə, kə ghaa nə neyzəənə nghee naʼ i Sodom, naʼ i Gomora nsə naʼa tən tə â dzəŋ ngəə bənə ghə, â fuu may ndownə wû i ghə zə ni ghəŋŋə ghəə a laŋŋə ghə nsə dzəə dzəə tə aghəə tə. Ghə loʼ tə a loʼ tsəə tə ghə̂ ghey ghə i fəʼlənə n vəllə wən u nəmmə koʼo tsə way.

⁸ N jii i mɔʼɔ zə, ghə̂ ghən keeli njim, n ghəŋŋənə ghə nə̀ ghə i dzəələ wû i ghə zə. Ghə tuu maʼlə daʼa key Zə̀ kə khənə ghii kə, kpaalə soʼo daʼa wey u khənə kɔʼlə mə idəŋ.

⁹ Wû u Maykel wən tə â loʼnə tow kə tsətəndəghə tə Kəzə̀, nghee tə â zùulənə vən i Mushi zə ghi vəətsəə ghə, tə â ka fòʼlə dzə ni tsəʼlə saʼ n kow wi nə̀ tə tsayyə Kəzə̀. Tə â fəd dza nə̀, “N gɔŋŋə nə̀ Zə̀ kə chɔd wɔ n ghəə zən.”

¹⁰ Ghə̂ ghən a maŋa kpaalə kənə fə kə nə̀ ghə buʼ khə way fə kə tii kə. Ghə maŋa ghəŋŋə ghəə zey ghə moʼlə kɔʼnə ni ghəŋə tə a loʼ nyam tə mbvən tə. Ndzoʼo ghəə ghən ghə ghəŋŋənə loʼ ghəə ghey a ləŋi maʼanə ghə.

¹¹ Ngoʼ loʼ tə ghə! Ghə n ney jìi zey Ken â neynə nghee tə â weynə waazə ə wi. Nghee ghə kəŋə ndownə mbənə nə ukhəə, ghə a zə ə ghəŋŋə kaabə tsənə ghəə ghə tə Balam â zə ghəŋə soʼonə. Ghə taw n tow kə tə Kora â tawnə n tow kə, sey, Zə̀ kə n ləŋi maʼa ghə tə kə â ləŋi maʼanə Kora bòʼ tow kə wi kə taw kə.

¹² Ghə̂ ghən loʼ tə a loʼ udzə, u dzəələnə ghaa abə ghaa ghi ghə dzəŋi zə̂ənə n kuubə tə. Ghə zə̂ə ghi ghaa nə̀ ghə khə way tow kə dədlə kə loʼ kə, ghə sə laalə tsu kənə ghow kə ibwey kə ghə kə. Ghə maŋ loʼ tə a loʼ mbaʼ tə ighow n bikighow, zəŋ maŋa fəəbə kaabə tsənə nə̀ tə way ni fuu koʼ ighow. Ghə loʼ soʼo tə a loʼ kaʼ fən abə nùm tii bənə, tam wə n way ni mə̂ koʼ tsə tii. Ghə loʼ tə a loʼ kàʼ mən ghə dənnə nuu shi kɔʼ bənə a ghəlitsə, mə u loʼ nə̀ mə n fɔɔ zum nuu.

¹³ Ghə loʼ tə a loʼ tuŋutuŋu tə dzuu tə taw tə n nali kə dzuu, nə̀ ghəə a ghə a tow kə dədlə kə dii bə uwû nə tətsəbə. Ghə loʼ tə a loʼ səghəbələ mən n laʼa kaabə tsə idəŋ nə̀ Zə̀ kə n sày naŋa ghə n luʼu key ləm kə loʼnə fu nəŋə tədzəm.

¹⁴ Enɔk wən tə â ghəŋə tsunə waa a waa ghə Adam ghə asəghəmbəghə, mâ dza naŋa zey ghəə ghə kuum ndzoʼo ghə̂ ghən nə̀, “Koʼo na! Mûkəbii i bəghə ghi ndəmə kam tə tsətəndəghə tə wi tə zow tə.

¹⁵ Tə i bəghə ghi ghə ni bə saʼ aghə̂ adzəm, tə chɔd soʼo ghə̂ ghey ghə ngɔɔmə way Zə̀ kə adzəm n ghəə a bəbə ghey ghə ghəŋŋənə. Tə i chɔdlɔ soʼo ghə̂ ghən ghə ngɔɔmə way Zə̀ kə n ghəə a bəbə ghən ghə â dzanə n tow K-a-zə̀.”

¹⁶ Ghə̂ ghən khə kə ni nyuŋŋə ghɔɔmə nsə ni kəŋə chɔd wə n kow ghə̂ a loʼ ghə. Ghə dzûmə ndow kə ghəə a ghə a bəbə ghey fə̀ŋ tə ghə tə ləghənə. Ghə ghaŋŋə kaabə tsə iwû, nəəbə soʼo aghə̂ nə idzuu ni keeli fə key ghə ləghənə.

Jìi zey dzûmə tə Klisto tə khə ni kow fə̀ŋ tii

¹⁷ Waazə ghuŋ a dzuŋu ghə, ghaa moʼlə tsu ghəə ghey ngəd tə Mûkəbii saa Yeso Klisto â dza naŋa zey bənə.

¹⁸ Ghə â dza tə ghaa nə̀, “Abə mbi nə may bənə, ghə̂ a loʼ a nə bəghənu, ghə nə tsoʼo ghaa. Ghə̂ ghən nə dzûmə ndow kə ghəə ghey fə̀ŋ tə ghə tə ləghənə ni ghəŋə.”

¹⁹ À wən loʼ ghə̂ ghey ghə ghəŋŋənə nə̀ ghə̂ ghə i dzawwə doʼlə kaabə tsə. Ndzoʼo ghə̂ ghən naŋa tən kə fə̀ŋ tə ghə n fə u mbi, Zay K-a-zə̀ kə a way soʼo n kow ghə.

²⁰ Abə ghaa a waazə ghuŋ a dzuŋu ghə, ghaa dəm tsu kə ni bəghə kɔʼ bə bəghəm i fə̀ŋ i ghaa. I gɔŋŋə na n daʼa key Zay kə Zow kə fuunə tə ghaa.

²¹ Keeli tsu na nə̀ Zə̀ kə ləghənu ghaa nghee ghaa ləmmənə nə̀ Mûkəbii saa Yeso Klisto kwɔɔlə isî n kow ghaa, tə fuu ghaa n muu zən i nə may way.

²² Ghaa i dii ndow sî i kwɔɔlə zə tə ghə̂ ghən ghə səmənə n bəghəm i fə̀ŋ i ghə.

²³ Ghaa bəghəshi ghə̂ a loʼ ghə ni ney nuu bə ghə nə uvələ. Ghaa dii sî i kwɔɔlə zə tə ghə nə ighə̂mə nə̀ kə ghəə a ghə a bəbə a nə daŋanə saa. Ghaa i nyaŋa daŋŋə ndzə̂ tə ghə tey tə loʼ nə̀ wû i ghə zə n dzəələ maʼa.

Gɔŋŋə zey i guŋ kɔʼnə

²⁴ N gɔŋŋə nə̀ saa adzəm i fuu kɔʼlə mə tə Zə̀ kə. Zə̀ kən kə loʼ ni kwu keeli saa nə̀ kə saa i bwu, nsə nə̀ saa i zow, ngii duʼlə soʼo n sə kə wi.

²⁵ Saa i fuu kɔʼlə mə tə Zə̀ kə, à loʼ kənə wi Zə̀ kə. À loʼ wi bəghəshi ə saa n bam i Yeso Klisto Mûkəbii saa. Nkɔʼlə n dzəm, udaʼa udzəm nsə fɔ̀ɔ wə udəŋ wən udzəm wə â loʼnə tə̀ mbi ni kaʼ, u wən u loʼnə nya nsə u wey wə i bə doʼlənə tə̀ mbi nə bə may, loʼ tə wi. Zə i loʼ kə sey.