Chi dii 8 - Kaa n Kəzə̀ n fəghə mə

Ujim bòʼ mə̀ŋ zey nə ulii usəghəmbəghə

¹ Nghee tə Waa Nji zey zhwey nuu kɔʼ mə̀ŋ zey nə ulii usəghəmbəghə, luʼu tə n fuŋ doʼo tsu mɔŋ idəŋ n kəm kə nəŋə zə izow imɔʼ.

² Mə n daŋŋə koʼ ndow tsətəndəghə tə Kəzə̀ tə tii tə təsəghəmbəghə tə tey n səə Kəzə̀, ghə n fuu ndow ghə n sɔŋ tə təsəghəmbəghə.

³ Tsəndəghə u loʼ wə tə â khə bɔm itsàa ghə kpəʼlə nəŋ zə tii n shi bə təmi bə n səə tsə zey ghə fəələnə maʼlə wə tii nə̀ ghə faalə nə itsaa. Ghə n fuu ndow wi n nəŋ zə ndəm nə tə təmdzəŋi kɔʼ ghi gɔŋŋə tə ghə̂ a Kəzə̀ ghə adzəm, tə fəələ ndow n tsə zey ghə fəələnə maʼlə wə tii nə̀ ghə faalə itsàa i teynə səə kuu kə fɔɔ key.

⁴ Nyoʼ kə inəŋ key n təmdzəŋi kɔʼ ghi gɔŋŋə tə ghə̂ a Kəzə̀ a zow ghə, nuu tsu n wɔɔ kə tsəndəghə Kəzə̀ zey, kɔʼ ndow n sə K-a-zə̀.

⁵ Tsəndəghə zey n ney kuu nyi tsu uvələ tə ney kɔʼnə n tsə zey ghə fəələnə maʼlə wə tii, maʼa tsu ndow n ghəlikətsə. Sey, ghow zə n kaʼ ni kwɔɔ, kəmmə, mwallə, ghəlitsə kə n zey ndow soʼo ni noʼlə nə kədaʼa.

Tsətəndəghə tə Kəzə̀ tə sə isə tən təkaykə tɔŋ sɔŋ tə ghə

⁶ Tsəndəghə tə Kəzə̀ tey təsəghəmbəghə tə khənə sɔŋ tey səghəmbəghə n bayyə tsu wû i ghə ni tɔŋ sɔŋ tə tii tə.

⁷ Tsəndəghə Kəzə̀ u sə isə wə n tɔŋ tsu sɔŋ i wi, ghə n feeli tsu bə ntətay nsə vəllə wə nə̀ kaŋ tə nyɔmmə doʼo tii n kaʼ ni feeli tsu bə a ghəlitsə. Bat kəmɔ̀ʼ nə ubad utəghə fa n ghəlikətsə n fə kɔʼ nə uvələ. Kəbad kəmɔ̀ʼ nə tədzawwə tətəghə tə loʼnə ighələ nə nkaʼ fa n ghəlikətsə n fə kɔʼ, ghii u zəə wə udzəm fa a ghəlitsə n fə kɔʼ soʼo.

⁸ Tsəndəghə Kəzə̀ zey nə ulii ubəghə n tɔŋ shi kɔʼ sɔŋ i wi, ghə n tuŋu maʼa shi tsu bə fə kə loʼ kə, kə â fiilə kaʼ u nii wə nə vəllə u bəʼlə tii n bwu nyi tsu ndow n nali kə dzuu. Bat kəmɔ̀ʼ n nali kə dzuu nə tədzawwə tətəghə tə loʼnə ighələ n fəd doʼo kɔʼ təkâŋ.

⁹ Kəbad kəmɔ̀ʼ nə tədzawwə tətəghə n fə wey u loʼnə utaw n nali kə dzuu n kpu tsu, bad kəmɔʼ nə tədzawwə tətəghə tə loʼnə ighələ nə ufən n saʼa tsu.

¹⁰ Tsəndəghə Kəzə̀ zey nə ulii utəghə n tɔŋ shi kɔʼ sɔŋ i wi. Səghəbələ fə nii fə bəʼlə tə a loʼ təsaalə n bwu tsu bə n bikighow. Fə n bwu tsu n bad kəmɔ̀ʼ nə tədzawwə tətəghə tə loʼnə ighələ nə tədzuu nsə n tɔŋ tə dzuu tən muu n shiənə tii.

¹¹ Zəd i səghəbələ fə tii fə n loʼ, “Fə nyey fə.” Bat kəmɔ̀ʼ nə tədzawwə tətəghə tə loʼnə ighələ nə mmuu n kaʼ ndow ni nyey. Ndəmə ghə̂ ghey ghə a mə̂nə mmuu n tii mə ghə kpuulə n təŋkey mmuu n tii n mâ nyey doʼo bə.

¹² Tsəndəghə Kəzə̀ zey nə ulii ukaykə n tɔŋ tsu sɔŋ wi. Fə kə loʼ kə n zaʼ ndow kəbad kəmɔʼ nə tədzawwə tətəghə tə loʼnə ighələ nə inyi, zə n nəmə doʼo tsu ighələ tə̀ ndzɔŋ nsə nsəghəbələ â nayyə maʼa tsunə daʼa kə ghə kə. Sey, luʼu tə n kəm zow way, ndzɔŋ n baŋa way n bad kəmɔ̀ʼ nə tə dzaw tətəghə n tsə tə nsə n tsuʼu tə.

¹³ Mə n laalə ndow, mə n zow ndow boʼo tûm i zəʼlə kaabə idəŋ idəŋ, zə n dey shi bə n dzə̂ i taw zə nə̀, “Ohooo! Ohooo! Ngoʼ i faalə i bəghənu tə ghə̂ ghən fa a ghəlitsə bòʼ ghəə zən zə i shiənə abə tsətəndəghə tə Kəzə̀ tən tətəghə i tɔŋɔnə sɔŋ tə ghə tə.”