Chi dii 13 - Kaa n Kəzə̀ n fəghə mə

Ujim bòʼ faalə u nyam tə mbvən tə loʼ tə təbəghə

¹ Mə n koʼ ndow faalə kə nyam mbvən i loʼ zə i shiə kɔʼɔ bənə n nali kə dzuu. Zə n khə təndɔŋ ighəm nsə tow wə usəghəmbəghə. Ndɔŋ tə tii tə tədzəm n khə taŋŋə kə fɔɔ. Tow u tii wə udzəm wə a khə izəd i tsayyənə Zə̀ kə.

² Faalə kə nyam mbvən zey mə â koʼnə, n fiilə kəbəghə. Fuu i wi zə n loʼ tə a loʼ nyam i loʼ zə ghə tɔŋŋə nə̀ a loʼ bee. Dzuu i wi zə n loʼ tə a loʼ dzuu i dəmow. Ngəm zey n ney fuu ndow daʼa kə wi, kuu kə fɔɔ kə wi nsə daʼa u wi wən n ndəm tə â khənə ni saʼa ghə̂ ghə a tii tə̀ faalə kə nyam mbvən key.

³ Tow kə wi kəmɔʼ kə n loʼ tə kə mâ keeli fəŋ i faalə zə, fəŋ i tii zə n kee zum tsu. Dzuu zə n zum aghə̂ adzəm fa n ghəlikətsə, sey, ghə n zey ndow ni dzûmə faalə kə nyam mbvən key.

⁴ Aghə̂ adzəm n ngɔɔmə ngəm zey, n təŋkey, zə â fuu ndow daʼa kə wi kə saʼa kə tə̀ faalə kə nyam mbvən i tii zə. Ghə n ngɔɔmə soʼo nyam mbvən ə tii, bəbə nə̀, “À loʼ ndee tə loʼ tə a loʼ faalə kə nyam mbvən kən ə? À loʼ ndee tə loʼ ni zùu ballə faalə kə nyam mbvən kən ə?”

⁵ Ghə n fuu ndow kəbùʼ tə faalə kə nyam mbvən key nə i ghɔɔmə bəəbə idyat i tsayyənə Zə̀ kə. Ghə n fuu ndow soʼo wi n bùʼ kə nə̀ tə saʼ kəŋə ndow nə təndzɔŋɔ nghəm nkaykə nsə ndzɔŋɔ tə təbəghə.

⁶ Nyam mbvən zey n jaʼ kɔʼ idzuu, tsayyə Kəzə̀, lənnə zəd i wi, lənnə luʼu key Zə̀ kə muu fu nsə ghə̂ ghey ghə muu idəŋ.

⁷ Ghə n fuu ndow faalə kə nyam mbvən key n daʼa kə nə̀ tə zùu ballə ghə̂ a Kəzə̀, tə təm zə kɔʼ ghə̂ a Kəzə̀. Ghə fuu soʼo wi n daʼa kə ni saʼa sali ndaw tə tədzəm, aghə̂ adzəm, ghɔɔmə tə tətûm nsə naʼa tə tədzəm.

⁸ Aghə̂ adzəm n mbi ghə i ngɔɔmə faalə kə nyam mbvən i tii zə. Ghə̂ ghən adzəm zəd a ghə â loʼ nə̀ ghə n tɔ̀ɔ n màʼlə kə ghə̂ ghən ghə i keelinə muu zə itsali zə, nə̀ a khə Waa Nji zən ghə a weynə nə ghə n bɔm mbi, i kee ngɔɔmə way nyam tii.

⁹ Wù wən tə khə tuŋŋə wə, tə zow.

¹⁰ Abə wù loʼ nə̀ ghə khə ni kwu fìi naŋa wi n ndaw tsaʼ, ghə i teeli kwɔɔ fìi naŋŋənu wi. Wù wən i loʼ nə̀ ghə khə ni wey wi n kɔb, ghə i teeli weynu wi n kɔb. Ghəə ghən dii bə nə̀ ghə̂ a Kəzə̀ a zow a khə ni kow tsu fə̀ŋ, ghə n təmi taw tsu n bəghəm i fə̀ŋ i ghə n kow Zə̀ kə.

¹¹ Mə n kəm koʼ ndow faalə kə nyam mbvən i loʼ zə i shiə kɔʼɔ bənə a ghəlitsə. Zə n khə təndɔŋ təbəghə tə a loʼ waa njì, kee ghɔɔmə tə a loʼ ngəm.

¹² Zə n bɔɔmə dii soʼo ndzoʼo daʼa u saʼa wey faalə kə nyam mbvən i sə̂ isə zey a khənə udzəm. Zə n tənnə ghə̂ mbi nsə ghə̂ ghən ghə muu tii nə ghə i ngɔɔmə faalə kə nyam mbvən i sə̂ isə zey zə â khənə bəbə bəbə kə zələ kə ifəŋ kə nə̀ kə n zum.

¹³ Zə n ghəŋŋə faalə n nii mə nsə ghəə a zum ghə idzuu ghə, ghəŋə daŋŋə nə vəllə u nuu tsu bə idəŋ, u tsu bə aghəlitsə aghə̂ adzəm.

¹⁴ Faalə mən zə â diinə n ghəŋə nə̀ ghə fuu wi n daʼa kə nə̀ zə i saʼa n tow kə faalə kə nyam mbvən kə sə isə key. Zə n sii ndzəŋ ndəmə aghə̂ a ghəlitsə. Zə n dza tə ghə nə̀ ghə bɔm kɔʼ fəmuʼu tə ghə ni ngɔɔmə, fə fiilənə faalə kə nyam mbvən kə sə isə key ghə â nyîmmənə wi n kɔb, zə n nam loʼ kə utaw.

¹⁵ Ghə n fuu tsu faalə kə nyam mbvən kə loʼ kən n daʼa kə nə̀ kə zay nyi tsu kəzay n muʼu fən ghə bɔm kɔʼnə nə̀ fə fiilə faalə kə nyam kə sə̂ isə key ni ghəŋə nə̀ muʼu fə tii fə i loʼ ni ghɔɔmə, i ghəŋŋə nə̀ ghə wey ghə̂ ghən ghə tuu nə̀ ghə ngɔɔmə way wi.

¹⁶ Tə n tənnə soʼo aghə̂ adzəm, ghə̂ a nii nsə ghə̂ ghən ghə way ghə̂ nii ghə, ghə̂ a kûm ghə nsə ghə̂ a laa ghə, ukɔd nsə ghə̂ ghə way kɔd wə, nə ghə ney tsə̀ə n kpi u ghə u zəə wə nkee n kaʼ usə.

¹⁷ Wù umɔ̀ʼ n tsəm way ni zuu nkee ni fii kəfə nə tə khə way tsə̀ə nə̀ a loʼ zəd i faalə kə nyam mbvən key nkee taŋ ə zəd i wi.

¹⁸ I dii tsu nə wù khə ni keeli utɔb ni zowkeeli ghəə ghən. Wù wey tə khə tɔb wə, tə loʼ ni fwaʼ shi kɔʼ taŋ ghəə zey taŋ ə faalə kə nyam mbvən ə tii diinə, n təŋkey taŋ ə tii tey n zəd i wù loʼ. Taŋ ə tii loʼ 666 (nbɔm ntuubə nsə nghəm mə ntuubə nsə ghii tə tətuubə).