Chi dii 10 - Kaa n Kəzə̀ n fəghə mə

Ujim boʼ tsəndəghə Kəzə̀ ghi nyaŋi fə màʼlə fən ghə nəmi kɔʼɔnə

¹ Sey, mə n kəm koʼ ndow tsəndəghə Kəzə̀ u nii u loʼ wə tə tsuu bənə idəŋ. Ghə n baŋ naŋa wi nə təmbaʼ tə ghə nə baŋanə wù nə təndzə̂ ghi gbookəngəm kə n tow kə wi. Tum usə̂ u wi wə n nyiəllə tə a loʼ inyi. Fuu i wi zə n baŋa tə a loʼ nyəllə wən vəllə u bəʼlənə tii.

² Tə n khə nyaŋi fə kəmàʼlə fə nəmi fə nə̀ kə n chi doʼo n wɔɔ kə wi. Tə n gaʼ ndow fuu kə wi kə zəə kə n nali kə dzuu, gaʼ tsu kə kwɔɔ kə n ghəlikətsə.

³ Tə n tɔŋɔ shi kɔʼ n dzə̀ i taw i loʼ zə tə̀ dəmow nə nəmmənə. Ambə tə tɔŋɔ shi kɔʼnə sey, ghow zə n nuu kə̀m tsu tənəŋə təsəghəmbəghə.

⁴ Ambə ghow i kə̀m tsunə tənəŋə təsəghəmbəghə, mə n ləghə ni tɔ̀ɔ tsu ghəə ghən n zow tsu, kəm fəd zow ndow dzə̀ i loʼ zə i ghɔɔmə bənə idəŋ, nə̀, “Nyi naŋa tsu ghəə ghən ghow zən i kəm tsunə tənəŋə təsəghəmbəghə dzanə. Kə wə nə tɔ̀ɔ naŋŋə soʼonə.”

⁵ Sey, tsəndəghə Kəzə̀ zey mə â koʼ nə̀ i tey n nali kə dzuu nsə n ghəlikətsə n dii kɔʼ ndow wɔ̀ kə wi kə zəə kə idəŋ.

⁶ Tə n kaa tsu n zəd i Zə̀ kən kə loʼnə utaw nəŋə tədzəm, tə wən tə â bɔmnə dəŋ kə, ghəlikətsə, nali kə dzuu nsə fə̂ wey u loʼ tii udzəm. Tsəndəghə zey n dza tsu nə̀, “Ghab kə i kəm shi way!”

⁷ Abə tsəndəghə zey nə ulii usəghəmbəghə i kee tɔŋ tsu sɔŋ i wi zə, ghəə ghey Zə̀ kə â nyi naŋa i daŋŋə ney kəbənə n nghee tə̀ â naʼa naŋanə tə̀ ghə̂ a kəfwaʼ a wi ghə tɔŋŋə tûm tə Kəzə̀.

⁸ Sey, dzə̀ zey mə â buʼ zownə idəŋ n kəm ghɔɔmə bə tə mə, dza tsu nə̀, “Ndow ney kɔʼ màʼlə key kə chi doʼonə n wɔ̀ tsəndəghə wey tə teynə n nali kə dzuu nsə n ghəlikətsə.”

⁹ Mə n ndow n sə kə tsəndəghə Kəzə̀ zey, dza nə̀ tə fuu bə màʼlə fə tii fə tə mə. Tə n dza bə tə mə nə̀, “Ney kɔʼ, wə fə! Kə i tɔbə dzɔbə n dzuu zə tə a loʼ təzow, kə i kee ngbəd nəghə wə.”

¹⁰ Mə n ney kɔʼ màʼlə fə tii fə n wɔɔ kə tsəndəghə Kəzə̀ zey, fə i ndow, fə n tɔbə n dzuu zuŋ tə a loʼ təzow. Ambə n mey ndownə, nəghə wə n fəd kaʼ mə ni mgbəd.

¹¹ Sey, ghə n dza kpiʼi bə tə mə nə̀, “Wə khə ni teeli naʼa tûm Kəzə̀ tə ndəmə aghə̂, tə̀ naʼa tə, ghɔɔmə tə tətûm nsə tə də̀ŋ wə.”