1 Tesalonika 4 - Kaa n Kəzə̀ n fəghə mə

Muu zey i kpiilənə tə̀ Zə̀ kə

¹ Ni ndow n sə kə waazə ghə, ghey mâ ghaa dəŋ kɔʼ bə n jìi zey ghaa khə ni muu tə̀ i kpiilənə tə̀ Zə̀ kə. Mə u ndzəm khə soʼo nə̀ a wey loʼ nghee ghaa muunə tii. Ghey nay fa buʼu bə ghaa n wɔ̀ kə n zəd i Mûkəbii Yeso nə ghaa ndow kə n sə kə n mwam u tii wə.

² Ghaa mgbaŋ khənu ndzoʼo tsə̀ zən ghey fuunə tə̀ ghaa n daʼa kə Yeso Klisto.

³ Zə̀ kə ləghə nə̀ ghaa i zow n muu i ghaa, ghaa tuu maʼa tən ghəə a laŋŋə ghə.

⁴ Kay wù khə ni zoʼlə tsu ni kwu keeli wû u wi sey nə̀ muu i wi zə i zow, tə i khə ngɔɔmə zə.

⁵ Kə ghaa nə̂ muunə ni zhwɔdlɔ kaabə tsə tə̀ a loʼ nghee ghə̂ ghey ghə ka bəghəm tə̀ Zə̀ kə a ghəŋənə.

⁶ Sey î kə̂ wù loʼ nə ghəŋə ghə i bəbə zə tə waazə n ghəə i zən nkee ni tsi ney wey wi. Ghey n ghəə ghən tə̀ ghaa dza, tɔ̀ʼ tiilə tsu tuŋŋə u ghaa nə̀ Zə̀ kə i saʼa bəəbənu ghə̂ ghən ghə ghəŋə ndzoʼo ghəə ghən.

⁷ I loʼ sey n təŋkey, Zə̀ kə ka tɔŋŋə dzə saa tə̀ a loʼ ghə̂ a wi nə̀ saa i ghəŋə ghəə a dzəə ghə. Tə tɔŋŋə saa nə̀ saa i muu muu zey i zownə.

⁸ Sey, abə wù tuu maʼanə tsə̀ zən, tə ka kad tuu maʼa dzə tsə̀ i wù sɔŋtsuʼ zə, tə sey tuu maʼa soʼo Kəzə̀, Zə̀ kən kə fuunə saa n Zay kə Zow kə.

⁹ Ni ghɔɔmə nya kuum ləghə zey ghaa khənə ni khə n wû i ghaa tə̀ a loʼ awaazə, ghey kəm khə dzə way ghəə i loʼ zə ni dza tə̀ ghaa, n təŋkey Zə̀ kə n ghaa dəŋ n jìi zey ghaa khənə ni ləghə tiillə wù zə.

¹⁰ Isəŋə i loʼ nə̀, ghaa ndzəm khənu ləghə zə tə̀ à loʼ dzûmə tə̀ Klisto tey n mbuʼu Masedonya idzəm. Waazə ghə, ghey kee nam buʼu bə kəwɔɔ tə̀ ghaa nə̀ ghaa ndow kə n sə kə n mwam u tii wə.

¹¹ Zoʼlə tsu na ni muu zuŋ kə imuu. Kə ghaa nə̂ kuunə dzuu i ghaa zə n ghəə zey i laalə way ghaa. Ghaa khə ni fwaʼa n wɔ a ghaa ghə ni keeli fə̂ kə zəə kə tə̀ ghey dzanə tə̀ ghaa.

¹² Abə ghaa ghəŋənə sey ghaa i khə ngɔɔmə zə n sə kə ghə̂ ghən ghə ka bəghəm tə̀ Zə̀ kə, Ghaa khə soʼo way ni ləmmə nə̀ wù loʼ mə fuu ghaa n fə̂ kə loʼ kə.

Jìi zey Mûkəbii î bəghə dzəŋŋənə tii

¹³ Waazə ghə, ghey ləghə nə̀ ghaa keeli tsu isəŋə bòʼ dzûmə tə̀ Klisto tən tə kpu dzənə, sey nə̀ kə ghaa i mow, tə a loʼ ghə̂ ghey ghə ləmmə way fə kə n wɔ Zə̀ kə.

¹⁴ N sey dza n təŋkey saa khənu nə Yeso â kpuunu kəm zhəm dzəŋŋə nə ivə. Saa u khə soʼo nə̀ Zə̀ kə i zhim dzəŋə bənu dzûmə tə̀ Klisto tən ghə kpu dzənə nə̀ ivə, ghə i nuu dzəŋi ghi Yeso abə tə i bənə.

¹⁵ Ghəə a ghən ghey dii bənə tə ghaa nyisa ndzəm loʼ ghɔɔmə i Mûkəbii. I loʼ nə, saa ghən saa i loʼnə utaw n tsuʼ fey Mûkəbii i bəghənə, saa i nuu dzə way isə̂ tə ghə̂ ghey ghə kpuu dzənə.

¹⁶ I loʼ sey n təŋkey, nəŋə zey Mûkəbii n wû u wi wə î tsu bə idəŋ, tə î naʼa tsu kəbɔŋ kə taw kə, tsəndəghə ə Kəzə̀ u nii wə i naʼa tsu soʼo kəbɔŋ, sɔŋ i Kəzə̀ zə i fuŋ tsu, sey dzûmə tə Klisto tən tə â kpu dzənə i zhəm dzəŋŋə bə isə̂ nə̀ ivə.

¹⁷ Ghə̂ ghən ghə i loʼ utaw n nəŋə i tii zə i daŋŋə nuu təmdzəŋi ndow ghə nə təmbaʼ, ghə i dzəŋi kpiilə kɔʼ ndow ghi Mûkəbii idəŋ. Sey saa i doʼo tən ndow ghi Mûkəbii.

¹⁸ Nghee tə̀ i loʼnə sey, ghaa khə ni kuu tiilə fə̀ŋ tə ghaa tə n ghɔɔmə zən.