1 Tesalonika 1 - Kaa n Kəzə̀ n fəghə mə

Tɔŋɔ zow i Pɔl

¹ À maʼlə kən tɔ̀ɔ bə mə Pɔl. N tɔ̀ɔ dzəŋi ghi Silas nsə Timoti. Ghey tɔ̀ɔ bə tə̀ dzûmə tə Klisto tey n naʼ i Tesalonika. Ghaa loʼ ghə̂ a Kəzə̀, tə loʼnə Bày saa, loʼ soʼo bày tə̀ Mûkəbii Yeso Klisto. Ghey gɔŋŋə nə̀ Zə̀ kə mə̂ dii ghaa n fə̀ŋ ə wi i dzuŋu zə, tə ghəŋə soʼo nə̀ fə̀ŋ tə ghaa tə i loʼ nə ibuulə.

Bəghəm i fə̀ŋ i ghə̂ a Tesalonika

² Ghey gɔŋŋə zeeli tsə tə̀ ghaa adzəm, fuu kəzɔŋŋə tə̀ Zə̀ kə bòʼ ghaa nəŋə tədzəm.

³ Abə ghey gɔŋŋənə tə̀ Zə̀ kə tə loʼnə Bày saa, ghey n moʼlə bə fwaʼ key ghaa fwaʼanə bòʼ bəghəm i fə̀ŋ i ghaa, nsə ghəə a dzuŋu ghey ghaa ghəŋənə bòʼ ləghə zey ghaa khənə n wû i ghaa, ghaa n təmi taw soʼo bòʼ bəghəm i fə̀ŋ zey ghaa khənə n kow Mûkəbii ə saa Yeso Klisto.

⁴ Waazə ghə, ghey khənu nə̀ Zə̀ kə ngii ləghənu ghaa, tə u sày kɔʼnə ghaa nə̀ ghaa doʼo ghə̂ a wi.

⁵ N ghəə ghən dza n tənkey, ghey ka maŋ naʼa dzə tûm i dzuŋu zən tə̀ ghaa nə idzuu. Ghey naʼa n daʼa K-a-zə̀, daʼa kə Zay kə Zow kə, nsə fə̀ŋ tə ghey tə tədzəm. Ghaa khənu jìi zey ghey â muunə tii n nəŋə zey ghey â loʼnə ghi ghaa. Ghey â muu sey n ndzuŋ ə ghaa.

⁶ Nghee ghaa â buʼu fəʼlə kənu, Zay kə Zow kə n ghəŋə nə̀ ghaa bəghəm tûm i dzuŋu zə nə iduʼlə. Sey, ghaa n bɔɔmə ney ndow ghow kə ibwey kə ghey dii tsu nə̀ ghaa mâ ney soʼo ghow kə ibwey kə Mûkəbii kə.

⁷ À wey loʼ ghə i tii zə ghaa â doʼo bənə tə̀ a loʼ ghə̂ ghey ghə moʼo diinə ghəə ghə tə̀ ghə̂ ghey ghə bəghəmnə Zə̀ kə n naʼa tə Masedonya nsə Akaya.

⁸ Ghaa khənu nə̀ tûm i dzuŋu zə bòʼ Mûkəbii â kaʼ nuu tsu n wɔ ghaa, bəghəm i fə̀ŋ zey ghaa khənə tə̀ Zə̀ kə n ghəŋə nə̀ zɔŋ u ghaa u fuŋ tsəghə ndow n naʼ i Masedonya, Akaya, nsə n badla tə mbi tədzəm. Ghey kəm khə soʼo way ghəə i loʼ zə ni tiilə dza bòʼ bəghəm i fə̀ŋ i ghaa.

⁹ N dza sey n təŋkey, luʼu tədzəm, ghə tiilə dza kaabənu jìi zey ghaa â kpii neynə ghey tii. Ghə a tiillə dza soʼonə nghee tə̀ ghaa tuu maʼanə ni kəm ngɔɔmə muʼu mə tii, kaʼ ndow ni ngɔɔmə Zə̀ kən kə ndzəm loʼnə Zə̀ kə, loʼ soʼo utaw.

¹⁰ Ghə dza kaabə soʼonu nghee ghaa ləmmənə Waa Kəzə̀ wən tə i tsu bə idəŋ, tɔŋŋə Yeso wən Zə̀ kə â zhəm dzəŋŋə bənə nə ivə. À loʼ wi tə bəghəshiənə saa n nə̀ kə Zə̀ kə nə chɔdlɔnə saa.