ZEKARIA 8 - OTSAO BAIBEL (BSI)

Jerusalem Tamchatle Zingle Achat angkya Jowanpa e Tsaosax

¹ Khüthak Jowanpae Zekariah ang ija kaxho fa:

² “Kue ikhama tüikya khünaknu to mongkünkyae Jerusalem tüle sungle. Hwom tokya mongkün khoma ku ang hwom zanpabu füi mongtsik ang tomle.

³ Ku a Jerusalem, ku otsao tingnu to chatüi, ilaxle ikhama ngoüi. Ija tingnu a tuita mongong tüikya tingnu changpule fuale wünüi, ilaxle Jowanpa Khüthak Zang haxnuang otsao haxnu le nyaküi.

⁴ Mixnu mixpabu, müimamale azukoxle aham pongma ze kiathox laxlaxle ahamkyabu, tamchatle tingtui panja to thungle tüiüi.

⁵ Tingjang lomnubu a naosombu azap-abaole ngokya awangle tüiüi.

⁶ “Athax danle toxdaokya jat-libu hanpakma ija chitsuak angkya fang ang achangle tüikoxlax, ikoxlechu ku zongto ija chitsuak angkya oli münchang.

⁷ Hwom kople paothomkya nok tokya kue ku khünakbu kue sünle kop angkya changle.

⁸ Jerusalem ma ngo angkya hanpakma kue hwom handün hannop tokya chatle apüi angkya changle. Hwom a ku khünaknu ang ilaxle ku a hwom Zang ang ngoüi. Kue hwom thakma mongong-chalom hia sukya kaxfün füi apün-awangle changüi.

⁹ “Mong chonglax! Ku Zangshwom-Hom azünle zing angkya homting thopong ma wüi ajebu makhange atat ang kopkya kaxkax wüi athax hünzome atale ngopu.

¹⁰ Ija thoto owaechu khünak chichangba müi, ibu shakle chang ang chithokya, ilaxle zanpabu chak tokya owachu azangle chitüikya. Kue khünaknu tata zan to kale tüi ang tomkya.

¹¹ Ikoxle athax kue ija jat-li khama ota toxle tüikya khünakbu to mamale hupu.

¹² Hwome mongsom ma manzaile changüi. Hwom zubu ma grep ziaküi, haxtoke saxziak alaiüi, ilaxle zangwat ti okhonguile tüiüi. Ota toxle tüikya kujat kuli khünakbu ang kue ibu mohiman koxüi.

¹³ Judah hia Israel khünaknu! Amipongma mixnokbue ‘Judah hia Israel nok hato nguikya thuakzom hünzom hatochu naxngui’ le akaxkya füi tata to thuakzomle bangpu. Ikoxle kue hünzom khosünüi, ifüima ibu mixnokbue tata hama thüiüi, ‘Judah hia Israel nok hato nguikya mohiman hünzom hatochu naxnguikox!’ Idaile mongchonglax ilaxle taxza.”

¹⁴ Jowanpa Khüthak Zang-e thüile: “Chemtue hünzom pupa hwome ku ang mong atsikkya hex, kue hwom hanpakma thama achwon ilaxle ku mong chialüix, ikoxle ku mwotthobu mokle wüi paopu.

¹⁵ Ikoxle athax kue Jerusalem hia Judah angkya khünakbu to mohiman angkya mwottho zingle ngopu. Idaile hünzom taxza.

¹⁶ Ibibi a hünzome mok angkya mwotbu changpu: Tata füi kaxtsing zangwünle changlax. Khwalo ma--ojae mongsom apüiüihex, iningkya sukya kaxfün fakox.

¹⁷ Tata zongto oma ang achang angkya mwot taxmok. Tsaotsütle othai mikngün kaxkhi taxfa. Atsekya, chisukya hia tata zan to kale changkya thua ku anule.”

¹⁸ Jowanpa Khüthak Zang-e ija kaxho Zekariah ang kox:

¹⁹ “Lyetnu kua ali, aga, anüt hia bün ma süt chisax ti chilingle atsaole changkya a Judah ma ngokya khünaknu hanpakma pwonla dongkya pangpwonbu ang changüi. Hünzome kaxtsing zangwün hia tumüi to mongkün angkya changpu.”

²⁰ Jowanpa Khüthak Zang-e thüile: “Tingnu tingnubu tokhange khünaknu Jerusalem to ngui angkya hanpak hüile ngole.

²¹ Idu tingnu tuita angkyae ata tingnu angkyabu füi akaxüi, ‘Kwome pi Jowanpa Khüthak Zang to shwom ang thüipu tamchu chix mohiman bama zangjop ang thüipu. Oman kwom füito!’

²² Müimamale Jowanpa Khüthak Zang to shwom angkya tamchu chix mohiman bama zangjop angkya hanpakma khünaknubu tamchu tsak-zong füi tüikya jat-libu Jerusalem to ngui angkya changle.

²³ Hetuk ma mixnok sünbün Judah khünak tuita hato hüilaxle thüiüi, ‘Kwome chuwüi hünzom füi tomle oshuk-oza tomhanle changse tsupu, chemthüikoxle Zang hünzom füi womle tüikya kwome atatle hüidaoa.’”