ZEKARIA 4 - OTSAO BAIBEL (BSI)

Wüntik Lotsap bama Ngünkya Mikngün-ohün

¹ Ku füi kaxkaxle ngokya kaxtaimix chatle ngui ilaxle jiple ngokya azwot pupu le ku azwot.

² Chixe atüi: “Nange chem ngünpu?” Kue lan: “Hun wüntik lotsap tuita ngünle. Okho ma a münga je angkya hanpakma khup tuita ngünle. Lotsap dingma wüntik anüt tüile, tuipong to okia anüt dan angkya onui füi tüile.

³ Lotsap zui ma olip pün anyi atale tüile.”

⁴ Ifüima kue kaxtaimix ma atüi: “Alixachong, ibu a chem hanpak changpuix?”

⁵ Chixe ku ang thüi: “Nange ija münawan hia?” Kue lan: “Alixachong, kue münawanhex.”

¹⁰ Kaxtaimix-e ku ang thüi: “Wüntik anüt a, zangfang pangnu khato hule ngokya Jowanpa mik anüt changpu.”

¹¹ “Ifüima kue chix ma atüi: Lotsap atale olip pün anyi tüikya a chem hanpak?

¹² Üntoxle olip münga jekya hun shat-jan anyi zui ma tüikya olip pünkang anyi a chem hanpak?”

¹³ Chixe ku ma atüi: “Nange ija müntsing hia?” Kue lan: “Alixachong kue münawanhex.”

¹⁴ Ifüima chixe akax: “Ija a, pangnu chaxwannu Jowanpa, chix thothale chang angkya hanpakma Zang-e zünle tamchu kamle kopkya mixsün anyi changle.”

Zerubbabel füikya Zang Kaxtsao

⁶ Ifüima kaxtaimixe ku ang, Zerubbabel hato Jowanpa kaxho ija kox angkya akax: “Janzüi makhange münchang, tsak-zong makhange münchang, ikoxle ku Chasa makhange tix, le Jowanpa Khüthak Zang-e thüile.

⁷ Ipong chongkya haxnu ningkya lombax-saibangkyabu nang tuntho angkya paole samüi. Nange Zangshwom-Hom azünle zaiüi. Nange akiakya long onui ma danle tsuakkya füi tomle khünaknue, ‘Müihule, müihule, le akhongüi!’”

⁸ Mama kaxho Jowanpa tokhange ku hato hüi.

⁹ Chixe thüi: “Zerubbabel-e Zangshwom-Hom thongnu küidaoa, ilaxle chixe homzai ashuk angkya changle. Chemtue ija ile changle hüipuix, izuma ku khünakbue nang a hwom hato kue tsanle ahüikya changpule awanlaxüi.

^10a Hwome hidaolüwüi tsuakle hüitsuakkya khoma hwom ang monghix. Ikoxle Zerubbabel-e chizakle Zangshwom-Hom zaikya hwome ngünle laxüi, ilaxle hwom ang mongmüiüi.”